မႄးႁၵ်ႉဢွၼ်ႇပီႈ

 

မေးဢၼ်ဝႃႈၼၼ်ႉ မီးၵႃႈၶၼ်တၢၼ်ႇႁိုဝ်ၼႂ်းၼႃႈႁိူၼ်း

ၼႂ်းၶူင်းၵၢင်လူင်ၼႆႉ ၽူႈယိင်းၶဝ် ၵမ်ႉၼမ်ၼမ် ၼင်ႇႁိုဝ် လုၵ်ႈလၢင်း ၼႂ်းတွင်ႉပေႃးတေယူႇလီၼၼ်ႉ   ပေႃးႁူႉဝႃႈ ၸပ်းတွင်ႉပႃးတူဝ်ယဝ်ႉၼႆ  လိုဝ်ႈၵၢၼ်ႁၢပ်ႇၼၵ်း၊  ႁၢမ်ႈ လုၵ်ႉပႆးၽႆး ၼိပ်ႈၼႅတ်ႈ၊   လႆႈၽင်ႉသတိ   တူဝ်ၶိင်းမႃး ၵူႈၶၢဝ်းယၢမ်း တေႃႇထိုင်ၵဝ်ႈလိူၼ် သိပ်းလိူၼ်။ လႆႈလုမ်း လႃးၼႂ်းတွင်ႉၵေႃႈ ယၢပ်ႇ"ယဵၼ်း"၊ လႆႈယူႇ ဢမ်ႇထၢင်ႇ ႁၢင်ႈ။

ၵူၺ်းၵႃႈ.... ၵမ်ႈပႃႈၼမ် ပေႃးႁၼ်ၶဝ်ၼႆ ႁေဝႃႈ ၵျူဝ်ႇပိူဝ်ႉ ၵျူဝ်ႇဢူၼ်ႈ ဢမ်ႇႁၼ်လၢတ်ႈလီၼိူဝ်ၶဝ်   ပႃးၸဵမ်ၽူဝ် ၶဝ်ၼင်ႇၵဝ်ႇ။   တီႈတႄႉမၼ်း လီလႆႈပၼ်ႁႅင်းလိူဝ်ၵဝ်ႇ၊ ႁၵ်ႉႁွမ်ၶဝ်လိူဝ်ႇၵဝ်ႇ၊ ႁႂ်ႈၶဝ်ယုမ်ႉယုမ်တူဝ်လိူဝ်ႇၵဝ်ႇယူႇ။

''ဢမ်ႇမီးၵၢၼ်သင်ႁဵတ်း ယူႇလီ"ငၢမ်း"သေ ထိင်းလုၵ်ႈ ဢွၼ်ႇတီႈႁိူၼ်း ၵူၺ်းၵေႃႈ ႁိူဝ်ႉၼႃႇၼႄႇ'' ဝႃႇ

ၽူႈယိင်းၶဝ်ၵမ်ႉၼမ်" (မၢင်တီႈ)  လႆႈၸႂ်ယႂ်ႇပႂ်ႉၵိၼ်ၽူႈ ၸၢႆးၸဝ်ႈၵဝ်ႇ လႄႈ ဢမ်ႇမီးတႃႇတေၸၢႆႇၼၼ်ႉ ၶဝ်လႆႈ ဢိုၵ်ႉၼိုၵ်ႉ ၸူမ်ၸၼ်း ၶူၺ်ႉ ၸႂ်ၶဝ်ၵႃႈႁိုဝ်။    ထၢင်ႇဝႃႈ ယူႇလၢႆ"သေ ပဵၼ်မိုဝ်းပႂ်ႉယွၼ်းၵိၼ်လွင်ႈလဵဝ်။ ဢၼ်ၶဝ် ႁဵတ်းၵၢၼ်ႁိူၼ်းၼႆႉ ပေႃးမႃးၼပ်ႉသွၼ်ႇ တူၺ်းၼႆ

1) ၵူၼ်းၸွႆႈၵၢၼ်တီႈႁိူၼ်း > ၶဝ်ႈၵၢတ်ႇ၊ ႁုင်ၽၵ်း၊ လွႆးၶူဝ်း၊ ႁဵတ်းလွင်ႈမူတ်းသႂ် (ငိုၼ်းလိူၼ် 1သႅၼ်)။

2) ထိင်းလုၵ်ႈဢွၼ်ႇ > လဵင်ႉၶဝ်ႈ၊ ဢၢပ်ႇၼမ်ႉပၼ်၊ ၶျေႃး ဝွၼ်းဢိုၼ်း၊ ထိင်းလုၵ်ႈဢွၼ်ႇ  ၼင်ႇႁိုဝ်တေ ဢမ်ႇပဵၼ် ၽႄး ငိုၼ်းလိူၼ် သႅၼ်ႁႃႈမိုၼ်ႇ။

3) ႁဵတ်းမေႃသွၼ် >  သွၼ်လိၵ်ႈ၊ ၶႆႈဢပုမ်ႇ၊ ဢွၵ်ႇလႄႇ တၢင်းၼွၵ်ႈ၊ သင်ႇသွၼ်ၼင်ႇႁိုဝ်တေဢမ်ႇလူႉလႅဝ် (ငလ- သွင်သႅၼ်)။

4) ထိင်းၼႃႈႁိူၼ်း ပႂ်ႉႁိူၼ်း၊ ဢၼ်ပိူၼ်ႈၸႂ်ႉႁဵတ်းၵူႈလွင်ႈ၊ ငိုၼ်းလိူၼ် သၢမ်သႅၼ်။

5) မေႃယႃ >> တူၺ်းထိုင်လုမ်းလႃးၵူၼ်းပဵၼ် ၸပ်းမႆႈ ၶႆႈၼၢဝ် ၵူႈသမ်သႅၼ်ပိူင် (ငိုၼ်းလိူၼ် ႁႃႈသႅၼ်)။

