သဵင်ႁူဝ်ၸႂ်ဢွၼ်ႇ သၢဝ်တႆး

 ယွၼ်ႉမိူင်းတႆးပွတ်းႁွင်ႇ ပဵၼ်ၽွင်းပၢင်ပွႆးတိုၵ်းလႄႈ သဵင်ႁူဝ်ၸႂ်ဢွၼ်ႇယိင်းဢွမ်သႂ် မင်ၵမ်းတဵၼ်ႈမႃးႁႅင်း မင်ၵမ်းၵေႃႈ လွႆးလူင်းၵႂႃႇ မိူၼ်ၼင်ႇဝႃႈတေၵိုတ်းလွင်ႈတဵၼ်ႈၼၼ်ႉယဝ်ႉ ၵွပ်ႈၵေႃႉႁၵ်ႉဢွၼ်ႇမၼ်းၼၢင်းတူၵ်းၼႃႈသိုၵ်းမီးယူႇပွတ်းႁွင်ႇၼၼ်ႉယဝ်ႉ။

 ဝၼ်းသွင်ဝၼ်းၼႆႉ ၵုမ်ႇလႆႈႁၼ်ၶၢဝ်ႇမီးလွင်ႈပၢင်တိုၵ်းႁၢဝ်ႈႁႅင်းယူႇတိၵ်းတိၵ်းလႄႈ ႁူဝ်ၸႂ်ယိင်းဢွမ်သႂ်မိူၼ်လုၵ်ႉပဵၼ်ၾႆးဝႆႉယူႇၶၢဝ်းယၢမ်းယဝ်ႉ ၶႂ်ႈငိၼ်းသဵင်ၵေႃႉႁၵ်ႉ မႆႈၸႂ်ၸွမ်းၵေႃႉႁၵ်ႉၶႂ်ႈထၢမ်ဝႃႈပဵၼ်ႁိုဝ်ၽွင်ႈ ၶႂ်ႈသင်ႇဝႃႈၾင်ႉတူဝ်လီလီတူၺ်းထိုင်လုမ်းလႃးတူဝ်လီလီ ၶႂ်ႈလၢတ်ႈၼႄဝႃႈယိင်းၸႂ်ထိုင်ပီႈ ယိင်းႁၵ်ႉပီႈဢေႃႈ ၼႆသေတႃႉၵေႃႈ ၵွပ်ႈၵေႃႉႁၵ်ႉတိုၵ်ႉတူၵ်းယူႇၼႂ်းၵႄႈၽေးၶဵၼ်လႄႈဢမ်ႇႁတ်းသိုပ်ႇၸူး ၵူဝ်ပဵၼ်တၢင်းသုၵ်ႉယုင်ႈၽွင်းႁဵတ်းၵၢၼ်သေ ယိူၼ်ႉသိမ်းဢိုၵ်ႉၼိုၵ်ႉမႆႈၸႂ်ယူႇႁင်းၵူၺ်းၵေႃႉလဵဝ်ယဝ်ႉ။

 ထိုင်မႃးထႅင်ႈဝၼ်းၼိုင်ႈ ၶၢဝ်းယၢမ်းႁူဝ်ၶမ်ႈၼၼ်ႉမႅၼ်ႈၽွင်းယိင်းဢွမ်သႂ်ၼင်ႈမိူၼ်ႇၸႂ်ပိဝ်ဝူၼ်ႉထိုင်မႆႈၸႂ်ၸွမ်းၸၢႆးႁၢၼ်ၶိူဝ်းယူႇ သဵင်ၽူင်းမေႃးၶဝ်ႈမႃးလႄႈ မၼ်းၼၢင်းတူၺ်းလႆႈႁၼ်ပဵၼ်ၸၢႆးႁၢၼ်ၶိူဝ်းထူဝ်းမႃးလႄႈ မၼ်းၼၢင်းၸူမ်းသိူဝ်းၼႃႇသေၼမ်ႉတႃပေႃးယိုင်ႈႁူၺ်ႇမႃး ၼႅတ်ႈႁပ်ႉယူႇ။

