ထႅမ်ႁႅင်းပၢႆးဝူၼ်ႉ လူလိၵ်ႈ၊တႅမ်ႈလိၵ်ႈလႄႈ

 

        

        ၵၢၼ်လူလိၵ်ႈၼႆႉ ပဵၼ်ၵၢၼ်ဢၼ်ၵူၼ်းၼုမ်ႇၶဝ်တေလႆႈဝႆႉၼမ်ႉၼၵ်းမၼ်းပိူင်ၼိုင်ႈၵေႃႈၸႂ်ႈယဝ်ႉ။ယွၼ်ႉပိူဝ်ႈ လိၵ်ႈဢၼ်ဝႃႈၼႆႉ မၼ်းပဵၼ်ပိုၼ်ႉထၢၼ်တႃႇဝၢၼ်ႈမိူင်းၼိုင်ႈမိူင်းလႄႈတႃႇၵူၼ်းၶိူဝ်းၼိုင်ႈၶိူဝ်းတေၸုၵ်းသၢင်ႈသဝ်းလႆႈၵႂႃႇႁိုင်တီႈၼႂ်းၵၢမ်ႇၾႃႇလူၵ်ႈလုမ်ႈၾႃႉလူင်ၼႆႉယဝ်ႉ။

လိၵ်းလၢႆးၼႆႉၼႄလႆႈႁႂ်ႈၵူၼ်းတင်းၼမ်ႁူႉလႆႈဝႃႈ ၶိူဝ်းလႂ်ဢၼ်ၸဝ်ႉသေပိူၼ်ႈလႄႈၶိူဝ်းလႂ်ပဵၼ်ၶူဝ်းဢၼ် မီးပိုၼ်းမၢၼ်ႇမႅၼ်ႈၼႆၼၼ်ႉယဝ်ႉ။

သင်ဝႃႈၼႂ်းဝၢၼ်ႈမိူင်းၼိုႃင်ႈမိူင်းလႄႈၼႂ်းၶူဝ်းၼိုင်ႈၶိူဝ်းၼၼ်ႉ ဢမ်ႇမီးလိၵ်ႈလၢႆးၶိူဝ်းတူဝ်ၵဝ်ႇႁင်းၶေႃၼႆ ပႆႇၸၢင်ႈတေၶိုၼ်ႈယႂ်ႇလႆႈ။

မီးလိၵ်ႈလၢႆးႁင်းၶေႃယူႇယဝ်ႉၵေႃႈသင်ႁဝ်းဢမ်ႇၽွမ်ႉၵၼ်လူဢမ်ႇၽွမ်ႉၵၼ်တႅမ်ႈ ဢမ်ႇၽွမ်ႉၵၼ်ပူၵ်းပွင်ၸုင်ဢဝ်ႁႂ်ႈၵူၼ်းတင်းၼမ် ပေႃးလႆႈႁူႉၸၵ်းၸွမ်းပေႃးၼႆ လွင်ႈၶိုၼ်ႈယႂ်ႇဢၼ်ဝႃႈၼၼ်ႉၵေႃႈ တေဢမ်ႇႁွတ်ႈမႃးလႆႈသေပွၵ်ႈ။

ၶေႃႈၵႂၢမ်းမီးဝႆႉဝႃႈ"လိၵ်ႈၼႆႉပဵၼ်သေႃးမိူင်းဢဝ်ၶိူဝ်းႁိူင်းၶိုၼ်ႈသၢင်ႉ" လိၵ်ႈၼႆႉပဵၼ်သေႃးၵၢၼ်ဢွၼ်ႁတ်းႁၢၼ်ၶိုၼ်ႈယႂ်ႇ"ၼႆလႄႈ ၵွပ်ႈၼၼ်တႃႇဝၢၼ်ႈမိူင်းႁဝ်းပေႃးတေလႆႈၶိုၼ်ႈယႂ်ႇလႄႈၵူၼ်းၶိူဝ်းႁဝ်းပေႃးတေလႆႈမီးၸႂ်ႁတ်းႁၢၼ်တေႃႇသူႈၵႂႃႇၼၼ်ႉ ႁဝ်းထုၵ်ႇလီလူလိၵ်ႈၼမ်"လႄႈတႅမ်ႈလိၵ်ႈၼမ်"ယဝ်ႉ။

ပေႃးမႃးထတ်းသၢင်ႈတူၺ်းၼႆ ၼႂ်းၶိူဝ်းတႆးႁဝ်းၼႆႉ ၵၢၼ်လူလိၵ်ႈဢၼ်ဝႃႈၼၼ်ႉ ၶဝ်ဢမ်ႇပေႃးသူၼ်ၸႂ်သေဝႆႉၼမ်ႉၼၵ်းပိူင်ယႂ်ႇမၼ်းလႄႈၽူႈတႅမ်ႈလိၵ်ႈၶဝ်မၢင်ၸိူဝ်းပေႃးလႆႈၵိုတ်းလိုဝ်ႈပၢႆၵမ်ၵႂႃႇၵေႃႈမီးယဝ်ႉ။

