လွင်ႈပွင်ႇၸႂ်

သင်ဢမ်ႇမီး လွင်ႈပွင်ႇၸႂ်ၼိူဝ်ၵၼ်ယဝ်ႉၸိုင်ၵူၼ်းတီႈၸမ်ၸႂ်ႁဝ်းၼၼ်ႉၵေႃႈ တေႁၢင်ႇၵႆယၢၼ်ၵၼ်ၵႂႃႇပဵၼ်ပိူၼ်ႈဢမ်ႇႁၢင်ႉယူႇယဝ်ႉ။

ၶေႃႈဢၼ်ဝႃႈ လွင်ႈပွင်ႇၸႂ် ၼႆႉ ပဵၼ်ဢၼ်မီးၵႃႈၶၼ်လမ်လွင်ႈတႄႉတႄႉဢၼ်ၼိုင်ႈ သင်လႆႈသုမ်း လွင်ႈပွင်ႇၸႂ် ဢူၺ်းၵေႃႉတီႈၸမ်ၸႂ်ၵေႃႈတေၵၢင်းယၢၼ်ၵၼ်ၵႂႃႇ။ သင်မီးလွင်ႈပွင်ႇၸႂ်ၸိုင် ဢူၺ်းၵေႃႉတီႈပႆမိုတ်ႈ ဢူၺ်းၵေႃႉတီႈယၢမ်ႈၽိတ်းမႅၼ်ႈၸိူဝ်းၵေႃႈ ၸၢင်ႈပဵၼ်သဵၼ်ႈတၢင်း ၸုင်ၸၼ်ၶဝ်ႈႁႃၸူးၵၼ်မႃးလႆႈထႅင်ႈၵွၼ်ႇ သင်ဝႃႈပွင်ႇၸႂ်ပၼ်ၵၼ်လႆႈယူႇ။

တၢင်းႁၵ်ႉ

ၼႆႉၵေႃႈ လွင်ႈပွင်ႇၸႂ် ဢၼ်ဝႃႈၼႆႉ လမ်ႇလွင်ႈမီးၵႃႈၶၼ်တေႉတေႉ သင်ဢမ်ႇၽိူမ်ႉထႅမ်ပၼ်  ၼိူဝ်ၵၼ်လႆႈၼႆၸိုင် ဝၼ်းၼိူင်ႈဢမ်ႇဝၼ်းၼိူင်ႈ တိုၼ်းၸၢင်ႈသုမ်း ၵူၼ်ႇပင်းလူႉလဵဝ်လွင်ႈယုမ်ႇယမ်ႁၵ်ႉပႅင်းၵၼ်ၼၼ်ႉဢမ်ႇႁၢင်ႉယဝ်ႉ။    သင်ဝႃႈမီးလွင်ႈပွင်ႇၸႂ်ၼိူဝ်ၵၼ်ၸိုင် ဢမ်ႇပႃးတၢင်းႁၵ်ႉသေတႃႉၵေႃႈ ၸၢင်ႈၵိူတ်ႇဢွၵ်ႇမႃးလွင်ႈၸႂ်ၸပ်းပႅၼ်း မႅတ်ႉတႃႇၼၼ်ႉၵွၼ်ႇဢိူဝ်ႈ။

