လွၵ်းလၢႆး 10 ပိူင်

 

လွၵ်းလၢႆး 10 ပိူင် တႃႇၸႅၵ်ႇၽႄ ၶၢဝ်ႇတေႉ လႄႈ ၶၢဝ်ႇပွမ် ၼႂ်းသိုဝ်ႇတူင်ႇဝူင်းၵူၼ်း

|တႃႇတေ ၸႅၵ်ႇၽႄလႆႈ ၶၢဝ်ႇတေႉ လႄႈ ၶၢဝ်ႇပွမ် ဢၼ်လိုဝ်းႁူင်ယူႇ ၼႂ်းသိုဝ်ႇတူင်ႇဝူင်းၵူၼ်း ၸိူဝ်းၼၼ်ႉ ၸုမ်းၸိူဝ်းႁဝ်းၶႃႈ ဢိင်ဢၢင်ႈ ဢဝ်မႃး ဢၼ် Facebook ၶဝ် ၶပ်းၶိုင်တႅမ်ႈဢွၵ်ႇဝႆႉ မႃးပိၼ်ႇတႅမ်ႈပဵၼ်လိၵ်ႈတႆးသေ ၸႅၵ်ႇၽႄပိူင်းၼႄဝႆႉ ႁႂ်ႈပီႈၼွင်ႉႁဝ်းၶဝ် ႁပ်ႉႁူႉၸွမ်း လွၵ်းလၢႆး 10 ပိူင် တႃႇၸႅၵ်ႇၽႄ ၶၢဝ်ႇတေႉ လႄႈ ၶၢဝ်ႇပွမ် ယူႇယဝ်ႉ။

ယွၼ်ႉၶၢဝ်ႇငၢဝ်းႁူင်လိုဝ်းၵၼ်ၵႂႃႇ ယဝ်ႉလႄႈ မိူဝ်ႈလဵဝ်ၼႆႉ ၶၢဝ်ႇပွမ်၊ ၶၢဝ်ႇၵၢင်လၢႆၸိူဝ်းၼႆႉၵေႃႈ ဢွၵ်ႇမႃးၼမ်။ သင်ၵူတ်ႇထတ်းတူၺ်းလီလီ ၼင်ႇဢၼ်တေတႅမ်ႈပိူင်းၼႄ ၽၢႆႇတႂ်ႈၸိူဝ်းၼႆႉၸိုင် တေၸၢင်ႈၸႅၵ်ႇၽႄလႆႈ ၶၢဝ်ႇတႄႉ လႄႈ ၶၢဝ်ႇပွမ် လႆႈငၢႆႈလူမ်ယူႇ။

သင်ဝႃႈ ပီႈၼွင်ႉႁဝ်းၶဝ် ႁၼ်မႅၼ်ႈၶၢဝ်ႇႁူဝ်႞ လိုဝ်းႁူင် ၼႂ်းသိုဝ်ႇတူင်ႇဝူင်းၵူၼ်းဝႆႉယူႇၼႆၸိုင် …

#ၾၢင်ႉတူၺ်းႁူဝ်ၶေႃႈၶၢဝ်ႇၼၼ်ႉလီလီ

တႃႇႁႂ်ႈၵူၼ်းလူမၼ်းတေၶဝ်ႈၸႂ်ၼၼ်ႉ ၶၢဝ်ႇပွမ်မၢင်ႁူဝ်ၼႆႉ သႂ်ႇႁူဝ်ၶေႃႈဢၼ်လီၸၼ်ၸႂ်ဝႆႉ။ ပိူင်တႅၵ်ႈမၼ်း မိူၼ်ၼင်ႇတႅမ်ႈဝႆႉဝႃႈ ၶၢဝ်ႇလွင်ႈယႂ်ႇ၊ ၶၢဝ်ႇၶိုတ်းတၼ်း၊ ၶၢဝ်ႇလၢၵ်ႇလၢႆး၊ ၶၢဝ်ႇၶိုၵ်ႉၶၵ်ႉ ၸဵမ်ၸိူဝ်းၼႆႉ။ ပေႃးႁၼ်မႅၼ်ႈ ႁူဝ်ၶေႃႈမၼ်းယဝ်ႉ ႁဵတ်းႁႂ်ႈ ၸႂ်ၶိုၼ်ႈ၊ လီဢၢမ်းလူင်လၢင်ၵႂႃႇ ၵမ်းလဵဝ်ၼၼ်ႉယဝ်ႉ။ သင်ႁၼ်မႅၼ်ႈ ၶၢဝ်ႇၸိူင်ႉၼႆယဝ်ႉၸိုင် ၶႂ်ႈပၼ်ၾၢင်ႉဝႃႈ ထုၵ်ႇလီထၢင်ႇထိူမ်ဝႆႉယဝ်ႉ။

