ၽူႈဢွၼ်ႁူဝ် လီၵွၼ်းယူႉ

ၽူႈဢွၼ်ၵေႃႇတင်ႈ မိူင်းၸိင်ႇၵပူဝ်ႇ ပိုၼ်းပွတ်းတီႈၵႅပ်ႈ Lee Kuan Yew  လီၵွၼ်ယူႉ ၽူႈဢွၼ်ႁူဝ်ၵေႃႇတင်ႈမိူင်းၸိင်ႇၵပူဝ်ႇ၊

    #Singapore

      မိူင်းၸိင်ႇၵပူဝ်ႇၼႆႉ ယူႇတီႈဢၼ်ၼႃႈၽႅၼ်ႇလိၼ်ၵႅပ်ႈၵႅပ်ႈဢွၼ်ႇသေ ႁဵတ်းႁႂ်ႈၵူၼ်းတင်းလုမ်ႈၾႃႉၶဝ်ႈၸႂ်ေသဢမ်ႇၵႃး ၽူႈလႂ်ၽႂ်ေၵႃႈၶႂ်ႈႁွတ်ႈ ၽႅဝ်ထိုင်ႄလႈ ပဵၼ်ဝႆႉလွင်ႈၼွၼ်းၾၼ် ၵူၼ်းႁဝ်းၵမ်ႈၽွင်ႈယူႇ၊သမ်ႉဝႃႈဢမ်ႇမီးၶူဝ်းၶွင်မေႃႇႁေႈမေႃႇၸိုၼ်းမေႃႇငိုၼ်းသေတႃႉၵေႃႈၶဝ်လႆႈၶတ်းၸႂ်သၢင်ႈလွင်ႈပၢႆးမၢၵ်ႈမီး လႄႈ ႁဵတ်းႁႂ်ႈမိူင်းၶဝ်ၶိုတ်းၵၢပ်ႈၶိုတ်းပၢၼ် ၸၼ်ႉလုမ်ႈၾႃႉဝႆႉယူႇ။

        မိူင်းၸိင်ႇၵပူဝ်ႇဢၼ်ဝႃႈၼႆႉ ယွၼ်ႉပိူဝ်ၼင်ႇႁိုဝ်တႃတေပဵၼ်မႃးမိူင်းဢၼ်ၶိုတ်းၵၢပ်ႈလႄႈပႆၢးမၢၵ်ႈမီးတဵမ်ထူၼ်ႈလီၼၼ်ႉ ၽူႈဢွၼ်ႁူဝ်ၶဝ် Lee Kuan Yew လီၵွၼ်းယူႉ ဢၼ်ပဵၼ်ၵူၼ်းၸၢဝ်းၶႄႇ ၸိူဝ်ႉၶိူဝ်းလီ(Lee) ၶဝ်ၼၼ်ႉ ပဵၼ်ၽူႈဢၼ်ဢွၼ်ဢဝ်မိူင်း ၸိင်ႇၵပူဝ်ႇပဵၼ်မႃးမိူင်းၵၢပ်ႈထိုင်ၸၼ်ႉလုမ်ႈၾႃႉလီလူင်မိူင်းၼိုင်ႈယူႇယဝ်ႉ။

        လီၵွၼ်းယူႉ ၼႆႉၵိူတ်ႇႁၼ်ၼႃႈမႃး မိူဝ်ႈပီ1923 လိူၼ်သဵပ်ႉတိမ်ႇပိူဝ်ႇ 16 ဝၼ်း တမ်ႈတီႈမိူင်းၸိင်ႇၵပူဝ်ႇယဝ်ႉ။ သႆၢၸိူဝ်ႉၶိူဝ်း ပူႇၼၢႆးမၼ်းၸၢႆးတႄႉ လႆႈၶၢႆႉမႃးယူႇတီႈမိူင်းၸိင်ႇၵပူဝ်ႇ မိူဝ်ႈႁူဝ်ပၢၵ်ႇပီ 19 ယႃႇၸူႉပီမိူင်းသေ ၶဝ်ပဵၼ်သႆၢႁိူဝ်ႇငိူၼ်ႈၶိူဝ်းၽူႈမၢၵ်ႈမီးၶိူဝ်းၼိုင်ႈယူႇ။

