ၾိင်ႈၶူင်းၵၢင် လႄႈ တၢင်းၶတ်းႁႅင်း

                         

မွၵ်ႇၵုမ်ႈတႄႉ ပိဝ်ၸွမ်းလူမ်းထွင်းယူႇၼိူဝ်ၵၢင်ႁၢဝ်ၵမ်းၼိုင်ႈၸိုၼ်ႈပၢင်ႇ ၵမ်းၼိုင်ႈႁၢင်ႇႁီႈႁၢင်ႇႁၢႆးထႅင်ႈၵမ်းၼိုင်ႈ ၶိုၼ်းၶၢႆးလူင်းယဵၼ်းပဵၼ်ၾူၼ်။

ၵူၺ်းၵႃႈ- ၵၢင်ႁၢဝ်ၶၢဝ်သႂ်ၶဝ်တႄႉ ၼိမ်ယဵၼ်ဝႆႉယူႇတီႈၼိူဝ်သုင်။

ၽိဝ်ၼမ်ႉပၢင်ႇလၢင်ႇ လူမ်းမၢႆႇဢိူမ်ႈထွင်းထူဝ်းသေဢုၼ်ႇႁွၼ်ႁွၼ် လေႃး ၵတ်းငွၼ်းငွၼ်းၼမ်ႉပၢင်ႇလၢႆႇတီႈလိုၵ်ႉတွၼ်းတႄႉ သွမ်ႇသႂ်ၸိုၼ်ႈယဵၼ်လီ။

 ၵူၺ်းၵႃႈ- သၢပ်ႇၼမ်ႉပၢင်ႇလၢႆႇႁိမ်းၾင်ႇမၼ်းတႄႉၶေႉၵၼ်ၶုၼ်ႇဢူၼ် ၼုၵ်းၵူဝ်ႈလေႃးသၢႆး မၼ်းပၢႆးမႃးပႃးၵိူဝ်ဝူၺ်ႇႁင်ႈဝႆႉ။

ၵူၼ်းမိူင်းၶူင်းၵၢင်ၼႆႉ မိူၼ်လုၵ်ႈဢွၼ်ႇၶဝ် ၵွပ်ႇဢဝ်သၢႆးၽွင်သေ ၵေႃႇသၢင်ႈလႅၼ်ႊႁိူၼ်း မိူၼ်တီႈသဝ်းတီႈယူႇ ႁႃဢဝ်ၵၢပ်ႇႁွႆလဵၼ်ႈလူၺ်ႈၵၼ်ပဵၼ်မူႇယူႇၸွမ်းၾင်ႇၼမ်ႉၶူင်းၵၢင်ၽႂ်မၼ်းသေ  ၵမ်ႈၽွင်ႈသမ်ႉ ပိတ်းဢဝ်မႂ်မႆႉႁဵတ်းႁိူဝ်းမၢင်ႇၵိူဝ်းတေလႆႈပွႆႇလႆလဵၼ်ႈ သိူဝ်းမူၼ်ႈၸွမ်းသၢႆၼမ်ႉထွင်းၸူဝ်ႈပၢၼ်ၶဝ်ယူႇ၊

ၵူၺ်းၵႃႈ-လုၺ်းၼမ်ႉဢိၵ်ႇႁႃပႃၵေႃႈ ၶဝ်ဢမ်ႇမေႃ  မိူဝ်ႈၽွင်း မေႃပႃ တိုၵ်ႉၺွပ်းပႃ လႄႈယၢမ်းမိူဝ်ႈ ၵူၼ်းၵႃႉၶဝ် တိုၵ်ႉၶီႇႁိူဝ်းဢွၵ်ႇၶၢဝ်းတၢင်းလွင်ႈလႆမိူဝ်းၸွမ်းပၢင်ႇလၢႆႇယူႇၼၼ်ႉ-ၵူၼ်း ၼင်ႇလုၵ်ႇဢွၼ်ႇၶဝ်တႄႉ ၵဵပ်းဢဝ်မၢၵ်ႇႁိၼ်ႁႄႈ ထိုမ်ႈပႅတ်ႈတူၵ်းၵႂႃႇၼႂ်းၼမ်ႉသေ ပွႆႇၶၢဝ်းယၢမ်းမီးၵႃႈၶၼ်ၶဝ် မူတ်းပႅတ်ႈလၢႆလၢႆယူႇ။