#တူၺ်းလိင်ႉ(Link)မၼ်းလီလီ

လွင်ႈဝႃႈပဵၼ် ၶၢဝ်ႇတႄႉ လႄႈ ၶၢဝ်ႇပွမ်ၼၼ်ႉ ၶၢဝ်ႇမၢင်ႁူဝ်ၼႆႉ တေတႄႇႁၼ်လႆႈ ၸွမ်းလိင်ႉမၼ်း။ ၵူၼ်းတႅမ်ႈၶၢဝ်ႇမၢင်ၸိူဝ်းၼႆႉ တႃႇႁႂ်ႈပိူၼ်ႈယုမ်ႇၶၢဝ်ႇပွမ်ၶဝ်ၼၼ်ႉ ႁဵတ်းလိင်ႉ URL ဢၼ်ပွမ်သေ သႂ်ႇဝႆႉယဝ်ႉ။ ၵွပ်ႈၼႆ ၶဝ်ႈတူၺ်း လိင်ႉ URL ၶၢဝ်ႇၼၼ်ႉသေ  လူဝ်ႇၵူတ်ႇထတ်းတူၺ်းၶိုၼ်း ႁႂ်ႈတႅတ်ႈတေႃး။

#ထတ်းသၢင်တူၺ်းငိူၼ်ႈငဝ်ႈၶၢဝ်ႇၼၼ်ႉလႄႈ

ၶၢဝ်ႇဢၼ်ႁဝ်းဢၢၼ်ႇယူႇၼႆႉ ၸွင်ႇယုမ်ႇၸႂ်လႆႈ လႄႈ  ထုၵ်ႇမႅၼ်ႈၸွမ်းပိူင် ယူႇႁိုဝ်ၼႆ လီၵူတ်ႇထတ်းတူၺ်းယူႇ။ သင်ဝႃႈ  ၶၢဝ်ႇၼၼ်ႉ မႃးတီႈ ႁွင်ႈၵၢၼ်ၶၢဝ်ႇ ဢၼ်ဢမ်ႇယၢမ်ႈငိၼ်း ဢမ်ႇယၢမ်ႈႁၼ်ၼႆၸိုင် ၶဝ်ႈတူၺ်း Page ႁွင်ႈၵၢၼ်ၶၢဝ်ႇၼၼ်ႉသေ ၵႂႃႇတူၺ်းတီႈ About ၼၼ်ႉလႆႈယူႇ။ ႁွင်ႈၵၢၼ်ၶၢဝ်ႇၼၼ်ႉ တႄႇတင်ႈဝႆႉမိူဝ်ႈလႂ်၊ ႁဵင်းလိၵ်ႈ ဢွင်ႈတီႈယူႇ၊ မၢႆၾူၼ်း တႃႇၵပ်းသိုပ်ႇၶဝ် ၸဵမ်ၸိူဝ်းၼႆႉ ၸွင်ႇၼႄႉၼမ်းသႂ်ႇဝႆႉ တႅတ်ႈတေႃးယူႇႁိုဝ်ၼႆ ထတ်းတူၺ်းလႆႈယူႇ။

