မႃၼႆးပွမ်ၸဵၼ်

မႃၼႆးႁူမ်ႇၼင်ၸဵၼ်ပွမ်ပဵၼ်ၵေႃႉ လွင်ႈဢၼ်သူၶဝ်ႁဝ်းတေလႆႈၾၢင်ႉႁူႉၵၼ်ဝႆႉ ၼင်ႇမႃၼႆးမေႃပွမ်ၸဵၼ်ၼႆႉဝၼ်းမိူဝ်ႈၼႆႉတေလႆႈႁၼ်မီးၵၼ်ၸွတ်ႇၵႂႃႇၵူႈတီႈဝႆႉတင်းၼမ်ယူႇ။

ၽူႈလူလိၵ်ႈႁဝ်းၶဝ်တေယၢမ်ႈငိၼ်းၵၼ်ယူႇလွင်ႈဢပုမ်ႇဢၼ်ယၢမ်ႈမီးမႃး လွင်ႈမႃၼႆးပွမ်ႁဵတ်းတူဝ်ၸဵၼ် ယူႇၸွမ်းၼႂ်းၵႄႈၽုင်ၸဵၼ် လႄႈၶႃႈႁႅမ်ၵိၼ်တူဝ်ၸဵၼ်ၵမ်းတူဝ်တူဝ်ၼၼ်ႉႁဝ်းမႃးတူၺ်းပွတ်းဢွၼ်ႇတွၼ်ႈထတ်းသၢင်လွင်ႈငဝ်းလၢႆးဝၼ်းမိူဝ်ႈလဵဝ်ၼႆႉၵၼ်တူၺ်း။

မီးၼင်ႇပွၵ်ႈၼိုင်ႈ တီႈႁိမ်းတိၼ်လွႆ လႅၼ်သူၼ်ႁႆႈပိူၼ်ႈတီႈၼိုင်ႈ ၸင်ႇမီးမႃၼႆးတူဝ်ၼိုင်ႈ ပႆမႃးႁၼ်မဵၼ်ႈ ၸုမ်းၽုင် တူဝ်ၸဵၼ်ၶူၼ်ပူင်းဢုၺ်ႉလူင်တၢင်းၼမ်ယူႇ။

မႃၼႆးၼႆႉမီးပၢႆးဝူၼ်ႉလၢၵ်ႇလၢႆးတၢင်းၼမ် မၼ်းၸင်ႇမႃးလၵ်ႉလွမ်ၶျွင်းၸဵၼ်သေ ၺွပ်းဢဝ်ၸဵၼ်တူဝ်ၼိုင်ႈမႃးပႅပ်ႉသေၵိၼ်ယူႇယဝ်ႉ ဝၢႆးၵိၼ်ယဝ်ႉ ၼင်ႇႁိုဝ်ပေႃးတေလႆႈၵိၼ်တူဝ်ၸဵၼ်ၼၼ်ႉလႆႈၼမ်ၼမ်ၵမ်းတူဝ်ၼႆသေ မႃၼႆးၸင်ႇဝူၼ်ႉ ႁႃလွၵ်းလၢႆးမၼ်းယူႇယဝ်ႉ။

ဝၢႆးသေၵိၼ်တူဝ်ၸဵၼ်ၼၼ်ႉယဝ်ႉ ၸင်ႇဢဝ်ၼင်ၸဵၼ်ၶူၼ်ပူင်းၼၼ်ႉႁေႃႇႁူမ်ႇတူဝ်မၼ်းသေ ပွမ်ႁဵတ်းတူဝ်ၸဵၼ် သေၶဝ်ႈၵႂႃႇယူႇၸွမ်းၼႂ်းၽုင်ၸဵၼ်ၼၼ်ႉ လၵ်ဢဝ်ၶူပ်းၵိၼ်တူဝ်ၸဵၼ် ၼၼ်ႉၵႂႃႇၵမ်းတူဝ်ၵမ်းတူဝ် ၵူႈဝၼ်းဝၼ်းယူႇယဝ်ႉ။

ၸၢႆးဢွၼ်ႇလဵင်ႉၸဵၼ်ၼၼ်ႉဢမ်ႇ တူၺ်းႁၼ်မႅၼ်ႈမႃၼႆးဢၼ်ပွမ်တူဝ်ၼၼ်ႉလႆႈလႄႈ မၼ်းၵူၺ်းသတိႁူႉဝႃႈ တူဝ်ၸဵၼ်ၸိူဝ်းၼႆႉ ႁဵတ်းႁိုဝ်သေလႄႈ ယွမ်းႁၢႆလၢႆၵႂႃႇတင်းၼမ်တင်းလၢႆလႃႇၼႆႉ ဝူၼ်ႉၸိူင်ႉႁိုဝ်ၵေႃႈဢမ်ႇလႆႈၶေႃႈတွပ်ႇဢမ်ႇပွင်ႇၸႂ်ယူႇလွင်ႈၼႆႉငမ်းငဝ်းဝႆႉ။