ၵူၼ်းၼုမ်ႇတေႇၸဵမ်ၵူၼ်းထဝ်ႈ ၼႂ်းၶိူဝ်းတႆးႁဝ်းၼႆႉ ႁႃႈပုၼ်ႈၼႆႉမီးသွင်ပုၼ်ႈၵူၺ်းဢၼ်လူဢၢၼ်ႇလိၵ်ႈ ယွၼ်ႉၼၼ်လႄႈဝၢၼ်ႈမိူင်းႁဝ်းၵေႃႈဢမ်ႇၶိုၼ်ႈယႂ်ႇသေ တူၵ်းတႅမ်ႇဝႆႉဢမ်ႇၵႃး တႃႇတေလွတ်ႈဢွၵ်ႇပူၼ်ႉတႂ်ႈမိုဝ်းၶဵၼ်ၼၼ်ႉ ပႆႇၸၢင်ႈႁၼ်သဵၼ်ႈတၢင်းမၼ်းလႆႈ။

ၵၢၼ်လူလိၵ်ႈၵၢၼ်တႅမ်ႈလိၵ်ႈၼႆႉ မၼ်းပဵၼ်ၵၢၼ်ဢၼ်တေႁဵတ်ႈႁႂ်ႈႁဝ်းမီးတၢင်းႁူႉၼမ်လႄႈတူဝ်ထူပ်းၼမ် လွင်ႈဢၼ်ႁဝ်းဢမ်ႇႁူႉၼၼ်ႉ တေၶႂ်ႈႁူႉမႃး လွင်ႈဢၼ်ႁဝ်းဢမ်ႇယၢမ်ႈႁဵတ်းၼၼ်ႉ တေၶႂ်ႈႁဵတ်းမႃး ပေႃးၸိူင်ႉၼၼ်ၵွၼ်ႇ ၸၢတ်ႈပၢၼ် လႄႈ ဝၢၼ်ႈမိူင်းႁဝ်းၸင်ႇတေၶိုၼ်ႈယႂ်ႇၵႂႃႇလႆႈ။

ၵူၼ်းၼုမ်ႇဝၼ်းမိူဝ်ႈၼႆႉတေပဵၼ်ၽူႈဢွၼ်ႁူဝ်မူဝ်းၼႃႈၼႆလႄႈလွင်ႈလူလိၵ်ႈတႅမ်ႈလိၵ်ႈၼၼ်ႉၵေႃႈၶႂ်ႈႁႂ်ႈ ၵူၼ်းၼုမ်ႇႁဝ်းၶဝ် ဝႆႉၼမ်ႉၼၵ်းပိူင်ယႂ်ႇမၼ်းသုၼ်ႇၼိုင်ႈၼႂ်းၸၢတ်ႈပၢၼ်ယဝ်ႉ။

ယွၼ်ႉသင်လႃႇ ပေႃးဝႃႈၼႆ သင်ဝႃႈၵူၼ်းၼုမ်ႇဝၼ်း မိူဝ်ႈၼႆႉ ဢမ်ႇလူလိၵ်ႈ၊ဢမ်ႇတႅမ်ႈလိၵ်ႈ ပေႃးၼႆ တႃႇတေပဵၼ်လႆႈၽူႈဢွၼ်ႁူဝ်လီ တႃႇဝၢၼ်ႈမိူင်းဝၼ်းမိူဝ်းၼႃႈၼၼ်ႉယၢပ်ႇတေႉ။

သင်ဝႃႈၽူႈဢွၼ်ႁူဝ်ဝၢၼ်ႈမိူင်းလႂ်မိူင်းၼိုင်ႈ ဢမ်ႇတိုၵ်းသူၼ်းႁႂ်ႈၵူၼ်းၶိူဝ်းဝၢၼ်ႈမိူင်းမၼ်းလူလိၵ်ႈဢၢၼ်ႇလိၵ်ႈပေႃးၼႆၸိုင် တႃႇဝၢၼ်ႈမိူင်းၼိုင်ႈမိူင်း တေၵိူတ်ႇဢွၵ်ႇမႃး ၵူၼ်းမီးတၢင်းၵတ်ႉၶႅၼ်ႇလႄႈၽူႈမီးပၺ်ႇၺႃႇယႂ်ႇသုင်ၼၼ်ႉ ယၢပ်ႇတေႉယဝ်ႉ။

