ၽေႃႇလီယႃႇၼႃႇ ယိင်းမဵတ်ႉတႃႇ

 ယိင်းၽေႃႇလီယႃႇၼႃႇ   Pollyanna 

သင်ၸိူဝ်ႉဝႃႈၵွပ်ႈသင်လႄႈႁၵ်ႉႁဝ်းလႃႇ ၼႆယင်းတေလၢတ်ႈလႆႈလွင်ႈတၢင်းမၼ်းထႅင်ႈတၢင်းၼမ်ယူႇ ။ တီႈတေႉၵေႃႈ မၼ်းဢိင်ၼိူဝ်လွင်ႈဢၼ်ႁဝ်းတေမေႃဝႆႉဝၢင်းၸႂ်ၸဝ်ႈၵဝ်ႇၸိူင်ႉၼင်ႇႁိုဝ်ၼၼ်ႉၵူၺ်း။

ယွၼ်ႉပိူဝ်ႈလႆႈလူပပ်ႉလိၵ်ႈၼႆႉလႄႈ ႁဵတ်းႁႂ်ႈႁဝ်းလႅၵ်ႈလၢႆႈမႃးတင်းၼမ်တင်းလၢႆဢိူဝ်ႈၼႆၵေႃႈတေဢမ်ႇၽိတ်းၼင်ႇၵွၼ်ႇ။ 

ဝၢႆးသေလႆႈလူပပ်ႉၼႆႉမႃး ထူပ်းလွင်ႈႁူၵ်ႉႁၢႆႉယၢပ်ႇၽိုၼ်ႇထၢၼ်ႇလႂ်မႃးၵေႃႈ ၸႂ်ၼႆႉဢမ်ႇပိူင်ႈ ဢမ်ႇသုၵ်ႉသၢၵ်ႉၸွမ်းယဝ်ႉ ၼႂ်းလွင်ႈသုၵ်ႉသၢၵ်ႉလူင်ၼၼ်ႉၶတ်းၸႂ်သွၵ်ႈႁႃလွင်ႈလီလီဢၼ်ၼိုင်ႈ မိူၼ်ၼင်ႇယိင်းၽေႃႇလီယႃႇၼႃႇၼၼ်ႉမႃးယူႇဢိူဝ်ႈ။

တွၼ်ႈတႃႇၵူၼ်းၸိူဝ်းၸႂ်သုၵ်ႉသၢၵ်ႉ ဢမ်ႇလီၸႂ်ၶဝ်ၼၼ်ႉ လႄႈၸိူဝ်းၶႂ်ႈမီးၸႂ်လီလီ သွၵ်ႈႁႃလၢႆးၵေႈၼၼ်ႉ ၼႆႉပဵၼ်ယႃလီလူင်ဝႆႉ။

ၽေႃႇလီယႃႇၼႃႇၼႆႉ ၽွင်းဢႃႈသၢၵ်ႈတိုၵ်ႉလႆႈ (11)ၶူပ်ႇၼၼ်ႉ ပဵၼ်လွင်ႈမွင်ၸႂ်ၼႂ်းၼႃႈႁိူၼ်း ဢွၼ်ႇမၼ်းဝၢႆးသေ ပေႃႈမႄႈမၼ်းဢမ်ႇမီးယဝ်ႉ လႆႈပိုင်ႈဢိင်ယူႇၸွမ်းၸုမ်းၵမ်ႇထႅမ်သေ ဝၢႆးပေႃႈၶဝ်သဵင်ႈယဝ်ႉၸင်ႇမီးလိၵ်ႈယွၼ်းပိုင်ႈဢိင်တီႈၼႃႉၶဝ်ႁႂ်ႈၵဵပ်းလုၵ်ႈဢွၼ်ႇလဵင်ႉၵႂႃႇၼႆသေ ၼႃႉၶဝ်လႆႈႁဵတ်းၸွမ်းပုၼ်ႈၽွၼ်းၵႂႃႇ ဝၢႆၼၼ်ႉယိင်းဢွၼ်ၸင်ႇလႆႈဢွၵ်ႇၶၢဝ်းတၢင်းမႃးၸွမ်းၵူၼ်းသွင်ၵေႃႉ မႃးယူႇၸွမ်းၼႃႉၶဝ် တီႈဢၼ်ပဵၼ်ငိူၼ်ႈၶိူဝ်းမႄႈၶဝ်ၶိုၼ်းယူႇ ၸိူင်းလွင်ႈယိင်းမႅတ်ႉတႃႇၵေႃႈလႆႈတေႇတီႈၼႆႈယဝ်ႉ။