မၼ်းၸင်ႇတႅပ်းတတ်းၸႂ်ဝႃႈ တေထတ်းသၢင်ၺွပ်းႁူႉႁႂ်ႈပေႃးလႆႈၶေႃႈတွပ်ႇမၼ်း ၵူၼ်းဢၼ်မႃးလၵ်ႉဢဝ်တၢႆလူလၢႆႁၢႆတူဝ်ၸဵၼ်ၼၼ်ႉႁႂ်ႈပေႃးလႆႈၼႆ သေတေတီႉမတ်ႉဢဝ်ၸိူၵ်ႈၽႅၼ်ၶေႃးမၼ်းဝႆႉတီႈတူၼ်ႈမႆႉလူင်ၼႆႉလူးၵွၼ်ႇၼႆယူႇ။

သိုပ်ႇၼၼ်ႉ ၸဵၼ်ၵေႃႈတူဝ်ၼိုင်ႈယဝ်ႉတူဝ်ၼိုင်ႈ ယင်းသိုပ်ႇၺႃးၺွပ်းၵိၼ်ႁၢႆလၢႆယူႇၵႂႃႇၵမ်းဢိတ်းၵမ်းဢိတ်းထႅင်ႈတင်းၼမ်ယူႇယဝ်ႉ။

ၵူၼ်းလဵင်ႉၸဵၼ်ၼၼ်ႉၸင်ႇၵႂႃႇယူႇၼႂ်းၵႄႈၸဵၼ်သေတူၺ်းဝၼ်းတေႃႇၶမ်ႈ ဢမ်ႇပၼ်ၽၢတ်ႇသၢႆတႃႇယူႇယဝ်ႉ တွၼ်ႈတႃႇတေလႆႈႁူႉၶေႃႈတွပ်ႇ။

မီးၼင်ႇဝၼ်းၼိုင်ႈ ၼႂ်းၽုင်ၸဵၼ်လူင်ၼၼ်ႉ မၼ်းၸင်ႇလၢမ်းၶၢတ်ႈႁၼ်မႅၼ်ႈၸဵၼ်တူဝ်ၼိုင်ႈ ယိူဝ်ႈယႃႈၵေႃႈမၼ်းဢမ်ႇၵိၼ် ၶၢႆႉၵေႃႈမၼ်းဢမ်ႇၶၢႆႉတီႈ ႁႃသွၵ်ႈၵိၼ်သင်ၸိူင်ႉတၢင်ႇတူဝ်ၼၼ်ႉလႄႈ ႁဵတ်းႁိုဝ်ၵေႃႈမၼ်းဢမ်ႇၸႂ်ႈၸဵၼ် မၼ်းတိုၼ်းပဵၼ်တူဝ်ဢၼ်ၽၢမ်ပွမ်ႁူမ်ႇၼင်ၸဵၼ်ၼၼ်ႉ ၵူၺ်းၼႆယူႇ။

 ၵူၼ်းလဵင်ႉၸဵၼ်ႁၼ်တူဝ်ဢၼ်ပဵၼ်ၶဵၼ်ဢၼ်ပၼ်တၢင်းတုၵ်ႉလႄႈၺွပ်းၵိၼ်တူဝ်ၸဵၼ်ၼၼ်ႉယဝ်ႉလႄႈမၼ်းၸင်ႇႁၢင်ႈၸိူၵ်ႈႁဵတ်းတူင်ႇသေတီႉ ၺွပ်းဢဝ်တူဝ်ၸဵၼ်ပွမ်ၼၼ်ႉယူႇ မၼ်းၸင်ႇဢဝ်ၵႂႃႇၽႅၼ်ယၢင်ႈဝႆႉၼိူဝ်တူၼ်ႈမႆႉၼၼ်ႉၼႄၵူၼ်းတင်းၼမ်ယူႇယဝ်ႉ။

ယၢမ်းၼၼ်ႉၵူၼ်းလဵင်ႉ ၸဵၼ်သွင်ၵေႃႉၸင်ႇမႃးႁၼ်မႅၼ်ႈၸဵၼ်ဢၼ်မတ်ႉၽႅၼ်ယူႇၼၼ်ႉလႄႈထၢမ်ဝႃႈ ႁဵတ်းသင်လႄႈသမ်ႉမတ်ႉၸဵၼ်ၽႅၼ်ၸိူင်ႉၼၼ်လႃႇၼႆယူႇ မၼ်းၸၢႆးၵေႃႈၸင်ႇတွပ်ႇလၢတ်ႈဝႃႈ ၼၼ်ႉဢမ်ႇၸႂ်ႈတူဝ်ၸဵၼ် မၼ်းၵူၺ်းပဵၼ် မႃၼႆး ဢၼ်ဢဝ်ၼင်ၸဵၼ်ႁေႃႇပွမ်တူဝ်ဝႆႉၼၼ်ႉၵူၺ်းဢိူဝ်ႈၼႆယူႇ

