ၸၢႆးဢွၼ်ႇၸၼ်ႁၢင်ႈၸၼ်ၸႂ်ၵူၼ်း လၢၵ်ႇလၢႆး

ၸၢႆးဢွၼ်ႇဢႃႇယု မွၵ်ႈ ႙ ၶူပ်ႇ ၸၼ်ႁၢင်ႈၸၼ်ၸႂ်ၵူၼ်း လၢၵ်ႇလၢႆး 

ပဵၵ်ႉသမ်ႉဝႃႈ လႆႈထူပ်းတၢင်းယၢပ်ႇ ၼႂ်းၵၢၼ်ၸၼ်ႁၢင်ႈယူႇၼႆသေတႃႉၵေႃႈ ယင်းမီးၵူၼ်းမႃးၸၢင်ႈႁႂ်ႈၵႂႃႇၸၼ်ႁၢင်ႈၶိူင်ႈပၼ်တၢင်းႁၢင်ႈလီၸွမ်းၽႃ တီႈၼႂ်းႁၢၼ်ႉၶၢႆတၢင်းၵိၼ်ယူႇ။

ၸၢႆးဢွၼ်ႇၸိုဝ်ႈႁွင်ႉဝႃႈ Joe Whale ဢႃႇယု မွၵ်ႈ 9 ၶူပ်ႇၼႆႉ မၼ်းလႆႈၸႂ်ၸၼ်ႁၢင်ႈယူႇသတေႃႉၵေႃႈ တီႈၼႂ်းႁွင်ႈႁဵၼ်းၼၼ်ႉ မီးလွင်ႈယၢပ်ႇတႃႇၵၢၼ်ၸၼ် doodling ၶၼ်ႇၶိၼ်ႇ ၶၼ်ႇၶွၼ်ႇၵမ်ႉတေႃႉၼၼ်ႉ တႃႇသေႇယူႇ။ ပေႃႈမႄႈမၼ်းၸၢႆး ၶဝ်ႁၼ်ဝႃႈ Joe ၼႆႉ ပဵၼ်ၵူၼ်းလႆႈၸႂ်ၵၢၼ် ၸၼ်တႅမ်ႈႁၢင်ႈၼႆယဝ်ႉ။

မၼ်းၼႆႉၸဵမ်မိူဝ်ႈဢႃႇယုလႆႈမွၵ်ႈ 4 ၶူပ်ႇၼၼ်ႉ ၶဝ်ႁၼ်ဝႃႈမၼ်းၸၢႆးၵိုၵ်းပႃးပႃႇရမီႇဢၼ်ၼႆႉယဝ်ႉ။

တေၸဵမ်မိူဝ်ႈပေႃႈမႄႈၶဝ်ဝႆႉသတိတူၺ်းဝႃႈ လုၵ်ႈၶဝ်ၼႆႉ မၼ်းမီးလွင်ႈၵတ်ႉၶႅၼ်ႇၶဝ်ၸႂ်ၼိူဝ်ၵၢၼ်ပၢႆးမွၼ်းၸၼ်ႁၢင်ႈမႃးၼၼ်ႉ ပေႃႈမႄႈၶဝ်ၵေႃႈဢဝ်မၼ်းၵႂႃႇပွႆႇ ၶိုၼ်ႈႁဵၼ်းတီႈဢွင်ႈႁဵၼ်းဝၢႆးၶိုၼ်ႈႁူင်းႁဵၼ်ယဝ်ႉ ဢၼ်ပဵၼ် after-school drawing class ႁွင်ႈႁဵၼ်းၽၢႆႇၸၼ်ႁၢင်ႈၼၼ်ႉဝႆႉယဝ်ႉ။  သိုပ်ႇၼၼ်ႉ မေႃသွၼ် Joe ၶဝ်ၽၢင်ႉတူၺ်းမႅၼ်ႈၼမ်ႉၵတ်ႉမၼ်းၸၢႆးလႄႈ ဢဝ်ပိုၼ်ၽႄတီႈၼႂ်း Instagram ၼၼ်ႉသေ မီးၵူၼ်းၶဝ်ႈတူၺ်းပၼ်ႁႅင်းထိုင် 1.5 လၢၼ်ႉၵေႃႉ view လႄႈ တၢင်းၶေႃႈႁၼ်ထိုင် comment တၢင်းၼမ်ထႅင်ႈယူႇ။