ယိင်းမႅတ်ႉတႃႇၼႆႉ ယွၼ်ႉပဵၼ်လုၵ်ႈယိင်း ဢၼ်ထွမ်ႇဢဝ်ၵႂၢမ်းသင်ႇသွၼ်တီႈပေႃႈမႃးလ​ႄႈ မိူဝ်ႈပေႃႈမၼ်းယင်းတိုၵ်ႉမီးၼၼ်ႉ လႆႈသွၼ်ဝႆႉပၼ်လွၵ်းလၢႆးလဵၼ်ႈၵဵမ်းငိၼ်းၸူမ်း (Glad Game) ဢၼ်ၼိုင်ႈဝႆႉပၼ်ယူႇ ၵဵမ်းၼၼ်ႉၵေႃႈပဵၼ် ထူပ်းၺႃးလွင်ႈသင်မႃးၵေႃႈယဝ်ႉႁႂ်ႈမေႃသွၵ်ႈႁႃတီႈလီလီသေ ငိၼ်းၸူမ်းၸွမ်းၼၼ်ႉယဝ်ႉ။

ပဵၵ်ႉသမ်ႉဝႃႈၼႃႉၶဝ်ႁဵတ်းၸွမ်းပုၼ်ႈၽွၼ်းၵဵပ်းလဵင်ႉၼႆၵေႃႈ တေႃႈဢမ်ႇပၼ်ၼႃႈလီတေႃႇ လႄႈ ၵူၺ်းပၼ်ဢွင်ႈတီႈၵႅပ်ႉၵႅပ်ႉလဵၵ်ႉလဵၵ်ႉႁဝ်ႉႁဝ်ႉမႆႈမႆႈယူႇယၢပ်ႇၼင်ႇၼၼ်သေတႃႉမၼ်းယင်းၶတ်းၸႂ်ငိၼ်းၸူမ်းၼႃႉၶဝ်ယူႇ ထိုင်ၵမ်းလိုၼ်းယွၼ်ႉၽေးၵိုင်ႉၵၢင်ႉသေလႄႈ လွင်ႈမွင်ၸႂ် ဢွၼ်ႇထိုင်တူဝ်မၼ်းၼႆၵေႃႈ ပိူၼ်ႈဢွၼ် ၵၼ်တိုၼ်ႇတၢင်းဝဵင်းၵႂႃႇ ။

ယွၼ်ႉပိူဝ်ႈလွၵ်းလၢႆးလဵၼ်ႈၵဵမ်း ယိင်းၽေႃႇလီယႃႇၼႃႇၼႆႉသေလေႇ ႁူၺ်းၵူၼ်းၼႂ်းဝၢၼ်ႈၼႂ်းသူၼ် ႁဵတ်းႁႂ်ႈမၢၵ်ႇႁူဝ်ၸႂ်ၵူၼ်းၵူႈၵေႃႉ ပေႃး ဢူၼ်ႈဢွၼ်ႇ ႁဵတ်းႁႂ်ႈၵူၼ်းၼႂ်းႁိူၼ်း တင်းမူတ်းသမ်ႉပေႃးလႅၵ်ႈလၢႆႈၵႂႃႇ လႄႈ ပႃးၸဵမ်ၵူၼ်းႁိမ်းႁွမ်း တၢင်းဝဵင်းလႅၵ်ႈလၢႆႈပႃး လိၼ်ႈၸွမ်းလွၵ်းၵဵမ်ႈ ငိၼ်းၸူမ်းၼႆႉမႃးတင်းၼမ်ယူႇ လႆႈၸွႆႈထႅမ်ပႃး ၸိူင်းတၢင်းႁၵ်ႉတီႈဢၼ်လႆႈၵိုတ်ႉယင်ႉၼႂ်းလပ်းသိင်ႇမႃး 10 ပီႊပၢႆၼၼ်ႉၶိုၼ်းမီးဢသၢၵ်ႈႁၼ်လႅင်းမႃးၶိုၼ်းၸိူဝ်းၼႆႉယူႇ။