#ၸွင်ႇမႅၼ်ႈၸွမ်းပိူင်ၵၢၼ်ၶၢဝ်ႇယူႇႁိုဝ်ၼႆၵေႃႈထတ်းတူၺ်းလႄႈ

ၶၢဝ်ႇဢၼ်ႁဝ်းဢၢၼ်ႇယူႇၼႆႉ ၸွင်ႇတူဝ်လိၵ်ႈမၼ်းမႅၼ်ႈ။ ၶႅပ်းႁၢင်ႊၸိူဝ်းၼၼ်ႉ ၸွင်ႇတတ်းတေႃႇဝႆႉ။ ၼိူဝ်ၶႅပ်းႁၢင်ႊၼၼ်ႉ ၸွင်ႇတႅမ်ႈလိၵ်ႈသႂ်ႇဝႆႉ ပိူဝ်ႈတႃႇၸၼ်ၸႂ်ၵူၼ်းတင်းၼမ် ၶႂ်ႈဢၢၼ်ႇလိၵ်ႈၶဝ်မႃးႁိုဝ် ၼႆၵေႃႈ ၾၢင်ႉထတ်းတူၺ်းတီႈ လၢႆးႁၢင်ႈႁႅၼ်း ၼႃႈလိၵ်ႈ ၼၼ်ႉလႆႈယူႇ။ သင်ဝႃႈ တူဝ်လိၵ်ႈဢမ်ႇမႅၼ်ႈ၊ ၶႅပ်းႁၢင်ႊၵေႃႈ တတ်းတေႃႇဝႆႉ မႄးဝႆႉၼႆၸိုင် ထုၵ်ႇလီၾၢင်ႉသေ ဢၢၼ်ႇလီလီယဝ်ႉ။ ႁွင်ႈၵၢၼ်ၶၢဝ်ႇ ဢၼ်ႁဵတ်းၸွမ်းပိူင်ၵၢၼ်ၶၢဝ်ႇ ႁႂ်ႈထုၵ်ႇမႅၼ်ႈၼႆႉၼႆႉ တူဝ်လိၵ်ႈၽိတ်းၸိူဝ်းၼၼ်ႉ ဢမ်ႇသူႈမီး၊ ၶႅပ်းႁၢင်ႊၸိူဝ်းၼႆႉၵေႃႈ တိုၼ်းဢမ်ႇလႃႈလီတတ်းတေႃႇဝႆႉ။

#ထတ်းတူၺ်းၶႅပ်းႁၢင်ႊလီလီယဝ်ႉၸင်ႇယုမ်ႇလႄႈ

မိူၼ်ၼင်ႇလၢတ်ႈတင်းၼိူဝ်ၼၼ်ႉယဝ်ႉ။ ဝႅပ်ႉသၢႆႉ လႄႈ ၼႃႈလိၵ်ႈ Page ၸိူဝ်းဢၼ်ပိုၼ်ၽႄ ၶၢဝ်ႇပွမ် ၶၢဝ်ႇၵၢင်လၢႆၸိူဝ်းၼၼ်ႉ ၶဝ်တေၸႂ်ႉ ၶႅပ်းႁၢင်ႊ၊ ငဝ်းႁၢင်ႊသဵင် ဢၼ်ၽိတ်းသေ ၶိုၼ်းမႄးတတ်းတေႃႇဝႆႉ ႁႂ်ႈမိူၼ်လွင်ႈတေႉ။ ၶႅပ်းႁၢင်ႊ၊ ငဝ်းႁၢင်ႊသဵင်ၸိူဝ်းၼၼ်ႉ တေဢမ်ႇၵႆႉၵဵဝ်ႇၵွင်ႉၵၼ်တင်းၶၢဝ်ႇၼၼ်ႉယဝ်ႉ။ ၵွပ်ႈၼႆ ၸႂ်ႉတိုဝ်း Google Image Search သႅၼ်း Search engine ၸိူဝ်းၼၼ်ႉသေ ထတ်းတူၺ်းလႆႈဝႃႈ ၶႅပ်းႁၢင်ႊ၊ ငဝ်းႁၢင်ႊသဵင်ၸိူဝ်းၼၼ်ႉ လုၵ်ႉတီႈလႂ်မႃးၼႆၵေႃႈ တေႁူႉလႆႈၵမ်းလဵဝ်ယဝ်ႉ။