ပေႃးမႃးၼပ်ႉသွၼ်ႇတူၺ်းၼႆ ပေႃးႁွင်ႉၵူၼ်းတၢင်း ၼွၵ်ႈ သေ မႃးႁဵတ်းတီႈႁိူၼ်းၼႆ ဢမ်ႇႁူႉတေသဵင်ႈပဵၼ်ၵႃႈႁိုဝ် ၸိူဝ်းၼႆႉ ၶႂ်ႈႁႂ်ႈပွင်ႇၸႂ်ပၼ်ၵၼ်။

ပၢၼ်ထိၼိုင်ႈ> ၸပ်းတွင်ႉပႃးတူဝ်၊ လုမ်းလႃးတူၺ်းထိုင်၊ ႁၢင်ႈႁႅၼ်းဝႆႉၸဵမ်မိူဝ်ႈပႆႇၵိူတ်ႇ၊ ဝူၼ်ႉဝႆႉ တႃႇပႃႈၼႃႈၶၢဝ်းၵႆ ၶၢဝ်းယၢမ်း (10)လိူၼ်။

ပၢၼ်ၵမ်းသွင်- ဝၢႆးသေၵိူတ်ႇလုၵ်ႈယဝ်ႉ ဢဝ်ပုၼ်ႈၽွၼ်း သွမ်ၼမ်ႉၼူမ်း၊ ၽဵဝ်ႈၶီႈၽဵဝ်ႈယဵမ်ႈ၊ လုမ်းလႃးမိူၼ်ၼင်ႇ ပဵၼ် မေႃယႃ ၶၢဝ်းယၢမ်းႁိုင် ႁႃႈပီ။

ၵမ်းသၢမ်မႃး > တေႃႇထိုင်လုၵ်ႈလႆႈၸုမ်ႈၶူး။ ပုၼ်ႈၽွၼ်း ႁပ်ႉသူင်ႇၵႂႃႇမႃး၊ ပႂ်ႉပႃးလူလွမ်တႃႇသေႇ ထိုင် 16ပီ။

ၵမ်းသီႇသမ်ႉ > ပူၼ်ႉပၢၼ်လုၵ်ႈဢွၼ်ႇ ၶဝ်ႈၼႂ်းပၢၼ်ႁႃ ၵၢၼ် တေႃႇထိုင်ပေႃးလႆႈၵေႃႉႁူမ်ႈၽၢၵ်ႈၼႃႈႁိူၼ်းမူၼ်း ၼၼ်ႉ ဢမ်ႇၵိုတ်းဢမ်ႇလိုဝ်ႈ။

ပၢၼ်လိုၼ်းသုတ်း... တႄႇၵိူတ်ႇမႃး တေႃႇထိုင်တၢႆ  ပုၼ်ႈ ၽွၼ်း ၼၼ်ႉ ထိင်းလုၵ်ႈဢွၼ်ႇ၊ ပႂ်ႉႁိူၼ်း ႁုင်ၶဝ်ႈၽၵ်း လၢင်ႉသုၵ်ႈ ၽဵဝ်ႈသိမ်း။

တၢင်းမူတ်းတၢင်းသဵင်ႈၼႆႉ ပဵၼ်ၵူၼ်းၵေႃႉၼိုင်ႈ လႆႈတူင်ႉၼိုင် တင်းၸူဝ်ႈပၢၼ်သေ ဢမ်ႇၶၢၼ်ႉဢမ်ႇဢိူၼ် ၶတ်းၸႂ်သႂ်ႇႁႅင်းမႃးပၼ်ယဝ်ႉလူး။

ၵွပ်ႈၼၼ် ၶႂ်ႈႁႂ်ႈၸဝ်ႈၽူဝ် ဢဝ်သႂ်ႇၸႂ်ၼိူဝ်ၵေႃႉပဵၼ်မေး၊ ႁႂ်ႈႁၵ်ႉႁွမ်မေး၊ ႁႂ်ႈမေႃယုင်ႈၵုင်ႇ ၼမ်ႉၵတ်ႉၶဝ် ဢၼ်မေႃ ႁဵတ်း သၢင်ႈ၊ မေႃဝႆႉၵႃႈၶၼ်ၼိူဝ်ၼၢင်းမေး ၵေႃႉဢၼ်ႁဝ်း ႁူမ်ႈပွင်းသေ ႁၵ်ႉႁွမ်ၵၼ်၊ ပၼ်ႁႅင်းၵၼ်၊   တူၺ်းထိုင် ၵၼ်၊    ဢၼ်မၼ်းႁဵတ်းတၢင်းမူတ်းၼၼ်ႉ  လၢတ်ႈၵႂၢမ်း ပၼ်ႁႅင်းဝႃႈ 

''ႁၵ်ႉ ႁၵ်ႉ ဢၼ်သူႁဵတ်းပၼ်ၵူႈလွင်ႈ တၢင်းမူတ်းတၢင်း သဵင်ႈၼႆႉ  ၸူမ်းသိူဝ်း  ငိၼ်းၶွပ်ႈၸႂ်တႄႉယဝ်ႉ ႁၵ်ႉႁိူဝ်ႉ ႁႅင်းၵႂႃႇယဝ်ႉ ႁဝ်းႁၵ်ႉသူၼႃႈ မေးႁၵ်ႉ "

ႁႂ်ႈမေႃဝႆႉၵႃႈၶၼ်ၼိူဝ်ၵူၼ်းသွင်ၵေႃႉလႄႈ လုၵ်ႈလၢင်းၵၢင် တဝ်ႈသေၵမ်း။

                   သႅင်မိူင်း  25.02.2017