 ၼမ်ႉပၢင်ႇလၢႆႇတႄႉ  ဢဝ်တင်းႁႅင်းႁွၼ်မၼ်းသေ ႁုၼ်ႉၶူဝ်တေႃႇၶဝ်၊ပၢင်ႇၵႂၢင်ႈႁၢတ်ႇသၢႆးသမ်ႉ  ဢဝ်တင်းႁႅင်းလႅတ်ႇလႅင်ႉမၼ်းသေ ယုမ်ႉၼူဝ်တေႃႇၶဝ်၊ ၸိူင်ႉၼင်ႇ မႄႈၸဝ်ႈၵႄးၸူးၶွၼ်းၵႆဢူႇၼွၼ်း ဢိုၼ်းဝွၼ်းလုၵ်ႈလၢင်း တႃႇဝၢင်းႁူဝ်လိုဝ်ႈမွႆႈၼၼ်ႉ-ႁွၼ်ၼမ်ႉပၢင်ႇလၢႆႇၵေႃႈ  ၸွႆႈႁွင်ႉသႅၼ်ႇသဵင်ၽဵင်းၵႂၢမ်း ဢၼ်ႁၢမ်းတီႈပွင်ႇသေ ပၼ်တၢင်းဝွၼ်းဝၢၼ်ၸႂ်မူၼ်ႈႁူတေႃႇလုၵ်ႈဢွၼ်ႇၶဝ်ယူႇ။

ယၢမ်းၼၼ်ႉ ၵူၼ်းမိူင်းၶူင်းၵၢင်ၶဝ်ဢွၼ်ၵၼ် တဝ်ဢူၼ်ပၼ်းၵဝ်း ယူႇသဝ်းၼုၵ်းထူ မိူၼ်ၾိင်ႈပဵၼ်လုၵ်ႈဢွၼ်ႇ ဢမ်ႇႁူႉသင်ၶဝ်ဢဝ်တင်း '' ဢတ်ႉတ ဢၼ်ဝႃႈ ၵဝ်ၵဝ် '' ၼၼ်ႉသေမေႃဢီးလူ မေႃးပႅင်းၸင်း တေႃႇႁင်းၵၼ်ဝႆႉယူႇ။

 ယၢမ်းၼင်ႇၼၼ် လူမ်းလႅင်ႉလူင် ပတ်ႉထူဝ်းထွင်းပဝ်ႇၼႂ်းႁူၺ်ႈလဝ်ႇလိုၵ်ႉဢမ်ႇလိူၵ်ႈ ထိုင်တိူၵ်ႈၾႃႉၵၢင်ႁၢဝ်သွမ်ႇၼႂ်းယွမ်ႇယုမ်းၶိူဝ်း ဢဝ်ႁႅင်းမၼ်းပတ်ႉတႅင်းတွင်ႈပၢင်ႇမိူဝ်းၵႂႃႇမူတ်းယဝ်ႉ။

ၼိူဝ်ၽိဝ်ၼမ်ႉလႆ သဵၼ်ႈတၢင်းသၢႆပၢင်ႇလၢႆႇ  လူမ်းလႅင်ႉႁွၼ်ၼမ်ႉ မေႃထွင်းပၢႆႇ   ႁႂ်ႈႁိူဝ်းပိၼ်ႈငူပ်ႉၸူမ်လူမ်ႉပင်း ၽင်ႇၽႅၼ်းပိုၼ်ႉႁိူဝ်းၵႅၼ်ႇၵိၵ်းၵေႃႈ  ႁိုဝ်ၼပ်ႉတေႃႈၶဵင်ႇတႃႉလႆႈ ႁႅင်းဢီးႁုင်သၽႃႇဝႁႅင်းၼမ်ႉၾိင်ႈၶူင်းၵၢင်လူင်။