#ထတ်းတူၺ်းဝၼ်းတီႈမၼ်းလီလီလႄႈ

ၵမ်ႈၽွင်ႈတေၵႆႉယၢမ်ႈၺႃး၊ ယၢမ်ႈႁၼ်ပိူၼ်ႈႁဵတ်းယူႇ။ ပေႃးဝႃႈႁၼ်ၶၢဝ်ႇၼိုင်ႈႁူဝ်ၼႆၵေႃႈ ဢမ်ႇထတ်းတူၺ်းလွင်ႈတၢင်းသင်သေ ၵိုင်ႉၵၢင်ႉသျႄး (Share) ၵမ်းလဵဝ် လႄႈ ၽိူဝ်ႇၶိုၼ်းတူၺ်း လီလီ ပဵၼ်ၶၢဝ်ႇၵဝ်ႇ ဢၼ်ပူၼ်ႉမႃးႁိုင်ၸိူဝ်းၼၼ်ႉ၊ ၵွပ်ႈၼႆ လူဝ်ႇထတ်းတူၺ်း ဝၼ်းတီႈမၼ်းလီလီ။ လိူဝ်ၼၼ်ႉ ၶၢဝ်ႇပွမ်မၢင်ႁူဝ်ၼႆႉ တေၸၢင်ႊပႃး လွင်ႈတၢင်း၊ ၶၢဝ်းယၢမ်း၊ ဝၼ်းတီႈ မၼ်းၽိတ်းဝႆႉ။

#ထတ်းတူၺ်းလၵ်းထၢၼ်သၢၵ်ႈသေႇမၼ်းလီလီလႄႈ

လၵ်းထၢၼ်ဢၼ်ဝႃႈၼႆႉ ၶႂ်ႈဝႃႈငဝ်ႈႁၢၵ်ႈ သၢၵ်ႈသေႇ ဢၼ်ပႃးၼႂ်းၶၢဝ်ႇၼၼ်ႉယဝ်ႉ။ ပိူင်တႅၵ်ႈမၼ်း- ၶၢဝ်ႇဢၼ်ၵဵဝ်ႇၵပ်းလိူင်ႈ  ၶၢဝ်ႇပၢႆးယူႇလီၸိူဝ်းၼႆႉ ၸွင်ႇၸႂ်ႈ ႁွင်ႈၵၢၼ်ၽၢႆယူႇလီၶဝ် ပိုၼ်ၽၢဝ်ႇႁိုဝ်။ ၶႂ်ႈႁႂ်ႈၵူတ်ႇထတ်းပႃးဝႃႈ ၶၢဝ်ႇၼၼ်ႉ မီးလွင်ႈၶိူင်ႇၶမ်ႉၵႃႊႁိုဝ် ၸဵမ်ၸိူဝ်းၼႆႉ။ ၸိုဝ်ႈၵူၼ်းၸိူဝ်းပႃးၼႂ်းၶၢဝ်ႇၼၼ်ႉ တၢင်းၼွၵ်ႈမၼ်းၸွင်ႇမီးတေႉယူႇႁိုဝ်။ ဢမ်ႇၼၼ် ၵူၼ်းၶႂ်ႈပိုၼ်ၽၢဝ်ႇ ၶၢဝ်ႇပွမ် ၶၢဝ်ႇၵၢင်လၢႆၶဝ် တိုၼ်းတင်ႈၸႂ် ဢဝ်ပၢႆးဝူၼ်ႉၶဝ် ႁဵတ်းဝႆႉႁိုဝ်ၼႆ ထုၵ်ႇလီၵူတ်ႇထတ်းတူၺ်းယူႇ။

#တႅၵ်ႈၼိူင်းတင်းၶၢဝ်ႇတၢင်ႇဢၼ်သေထတ်းတူၺ်းလႄႈ

ၶၢဝ်ႇဢၼ်ႁဝ်းတိုၵ်ႉဢၢၼ်ႇယူႇၼႆႉ ၸွင်ႇပႃးၼႂ်း ႁွင်ႈၵၢၼ်ၶၢဝ်ႇတၢင်ႇဢၼ်ၼႆၼၼ်ႉၵေႃႈ တေလႆႈထတ်းတူၺ်းၶိုၼ်းယဝ်ႉ။ သင်ဝႃႈ ၶၢဝ်ႇဢၼ်ႁဝ်းဢၢၼ်ႇယူႇၼႆႉ ဢမ်ႇႁၼ်ပႃးၼႂ်း ႁွင်ႈၵၢၼ်ၶၢဝ်ႇ ဢၼ်ပဵၼ်တၢင်းၵၢၼ်ၸိူဝ်းၼၼ်ႉၸိုင် တေၸၢင်ႈပဵၼ်ၶၢဝ်ႇပွမ်ၵေႃႈ ပဵၼ်လႆႈယူႇ။ သင်ဝႃႈ ပႃးၼႂ်း ႁွင်ႈၵၢၼ်ၶၢဝ်ႇ ဢၼ်ယုမ်ႇလႆႈလႄႈ ပဵၼ်တၢင်းၵၢၼ်တေႉယူႇၼႆၸိုင် ၸၢင်ႈပဵၼ်ၶၢဝ်ႇတေႉယူႇ။