         လီၵွၼ်းယူႉၼႆႉ ပဵၼ်လုၵ်ႈၸၢႆးၵေႃႉယႂ်ႇသုတ်းၼႂ်းၼႃႈႁိူၼ်းၶဝ်သေ ၸဵမ်မိူဝ်ႈမၼ်းတိုၵ်ႉလဵၵ်ႉယူႇၼၼ်ႉ ယွၼ်ႉပိူဝ်ႈမၼ်းပဵၼ်ၵူၼ်းၵေႃႉဢၼ် မေႃတႅပ်းတတ်းႁတ်းႁတ်းႁၢၼ်ႁၢၼ်ၵေႃႉၼိုင်ႈသေဢမ်ႇၵႃး သမ်ႉမီးပႃးၼမ်ႉၵတ်ႉႁဵတ်းၽူႈဢွၼ်ႁူဝ်လႆႈထႅင်ႈ။

        မိူဝ်ႈမၼ်းၸၢႆးတိုၵ်ႉၵေႃႉလဵၵ်ႉယူႇၼၼ်ႉ ယွၼ်ႉပိူဝ်ႈပေႃႈမႄႈမၼ်းၸွမ်းလုမ်းလႃးတူၺ်းထိုင် သေဢမ်ႇၵႃး မၼ်းပဵၼ်ၵူၼ်းၵေႃႉဢၼ်မီးတၢင်းၶတ်းၸႂ်ႄလႈ မိူဝ်ႈပီ 1935 ၼၼ်ႉမၼ်းလႆႈထိၼိုင်ႈၼႂ်းႁူင်းႁဵၼ်းၸၼ်ႉငဝ်ႈတီႈမိူင်းၸိင်ႇၵပူဝ်ႇ မိူင်းႁူမ်ႈတုမ် မေလးသျႃးသေ မၼ်းလႆႈၶႂၢင်ႉတႃႇၶိုၼ်ႈႁူင်းႁဵၼ်းၸၼ်ႉသုင်ၸိုဝ်ႈသဵင်ယႂ်ႇၼႂ်းမိူင်းၸိင်ႇၵပူဝ်ႇ ဢၼ်မီးၸိုဝ်ႈဝႃႈ ရႃႇၽေး ၼၼ်ႉယူႇ။

        ၽိူဝ်ႇလႆႈၶိုၼ်ႈႁူင်းႁဵၼ်းရႃႇၽေးယဝ်ႉၼၼ်ႉ ယွၼ်ႉပိူဝ်ႈမၼ်းပဵၼ်ၵူၼ်းၵေႃႉဢၼ်မီးၼမ်ႉၵတ်ႉတေႉတေႉလႄႈ ၸင်ႇလႆႈႁပ်ႉငိုၼ်းၵမ်ႉၸွႆႈ တႃႇတေၶိုၼ်ႈ ၸၵေႃးလႃးသျိပ်ႉ (Scholarship) သေ မိူဝ်ႈပီ 1940 ၼၼ်ႉ လီၵွၼ်းယူႉ လႆႈသူးထိၼိုင်ႈၼႂ်းႁူင်းႁဵၼ်း (ၶိၼ်းပရိတ်ႉ ဢၼ်ၽုၺ်ႇဝႆႉတီႈ ၸိင်ႇၵပူဝ်ႇ၊မေလးသျႃႈၼၼ်ႉယဝ်ႉ။)