 ယွၼ်ႉၼႆလႄႈ- ၶုၼ်တၢႆမရၼၼႆႉ  ဢမ်ႇလိူၵ်ႈၶၢဝ်းယၢမ်း ဢမ်ႇလိူၵ်ႈၶိူဝ်းၵူၼ်း ဢမ်ႇလိူၵ်ႈဢွင်ႈတီႈ ဢမ်ႇလိူၵ်ႈဢႃႇယုပၢၼ်ဢမ်ႇလိူၵ်ႈၽၢၼ်ႁိုဝ်မီးဢမ်ႇလိူၵ်ႈပီးႁိုဝ်ယွမ်ဢမ်ႇလိူၵ်ႈၸၼ်ႉသုင်ႁိုဝ်တႅမ်ႇဢမ်ႇပႂ်ႉၶေႃႈတႅပ်းတတ်းၽႂ်သေတႃႇထွတ်ႇထွၼ်ဢဝ်ၸႂ်ၵူၼ်း ႁႂ်ႈလူႉၶွႆႈတၢႆၼၼ်ႉ မၼ်းႁွတ်ႈၽႅဝ်ဝႆႉယူႇၵူႈတီႈ။

ဝႃႈၼၼ်သေတႃႉ ယၢမ်းၼၼ်ႉ ၵူၼ်းမိူင်းၶူင်းၵၢင်ၶဝ် ဢွၼ်ၵၼ် တဝ်ဢူၼ်ပၼ်းၵဝ်း ယူႇသဝ်းၼုၵ်းထူ မိူၼ်ၾိင်ႈပဵၼ်လုၵ်ႈဢွၼ်ႇ ဢမ်ႇႁူႉသင်ၶဝ် ဢဝ်တင်း '' ဢတ်ႉတ ဢၼ်ဝႃႈ ၵဝ်ၵဝ် '' ၼၼ်ႉသေ မေႃဢီးလူ မေႃးပႅင်းၸင်း တေႃႇႁင်းၵၼ်ဝႆႉယူႇ။

 ဢေႃး .... မိူင်းၵူၼ်းလူင်ၼႆႉ  မၼ်းမိူၼ်ၾင်ႇၼမ်ႉလူၵ်ႈၶူင်းၵၢင်ဝႆႉၼႆ ဢဝ်ၸႂ်ဢၼ်ႁူႉပွင်ႇလႆႈလွင်ႈမၼ်းၼၼ်ႉသေ  ဢမ်ႇၸၢင်ႈပိၼ်ႇပႅင်ႈလႆႈတၢင်းမူတ်းၼင်ႇၸႂ်မီးၵေႃႈၶိုၼ်းဢီးႁႅင်းတိုၼ်ႇတူဝ်ၸိုၼ်ႇၸႂ်တူဝ်ၵဝ်ႇသေၶတ်းတႃႉတေႃႇသူႈၾိင်ႈၶူင်းၵၢင်ယဝ်ႉၸတ်းၵၢၼ်တူဝ်ႁႂ်ႈတူင်ႉတိုၼ်ႇလႄႈ ယႃႇၽူမ်ႈၶႂင်ထတ်းသၢင်ၸႂ်ႁႂ်ႈလႅတ်းသႅဝ်းလႄႈ ယႃႇၵုမ်ႇၵႂင်   ႁတ်းႁၢၼ် လႄႈ တူဝ်တင်းၸႂ်တူၵ်းငရၢႆးႁိုဝ်ၶိုၼ်ႈမိူင်းသၢင် ....

   ~ လၢဝ်ႁဵင် (L. H.)