ယွၼ်ႉၼၼ် တႃႇဝၢၼ်ႈမိူင်းလႄႈၶိူဝ်းၵူၼ်းပေႃးတေ ၸုၵ်းသဝ်းသၢင်ႈၵႂႃႇလႆႈယၢဝ်းႁုိင် တီႈလုမ်ႈၾႃႉလူင်ၼႆႉၼၼ်ႉ ထုၵ်ႇလီလူလိၵ်ႈၼမ်"လႄႈတႅမ်ႈလိၵ်ႈၼမ်"ယဝ်ႉ။

လိၵ်ႈဢၼ်ဝႃႈၼၼ်ႉ ၶႂ်ႈပဵၼ်လိၵ်ႈသင်ပဵၼ် လူၵႂႃႇတိၵ်း"လႃႈ ၵူၺ်းၼႃႇ ႁႂ်ႈမေႃထတ်းသၢင်ႈၸွမ်းလႄႈၶုၺ်ႉႁၼ်ၸွမ်း ၼမ်ႉၵႂၢမ်း ၼႂ်းလိၵ်ႈၼၼ်ႉၵူၺ်း။ဝႃႈမၼ်းမၢႆထိုင်သင် ၶႂ်ႈလၢတ်ႈၸိူင်ႉႁိုဝ်ၼႆၼၼ်ႉ ယႃႇလူႁႂ်ႈယဝ်ႉလၢႆ"ၵူၺ်း မၼ်းတေဢမ်ႇမီးၽွၼ်းလီသင်။

ၼင်ႇႁိုဝ်တေမီးၽွၼ်းလီလႄႈၵိုင်ႇငၢမ်ႇၸွမ်းတီႈလႆႈသဵင်ႈၶၢဝ်းယၢမ်း လူဢၢၼ်ႇလိၵ်ႈၼၼ်ႉ ႁဝ်းထုၵ်ႇလီၶုၺ်ႉႁၼ်ၼိူဝ်ႉလိၵ်ႈလႄႈၼမ်ႉၵႂၢမ်းၼႂ်းလိၵ်ႈၼၼ်ႉပႃးယဝ်ႉ။

ၼႂ်းလိၵ်ႈၼိုင်ႈတွၼ်ႈၼၼ်ႉတီႈဢေႇသုတ်း လွင်ႈတၢင်းႁူႉလႄႈတွၼ်ႈသွၼ်ၼၼ်ႉတုၼ်းမီးဝႆႉပႃးယဝ်ႉ ယူႇတီႈႁဝ်းမေႃလူလႄႈမေႃၵဵပ်းဢဝ်ၵူၺ်း။

သင်တေထတ်းသၢင်ႈတေႉ"ၼႆၵူၼ်းၼုမ်ႇတႆးႁဝ်းၵမ်ႈၼမ် ဢမ်ႇသူၼ်ၸႂ်လူလိၵ်ႈလႄႈတႅမ်ႈလိၵ်ႈၶိူဝ်းတူဝ်ၵဝ်ႇ လိၵ်ႈၶိူဝ်းတူဝ်ၵဝ်ႇၼၼ်ႉ သမ်ႉဢမ်ႇဝႆႉပိူင်ယႂ်ႇသေယဝ်ႉၵူၺ်းဢမ်ႇၵႃး သမ်ႉၵႂႃႇဢဝ်လိၵ်ႈပိူၼ်ႈမႃးၸိမ်သေတႅမ်ႈၸွမ်းမီးတင်းၼမ်။

ႁဝ်းၵူၼ်းၼုမ်ႇဝၼ်းမိူဝ်ႈၼႆႉၼၼ်ႉ သင်ဝႃႈႁဝ်းမိုင်ႉလူလိၵ်ႈပိူၼ်ႈတႅမ်ႈလိၵ်ႈပိူၼ်ႈၵူၺ်းၼႆ ဝၼ်းမိူဝ်းၼႃႈ တႃႇလိၵ်ႈလၢႆးႁဝ်းၼၼ်ႉ တေၸၢင်ႈမေႃႁၢႆလၢႆၵႂႃႇယဝ်ႉ။

