ထုၵ်ႇလီႁဵၼ်းလိၵ်ႈၼႂ်းၶၢဝ်းယၢမ်းလႂ် ႁႂ်ႈတိူဝ်းသၢင်ႇထုၵ်ႇ

 

ဢူၺ်းၵေႃႉၶဝ်ယၢမ်ႈႁဵၼ်းလိၵ်ႈၶၢဝ်းလႂ်ၵၼ်ၽွင်ႈ?

မၢင်ပွၵ်ႈၼႆႉၵႆႉပဵၼ် ႁဝ်းဝူၼ်ႉဝႆႉယဝ်ႉ ဝႃႈတေ ႁဵၼ်းလိၵ်ႈၼႆသေ ၽိူဝ်ႇထိုင်တီႈႁဵတ်းမႃးသမ်ႉဢမ်ႇပႃးၸႂ်ယဝ်ႉၸိူင်ႉၼႆ ၸွင်ႇယၢမ်ႈပဵၼ်ယူႇႁႃႉ?

တွၼ်ႈတႃႇ ဢူၺ်းၵေႃႉၸိူဝ်းဢၼ်ၵႆႉပဵၼ် ႁၼ်ပပ်ႉလိၵ်ႈယဝ်ႉၵေႃႈ တႃၼွၼ်းၵုမ်ႈမႃးၵမ်းလဵဝ် ဢမ်ႇပဵၼ်သိုပ်ႇလဵပ်ႈႁဵၼ်းထိုင်တီႈလႆႈၼၼ်ႉ တီႈၼႆႈတေၶႂ်ႈလၢတ်ႈၼႄ ၶၢဝ်းယၢမ်းလႂ်ၼႆႉလီလဵပ်ႈႁဵၼ်း လႄႈ ထုၵ်ႇလီလဵပ်ႈႁဵၼ်းလွၵ်းလၢႆးၸိူင်ႉၼင်ႇႁိုဝ်ၼႆၸိူဝ်းၼႆႉ။

ၵေႃႉၼိူင်ႈလႄႈတင်းၵေႃႉၼိူင်ႈမၼ်းၵေႃႈတေၸၢင်ႈပိူင်ႈၵၼ် ၼႂ်ႈလွၵ်းယၢမ်းၶၢဝ်းလဵပ်ႈႁဵၼ်းၼၼ်ႉယူႇ ။ မီးၵူၼ်းလဵပ်ႈႁဵၼ်းယၢမ်းၵၢင်ၼႂ်ၸဝ်ႉၸဝ်ႉၵေႃႈႁူႉတေႃႈမီး ၵူၼ်းယၢမ်ႈလဵပ်ႈႁဵၼ်းၵၢင်ၶမ်ႈၵၢင်ၶိုၼ်းယူႇမိူၼ်ၵၼ်။

႑ ။ ႁဵၼ်းလိၵ်ႈၵၢင်ၼႂ်ၼႆႉ မီးၽွၼ်းလႆႈၸိူင်ႉႁိုဝ်?

ၵူၼ်းၵမ်ႉပႃႈၼမ်တႄႉဢွၼ်ၵၼ်မၵ်းမၼ်ႈဝႃႈ ၵၢၼ်ႁဵၼ်းလိၵ်ႈၵၢင်ၼႂ်ၸဝ်ႉၸဝ်ႉၼႆႉ ပဵၼ်ၶၢဝ်းယၢမ်းလီလီတွၼ်ႈတႃႇၼႂ်းၼိူင်ႈဝၼ်းၼၼ်ႉၼႆယဝ်ႉ။ ၼႆႉထုၵ်ႇမႅၼ်ႈတေႉ။ ထုၵ်ႇလီပဵၼ်ၵူၼ်းၼွၼ်းလပ်းလိုဝ်ႈလႆႈလီလီၼႂ်းယၢမ်းၵၢင်ၶိုၼ်းယဝ်ႉ  ၶၢဝ်းယၢမ်းၵၢင်ၼႂ်ၼၼ်ႉတႄႉ ထုၵ်ႇလႆႈထႅမ်ႁႅင်းၵိၼ်ဢႁႃႇရ တဵမ်ထူၼ်ႈလီၼၼ်ႉယူႇယဝ်ႉ။