ၶႃသွင်ၵေႃႉၼၼ်ႉၸင်ႇလၢတ်ႈၶိုၼ်းဝႃႈ ဢေႃႈ ၵူၼ်းၽၢမ်းပဵၼ်ဢူၺ်းၵေႃႉ ဢူၺ်းလီၼႆၵေႃႈ ပဵၼ်ၽေးၶဵၼ်ဢၼ်လီၵူဝ်ယႂ်ႇလူင်တေႉဢိူဝ်ႈၼႆႉ လၢတ်ႈဝႃႈၼၼ်သေ မၢတ်ႈမၢႆတွင်းဝႆႉယူႇယဝ်ႉ။

ပေႃးတေၶူၼ်ႉတူၺ်းၶိုၼ်းၵေႃႈ ယွၼ်ႉသင်လႄႈတူဝ်ၸဵၼ်ၶဝ်လႆႈထုၵ်ႇၺႃးဢဝ်ၵိၼ်ၵႂႃႇၼမ်လႃႇၼႆၸိုင် ပဵၼ်ယွၼ်ႉပိူဝ်ႈ မႃၼႆးမေႃပွမ် မေႃယူႇၸွမ်းဢွင်ႈတီႈ ၸွမ်းၵႄႈမေႃႁဵတ်းၵေႃႉၸိူဝ်းၶဝ်လႄႈဝႃႈႁိုဝ် ဢမ်ႇၼၼ် ပဵၼ်ယွၼ်ႉပိူဝ်ႈတူဝ်ၸဵၼ်ၸိူဝ်းၼၼ်ႉဢမ်ႇဝႆႉၼမ်ႉၼၵ်းၼိူဝ်ၶဝ်ၼင်ႇၵၼ် ႁၼ်ယူႇပိူၼ်ႈမႃးႁဵတ်းႁၢႆႉၸႃႉ ဢဝ်ၵိၼ်ၼိူဝ်ႉလိူတ်ႈဢဝ်ၶဝ်တၢႆ ၶဝ်ယူႇႁဵတ်းမိူၼ်ဢမ်ႇႁူႉဢမ်ႇႁၼ်ဢမ်ႇသူၼ်ၸႂ် ၵုမ်ႇဝူၼ်ႉတႃႇဢဝ်တူဝ်ၸဝ်ႈၵဝ်ႇလွတ်ႈ သွၵ်ႈႁႃတႃႇဢၼ်သႂ်ႇတွင်ႉတူဝ်ၸဝ်ႈၵဝ်ႇသေ ဢမ်ႇတၼ်းသူၼ်ၸႂ် ၽႂ်ႁၢႆၽႂ်ယွမ်းၵႂႃႇၼၼ်ႉၵူၺ်းႁိုဝ်ၼႆဝႆႉယူႇ ယၢမ်းသူလူယဝ်ႉၵႂႃႇယဝ်ႉ ႁႂ်ႈဢဝ်ဝူၼ်ႉတူၺ်း ၸွင်ႇသူထူပ်းၺႃးဢူၺ်းၵေႃႉၼင်ႇၼႆယူႇႁိုဝ်။

ၾၢင်ႉဝႆႉလႄႈ... မႃၼႆးဢၼ်မေႃဢဝ်ၼင်ၸဵၼ်ႁူမ်ႇၼင်ႇၼႆၼႆႉ မၼ်းမီးၵူႈတီႈဢိူဝ်ႈ။

ၼင်ႇမႃၼႆးပွမ်ၸဵၼ်ၼႆႉ ဢမ်ႇဝႃႈၵူၼ်းၼႂ်းႁိူၼ်းသူၵေႃႈယဝ်ႉ၊ ဢမ်ႇဝႃႈၵူၼ်းႁူမ်ႈၼႃႈၵၢၼ်ၵေႃႈၼင်ႇၼၼ်၊ ပႃးၸဵမ်ၼႂ်းဢူၺ်းၵေႃႉလီၵၼ် ၸိူဝ်းၼၼ်ႉ လႄႈတီႈၼႂ်းတူင်ႇၵူၼ်းႁဝ်းၸိူဝ်းၼႆႉ ၸၢင်ႈမီးၵူႈတီႈယူႇ ၊ ၼင်ႇႁိုဝ် သူပေႃးတေလွတ်ႈၶဝ်လႆႈထုၵ်ႇ ၶျေႃးၸႂ်ႉၵၢၼ် ဢဝ်ၼမ်ႉမျၢတ်ႈၼမ်ႉတွၼ်းတႃႇၶဝ်ၼၼ်ႉ ႁႂ်ႈမေႃၽၢင်ႉၵၼ်သေတိတ်းတေႃႇၵပ်းသိုပ်ႇၶဝ်ႁႃၵၼ်သေၵမ်းၼႆ ဝၢႆးလူယဝ်ႉသူလႆႈတၢင်းဝူၼ်ႉသင်ၽွင်ႈၼႆၵေႃႈ ၽၢၵ်ႇဝႆႉပၼ်လိၵ်ႈပွတ်းတီႈတႂ်ႈၼႆႉလႆႈယူႇဢေႃႈ။