တီႈႁၢၼ်ႉၶၢႆ ‘ Number 4 ’ ၼႂ်းဝဵင်း Shrewsbury  မိူင်း England ၼၼ်ႉ ၵူၼ်းႁဵတ်းၵၢၼ်ၼႂ်းလၢၼ်ႉၶဝ် ၽၢင်ႉႁူႉႁၼ်မႅၼ်ႈသေယဝ်ႉ ၸင်ႇၶၢတ်ႇႁႂ်ႈ Joe မႃးတႅမ်ႈႁၢင်ႈပၼ်ၸွမ်းၽႃႁၢၼ်ႉၶၢႆၶဝ် ၼင်ႇမၼ်းမေႃၼႆယူႇယဝ်ႉ။

ၸၢႆး Joe လႆႈၸႂ်ႉၶၢဝ်းယၢမ်း 12 ၸူဝ်ႈမူင်း တႃႇႁၢင်ႈႁႅၼ်းပဵၼ်ႁၢင်ႈလီတူၺ်းမႃးၼၼ်ႉ။ ၼင်ႇႁိုဝ်မၼ်းတေၸဵဝ်းယဝ်ႉတူဝ်ႈၵၢၼ်တႅမ်ႈႁၢင်ႈမၼ်းၸၢႆးၼၼ်ႉ ပေႃႈမႄႈၶဝ်ၵေႃႈ ပေႃးဝႃႈမၼ်းၸၢႆးၶိုၼ်ႈႁဵၼ်းယဝ်ႉသေလူင်းႁဵၼ်းၼႆၸိုင် ၼႅတ်ႈဢဝ်မၼ်းၸၢႆးမႃးသူင်ႇပၼ် တီႈႁၢၼ်ႉၼၼ်ႉပၼ်ယူႇယဝ်ႉ။ ၸဝ်ႈႁၢၼ်ႉၶၢႆတၢင်းၵိၼ်ၼၼ်ႉၵေႃႈ ပၼ်ၶႂၢင်ႉ ဢဝ်ၵၢင်ၸႂ်မၼ်းၸၢႆး Joe ဝႃႈ မၼ်းၶႂ်ႈၸၼ်ႁၢင်ႈဢီႈသင်တီႈၽႃၼၼ်ႉၼႆၵေႃႈ ဢဝ်ၼင်ႇမၼ်းဝူၼ်ႉဢွၵ်ႇၸၼ်ၵႂႃႇတေႃႇယဝ်ႉၼႆယဝ်ႉ။ ထိုင်မိူဝ်ႈလဵဝ်ပိူၼ်ႈတၢင်းၼမ်ဢွၼ်ၵၼ်ႁူႉၸၵ်းမၼ်းၸၢႆးဝႃႈပဵၼ်ၵူၼ်း Doodle Boy ၼႆမႃးယူႇယဝ်ႉ။

“ ၶဝ်ၶႂ်ႈႁႂ်ႈ Joe ၶဝ်ႈတီႈႁၢၼ်ႉၶဝ်ၼၼ်ႉသေယဝ်ႉ ႁဵတ်းတႅမ်ႈႁၢင်ႈပၼ်တီႈၸွမ်းၽႃၼႂ်းႁၢၼ်ႉၶဝ်ၼၼ်ႉ ႁႂ်ႈပေႃးပဵၼ်လၢႆးမိုဝ်းႁၢင်ႈပၢႆးမွၼ်းပိတ်းပွတ်းၸွမ်းၽႃၵႂႃႇ တေႃႇပေႃးယဝ်ႉတူဝ်ႈ၊ ယဝ်ႉၵေႃႈ တီႈဢၼ်မၼ်းၸၢႆးၵႂႃႇတႅမ်ႈႁၢင်ႈပၼ်ၼၼ်ႉ ပဵၼ်တီႈဢွင်ႈႁွင််ႈလမ်ႇလွင်ႈၼႂ်းႁွင်ႈလူင်ၵိၼ်ယႅမ်ႉၼၼ်ႉၵွၼ်ႇ ” ပေႃႈမၼ်းၸၢႆး Greg ဢဝ်ၵုင်ႇမုၼ် ၸွမ်းၸၢႆးမၼ်းဢမ်ႇသုတ်းဢမ်ႇသဵင်ႈသေလၢတ်ႈတီႈ ၸုမ်း The Metro ၼင်ႇၼႆ။  ထိုင်မိူဝ်ႈလဵဝ် မၼ်းၸၢႆးမီးပႃး website ၶွင်တူဝ်ၵဝ်ႇဝႆႉယဝ်ႉၵွၼ်ႇၼႆ။