ၵိုင်ႇယူႇႁိုဝ်

ၵႆႉလေႇငိၼ်းဝႃႈ ၵူၼ်းမၢင်ၸိူဝ်းၼႆႉ ဢမ်ႇၵိုင်ႇတၢၼ်ႇ တၢင်းလွင်ႈပွင်ႇၸႂ် ၼႆယူႇ ၵိုင်ႇဢမ်ႇၵိုင်ႇၵေႃႈယႃႇၶဝ်သေလႄႈ ပဵၼ်လွင်ႈၶဝ် ၵူၺ်းၵႃႈ ပုၼ်ႈၸဝ်ႈၵဝ်ႇ တိုၼ်းထုၵ်ႇလီပွင်ႇၸႂ်ပၼ်ၶဝ်ယူႇ ၼႆႉပဵၼ်ၽိင်ႈယၢမ်ႈၵူၼ်းၼမ်ႉၸႂ်လီယဝ်ႉ ဢမ်ႇယွမ်းဢဝ်တၢင်းယၢမ်ႈလူႉၵွပ်ႈ ပိူၼ်ႈတီႈဢမ်ႇမီးလွင်ႈတွပ်ႇတႅၼ်းၶိုၼ်းၼၼ်ႉ ။ ၶဝ်ဢမ်ႇပွင်ႇၸႂ်ပၼ်ႁဝ်းလႆႈၵေႃႈ ၼၼ်ႉပဵၼ်လွင်ႈၶဝ်ၵူၺ်း မၢတ်ႈမၢႆဝႆႉပၼ်ၶဝ်ၵူၺ်းလႄႈ။

ၵေႃႉလီႁၵ်ႉ

ၵူၼ်းၼႂ်းၶူင်းၵၢင်လူင်ၼႆႉ ဢၼ်လီႁၵ်ႉလိူဝ်သေပိူၼ်ႈၼၼ်ႉ ဢမ်ႇၸိုဝ်ႈၵူၼ်းႁၢင်ႈလီၽၢင်ငၢမ်းၵူၺ်း ပဵၼ်ၵေႃႉဢၼ် မေႃမီးလွင်ႈပွင်ႇၸႂ်ၼိူဝ်ပိူၼ်ႈၼၼ်ႉယဝ်ႉ လီႁၵ်ႉလိူဝ်သေပိူၼ်ႈ  ယွၼ်ႉလွင်ႈမၢၼ်ႇမႅၼ်ႈ ထုၵ်ႇၸႂ်ၵူၼ်းႁဝ်းၼႆႉ ပဵၼ်လွင်ႈမေႃဝူၼ်ႉႁၼ်လွင်ႈလီပွႆႇဝၢင်းပၼ်ၵၼ်ၼၼ်ႉ ပဵၼ်ဢၼ်ၵူၼ်းႁဝ်းလႆႈၸႂ်ႁၵ်ႉႁွမ်လိူဝ်သေပိူၼ်ႈၼၼ်ႉယဝ်ႉ။

ႁႅင်းဢီးႁႂ်ႈထိုင်တီႈ

လွင်ႈပွင်ႇၸႂ် ၸၼ်ႉသုင် ၸၼ်ႉတႅမ်ႇ ဢၼ်ဝႃႈၼၼ်ႉ ၵဵဝ်ႇလူၺ်ႈ လွင်ႈဝႆႉဝၢင်းၼႂ်းၸႂ် လိုၵ်ႉလမ်ႇယႂ်ႇ ဢမ်ႇၼၼ် ဝႆႉတိုၼ်ႈ ၊ လူၺ်ႈလွင်ႈဝူၼ်ႉထတ်းသၢင် ၼႂ်းၸူဝ်ႈပၢၼ်တူဝ်ၵဝ်ႇ ၸၵႂႃႇၸိူဝ်းၼၼ်ႉယဝ်ႉ တေပဵၼ်ႁႅင်းဢီးထႅမ်သၢင်ႈပၼ်ႁႂ်ႈထိုင်တီႈလႆႈ။

လမ်ႇလွင်ႈဝႆႉ

လွင်ႈပွင်ႇၸႂ်ၼႆႉ တေႇၸဵမ်  ၵေႃႉတေႃႇၵေႃႉ ဢမ်ႇၼၼ်  ၸူႉႁၵ်ႉၵၼ်၊ ၽူဝ်မေးၵၼ် ၊ၸုမ်းလဵဝ်ၵၼ်၊  ၵႄႈၵၢင်ဢူၺ်းၵေႃႉပီႈၼွင်ႉ ဢမ်ႇဝႃႈ ပဵၼ်ဢၼ်လမ်ႇလွင်ႈလူင်ထိသုတ်းယဝ်ႉ။ 

