"သဵၼ်ႈတၢင်းသၢႆၵၢင်"

မၢင်​​ၸိူဝ်ၶဝ် ပွင်ႇၸႂ်ႁၼ်ထိုဝ်ဝႃႈ လွင်ႈဢမ်ႇၸပ်းၽၢၵ်ႇ ၽၢႆႇလႂ်ၼႆႉ ပဵၼ်သဵၼ်ႈတၢင်းသၢႆၵၢင် တီႈၽြႃးပဵၼ်ၸဝ်ႈတမ်းဝၢင်းဝႆႉၼႆ၊ ​​ပေႃးပဵၼ်ၼၼ်မႃးတႄႉ ​​တေလႆႈဝႃႈ မၼ်းပဵၼ်ၵွပ်ႈယွၼ်ႉ ဢမ်ႇႁူႉတြႃးတႄႉ လႄႈ ဢမ်ႇၶူၼ်ႉဝူၼ်ႉႁၼ် ပိုၼ်းလွင်ႈႁဵတ်းသၢင်ႈပုတ်ႉထၸဝ်ႈ ၵူၺ်းၼႆယဝ်ႉ။

သင်ဢဝ်တီႈပွင်ႇဝႃႈ ၼင်ႇၼၼ် ႁဵတ်းလွင်ႈလီၽွင်ႈ ဢမ်ႇၼၼ် ဢဝ်ၵူၼ်းတၢႆၽွင်ႈ ထႅင်ႈဝၼ်းၼိုင်ႈသမ်ႉ ၵႂႃႇ​​ၵေႃႇၽြႃး ႁဵၼ်းတၢင်းလီၽွင်ႈၼႆႉ ပဵၼ်သဵၼ်ႈတၢင်းသၢႆၵၢင်ယဝ်ႉ​​လေႃႇ။ ၼင်ႇတီႈၶႃႈပွင်ႇတႄႉ ၽြႃးပဵၼ်ၸဝ်ႈ ဢမ်ႇယၢမ်ႈသွၼ်မႃးၼင်ႇၼၼ်၊ ​​ပေႃးၼႆ သဵၼ်ႈတၢင်းသၢႆၵၢင် တီႈပုတ်ႉထၸဝ်ႈႁဝ်း သွၼ်ဝႆႉ သမ်ႉပဵၼ်ၸိူင်ႉႁိုဝ်လႃႇ ၼႆ လႅပ်ႈ​​တေၵႂင်ၸႂ် ၶႆႈႁူႉၵၼ်ယူႇ။

ၸွမ်းၼင်ႇတီႈၶႃႈပွင်ႇၸႂ် သဵၼ်ႈတၢင်းသၢႆၵၢင်ၶွင်ၽြႃးပဵၼ်ၸဝ်ႈတႄႉ ​​တေလႆႈမႃးတူၺ်းထိုင်လွင်ႈ​​တေႇငဝ်ႈမၼ်းမႃး ၵွပ်ႈဝႃႈ ဝၢႆး​​သေ ဢွၵ်ႈဝၢင်းၶဝ်ႈထိူၼ်ႇ ႁႃတြႃးၵူႈလွၵ်းလၢႆး (ၵၼ်ႈၶဝ်ႈၵၼ်ႈၼမ်ႉ ယူၵ်ႉမိုဝ်းၸုၵ်းယိုၼ်ႈ ၼင်ႈတြႃး ဢမ်ႇၵိၼ်ၶဝ်ႈၵိၼ်ၼမ်ႉ ​​တေႃႇ​​ပေႃးယွမ်ႁႅင်ႈ) မႃး​​သေတ တႃႇ​​တေလႆႈတြႃး ႁႂ်ႈဢွင်ႇပူၼ်ႉဢဝ်​​ပေႉတၢင်းတုၵ်ႉၶတၢင်းလၢႆ ၼႆႉ​​ၵေႃႈ ဢမ်ႇႁၼ်ၼႆလႄႈ ၸင်ႇလႆႈပႆၵႂႃႇၸူးမႄႈၼမ်ႉ သမ်ႉမီးၼၢင်းယိင်း​​ၵေႃႉၼိုင်ႈ ဢဝ်ၼမ်ႉၼူမ်းဝူဝ်းမႃး လူႇပၼ်ၵိၼ် ၸင်ႇလႆႈမီးႁႅင်းမႃးဢိတ်းၼိုင်ႈ​​သေ ဢတိထၢၼ်ႇ ႁႂ်ႈလႆႈႁၼ်တြႃး