        မိူဝ်ႈၽွင်းသိုၵ်းလုမ်ႈၾႃႉပွၵ်ႈသွင်ၼၼ်ႉ လီၵွၼ်းယူႉ လႆႈၶိုၼ်းသိုပ်ႇၶိုၼ်ႈႁူင်းၶေႃးလဵၵ်ႉ ရႃႇၽေး ၵူၺ်းၼင်ႇၵဝ်ႇ။ ၽွင်းၼၼ်ႉ ယွၼ်ႉပိူဝ်ႈ ၵျႃႇမၼီႇၶဝ် ပိုတ်ႇပၢင်တိုၵ်းတင်းမိူင်းဝၼ်းတူၵ်း ၵုၼ်ဢူးရေႃးပ ယူးရုပ်ႉၼၼ်ႉလႄႈ ၵျပၢၼ်ႇၶဝ်သမ်ႉပိုတ်ႇပၢင်တိုၵ်းၸူး ၵုၼ်ဢေးသျႃး ၸဵင်ႇၸၢၼ်းၼႃႈဝၼ်းဢွၵ်ႇသေ ၸင်ႇႁွင်ႉဝႃႈၵၢပ်ႈပၢၼ် ၵျပၢၼ်ႇၼႆယဝ်ႉ  ၵွပ်ႈၸိူင်ႉၼၼ်ႄလႈ လီၵွၼ်းယူႉ ၸင်ႇလႆႈမီးတိုဝ်ႉတၢင်းလဵပ်ႈႁဵၼ်းဢဝ် လိၵ်ႈၵျပၢၼ်ႇလႄႈတင်းလိၵ်ႈၶႄႇယူႇ။

        မိူဝ်ႈပီ1943 ၼၼ်ႉ လႆႈၶဝ်ႈႁဵတ်းၵၢၼ် ႁွင်ႈၵၢၼ်ပိုၼ်ၽၢဝ်ႇၵျပၢၼ်ႇၶဝ် ဢၼ်ပဵၼ်ၽၢႆႇၽႃႇသႃႇၽၢႆႇဢင်းၵိတ်ႉ ၼၼ်ႉယူႇ၊ မိူဝ်ႈၽွင်းသိုၵ်းလုမ်ႈၾႃႉပွၵ်ႈၼၼ်ႉ လီၵွၼ်ယူႉ ပဵၼ်ၵူၼ်းထီႇၼဵဝ်ၵေႃႉၼိုင်ႈလႄႈမေႃပႅင်းၸႂ်ႉၵိၼ်တႃႇယူႇလွတ်ႈ ၵူၺ်းသိုဝ်ႉၵိၼ်ၶဝ်ႈမုၼ်း ဢၼ်ပိူၼ်ႈၶၢႆ ၸွမ်းၽင်ႇတၢင်းသေ လဵင်ႉဢသၢၵ်ႈတူဝ်ၵဝ်ႇမႃး ယၢပ်ႇယၢပ်ႇၽိုတ်ႇၽိုတ်ႇယူႇသေတႃႉၵေႃႈ ထိုင်မႃးပီ1949မႃးၼၼ်ႉ ငိုၼ်းဢၼ်မၼ်းၸၢႆးႁႃႁွမ်ၸူႉဝႆႉၼၼ်ႉ မၼ်းၸင်ႇဢဝ်ၸႂ်ႉတိုဝ်းႁႂ်ႈပဵၼ်တိုဝ်ႉတၢင်းလီ တႃႇၽဝတူဝ်ၵဝ်ႇသေ ၸင်ႇဢဝ်ငိုၼ်းၼၼ်ႉ ၵႂႃႇၶိုၼ်ႈႁဵၼ်း ၽၢႆႇပၵ်းပိူင် တီႈဝဵင်းလၢၼ်ႇတၢၼ်ႇ ၸိုင်ႈမိူင်းဢင်းၵိတ်ႉသေ ၸင်ႇလႆႈၶဝ်ႈၸႂ်လဵပ်ႈႁဵၼ်းမႃး ၽၢႆႇဝႃႇတ သူဝ်ႇသႄႇလိတ်ႉ ၶဝ်ယူႇ၊

