ၶေႃႈၶႂ်ႈၽၢၵ်ႇ တႃႇ 2021 ထိုင်ၽူႈလူလိၵ်ႈ

 ၼင်ႇဝႃႈယဝ်ႉၶၢဝ်းယၢမ်းဢမ်ႇပႂ်ႉၽႂ် ၶၢဝ်းယၢမ်းၵေႃႈသဵင်ႈမူတ်းၵႂႃႇၵူႊမိုဝ်ႉၵူႊဝၼ်းၵူႊလိူၼ်သေယဝ်ႉ ပီႊ 2020ၵေႃႈတေႃႈတေမူတ်းသဵင်ႈၵႂႃႇ ပီႊ 2021ၵေႃႈတေႃႈတေႁွတ်ႈမႃးယူႇဢမ်ႇႁၢင်ႉယဝ်ႉ။

ၼႂ်းပီႊ 2020 ၼႆႉၵူၼ်းဢၼ်လႆႈထူပ်းလွင်ႈလီၵေႃႈတေမီးၵူၼ်းဢၼ်လႆႈထူပ်းလွင်ႈႁၢႆႉၸႃႉၵေႃႈတေမီးၵူၼ်းဢၼ်လႆႈၸႂ်ပီႊ 2020 ၵေႃႈတေမီးဢၼ်ဢမ်ႇလႆႈၸႂ်ေၵႃႈတေမီးယူႇ၊ လႆႈၸႂ်ႁိုဝ်ဢမ်ႇလႆႈၸႂ်ေၵႃႈယႃႇပီႊ 2020တေႉတေမူတ်းယူတ်းသဵင်ႈၵႂႃႇသေပီႊ 2021တေမႃးထိုင်ယဝ်ႉ။

ၼႂ်ႈပီ2020ၼႆႉဢမ်ႇတၼ်းလႆႈႁဵတ်းသၢင်ႈဢၼ်ၸဝ်ႈၵဝ်ႇၶႂ်ႈပဵၼ် ဢမ်ႇတၼ်းပၼ်ၶၢဝ်းယၢမ်းတူဝ်ၵဝ်ႇႁႃတၢင်းႁူႉ ၵုမ်ႇလႆႈသုၵ်ႉၸွမ်းၼႃႈၵၢၼ် လွင်ႈၼႃႈႁိူၼ်း ၵၢၼ်ၸိူဝ်ႉ ၵၢၼ်ၶိူဝ်းၸဝ်ႈၵဝ်ႇၼႆၵေႃႈဝႆႉသေၵွၼ်ႇ ၵူၺ်းၵႃႈၼႂ်းပီႊ 2021ပီႊမႂ်ႇမႃးၼႆႉ ၶတ်းၸႂ်ႁဵတ်းလွင်ႈဢၼ်ႁဝ်းၶႂ်ႈပဵၼ် ဢၼ်ႁဝ်းႁၵ်ႉသႃ   ပၼ်ၶၢဝ်းယၢမ်းတူဝ်ၵဝ်ႁႃလဵပ်ႈႁဵၼ်းတၢင်းႁူႉၽွင်ႈလႄႈ။

တွၼ်ႈတႃႇပီႊ 2021ၼႆႉတေဢဝ်လိၵ်ႈၽၢၵ်ႇတွၼ်ႈထိုင်ပၼ်ဢူၺ်းၵေႃႉၽူႈႁၵ်ႉသႃလိၵ်ႈလၢႆးတႆးႁဝ်းၶဝ်ၸွမ်းလူၺ်ႈႁူဝ်ၶေႃႈ"လူလိၵ်ႈလႄႈ"ၼႆၼၼ်ႉသေ တေမႃးၽၢၵ်ႇတွၼ်ႈပၼ်ဢူၺ်းၵေႃႉၶဝ်ၵႂႃႇၶႃႈဢေႃႈ။

ၵူၼ်းႁၢင်ႈလီၵူႊၵေႃႉ ဢမ်ႇၵႆႉလူလိၵ်ႈၼႆသေတႃႉၵေႃႈ ၵူၼ်းလူလိၵ်ႈၵူႊၵေႃႉၼႆႉ တိုၼ်းႁၢင်ႈလီတင်းတူဝ်တင်းၸႂ်ယဝ်ႉ။