ပေႃႈၶဝ်ဝႃႈ Joe ၼႆႉ မၼ်းပဵၼ်ၵူၼ်းဢၼ်လၢၵ်ႇလၢႆးၵတ်ႉၶႅၼ်ႇၵေႃႉၼိူင်ႈသေဢမ်ႇၵႃး တီႈႁူင်းႁဵၼ်းၵေႃႈ ၵတ်ႉၶႅၼ်ႇလွင်ႈလိၵ်ႈ ပႃးၸဵမ်ၽၢႆႇလဵၼ်ႈဢဵၼ်ႁႅင်းၵေႃႈလူင်ႉလႅၼ်ႇထႅင်ႈ၊ ဝႃႈၼၼ်သေတႃႉ ၼႂ်းၵၢၼ်တႅမ်ႈႁၢင်ႈပၢၼ်းသီ ၵေႃႈပဵၼ်ၵေႃႉလၢၵ်ႇလၢႆးၼႂ်းပၢႆးမွၼ်းၵၢၼ်ၸၼ် ႁၢင်ႈၼၼ်ႉဝႆႉယူႇၼႆ ပေႃႈၶဝ်သိုပ်ႇယုၵ်ႉယွင်ႈ လုၵ်ႈၸၢႆးမၼ်း Joe ၼင်ႇၼႆထႅင်ႈယဝ်ႉ။

ယူႇတီႈလွင်ႈလဵၵ်ႉလဵၵ်ႉဢွၼ်ႇၼၼ်ႉပေႃႈမႄႈၶဝ်ပၵ်းတႃႁႂ်ႈႁူႉၸွမ်းဝႃႈလုၵ်ႈၸဝ်ႈၵဝ်ႇၵတ်ႉၶႅၼ်ႇလူင်ႉလႅၼ်ႇၽၢႆႇလႂ်ၼႆဝႆႉလီလီလႄႈ တွၼ်ႈတႃႇလုၵ်ႈဢွၼ်ႇၵေႃႈမီးတိုဝ်ႉတၢင်းယၢင်ႈၸွမ်း ယိူင်းမၢႆဝႃႇသၼႃႇ ၼႆၸိုင်လႆႈဝႃႈပဵၼ်ပႃႇရမီႇၵိုၵ်းပႃးၵႂႃႇယူႇၼင်ႇၼႆ။ မၼ်းပႅၵ်ႇပိူင်ႈၵၼ်တင်းၵၢၼ်ႁုၼ်ႈမုၼ်းၼေႃႇတႅၼ်းၶိူဝ်းမိူင်းႁဝ်းဝႆႉ လၢႆးႁုၼ်ႈမုၼ်းပၼ်လွၼၼ်ႇၼငင်ႇၼႆ ယွၼ်ႉဢမ်ႇမေႃၵွၵ်ႇပၼ်သဵၼ်ႈတၢင်းဢၼ်ၼမ်ႉတေ လႆၼၼ်ႉသေဢမ်ႇၵႃး ပၢႆၵႂႃႇတတ်းတဵင်တၢင်းမၼ်းတေလႆ သေ ၵႅတ်ႇႁႂ်ႈၶဝ်ႁဵတ်းပဵၼ်ၸွမ်းၼင်ႇပေႃႈမႄႈ ၶဝ်ၶႂ်ႈပဵၼၼ်ႉၵူၺ်းလႄႈ ထိုင်ၵမ်းလိုၼ်းလုၵ်ႈဢွၼ်ႇဢမ်ႇသူၼ်ၸႂ် ၼိူဝ်ၵၢၼ်ၶဝ်ဢၼ်ၶႂ်ႈႁဵတ်းသေဢမ်ႇလႆႈႁဵတ်းလႄႈ ၵုမ်ႇပၵ်းၸႂ်လႆႈႁဵတ်းၵၢၼ်တီႈၶဝ်ဢမ်ႇသူၼ်ၸႂ်ၼၼ်ႉသေ ၸႂ်ဝင်ႇဝိူဝ်ႈပိူင်ႈႁွႆႈပႅတ်ႈလၢႆ ဝင်ႇဝိူဝ်ႈၽိတ်းတၢင်းမႃးၵေႃႈၼမ်တေႃႇတေႃႇယူႇ။

သိုပ်ႇၼႆႉယွၼ်းႁႂ်ႈသူၶဝ်ႁဝ်း မေႃၽၢင်ႉသတိ တူၺ်းတၢင်းသူင်လူဝ်ႇၶွင်လုၵ်ႈလၢၼ်တူဝ်ၵဝ်သေ ထႅမ်ႁႂ်ႈၶဝ် ယၢင်ႈထိုင်တီႈဢွင်ႇမၢၼ်ၵႂႃႇၵၼ်လႆႈၼင်ႇၸၢႆး Joe ၼၼ်ႉသေၵမ်း။