သင်ဝႃႈလႆႈလိုဝ်ႈႁွမ်ႁႅင်းလီလီၵွၼ်ႇ ၼႂ်းၶၢဝ်းယၢမ်းၵၢင်ၼႂ်တေႃႇၶမ်ႈၼၼ်ႉ ဢွၵ်းဢေႃႁဝ်းၵေႃႈတေတိူဝ်းႁဵတ်းၵၢၼ်လႆႈလီလီယူႇယဝ်ႉ။ ၼင်ႇၼၼ်ယဝ်ႉ မိူဝ်ႈႁဝ်းႁႃႁွမ် တၢင်းႁူႉ ၼႂ်းတွၼ်ႈလႂ်တွၼ်ႈၼၼ်ႉၵေႃႈ တေတိူဝ်းႁပ်ႉလႆႈတၢင်းႁူႉမႂ်ႇမႂ်ႇယူႇယဝ်ႉ။ ၼႂ်းယၢမ်းတွၼ်ႈၼႂ်ၸဝ်ႉၼႆႉ ဢၼ်ထုၵ်ႇလီၽိုၵ်းလိုမ်ႉတႄႉ ထုၵ်ႇလီလူၶိုၼ်း လိၵ်ႈဢၼ်လူမႃးယဝ်ႉမိူဝ်ႈဝႃး ဢမ်ႇၼၼ်ဢဝ်မႃးဝူၼ်ႉတူၺ်းဢုၼ်ႇပၼ် ( recollet )ၶိုၼ်းၸိူဝ်းၼႆႉ ႁႂ်ႈတိူဝ်းတွင်းလႆႈလီ ၼႆႉပဵၼ်လွၵ်းလၢႆး ဢုၼ်ႇၶိုၼ်းတၢင်းႁူႉ တီႈထႅမ်မႃးယဝ်ႉၼၼ်ႉႁႂ်ႈၸႂ်ႉတိုဝ်းလႆႈ။

တွၼ်ႈယၢမ်းၵၢင်ၼႂ်ၸဝ်ႉၼၼ်ႉ ထုၵ်ႇလီႁဵၼ်းမေႃတၢင်းႁူႉဢၼ် ဢမ်ႇတွၼ်ႉယၢမ်ႈႁဵၼ်းမႃးသေပွၵ်ႈၼၼ်ႉယဝ်ႉ တေတိူဝ်းလီဝႃႈၼႆယူႇလိၵ်ႈဢၼ်ႁဝ်းမၢတ်ႈမၢႆႁဵၼ်းမႃးမိူဝ်ႈဝႃးၼၼ်ႉၵေႃႈ တႃႇႁႂ်ႈတိူဝ်းတွင်းၶိုၼ်းလႆႈၼၼ်ႉၵေႃႈ ပဵၼ်ၶၢဝ်းယၢမ်းတီႈလီလီယူႇယဝ်ႉ။

႒ ။ ၸွင်ႇထုၵ်ႇလီႁဵၼ်းလိၵ်ႈယၢမ်းၵၢင်ဝၼ်းယူႇႁိုဝ်?

ၵေႃႈလီယူႇၵွႆး ထုၵ်ႇလီႁႂ်ႈပဵၼ် လွင်ႈဢၼ်ၵွင်ႉၵၢႆႇၵၼ် တၢင်းဢၼ်ယၢမ်ႈလဵပ်ႈႁဵၼ်းႁူႉမႃးတွၼ်ႈၼႂ်ၸဝ်ႉၼၼ်ႉယူႇ။ ယၢမ်းၵၢင်ဝၼ်းၼႆႉ ၽိူဝ်ႇတေလဵပ်ႈႁဵၼ်းႁူႉလွင်ႈမႂ်ႇမႂ်ႇထႅင်ႈၼၼ်ႉ တႃႉသိုပ်ႇလဵပ်ႈႁဵၼ်းႁူႉဢဝ်လွင်ႈတၢင်းဢၼ်ၵွင်ႉၵၢႆႇၵၼ်တီႈယၢမ်ႈႁဵၼ်းႁူႉမႃးၸိူဝ်းၼၼ်ႉတေတိူဝ်းလီ။ မိူၼ်ၼင်ႇတီႈဢၼ်ႁဝ်းဢမ်ႇပွင်ႇၸႂ် ဢမ်ႇၸႅင်ႈလႅင်း ဢမ်ႇႁူႉၸိူဝ်းၼၼ်ႉ ထုၵ်ႇလီထၢမ် ဢမ်ႇၼၼ်သွၵ်ႈႁႃပပ်ႉလိၵ်ႈလူၼႆၸိူဝ်းၼႆႉၸိုင် တေတိူဝ်းသၢင်ႇထုၵ်ႇၼႂ်းၶၢဝ်းယၢမ်းၼႆႉယဝ်ႉ။