        မိူဝ်ႈၽွင်းၼၼ်ႉ ယွၼ်ႉပိူဝ်ႈၵလႃးၼႃႈၽိူၵ်ႇၶဝ် ၸႅၵ်ႇၽႄၽိဝ်ၼိူဝ်ႉၶိူဝ်းၵူၼ်းသေ ၸႂ်ႉတိုဝ်းဝႃႇတ ၶူဝ်ႇလူဝ်ႇၼီႇယူႇၼၼ်ႉ မၼ်းၸၢႆးၸင်ႇမီးၸႂ်ဝႃႇတသၢၼ်ၶတ်းမႃးၼႂ်းၸႂ်မၼ်းယဝ်ႉ။

        မိူဝ်ႈပီ1947ၼၼ်ႉ မၼ်းၸၢႆးၸင်ႇလႆႈၵူပ်ႉၵူႈၵၼ်တင်း ၼၢင်းမီးၶျႃး ယဝ်ႉ၊ မိူဝ်းၽွင်းတိုၵ်ႉၶိုၼ်ႈႁူင်းႁဵၼ်းတီႈလၢၼ်ႇတၢၼ်ႇယူႇၼၼ်ႉ မၼ်းၸင်ႇႁႃႁူၺ်းၵူၼ်းၶိူဝ်း ၸိင်ႇၵပူဝ်ႇလႄႈမေလးသျႃးသေ လႆႈထုၵ်ႇလူင်ပွင်ၸိုင်ႈမိူင်းဢင်းၵိတ်ႉၶဝ် ပၵ်းတႃတူၺ်းဝႆႉၵေႃႉၼိုင်ႈယူႇၵွၼ်ႇ။

        ပီ 1950 ၼၼ်ႉမၼ်းၸၢႆးၸင်ႇလႆႈပွၵ်ႈၶိုၼ်းဝၢၼ်ႈၵဝ်ႇမိူင်းၼွၼ်းမၼ်း တီႈၸိင်ႇၵပူဝ်ႇသေ ၸင်ႇလႆႈၶဝ်ႈၸုမ်းၽၢႆႇၵၢၼ်မိူင်းၶဝ်တီႈၸိင်ႇၵပူဝ်ႇမႃး သိုပ်ႇဢွၼ်ႁူဝ်သၢၼ်ၶတ်းၼႄၵၢင်ၸႂ်ေတႃႇ ၶုၼ်ဢင်းၵိတ်ႉၶဝ်ယဝ်ႉ။

        ပီ1954 လီၵွၼ်းယူႉ ၸင်ႇၶွတ်ႇၽွတ်ႇၶိုၼ်ႈမႃး ၸုမ်းတူင်ႉၼိုင်ပႃႇတီႇၵူၼ်းမိူင်း ဢၼ်မီးၸိုဝ်ႈဝႃႈ People's Action Party -PAP ၼၼ်ႉယူႇ။ ၸုမ်းပႃႇတီႇ PAP ၶဝ်ၼႆႉ လႆႈတေႃႇသူႈတႂ်ႈမိုဝ်းၶုၼ်ဢင်းၵိတ်ႉၶဝ်ၽွင်းငမ်း ဝႆႉသေပိူၼ်ႈလႄႈ  ပႃႇတီႇ PAP ၵေႃႈ ပဵၼ်ပႃႇတီႇၵၢၼ်မိူင်းဢၼ်ႄၼၼမ်ႉ ၼႄတူဝ်ႄလႈၶိုၼ်ႈယႂ်ႇမႃးတေႉတေႉယူႇ။

        ပီ 1959 မႃး ယွၼ်ႉပိူဝ်ႈၵုၼ်ၸိင်ႇၵပူဝ်ႇၶဝ်လႆႈမီးလွင်ႈထၢင်ႇႁၢင်ႈၽွင်းငမ်း ႁင်းၶေႃမႃးလႄႈ လီႇၵွၼ်းယူႉ ၸင်ႇလႆႈၶၢမ်ႇလိူၵ်ႈတင်ႈပဵၼ်မႃး ၸွမ်ပွင်ၸိုင်ႈ မိူင်းမႂ်ႇၶွင်ၸိင်ႇၵပူဝ်ႇၶဝ်ယဝ်ႉ။

