သူဢမ်ႇၵေႃႉလဵၵ်ႉယဝ်ႉ

ၼႆႉတႄႉၵေႃႈပွင်ႇဝႃႈ သူၵေႃႉယႂ်ႇယဝ်ႉ ၼႆၼၼ်ႉယိုင် ဢၼ်ၶႂ်ႈလၢတ်ႈတေႉၵေႃႈၶတ်းၸႂ်ႁႂ်ႈထိင်းလႆႈၸႂ်ၸဝ်ႈၵဝ်ႇလႄႈ။

ပေၸႂ်ၼႅတ်ႈၸႂ်ဝႆးသေတႅပ်းတတ်းငၢႆႈငၢႆႈၵႂႃႇ မိူၼ်မိူဝ်ႈၽွင်းတိုၵ်ႉၵေႃႉလဵၵ်ႉၼၼ်ႉယဝ်ႉ။

သိမ်းသိူင်ႇဝႆႉၸႂ် လေႃးၽ၊ တေႃးသ ၸဝ်ႈၵဝ်ႇသေ ၶတ်းၸႂ်ထိင်းပႃး ၸႂ်မေႃးႁ ဢၼ်သုမ်ႇၵုမ်ႈငုမ်းတၼ်လူင်ၼၼ်ႉပႃးလႃႈ လွင်ႈလႂ်ၵေႃႈ ၵွပ်ႈဢမ်ႇမၼ်ႈဢမ်ႇၵိုမ်းလႄႈ ၵၢၼ်ဢၼ်လႂ်ဢမ်ႇဝႃႈ ႁႂ်ႈသူမေႃဝူၼ်ႉသွၼ်ႇၼပ်ႉသၢင်ႈသေၸင်ႇႁဵတ်းၵႂႃႇတႃႉ။

ၵွပ်ႈၸႂ်ႉတိုဝ်းၶေႃႈၵႂၢမ်းဢၼ်ဝႃႈ "ၵဝ်" ၼႆသေ ဢဝ်ၸႂ် ဢတ်ႉတ ထူဝ်းၼႃႈမႃးတႃႇသေႇလႄႈ ၵမ်းၵမ်းလႆႈႁူပ်ႉထူပ်းမႃး လွင်ႈၽိတ်းပိူင်ႈလၢႆၵမ်းယူႇယဝ်ႉ ဢဝ်ၼႆႉၵႂႃႇ ဢဝ်လွင်ႈၸႂ်ႁူႉတူဝ်ၵဝ်ႇသေထိင်းမၼ်းၵႂႃႇတူၺ်းၶိုၼ်းလႄႈ။

ၸိူဝ်းၼႆႉၵေႃႈ ယွၼ်ႉပိူဝ်ႈၶႂ်ႈလၢတ်ႈ လွင်ႇတႃႇထိင်းၸႂ်တေႃးသၵွႆးလႄႈ ပၼ်ၶၢဝ်းယၢမ်းတူၺ်းၶိုၼ်းၸႂ်တေႃးသၸဝ်ႈၵဝ်ႇၼၼ်ႉသေ ထိင်းမၼ်းၵႂႃႇလႄႈ လွင်ႈလႂ်ဢမ်ႇဝႃႈ ပေႃးပဵၼ်ယဝ်ႉႁူႉတေလူႉၵွႆး ပေႃးမေႃႁူႉဝႆႉၸိူင်ႉၼႆၸိုင် တေမေႃႁၢၼ်ႉၸႂ်ၸွမ်းၵူႈလွင်ႈတီႈသူထူပ်းသေ သိူဝ်းၸႂ်ၸွမ်းယူႇဢိူဝ်ႈ။

ၶေႃႈၵႂၢမ်းမၢင်ၶေႃႈၼႆႉ မၼ်းမၢၼ်ႇမႅၼ်ႈယူႇၼႆသေတႃႉၵေႃႈ သင်ႁူႉဝႃႈမၼ်းဢမ်ႇမီးၽွၼ်းလီၼႆၸိုင် ဢမ်ႇလၢတ်ႈသင်ၼႆႉယင်း တ​ေ မီးၼမ်ႉတွၼ်းၵွၼ်ႇယဝ်ႉ။

ၼင်ႇႁိုဝ်ၼႂ်းဝၼ်းသိၼ်လိူၼ်သိပ်းလပ်းၼႆႉ ပေႃးတေထိင်းၸႂ်ၸဝ်ႈၵဝ်ႇလႆႈၼႆလႄႈ လိူၵ်ႈလိၵ်ႈႁူဝ်ၼႆႉၽၢၵ်ႇပၼ်ယူႇ ႁႂ်ႈတူဝ်ၸႂ်သွင်ပိူင် မီးမင်ႇၵလႃႇၼႂ်းဝၼ်းၼႆႉသေၵမ်း။