႓ ။ ႁဵၼ်ႁူႉလိၵ်ႈယၢမ်းၵၢင်ၶမ်ႈၼႆႉမီးၽွၼ်းၸိူင်ႉၼင်ႇႁိုဝ်?

မၢင်ၸိူဝ်းပေႃးထိုင်ယၢမ်းၵၢင်ၶမ်ႈၸင်ႇမီးၸႂ်ၶႂ်ႈႁဵၼ်းႁႃတၢင်းႁူႇၸိူင်ႉၼႆၵေႃႈမီးယူႇၼင်ႇၵွၼ်ႇ။ ၼႂ်းတၢင်းဝၼ်းတႄႉဢမ်ႇမီးၸႂ်ၶႂ်ႈတူင်ႉတိုၼ်ႇသင်သေ ထိုင်ယၢမ်းၵၢင်ၶမ်ႈသမ်ႉတိူဝ်းမီးၸႂ်ၶႂ်ႈႁဵၼ်းႁူႉတူင်ႉတူင်ႉတိုၼ်ႇတိုၼ်ႇဝႆႉၸိူင်ႉၼႆႉၵေႃႈမီး၊ မၢင်ၸိူဝ်းမၢင်ဢွင်ႈတီႈၶဝ်တေဝူၼ်ႉဝႃႈ ပေႃးၵၢင်ၶမ်ႈၼႆႉတိူဝ်းယဵၼ်ၸႂ် ႁိမ်းႁွမ်းၵေႃႈဢမ်ႇမီးလွင်ႈဢူၼ်ဢၢၼ် ၼိမ်ယဵၼ်ႁဵတ်းႁႂ်ႈဢႃႇရုင်ႇ ၵၢၼ်ပၵ်းၸႂ်လႆႈလီ လႄႈ တိူဝ်းဝူၼ်ႉသၢင်ႈလႆႈလီလီၼႆယူႇ။

ၽူႈမီးတၢင်းႁူႉႁၼ် ၶဝ်ၵမ်ႉပႃႈၼမ်ႁၼ်ထိုင်ဝႃႈ ၼႂ်းၶၢဝ်းယၢမ်းၵၢင်ၶမ်ႈၼႆႉ တိူဝ်းႁဵတ်းႁႂ်ႈ တၢင်းဝူၼ်ႉ ဢွၵ်ႇမႃးလႆႈလီၽွင်းလိုၵ်းယဵၼ်ၼႆယူႇ။ မိၼ်ၼင်ႇပၼ်ႁႃ ၸဵမ်လွင်ႈတၢင်းဢၼ်ႁႃၶေႃႈတွပ်ႇဢမ်ႇလႆႈၵႄႈၶႆယၢပ်ႇၼၼ်ႉ ဝႆႉၶူၼ်ႉဝူၼ်ႉတူၺ်းၵၢင်ၶိုၼ်းၼႆ ၸၢင်ႈလႆႈၶေႃႈတွပ်ႇမႃးယူႇ။ၼင်ႇၼၼ် သင်ဝူၼ်ႉပူၼ်ႉ လႄႈ ႁဵၼ်းႁႂ်ႈပေႃးပူၼ်ႉတဵင်ႈၶိုၼ်းလိုၵ်းၼၼ်ႉတႄႉဢမ်ႇလီပဵၼ် ၸၢင်ႈႁဵတ်းႁႂ်ႈဢွၵ်းထိုင်ႉၵႂႃႇၵေႃႈပႃးဝႆႉယူႇ ယွၼ်ႉတႃၼွၼ်းဢမ်ႇဢိမ်ႇသေ ။ ၼႂ်းၼိူင်ႈဝၼ်းၼၼ်ႉထုၵ်ႇလီလႆႈၼွၼ်းပၼ် ႁႂ်ႈတဵမ် 8 ၸူဝ်ႈမူင်းၵၼ်ယူႇလိူဝ်ၵႂႃႇၵေႃႈဢမ်ႇလီ ယွမ်းၵေႃႈဢမ်ႇသၢင်ႇထုၵ်ႇတႃႇၵၢၼ်ႁုၼ်ႈမုၼ်းဢွၵ်းဢေႃ လႄႈလွင်ႈတူင်ႉတိုၼ်ႇတူဝ်လႅတ်းသႅဝ်းၼႆဝႆႉ။