ပေႃးမီးလွင်ႈပွင်ႇၸႂ်ၵွၼ်ႇ ၸင်ႇတေမေႃဝူၼ်ႉ သွၼ်ႇပိူၼ်ႈသွၼ်ႇႁဝ်း ၽႃႇၵၢင်ဝၢင်းၶိုင်ႈၵၼ်  ၵေႃႉၼိူင်ႈလႄႈၵေႃႉၼိူင်ႈ သင်ဝႃႈမီးလွင်ႈ သုၵ်ႉယုင်ႈၵၼ်မႃးၼႆ ၸၢင်ႈတေပဵၼ်ဢၼ်ၵမ်ႉထႅမ်သၢင်ႈပၼ်ႁႂ်ႈလီလႆႈၵွၼ်ႇဢိူဝ်ႈ။

တူဝ်တႅၵ်ႈၼူၵ်ႉ

လွင်ႈပွင်ႇၸႂ် ဢၼ်ဝႃႈၼႆႉ မၼ်းမိူၼ်ၼင်ႇၼူၵ်ႉဢွၼ်ႇတူဝ်ၼိုင်ႈယဝ်ႉ ပိၵ်ႉသမ်ႉဝႃႈပိၵ်ႇမၼ်းၽၢႆႇၼိုင်ႈ ၶတ်းႁႅင်းတၢၼ်ႇႁိုဝ်ၵေႃႈယဝ်ႉ ၵူၺ်းသင်ပဵၵ်ႇတႃႇၽၢၵ်ႇၼိုင်ႈသမ်ႉ ႁၢၵ်းဝႆႉယူႇပေႃးၼႆၸိုင် ၶၢဝ်းတၢင်း ဢၼ်တေလႆႈသိုပ်ႇၵႂႃႇၼႆၼၼ်ႉ ႁိုဝ်တေထိုင်တီႈယိူင်းဢၢၼ်းၶႂ်ႈႁွတ်ႈလႆႈယဝ်ႉ။

ၶူင်းၵၢင်လူင်ၼႆႉ

မိူၼ်ၼင်ႇ သၢႆၸိူၵ်ႈႁိူဝ်းဢၼ်ၶၢတ်ႇၵႂႃႇ လွင်ႈၸႂ်ၸပ်းပႅၼ်းဢၼ်တဵတ်ႇယဵၼ်ႁၢႆလၢႆၵႂႃႇၸိူဝ်းၼၼ်ႉ ပဵၼ်ယွၼ်ႉၵွပ်ႈ လွင်ႈမေႃပွင်ႇၸႂ်ၼိူဝ်ၵၼ် ၵူၼ်ႇပင်းလူႉလႅဝ်သေ ပွႆႇၽႃႈပႅတ်ႈၵႂႃႇၼၼ်ႉယဝ်ႉ။

 ၵွပ်ႈပိူဝ်ႈၼႆလႄႈ ၶႂ်ႈတိုၵ်းယွၼ်းထိုင်ၵေႃႉလူလိၵ်ႈၶဝ်တၢင်းလၢႆဝႃႈ ႁႂ်ႈဢွၼ်ၵၼ်သႂ်ႇၸႂ် ဝႆႉၼၵ်းၼႃၼိူဝ်ၶေႃႈၵႂၢမ်း (လွင်ႈပွင်ႇၸႂ်)ၼႆ သၢမ်ၶေႃႈၼႆႉ သေၵမ်း မၼ်းတေၸုင်ၸၼ် ႁႂ်ႈသူၶဝ်မီးတၢင်းသိူဝ်းႁူမ်ႈၵၼ်မႃးၶိုၼ်ႈလႆႈတင်းၼမ်ယူႇၼႆသေ။

Credit writer