​​တေႇဢဝ်ၼၼ်ႉမႃး​​ၵေႃႈ ဢမ်ႇၵၼ်ႉၶဝ်ႈၵၼ်ႉၼမ်ႉ ၵူၺ်းၵႃႈ ၵိၼ်ၶဝ်ႈၵိၼ်ၼမ်ႉ (သုင်သွမ်း) မွၵ်ႈၵႃႈထုၵ်ႇလီသုင်း ႁႂ်ႈတူဝ်ၸႂ်မီးႁႅင်း​​ (ႁႅင်းတူဝ် ႁႅင်းၺၢၼ်ႇ) ​​သေ ၵျၢင်ႉၵမ်​​တေႃႇမႃးလႄႈ ၸင်ႇလႆႈႁၼ်တြႃး တီႈမၢၼ်ႇမႅၼ်ႈ လႄႈ လုၵ်ႉတီႈႁူႇႁၼ်တြႃးမၢၼ်ႇမႅၼ်ႈ ၸင်ႇလႆႈႁၼ်သဵၼ်ႈတၢင်း ပူၼ်ႉလွတ်ႈတၢင်းတုၵ်ႉၶတၢင်းလၢႆယဝ်ႉ။ ၵွပ်ႈတူဝ်ထူပ်းၸဝ်ႈၵဝ်ႇ မီးမႃးၼင်ႇၼၼ်လႄႈ ပႆသဵၼ်ႈတၢင်းတီႈ ဢမ်ႇမၢၼ်ႇမႅၼ်ႈ (ၵၼ်ႈၶဝ်ႈၵၼ်ႈၼမ်ႉ ႁဵတ်းလၢႆၸိူဝ်ႉလၢႆလွင်ႈ ၵႃႈႁိုဝ်​​ၵေႃႈယဝ်ႉ ႁဵတ်းၼမ် ႁဵတ်းႁႅင်းၵႃႈႁိုဝ်​​ၵေႃႈယဝ်ႉ) ၵွပ်ႈဢမ်ႇမၢၼ်ႇမႅၼ်ႈလႄႈ ၸင်ႇဢမ်ႇထိုင်တီႈ ၸင်ႇဢမ်ႇထိုင်ယိူင်းမၢႆ တႃႇထိုင်တီႈ တႃႇထိုင်ယိူင်းမၢႆၼၼ်ႉ တၵ်းလႆႈၸႂ်ႉသဵၼ်ႈတၢင်းသၢႆၵၢင် (ဝူၼ်ႉမၢၼ်ႇမႅၼ်ႈ၊ ယိူင်းမၢၼ်ႇမႅၼ်ႈ၊ လၢတ်ႈမၢၼ်ႇမႅၼ်ႈ၊ ႁဵတ်းမၢၼ်ႇမႅၼ်ႈ၊ လၢႆးႁႃလဵင်ႉတွင်ႉမၢၼ်ႇမႅၼ်ႈ၊ ၶတ်းၸႂ်မၢၼ်ႇမႅၼ်ႈ၊ သတိမၢၼ်ႇမႅၼ်ႈ၊ သမႃႇထိမၢၼ်ႇမႅၼ်ႈ) ၼၼ်ႉယဝ်ႈ ၸင်ႇ​​တေထိုင်ယိူင်းမၢႆၼႆလႄႈ ၸင်ႈလႆႈမႃးတမ်းဝၢင်း သဵၼ်ႈတၢင်းသၢႆၵၢင် မၵ်ႉ (ၼၼ်ႉယဝ်ႈ။ ၼႂ်းၵၢၼ်ပႆသဵၼ်ႈတၢင်း ႁႂ်ႈမၢၼ်ႇမႅၼ်ႈ ၼႆ ႁူဝ်ႁုပ်ႈပိူင်လူင်မၼ်းတႄႉ ႁႂ်ႈ​​မေႃၸႂ်ႉ ဢွၵ်း​​ဢေႃ (ပၺ်ၺႃႇ) လႄႈ ႁူဝ်ၸႂ် (မဵတ်ႈတႃႇ) ႁႂ်ႈၽဵၼ်ႈၽဵၼ်ႈ ၸင်ႇ​​တေၸၢင်ႈလိူၵ်ႈသဵၼ်ႈတၢင်းမၢၼ်ႇမႅၼ်ႈ မၵ်ႉ ( ၼၼ်ႉယဝ်ႈ။

ၵွပ်ႈၼႆ သဵၼ်ႈသၢႆၵၢင် ဢၼ်ဝႃႈၼၼ်ႉ ၵႂင်ပူ ၵႂင်ပႃ ဢမ်ႇႁူႉ​​တေၵႂႃႇတၢင်းလႂ် တၢင်းၼႆႉ​​ၵေႃႈဢမ်ႇဢဝ် တၢင်းၼၼ်ႉ​​ၵေႃႈဢမ်ႇၵႂႃႇ ၸုၵ်းယူႇတီႈတၢင်း​​ၽေ ဢမ်ႇႁတ်းလိူၵ်ႈသဵၼ်းတၢင်းလႂ်ၼၼ်ႉ ဢမ်ႇၸႂ်ႈပႆသဵၼ်တၢင်းသၢႆၵၢင် (ပဵၼ် တိထီႇ) ဢမ်ႇမီးတၢင်းႁူႉ ပႃႇရမီႇဢဵၼ်ႁႅင်း ဢမ်ႇပဵင်း​​ပေႃးလႄႈ ၵႂၢင်ပူၵႂၢင်ပႃယူႇၵူၺ်း။ ပႆ သဵၼ်တၢင်းသၢႆၵၢင်ဢၼ်ဝႃႈၼၼ်ႉ ၶတ်းၸႂ် ႁႂ်ႈႁူႉ လွင်ႈထုၵ်ႇမႅၼ်ႈ​​သေ ပႆယၢင်ႈလႄႈ ၶတ်းၵၼ်တင်း ၵူၼ်းၵႂင်ပူၵႂင်ပႃ ဢမ်ႇႁူႉ​​တေၵႂႃႇတၢင်းလႂ် ဢမ်ႇႁတ်းလိူၵ်ႈၵႂႃႇတၢင်းလႂ်ၼၼ်ႉယဝ်ႈ။

#ၸၢႆးလႅင်း