        ပီ1969 လိူၼ်ဢေႃးၵၢတ်ႉ(သ) 9 ဝၼ်းၼၼ်ႉ မိူင်းၸိင်ႇၵပူဝ်ႇၶဝ် ၸင်ႇတေႇၽၢတ်ႇဢွၵ်ႇ မိူင်းႁူမ်ႈတုမ် မေလးသျႃး သေ တေႇတင်ႈၸိုင်ႈမိူင်းလွတ်ႈလႅဝ်းသဝ်းမႃးႁင်းၵူၺ်းလႄႈ လီၵွၼ်းယူႉၸင်ႇလႆႈၶတ်းပူၵ်းပွင်ပၼ်ၵူၼ်းမိူင်း ႁႂ်ႈပဵၼ်မႃးမိူင်းဢၼ်မၢၵ်ႈမီးလီပဵၼ်ၼႂ်းလုမ်ႈၾႃႉမိူင်းၼိုင်ႈယဝ်ႉ။

        မိူင်းၸိင်ႇၵပူဝ်ႇၼႆႉၶဝ်ႈပႃးၼႂ်းမိူင်း ၸဵင်ႇၸၢၼ်းၼႃႈဝၼ်းဢွၵ်ႇဢေးသျႃး တၢင်းၵႂၢင်ႈၽႅၼ်လိၼ်ၶဝ်မီးမွၵ်ႈ 173 လၵ်းၵူၺ်း ၊ မိူဝ်ႈပီ 2004 ၼၼ်ႉ ႁူဝ်ၵူၼ်းမီးမွၵ်ႈ 4839400 ၵေႃႉသေ ၊ မိူဝ်ႈပီ 1959 ၼၼ်ႉ လီၵွၼ်းယူႉ တိုၵ်ႉလႆႈဢသၢၵ်ႈ 36 သေပဵၼ်ၸွမ်ပွင်ၸိုင်ႈ မိူင်းၸိင်ႇၵပူဝ်ႇယဝ်ႉ ၊ 

        ယွၼ်ႉပိူဝ်ႈဢသၢၵ်ႈတိုၵ်ႉလဵၵ်ႉလႄႈ မိူဝ်ႈၼၼ်ႉလႆႈထူပ်းတၢင်းယၢပ်ႇလူင်လၢင် တႃႇမၼ်းၸၢႆးတေႉတေႉ၊ ယွၼ်ႉပိူဝ်ႈဝႃႈ ၸုမ်းၶွမ်ႇမိဝ်ႇၼိတ်ႉၵူၼ်းၸိူဝ်း ဢၼ်ႁဵတ်းၵၢၼ်တႂ်ႈလိၼ်ၶဝ်သၢၼ်ၶတ်း၊ မီးလွင်ႈၵေႃႇၵၢၼ်ႁူၵ်ႉႁၢႆႉၼႂ်းမိူင်း၊ ၸုမ်းပႃႇတီႇ PAP ၶဝ်ထွၼ်တူဝ်ဢွၵ်ႇ၊ လူဝ်ႇငိုၼ်းၸႂ်ႉၸၢႆႇတႃႇၵၢၼ်ပူၵ်းပွင် ၼမ်ႁႅင်းသေ  ႁဵတ်းႁႂ်ႈၵၢၼ်ပႆၢးမၢၵ်ႈမီး မီးပၼ်ႁႃယႂ်ႇလူင်လၢင်တေႉတေႉ၊ မိူဝ်ႈၽွင်းၼၼ်ႉ လီၵွၼ်းယူႉ ၸင်ႇလႆႈႁႃလွၵ်းလၢႆးၵူႈၸိူဝ်ႉၵူႈပိူင်သေ တေၵႄႈလိတ်ပၼ် လွင်ႈၵၢၼ်ပၢႆးမၢၵ်ႈမီး၊ ၵၢၼ်ပၢႆးမိူင်း၊ တူင်ႇဝူင်းၵူၼ်း ၸိူဝ်ႉၼႆႉတေႉတေႉဝႃႈဝႃႈယူႇ။