လိၵ်ႈလၢႆးၼႆႉလႅၵ်ႈလၢႆႈပၼ် ၸႂ်ၵူၼ်းႁဝ်းႁႂ်ႈႁၢင်ႈလီၼၼ်ႉယဝ်ႉ။ပေႃးၼမ်ႉၸႂ်ႁၢင်ႈလီၵေႃႈ ႁၢင်ႈၽၢင်ႁဝ်းၵေႃႈႁၢင်ႈလီလႅၵ်ႈလၢႆႈမႃးၸွမ်းယဝ်ႉ။

လိၵ်ႈလၢႆးၼႆႉ သင်သွၼ်ပၼ်ႁႂ်ႈႁဝ်းမေႃၵႅၼ်ႇၶႅင်ၼႅၼ်ႈၼႃမႃးလႄႈ  တေမီးလွင်ႈၼိမ်ယဵၼ်မႃးယဝ်ႉ။

လိၵ်ႈလၢႆးၼႆ့သင်သွၼ်ပၼ်ၸႂ်ၵူၼ်းႁဝ်းႁႂ်ႈယဵၼ်ႇငႄႈဢူၼ်ႈဢွၼ်ႇမႃးလႄႈႁၢင်ႈၽၢင်ႁဝ်းၵေႃႈတေမီးလွင်ႈဢူၼ်ႈဢွၼ်ႇႁၢင်ႈလီမႃးယဝ်ႉ။

လိၵ်ႈလၢႆးၼႆႉ သင်ႇသွၼ်ပၼ်ၵူၼ်းႁဝ်း ႁႂ်ႈမေႃမီးလွင်ႈႁၼ်ထိုင်ၵၢင်ၸႂ်ၼိူဝ်ၵၼ်၊ၸႂ်ေဢးလူ၊ၸႂ်မဵတ်ႉတႃႇၼူိဝ်ၵၼ်ႄလႈ ႁၢင်ႈၽၢင်ႁဝ်းၵေႃႈတေၼႃႈလီႁၵ်ႉမႃးယဝ်ႉ။

လိၵ်ႈလၢႆးၼႆႉ ႁဵတ်းႁႂ်ႈႁဝ်းမေႃဝူၼ်ႉသွၼ်ႇလွင်ႈၽိတ်းလွင်ႈထုၵ်ႇလႄႈ ပၼ်ႁႃသင်သေဢမ်ႇဝႃႈ  တေၵေႈၶႆငၢႆႈလူမ်ၸႂ်ၼၼ်ႉယဝ်ႉ။

ၵူၼ်းလူလိၵ်ႈၵူႊၵေႃႉ ဢမ်ႇပဵၼ်ၵူၼ်းမၢၵ်ႈမီးသေတႃႉၵေႃႉ ၵူၼ်းမၢၵ်ႈမီးၵူႊၵေႃႉၼႆႉၶဝ်တိုၼ်းပဵၼ်ၵူၼ်းလူလိၵ်ႈယဝ်ႉ။

ၶႂ်ႈႁႂ်ႈၵူၼ်းႁၵ်ႉၵူၼ်းမိုတ်ႈၵူၼ်းႁူၸၵ်းၼမ်ႁႃႉ?။လူလိၵ်ႈလႄႈ လိၵ်ႈၼႆႉတေႁဵတ်းႁႂ်ႈႁဝ်းမေႃၶဝ်ႈဢွၵ်ႇၵူၼ်းတင်းၼမ်ႄလႈမေႃၶဝ်ႈဢွၵ်ႇၼႂ်ႈတူင်ႇဝူင်းၵူၼ်းႁဝ်းႁႂ်ႈငၢႆႈလူမ်ၸႂ်ၼၼ်ႉယဝ်ႉ။

တႃႇႁႂ်ႈပိုၼ်ႈထၢင်ႇယႂ်ႇႁဝ်းၼၼ်ႉ ဢမ်ႇတၢပ်ႈလူဝ်ႇၼုင်ႈၶူဝ်းၶိုၵ်ႉၶႅမ်ႉၵႃႈၶၼ်ယႂ်ႇၼႄပိူၼ်ႈ။လူလိၵ်ႈသေ ယုၵ်ႉယွင်ႈၵႃႈၶၼ်တူဝ်ၸဝ်ႈၵဝ်ႇဢဝ်ႄလႈ(ဢမ်ႇၸႂ်ႈႁႂ်ႈထၢင်ႇယႂ်ႇတူဝ်)။ယူႇယူႇၵေႃႈပိူၼ်ႈတေၼပ်ႉယမ်ဝႆႉၵႃႈၶၼ်ထၢင်ႇယႂ်ႇႁဝ်းႁင်းၵူၺ်းယဝ်ႉ။

