လိၵ်ႈႁူမ်ႈမၢႆပၢင်လူင် 1947

 

ၶေႃႈတူၵ်းလူင်းတင်း 9 ၶေႃႈၼႆႉ ပဵၼ်ၶေႃႈလႆႈၸႂ် လိၵ်ႈႁူမ်ႈမၢႆပၢင်လူင် 1947 ယဝ်ႉ

(1) လိူၵ်ႈတင်ႈၽူႈတၢင်တူဝ် မိူင်းတႆးၵေႃႉၼိုင်ႈ ၵႂႃႇပဵၼ်ၽွင်းလူင် ၼႂ်းလူင်ပွင်ၸိုင်ႈၸူဝ်ႈၶၢဝ်း မိူင်းမၢၼ်ႈ။

(2) ၽွင်းလူင်ၽူႈတၢင်တူဝ်(မိူင်းတႆး)ၼႆႉ လိူဝ်သေၵၢၼ်ၵႅတ်ႇၶႄလႄႈၵၢၼ်တိတ်းတေႃႇၼွၵ်ႈမိူင်း၊ ၵႂႃႇပဵၼ်ၽူႈမီးဢႃႇၼႃႇ/ဢမ်းၼၢၸ်ႈၼိူဝ်ၵၢၼ်ငၢၼ်း ဢၼ်ၵဵဝ်ႇတင်းမိူင်းသၼ်လွႆတင်းမူတ်း။

(3) လိူၵ်ႈၽူႈတၢင်တူဝ်ၶၢင်လႄႈ ၽူႈတၢင်တူဝ်ၶျၢင်းၶိူဝ်းလႂ်ၼိုင်ႈၵေႃႉ ပဵၼ်ၵႅမ်ၽွင်းလူင် ပိူဝ်ႈတႃႇႁဵတ်းပၼ် ၵၢၼ်သၼ်လွႆၶၢင်လႄႈ သၼ်လွႆၶျၢင်းသေ တင်းသၢမ်ၵေႃႉႁဵတ်းၵၢၼ်ႁူမ်ႈၵၼ်ၸွမ်းပိူင်ၵၢၼ်။

(4) ၽွင်းလူင်(ၽူႈတၢင်တူဝ်)မိူင်းတႆးၼႆႉ ပဵၵ်ႉသမ်ႉဝႃႈႁပ်ႉပုၼ်ႈၽွၼ်းၵၢၼ်ငၢၼ်း မိူင်းသၢၼ်လွႆဝႆႉ တင်းမူတ်းၵေႃႈ ပေႃးမီးပၢင်ၵုမ် ဢၼ်ၵဵဝ်ႇတင်းမိူင်းသၼ်လွႆမႃး ၵႅမ်ၽွင်းလူင်သၼ်လွႆၶၢင်လႄႈ သၼ်လွႆၶျၢင်းၶဝ် မီးသုၼ်ႇလႆႈၶဝ်ႈႁူမ်ႈဢုပ်ႇဢူဝ်းၸွမ်း။

(5) မိူင်းတႆးမီးသုၼ်ႇလႆႈၽွင်းငမ်းတူဝ်ၵဝ်ႇလႄႈ မီးသုၼ်ႇလႆႈတႅပ်းတတ်းႁင်းၶေႃတဵမ်ထူၼ်ႈ။

(6) တႃႇတေမၵ်းမၼ်ႈႁႂ်ႈမီးၸႄႈမိူင်းၶၢင်ၼၼ်ႉ ဢွၼ်တၢင်းမိူဝ်ႈပႆႇလႆႈတႅပ်းတတ်း ၼႂ်းသၽႃးပူၵ်းပွင်ၸိုင်ႈမိူင်း (တႅင်းပျူႉပျီႇပျူႉလုတ်ႉတေႃႇ)ၼႆႉ ႁၼ်လီ လႆႈၸႂ်ၵၼ်ဝႃႈထုၵ်ႇလီမီး(ၸႄႈမိူင်းၶၢင်)ယူႇ။

(7) မိူင်းတႆးမီးသုၼ်ႇလႆႈႁပ်ႉပူၺ်ႈ လွင်ႈတီႊမူဝ်ႊၶရေႊသီႊ ၸၼ်ႉလုမ်ႈၾႃႉ။

(8) မိူင်းတႆး မီးသုၼ်ႇလႆႈၸတ်းၵၢၼ် လွင်ႈငိုၼ်းတွင်းပုၼ်ႈမိူင်းတႆးႁင်းၶေႃ။

(9) ငိုၼ်းတွင်း တႃႇၸွႆႈထႅမ်သၼ်လွႆၶၢင်လႄႈသၼ်လွႆၶျၢင်း ႁႂ်ႈလႆႈပဵင်းၵၼ် တင်းမိူင်းမၢၼ်ႈ၊ မိူင်းတႆး ပဵၼ်လႆႈဢမ်ႇပဵၼ်လႆႈၼၼ်ႉ လူင်ပွင်ၸိုင်ႈၸူဝ်ႈၶၢဝ်း တင်း ၽွင်းလူင်ၽူႈတၢင်တူဝ်မိူင်းသၼ်လွႆ(ၶၢင် ၶျၢင်း တႆး) ဢုပ်ႇဢူဝ်း ၵၼ်သေၶပ်းၶိုင်ၵႂႃႇ။