        လီၵွၼ်းယူႉ ၼႆႉ ၼင်ႇႁိုဝ်ၵူၼ်းမိူင်းမၼ်း ေပႃးတေမီးၵၢၼ်ႁႃလဵင်ႉတွင်ႉ ႁႂ်ႈမၼ်ႈၵိုမ်းတႃႇၸၢတ်ႈပၢၼ်ၶဝ်ၼၼ်ႉသေဢမ်ႇၵႃး မၼ်းၸင်ႇႁႃၵူႈလွၵ်းၵူႈလၢႆးသေၶတ်းၸႂ်မႃးတေႉတေႉဝႃႈဝႃႈ လႄႈ ၸင်ႇလႆႈတမ်းပၵ်းပိူင်ႁၢဝ်ႈႁႅင်းတႃႇၵူၼ်းမိူင်းယူႇယဝ်ႉ၊ ပၵ်းပိူင်ဢၼ်လႆႈတေႇတမ်းဝၢင်းပၼ် ႁႂ်ႈၵူၼ်းမိူင်းပေႃးမေႃယူႇမူတ်းမူတ်းသႂ်သႂ်ၼၼ်ႉတႄႉ၊ တေဢမ်ႇလႆႈပႅတ်ႈယုၵ်းယၢၵ်းၸွမ်းတၢင်း ၶႅပ်ႇတၢင်း ၊ထၢင်ဢၼ်ၵူၼ်းၼမ် ၸႂ်ႉတိုဝ်းၼၼ်ႉ သင်ဝႃႈၶိုၼ်ႈယဝ်ႉလႄႈဢမ်ႇလၢင်ႉၸွမ်းၸိုင် ပေႃးႁၼ်ၼႆ ၺႃးတၢမ်ႇငိုၼ်းၼႆယဝ်ႉ၊ ယွၼ်ႉၼၼ်ႄလႈ မိူင်းၸိင်ႇၵပူဝ်ႇၸင်ႇပဵၼ်မႃးမိူင်း မူတ်းသႂ်လီမိူင်းၼိုင်ႈလႄႈ မိူင်းဢၼ်မီးပၵ်းမီးပိူင် မိူင်းၼိုင်ႈယဝ်ႉ။

        ၼင်ႇႁိုဝ်တေဢမ်ႇတိူဝ်ႉၶိူၵ်ႈလွင်းမူတ်းသႂ်မိူင်းၼိုင်ႈၼၼ်ႉ လီၵွၼ်းယူႉ ၸင်ႇႁၢမ်ႈပႃး လွင်ႈၵိၼ်ပီႇၵေႇ လႄႈ လွင်ႈၵိၼ်ပူႉထႅင်ႈ။ ၼင်ႇႁိုဝ်ၽူႈႁၢပ်ႇၵၢၼ်လူင်ပွင်ၸိုင်ႈၶဝ် တေဢမ်ႇၵိၼ်ငိုၼ်းသူငိုၼ်းလၢပ်ႈၼၼ်ႉၵေႃႈ မၼ်းလႆႈတမ်းဝၢင်း ပၼ်ငိုၼ်းလိူၼ်ၶဝ်တဵမ်တဵမ်ထူၼ်ႈထူၼ်ႈယူႇ။ ယွၼ်ႉၼၼ်ႄလႈ ငိုၼ်းလိူၼ်လူင်ပွင်ၸိုင်ႈ ၸိင်ႇၵပူဝ်ႇ ၼႆႉတေၼမ်လိူဝ်သေလူင်ပွင်ၸိုင်ႈ မိူင်းႁူမ်ႈတုမ် ဢေမႇရီးၵႃးၶဝ်ဝႆႉယူႇ။