ၼႂ်းလွၵ်းၸိူင်းႁူဝ်ၼႆႉ ပဵၵ်ႉသမ်ႉဝႃႈ ဢဝ်လွင်ႈယိင်းဢွၼ်ႇ 11 ၶူပ်ႇႁဵတ်းပဵၼ်ၸိူင်းၼႆသေတႃႉ ပဵၼ်တီႈဢၼ်လီယိူင်ႈ လီၵဵပ်းဢဝ် တီႈပဵၼ်ပေႃႈမ​ႄႈ လုၵ်ႈဢွၼ်ႇၼိုင်ႈၵေႃႉၼႆႉ ထုၵ်ႇလီသင်ႇသွၼ်လုၵ်ႈဢွၼ်ႇႁဝ်းဝႆႉႁႂ်ႈပဵၼ်ၵူၼ်းလီၼင်ႇႁိုဝ် လ​ႄႈတူဝ်ၵဝ်ႇထုၵ်ႇလီဢဝ်မႃးၸႂ်ႉတိုဝ်းတႃႇတူဝ်ၵဝ်ႇယူႇ ယွၼ်ႉမၼ်းမီးၽွၼ်းလီတွၼ်ႈတႃႇ တူင်ႇဝူင်းၵူၼ်းႁဝ်းႁႂ်ႈပေႃးတိူဝ်းမီးႁႅင်းတူဝ် ႁႅင်းၸႂ် မေႃဢဝ်ဝႆႉမႅတ်ႉတႃႇတ​ေႃႇသူႈ ၼိူဝ်ၵူႈလွင်ႈ တီႈတေထူပ်းၺႃး ၼႂ်းၸူဝ်ႈပၢၼ်ၼၼ်ႉတၢင်းသဵင်ႈလႄႈ ၶႂ်ႈတိုၵ်းသူၼ်းထိုင်ၼွင်ႉယိင်းၼွင်ႉၸၢႆးၶဝ် ထုၵ်ႇလီလူတူၺ်းၸိူင်းႁူဝ်ၼႆႉယူႇ။

ပပ်ႉၸိူင်းႁူဝ်ၼႆႉ ပဵၼ်ပပ်ႉၸိူင်းဢၼ်ဢွၵ်ႇမႃး ႁိုင်ႁီး ယဝ်ႉၼႆသေတႃႉ ယင်းတိုၵ်ႉလီလူလီဢဝ်တၢင်းႁူႉတွၼ်ႈသွၼ်တႃႇသေႇလႄႈပိူၼ်ႈဢွၼ်ၵၼ်ပိၼ်ႇသႃႇသႃႇပၼ်ၸၢဝ်းၶိူဝ်းၽႂ်မၼ်းလႆႈၸိမ်းလူႇၵၼ်ယူႇ ဢမ်ႇၵႃး လႆႈႁဵတ်းပႃးလွၵ်းၸိူင်းတူဝ်တူင်ႉၼႄၵၼ်ၼႂ်းႁူင်းငဝ်းတူင်ႉမႃး ပႃးၸဵမ်ၼႂ်းဝွၵ်းၵူၼ်းမိူင်းဝၼ်းတူၵ်းၶဝ်ၵေႃႈ ဢဝ်ၸႂ်ႉတိုဝ်းပႃးၼႂ်း Pollyanna Outlook ဝႆႉယူႇ သင်ဝႃႈလႆႈလူၸိမ်းတူၺ်းယဝ်ႉ တေၸွႆႈႁႂ်ႈႁဝ်းမေႃႁၼ်ထိုင် Positive thinking လွင်ႈႁပ်ႉႁၼ်လီ ၼႂ်းလ​ေႃးၵ ဢၼ်သုၵ်ႉသၢၵ်ႉ သူႈသိၼ်သၢၼ်ၼၼ်ႉယူႇဢမ်ႇႁၢင်ႉၼႆ တွၼ်ႈတႃႇပီႈၼွင်ႉတႆးႁဝ်းတႄႉ ထိုင်မႃး 2012 ၼႆႉမႃးတေလႆႈငိၼ်းၸူမ်းၶွပ်ႈၸႂ်ထိုင် ၽူႈပိၼ်ႇတႅမ်ႈ A-မႆႇ (ၼၢင်းဢေႇမႆႇ)မူႇၸေႈ ႁဝ်းယႂ်ႇၼမ် လႄႈ ၶွပ်ႈၸႂ်ထိုင်ပႃး ႁႅင်းသိူဝ်ၶႅင်(တၢင်ႉယၢၼ်း) ၽူႈၸွႆႈထႅမ်ၶပ်ႉၶိုင်ပဵၼ်မႃးပပ်ႉ တႃႇသူၶဝ်ႁဝ်းတေႉယူႇ။

Pollyanna တႅမ်ႈ Eneanor H.Proter

ပိၼ်ႇၽၢႆႇတႆး  ယိင်းဢေႇမႆႇ