ၵွပ်ႈၸိူင်ႉၼၼ် ၶႂ်ႈတိုၵ်းသူၼ်းႁႂ်ႈၵူၼ်းၼုမ်ႇတႆးႁဝ်းဝၼ်းမိူဝ်ႈၼႆႉၼၼ်ႉ လူပၼ်ၼမ်"လႄႈတႅမ်ႈပၼ်ၼမ်"သေၵမ်း လိၵ်ႈလႄႈပိုၼ်းတႆးႁဝ်းၼၼ်ႉ ၶႂ်ႈႁႂ်ႈလဵပ်ႈႁဵၼ်းသေတႅမ်ႈဢွၵ်ႇပၼ်ၼမ်"သေၵမ်း။တႃႇႁႂ်ႈလုၵ်ႈလၢၼ်ႁဝ်းဝၼ်းမူိဝ်းၼႃႈ ပေႃးတေဢမ်ႇလိုမ်းၶိူဝ်းလႄႈမေႃႁူႉၸၵ်းပိုၼ်းၼၼ်ႉ ယူႇတီႈပိူင်တႅၵ်ႈမၼ်းၸိူဝ်းသူႁဝ်းဝၼ်းမိူဝ်ႈၼႆႉၼၼ်ႉယဝ်ႉ။ၵေႃႉႁူႉပိုၼ်းတိုၼ်းမေႃႁၵ်ႉၶိူဝ်းၼႆလူးၵွပ်ႈၼၼ်လဵပ်ႈႁဵၼ်းပိုၼ်းၶိူဝ်းႁဝ်းၼမ်"သေဝႆႉၼမ်ႉၼၵ်းပိူင်လူင်မၼ်းလႄႈ။    ၼင်ႇႁိုဝ်ဝၢၼ်ႈမိူင်းႁဝ်းပေႃးတေၶိုၼ်ႈယႂ်ႇလႄႈၶုၼ်ႈသုင်ၵႂႃႇၼၼ်ႉ ယူႇတီႈၼႂ်းမုိဝ်းသူႁဝ်းဝၼ်းမူိဝ်ႈၼႆႉယဝ်ႉ။

ယွၼ်ႉၼၼ် ႁဝ်းမႃးၽွမ်ႉၵၼ်လူလိၵ်ႈလႄႈႁဝ်းမႃးၽွမ်ႉၵၼ် တႅမ်ႈပိုၼ်ၽႄလိၵ်ႈၶိူဝ်းႁဝ်း ႁႂ်ႈလုမ်ႈၾႃႉ လူင်ၼႆႉပေႃးႁူႉၸၵ်းဝႃႈ လိၵ်ႈတႆး ၼႆႉပဵၼ်တီႈလီတႅမ်ႈလႄႈလီလူပေႃးၵႃႈႁိုဝ်ၼႆၼၼ်ႉ။

ယူႇတီႈႁဝ်းၽွမ်ႉႁူမ်ႈၵၼ်ၵူၺ်း ၵၢၼ်ၽွမ်ႉႁူမ်ႈ ဢၼ်ဝႃႈၼႆႉ မၼ်းလွင်ႈယႂ်ႇၼႃႇ သင်ဝႃႈၶႂ်ႈလႆႈၶိုၼ်းမိူင်းလူင်ၸိုင်ႈတႆးၼႆႉၼႆၸိုင်ဢမ်ႇဝႃႈတေပဵၼ်လွၵ်းလၢႆးလႂ်ၵေႃႈယဝ်ႉ ၽွမ်ႉႁူမ်ႈၼမ်ႉၼိုင်ႈၸႂ်လဵဝ်ၵၼ်သေပူၵ်းပွင်ၵႂႃႇၸွမ်းၵၼ်လႄႈ။

လွင်ႈၶႅမ်ႉလႅပ်ႈလႄႈယိူင်းမၢႆဢၼ်ဝႃႈၼၼ်ႉႁဝ်းတိုၼ်းတေထိုင်လႆႈ သင်ႁဝ်းၽွမ်ႉႁူမ်ႈၵၼ်သေၸုင်ၸၼ် ႁဵတ်းႁႂ်ႈလူၵ်ႈလုမ်ႈၾႃႉလူင်ၼႆႉ ႁူႉၸၵ်းဝႃႈတႆး ။

ဢၼ်တေဢမ်ႇပဵၼ်လႆႈၼႆႉမၼ်းဢမ်ႇမီး သင်ဝႃႈႁဝ်းႁဵတ်းလႄႈတိုၵ်ႉပူၵ်းပွင်မၼ်းယူႇၼႆ မိူဝ်ႈၼႆႉဢမ်ႇပဵၼ်လႆႈၵေႃႈ မိူဝ်းၼႃႈၼၼ်ႉတိုၼ်းတေပဵၼ်မႃးလႆႈယူႇ။

ၵွပ်ႈၼၼ် ႁဝ်းမႃးၸွႆႈၵၼ် ၽွမ်ႉႁူမ်ႈ တိုၵ်းတေႃးတေႃႇသူႈၵႂႃႇၸွမ်းၵၼ် သင်ႁဝ်းၽွမ်ႉႁူမ်ႈၵၼ်ၼႆတေဢမ်ႇမီးသင်တေမႃးဢီးႁဝ်းလူမ်ႉၵႂႃႇလႆႈ။

#ယိင်းၸၢမ်မူၺ်(သၢဝ်တႆးထိူၼ်ႇ)