        မိူင်းၸိင်ႇၵပူဝ်ႇၼႆႉ ယွၼ်ႉသင်ႄလႈ လႆႈပဵၼ်မိူင်းဢၼ်ၶိုၼ်ႈယႂ်ႇမၢၵ်ႈမီး လီပဵၼ်ၼႆၸိုင် ယွၼ်ႉပိူဝ်ႈဝႃႈပဵၼ်မိူင်းဢၼ် ဝၢၼ်ႈမိူင်းၼိမ်သဝ်းလႄႈဢမ်ႇမီး လွင်ႈသုၵ်ယုင်ႈဢူၼ်ဢၢၼ်သင်ၼၼ်ႉယဝ်ႉ။ 

        မိူဝ်ႈၼႂ်းပီ1959ၼၼ်ႉယွၼ်ႉပိူဝ်ႈ လီၵွၼ်းယူႉ ၵေႃႇတင်ႈၶိုၼ်ႈမႃးပႃႇတီႇ PAP ၶဝ်ႄလႈ ပႃႇတီႇPAP ၶဝ်ၸင်ႇလႆႈဢၢမ်းၼၢတ်ႈသေပွင်ၵၢၼ်မိူင်းယူႇယဝ်ႉ။

        မိူင်းၸိင်ႇၵပူဝ်ႇၶဝ်တိုၼ်းဝႆႉၼမ်ႉၼၵ်းလိူဝ် ၼိူဝ်ၵၢၼ်မိူင်း ပၢၼ်သိုပ်ႇပၢၼ်ဝႃႈၼႆ၊ တေလႆႈဝႃႈယွၼ်ႉပိူဝ်ႈမီးၽူႈဢွၼ်ႁူဝ် မိူၼ်ၼင်ႇ လီၵွၼ်းယူႉ ၵေႃႉဢၼ်မီးတၢင်းၶတ်းၸႂ် ၊ မီးၼမ်ႉၵတ်ႉ ၊ မီးတၢင်းႁူႉႁၼ် လႄႈ မီးၺၢၼ်ႇပၼ်ႇၺႃႇယႂ်ႇ  ပဵၼ်ၽူႈဢၼ်မီးၵႃႈၶၼ်တႃႇ ဝၢၼ်ႈမိူင်းၸိင်ႇၵပူဝ်ႇတေႉတေႉဝႃႈဝႃႈႁၼ်ထိုင်ၼင်ႇၼႆ။

        ၶေႃႈႁၼ်ထိုင် လီၵွၼ်ယူႉ ပဵၼ်ၽူႈဢၼ်ၵေႃႇတင်ႈၶိုၼ်ႈမႃး ပႃႇတီႇ PAP သေ ၶတ်းၸႂ်ပူၵ်းပွင်တႃႇၸိူဝ်ႉၶိူဝ်းဝၢၼ်ႈမိူင်းလႄႈ မိူၼ်ၼင်ႇၽူႈပၼ်ႁႅင်း ပႃႇတီႇ ႁူဝ်သိူဝ်တင်းသိူဝ်ၽိူၵ်ႇ လီဢဝ်ပဵၼ်တူဝ်ယင်ႇ ပိူင်တႅၵ်ႈသေ ပေႃးထိုင်ပၢင်လိူၵ်ႈတင်ႈမႃးထႅင်ႈ ႁဝ်းၶႃႈၵူၼ်းမိူင်းဢမ်ႇထုၵ်ႇလီၽိတ်းမေႃးၵၼ် မိူၼ်ၵႃႈၵွၼ်ႇပူၼ်ႉမႃးၼၼ်ႉ ၊ ယူႇဝၢၼ်ႈမိူင်းလႂ်ေၵႃႈ ႁႂ်ႈပဵၼ်ၽူႈဢၼ်မီးလွင်ႈၵၢၼ်လဵပ်ႈႁဵၼ်း လူၺ်ႈၵၢၼ်မိူင်း ၼႂ်းမိူင်းမၢၼ်ႈ လႄႈၵူႈမိူင်းမိူင်းယူႇ၊