ၼင်ႇလႆႈလဵပ်ႈႁဵၼ်းႁူႉဝႆႉထႅင်ႈဝႃႈ မၢင်ၸိူဝ်းၼႆႉ ၼႂ်းၶၢဝ်းယၢမ်း ႁိူဝ်ႉမွႆႈလိူဝ်ၸႂ်ၼၼ်ႉ ယင်းၸၢင်ႈမေႃႁဵၼ်းႁူႉဢဝ်တွၼ်ႈသွၼ်လႆႈ တိူဝ်းမၢတ်ႈမၢႆတွင်းငၢႆႈလိူဝ်သုတ်းလူးၵွၼ်ႇၼႆယဝ်ႉ။

ထႅင်ႈလၢႆးၼိုင်ႈတႃႇတွင်းၶိုၼ်းလႆႈလီလီ ၵွၼ်ႇႁဝ်းပႆႇၶဝ်ႈၼွၼ်းၼၼ်ႉ သင်ၸိူဝ်ႉဝႃႈႁႃႁွမ်တၢင်းႁူႉမႂ်ႇ လဵပ်ႈႁဵၼ်းၸိုင် တေႁဵတ်းႁႂ်ႈတိူဝ်းမီးၵၢၼ်ပၵ်းၸႂ်သႂ်ႇၶေႃးလႆႈလီလီ လႄႈ တွင်းမၢတ်ႈမၢႆၶႅမ်ႉယူႇ။ ပိူၼ်ႈႁွင်ႉဝႃႈ Sleep-Learning ၼႆယူႇ ဢမ်ႇၸႂ်ႈဝႃႈပဵၼ်ၵၢၼ်ႁဵၼ်းႁူႉလွင်ႈမႂ်ႇမႂ်ႇၵွၺ်း ပႃးၸဵမ်ၽႃႇသႃႇၵၢၼ်ႁဵၼ်းဢၼ်မႂ်ႇမႂ်ႇၵေႃႈတေႃႈၼၼ်။

ဢူၺ်းၵေႃႉၶဝ်... သင်ၸိူဝ်ႉဝႃႈႁူႉဝႆႉၶၢဝ်းယၢမ်းလႂ်တေႁဵၼ်းလႄႈ တေႁဵၼ်းလွင်ႈသင် သင်လႆႈႁူႉဝႆႉၸႅင်ႈၸႅင်ႈလႅင်းလႅင်းပေႃးၼႆၸိုင် တွၼ်ႈတႃႇၼႂ်းၼိူင်ႈဝၼ်းၼၼ်ႉ တႅမ်ႈဝႆႉလွၵ်းပိူင်ၶၢဝ်းယၢမ်း Goal သေ ၶတ်းၸႂ်လဵပ်ႈႁဵၼ်း ႁႂ်ႈထိုင်တီႈၵႂႃႇလႄႈ။

#ဢိင် - Aplus Myanmar ၵူၼ်းၼုမ်ႇသိုပ်ႇပဵၼ်ၵူၼ်းၼုမ်ႇ