တင်း 9 ၶေႃႈၼႆႉ ပဵၼ်ၶေႃႈလႆႈၸႂ်၊ ၶေႃႈတူၵ်းလူင်း (ၵတိၵဝၼ်ႈ) ၼႂ်းလိၵ်ႈႁူမ်ႈမၢႆပၢင်လူင် ဢၼ်တႅမ်ႈဝႆႉတင်းလိၵ်ႈလၢႆး (Written Agreement)။

ၼမ်ႉၸႂ်ပၢင်လူင် 5 ၶေႃႈ

ၼမ်ႉၸႂ်ပၢင်လူင် (The Spirit of Panglong) ၼႆႉပဵၼ် လွၼ်ႉၵႅၼ် လိၵ်ႈ ႁူမ်ႈမၢႆပၢင်လူင်ဢၼ်ပဵၼ်လွင်ႈတၢင်း လႆႈ တူၵ်းလူင်း၊ လႆႈလူင်းလၢႆးမိုဝ်း၊ ပဵၼ် ၶေႃႈလႆႈၸႂ်(ၶေႃႈမၵ်းမၼ်ႈပၼ်ၵတိ) တၢင်းသူပ်း တၢင်းပၢၵ်ႇ (Un-written Agreement) မိူဝ်ႈဝၼ်းတီႈ 10/02/1947 ဢွၼ်တၢင်းတေလူင်းလၢႆးမိုဝ်း လိၵ်ႈႁူမ်ႈမၢႆပၢင်လူင်(သွင်ဝၼ်း)ၼၼ်ႉ မီးၼင်ႇပႃႈ တႂ်ႈၼႆႉ-

(1) တေလႆႈမီးသုၼ်ႇၽဵင်ႇပဵင်းၵၼ်တင်းမၢၼ်ႈ ၸွမ်းၼင်ႇလွၵ်းလၢႆးတီႇမူဝ်ႇၶရေႇသီႇမီး။

(2) ၽူႈတႅၼ်းမိူင်းတႆး မိူင်းၶၢင် မိူင်းၶျၢင်းၶဝ် မီးသုၼ်ႇၶိုင်ပွင်လွင်ႈ ဝၢၼ်ႈမိူင်းတူဝ်ၵဝ်ႇ။ ၼွၵ်ႈၼၼ်ႉ ၵၢၼ်ငၢၼ်း ဢၼ်ၵဵဝ်ႇလူၺ်ႈသုၼ်ႇ ႁူမ်ႈ မိူၼ်ၼင်ႇၵၢၼ်ၵႅတ်ႇၶႄလႄႈ ၵၢၼ်ၵပ်းသိုပ်ႇၼွၵ်ႈမိူင်းၼၼ်ႉ တေလႆႈႁူမ်ႈၵၼ်ႁပ်ႉ ပုၼ်ႈၽွၼ်း။

(3) ၵမ်ႉထႅမ်ႁႂ်ႈ ၶၢင် လႆႈမီးၸႄႈမိူင်းႁင်းၶေႃ။

(4) လိၵ်ႈတူၵ်းလူင်း ဢႅတ်ႇတလီႇ-ဢွင်ႇသၢၼ်းၼႆႉ တၵ်းဢမ်ႇၵဵဝ်ႇၶွင်ႈၸွမ်း ၸိုင်ႈတႆး/ ၶၢင်/ ၶျၢင်း။

(5) မိူဝ်ႈလႂ်ၶႂ်ႈၽၢတ်ႇဢွၵ်ႇၵေႃႈ ႁႂ်ႈၽၢတ်ႇဢွၵ်ႇလႆႈ။

တွၼ်ႈတႃႇၸၢဝ်းၶိူဝ်းၼိူဝ်ႉလိူတ်ႈၸဝ်ႈၵဝ်ႇတေလႆႈႁူႉႁၼ်ၸႅင်ႈလႅင်း ဝႃႈယၢမ်ႈတူၵ်းလူင်းသမ်းသင်

ၵၼ်မႃႈထိုင်ႁၢၼ်ႉၼႆႉၼႆၼၼ်ႉ ၸွႆႈထႅမ်ပိုၼ်ၽႄႈ

Share ၽၢၵ်ႇတွၼ်ႈပၼ်ႁႂ်ႈၸိူဝ်းၶဝ်ၵႂႃႇလႄႈ

#ဢိင်ၶေႃႈမုလ်း  #ပပ်ႉမႅၵ်ႉၵသိၼ်းၽူႈတွႆႇႁွၵ်ႈ မၢႆ 014, 

https://shannews.org/archives/15536

https://shannews.org/archives/10757

ပိုၼ်းပၢင်ၵုမ်လူင် ပၢင်လူင် 1947

https://shannews.org/archives/10726

#ShanBooks #ShanNews #Shan #Written

 #Panglong #Agreement #လိၵ်ႈႁူမ်ႈမၢႆ

#ပၢင်လူင် #ၶေႃႈတူၵ်းလူင်း #ပၢင်ၵုမ် #ပင်လုံ