        ပဵၼ်ၽူႈၵေႃႉဢၼ်ႁဵတ်းၵၢၼ် ၵိၼ်ၸၢင်ႈပိူၼ်ႈ တီႈမိူင်းထႆးႁႃႉမိူင်းၶႄႇ ဢမ်ႇၼၼ်ၵူႈမိူင်းမိူင်းၵေႃႈယဝ်ႉ ပေႃးသူၸဝ်ႈမီးၶၢဝ်းတၼ်းၸိုင် ႁႂ်ႈၶတ်းလဵပ်ႈႁဵၼ်းပႆၢးပၼ်ႇၺႃႇလႄႈ ဢမ်ႇၼၼ်ဢဝ်လုၵ်ႈလၢၼ်သူၸဝ်ႈ ၶိုၼ်ႈႁူင်းႁဵၼ်းလႄႈ ၵၢၼ်ႁႆႈၵၢၼ်ၼႃးၼၼ်ႉ ပၢၼ်သိုပ်ႇပၢၼ်ဢမ်ႇၸၢင်ႈသုတ်းသဵင်ႈလႆႈသေတႃႉၵေႃႈ ၵၢၼ်ပႆၢးပၼ်ႇၺႃႇၵေႃႈတိုၼ်းဢမ်ႇမေႃသုတ်းသဵင်ႈတႃႇၸူဝ်ႈပၢၼ်ၵူၼ်းလႃးလႃး၊ ယူႇတီႈလႂ်ေၵႃႈ ႁႂ်ႈႁူႉဝႃႈ သူၶဝ်ႁဝ်းႁႃး မီးဝၢၼ်ႈမိူင်းတူဝ်ၵဝ်ႇႁင်းၵူၺ်း မီးၽႃႇသႃႇၵႂၢမ်းလၢတ်ႈ၊ ၽိင်ႈထုင်း၊လိၵ်ႈလၢႆးတူဝ်ႇၵဝ်ႇ ႁင်းၵူၺ်းယူႇၼႆၼၼ်ႉ ယႃႇေပလိုမ်းလိုမ်းလႃးလႃးတႃႉ၊ 

        သင်တေပႂ်ႉၼေႃႇတႅၼ်းၶိူဝ်းပိူင်လဵဝ်သေ သမ်ႉဢမ်ႇမီးလွင်ႈပူၵ်းပွင်ပၼ်ၶဝ်ၼႆတႄႉ မိူၼ်ၵၼ်တင်းႁဝ်းပဵၼ် ပၢင်တၢႆးမွင်းၼွၵ်ႇၵူၺ်း ၵွပ်ႈၼၼ်ပွင်ႇၸႂ်ႁူႉႁၼ်ၵႃႈႁိုဝ်ၵေႃႈ ပူၵ်းပွင်ပၼ်ၼမ်ႉၵတ်ႉ သႅၼ်းႁုၼ်ႈမႂ်ႇႁဝ်းၼမ်ၼမ်သေၵမ်းၶႃႈ။

လီၵွၼ်းယူႉတေႃႇသူႈၸိူင်ႉႁိုဝ်

တၢင်းႁၢင်ႈလိၸိင်ႇၵပူဝ်ႇ  https://www.facebook.com/IAmSreeragNK/videos/476811486063285/

ၶေႃႈၵႂၢမ်း

“Please do not assume that you can change governments.” “Young people don’t understand this.”

ၼပ်ႉယမ်ယႂ်ႇၼမ်သေ   #သႅင်ၶဵဝ်တႆး                                                                           #Shanbooks  #Parliament #Master 

#Scholarship #Education #school  #Leadership #LeeKuanYew #လီကွမ်ယူး #Singapore #General #ၽူႈဢွၼ်ႁူဝ် #လီၵွၼ်းယူႉ #PAP #Party #NUS #public #Policy #peace #freedom