#ၶၢဝ်ႇၼၼ်ႉၸွင်ႇၸႂ်ႈလွင်ႈႁုၼ်ႉၼူဝ်ႁိုဝ်

မၢင်ပွၵ်ႈမၢင်လႂ် ၶၢဝ်ႇၼႆႉ ၸၢင်ႊမိူၼ် လွင်ႈႁုၼ်ႉၼူဝ်ဝႆ့၊ တိုၼ်းတင်ႈၸႂ် ၵိူဝ်ႉဝႆႉၵေႃႈၸၢင်ႈပဵၼ်လႆႈလႄႈ ၸႅၵ်ႇၽႄယၢပ်ႇဝႆႉ။ ပေႃးၼၼ် ဢၢၼ်ႇတူၺ်း ၶေႃႈမုၼ်းၶၢဝ်ႇၼၼ်ႉလီလီသေ တေၸၢင်ႈၸႅၵ်ႇၽႄလႆႈဝႃႈ ပဵၼ်ၶၢဝ်ႇတေႉ၊ ၶၢဝ်ႇပွမ်၊ ၶၢဝ်ႇၵၢင်လၢႆယူႇ။

#တေလႆႈၾၢင်ႉ ၶၢဝ်ႇဢၼ်တင်ႈၸႂ်တႅမ်ႈဝႆႉ ႁႂ်ႈပဵၼ်မႃး ၶၢဝ်ႇပွမ် ၶၢဝ်ႇၵၢင်လၢႆၼၼ်ႉလႄႈ

ၶၢဝ်ႇမၢင်ႁူဝ်ၼႆႉ တိုၼ်းတင်ႈၸႂ် တႅမ်ႈဝႆႉ ႁႂ်ႈပဵၼ်ၶၢဝ်ႇၽိတ်းၶၢဝ်ႇၽူၼ်ၼၼ်ႉယဝ်ႉ။ ပေႃးႁၼ်ၶၢဝ်ႇၸိူင်ႉၼႆတႄႉ ထုၵ်ႇလီဢၢၼ်ႇတူၺ်းႁူဝ်ယွႆႈမၼ်း တင်းသဵင်ႈယဝ်ႉ ဢဝ်ၺၢၼ်ႇ တၢင်းဝူၼ်ႉၸဝ်ႈၵဝ်ႇ ထတ်းသၢင်တူၺ်းလီလီသေ တႅပ်းတတ်းၵႂႃႇတႃႉ။

သင်ဝႃႈ ထတ်းသၢင်တူၺ်း ၼင်ႇၵႃႊဝႃႈမႃး လၢႆးတၢင်းဢၼ်ႁဝ်းၶႃႈ သပ်းလႅင်းၸႅင်ႈၼႄဝႆႉ ၽၢႆႇၼိူဝ်ၸိူဝ်းၼႆႉၸိုင် တေၸၢင်ႊၸႅၵ်ႇၽႄလႆႈ ၶၢဝ်ႇပွမ်၊ ၶၢဝ်ႇၽိတ်း၊ ၶၢဝ်ႇတေႉ၊ ၶၢဝ်ႇၵၢင်လၢႆၸိူဝ်းၼၼ်ႉ လႆႈငၢႆႈငၢႆႈသေ တေၸၢင်ႊပၢၵ်ႈပႅတ်ႈလႆႈၶၢဝ်ႇပွမ်ၸိူဝ်းၼၼ်ႉပႃးထႅင်ႈယူႇ။

#Byၸုမ်းၶၢဝ်ႇသႅၼ်ပၢႆး

.

.

#ShanBooks #HsenPai #Media #Fake #News #RealorFake #သႅၼ်ပၢႆး#ၶၢဝ်ႇ #ၾၢင်ႉ