လွင်ႈမိူဝ်းၼႃႈႁဝ်းတေပဵၼ်သင်မႃးၼၼ်ႉ ဢမ်ႇတၢပ်ႈလူဝ်ႇၵႂႃႇထၢမ်မေႃတႂၢၵ်ႈ၊ပေတၢင်ႇ ၵႃႇလႃးသင် ၵမ်ႉတေၽိတ်းပိူင်ႈဢိူဝ်ႈ။ လူလိၵ်ႈသေ ဢဝ်ဢဵၼ်ႁႅင်းလူင်ၼႂ်းလိၵ်ႈလၢႆးၼႆႉ ႁၢင်ႈႁႅၼ်းၶဵင်ႇတႃႉၶၢမ်ႈပူၼ်ႉလွင်ႈယၢပ်ႇဢၼ်တေပဵၼ်မႃးၼၼ်ႉလႄႈ ၵူႊဝၼ်းဝၼ်းၼႆႉၵေႃႈ တေယူႇငၢႆႈလူမ်ၸႂ်မႃးဢိူဝ်ႈ။

ၶႂ်ႈတွပ်ႇတႅၼ်းၵုင်ႇမုၼ်ပေႃႈမႄႈႁႃႉ?။ႁႃငိုၼ်းသေယိုၼ်ႈမႅင်ႇပၼ်လွင်ႈလဵဝ်ၵူၺ်းတေႉ တေပႂ်ႇၵုမ်ႇထူၼ်ႈလႆႈ။ လူလိၵ်ႈသေ ပေႃးပွင်ႇၸႂ်လွင်ႈ"ဝတ်ႈတြႃးလုၵ်ႈလၢင်း"မႃးယဝ်ႉၼႆ တွၼ်ႈတႃႇတွပ်ႇၵုင်ႇမုၼ်ပေႃႈမႄႈႁဝ်းၼၼ်ႉ ႁဝ်းတေႁူႉ လွၵ်းလၢႆး မီးၸိူင်ႉႁိုဝ်ၼႆယူႇ။

ၶႂ်ႈပဵၼ်ၵူၼ်းၵတ်ႉၵူၼ်းၶႅၼ်ႁႃႉ?။ပဵၼ်ၵူၼ်းမီးပၺ်ႇၺႃလႄႈလႆႈၸုမ်ႈၶူးၵူၺ်းတေႉ ပႆႇၵုမ်ႇထူၼ်ႈလႆႈ။ လႆႈၸုမ်ႈၶူးမိူဝ်ႈဝႃး မိူဝ်ႈၼႆႉဢမ်ႇလူလိၵ်ႈ မိူဝ်ႈၽုၵ်ႈတေပဵၼ်ၵူၼ်း ဢမ်ႇႁူႉလိၵ်ႈယဝ်ႉ။ လူလိၵ်ႈလႄႈ တေပဵၼ်ၵူၼ်းၵတ်ႉၵူၼ်းၶႅၼ်ႇမႃးဢိူဝ်ႈ။

ဢမ်ႇမီးၽႂ် လူလိၵ်ႈသေ ပဵၼ်ၵူၼ်းၺၢမ်ႉၶုၺ်ႈယုပ်ႈယွမ်းၵႂႃႇသေၵေႃႉလူး။

ၼႂ်းပီႊမႂ်ႇလုၵ်ႈလူမ်ႈၾႃႉ 2021ၼႆႉ ယူႇတီႈၽူႈတႅမ်ႈလိၵ်ႈသေ ယွၼ်းသူးပၼ်ႁႂ်ႈဢူၺ်းၵေႃႉၽူႈႁၵ်ႉသႃလိၵ်ႈတႆးႁဝ်းၶဝ်ၵူႊၵေႃႉ ႁႂ်ႈမီးတူဝ်ၸႂ်သွင်ပႃးၵတ်းယဵၼ်သေ သိုပ်ႇႁၵ်ႉသႃလိၵ်ႈလၢႆးတႆးႁဝ်းၵႂႃႇၶၢဝ်းၼႃႈႄလႈ ႁႂ်ႈပဵၼ် ၵူၼ်းၵႆႉလူလိၵ်ႈ တႅမ်ႈလိၵ်ႈ ဝူၼ်ႉၸွမ်းတၢင်းႁူႉၼႂ်းလိၵ်ႈ ဢဝ်လိၵ်ႈထႅမ်တၢင်းႁူႉ ပဵၼ်ၵူၼ်းၵတ်ႉၶႅၼ်ၵႂႃႇၵူႊၽႂ်မၼ်းသေၵမ်း။

တႅမ်ႈ #မူဝ်ႁိူင်း