 "ႁႃလူဝ် ပီႈ"

 "ပီႈပဵၼ်ႁိုဝ်ၽွင်ႈ ၸွင်ႇပီႈပဵၼ်သင်"

 "ပီႈလွတ်ႈၽေးယူႇၸွင်ႇၸႂ်ႈၶႃႈ"

 "ဢိူဝ်ႈ ၼွင်ႉဢွမ် ပီႈဢမ်ႇၸႂ်ႈႁၢၼ်ၶိူဝ်း"

 "ပီႈပဵၼ်ပီႈပိုၼ်ႉမိူင်းသူဢိူဝ်ႈ"

 "ၼွင်ႉဢွမ်ဝႆႉၸႂ်လီလီၼႃ"

 ယိင်းဢွမ်သႂ်ငိၼ်းသဵင်ဢၼ်မေႃးမႃးၼႂ်းၽူင်းၼၼ်ႉ ဢမ်ႇၸႂ်ႈသဵင်ၵေႃႉႁၵ်ႉမၼ်းလႄႈ မိူၼ်ႁၢင်ႈဢိုမ်တိုမ်းၸႂ်လူင်မႃး သမ်ႉငိၼ်းၶေႃႈၵႂၢမ်းဝႃႈ (ဝႆႉၸႂ်လီလီ) ၼႆထႅင်ႈလႄႈ ႁူဝ်ၸႂ်မၼ်းၼၢင်းမိူၼ်တေတႅၵ်ႈယၢႆႈသေ မဵတ်ႉၼမ်ႉတႃမၼ်းၼၢင်းဢၼ်ဢဝ်တီႈယူႇဝႆႉမိူဝ်ႈၵႆႈၼၼ်ႉၵေႃႈ လေႃႈလႆလူင်းၸွမ်းၵႅမ်ႈၶွင်ႇမၼ်းၵမ်းလဵဝ်သေ သဵင်သၼ်ႇသၼ်ႇ သဵင်ဢႃႉဢႃႉသေ ၶိုၼ်းဝႃႈ...

 "ပီႈ ပိုၼ်ႉ မိူင်း ၶႂ်ႈ ဝႃႈ ႁိုဝ် ၶႃႈ"

 "ႁၢၼ်ၶိူဝ်းမၼ်းၸုၼ်ႉလူၼိူဝ်ႉလိူတ်ႈသၢႆၸႂ်

 တွၼ်ႈတႃႇဝၢၼ်ႈမိူင်းၸိူဝ်ႉၶိူဝ်းႁဝ်းၵႂႃႇယဝ်ႉၼွင်ႉ"

 ၶေႃႈၵႂၢမ်းၸၢႆးပိုၼ်ႉမိူင်းၼၼ်ႉ လၢတ်ႈလွႆးလွႆးၵူၺ်းသေတႃႉ မၼ်းလင်ၶဝ်ႈႁူမႃးသဵပ်ႇႁူဝ်ၸႂ်ယိင်းဢွမ်သႂ်လူႉလႅဝ်ၵႂႃႇမူတ်းယဝ်ႉ ယိင်းဢွမ်သႂ်ၵပ်ႉဢူၵ်းတိပ်ႇၸႂ်ၼႃႇလႄႈ ၵၼ်ႈႁႆႈယူႇဢမ်ႇၸၢင်ႈတၵ်းသဵင်သင်ၶိုၼ်း ၸၢႆးပိုၼ်ႉမိူင်းၵေႃႈလၢတ်ႈယဝ်ႉသဵင်ယိင်းဢွမ်သႂ်သမ်ႉယဵၼ်ဝႆႉယူႇလႄႈ မၼ်းၸင်ႇဝႃႈ

 "ၼွင်ႉဢွမ် ၼွင်ႉဢွမ် ၸွင်ႇတိုၵ်ႉလႆႈငိၼ်းသဵင်ပီႈႁိုဝ် ၼွင်ႉဝႆႉၸႂ်လီလီၼႃ"

 ယိင်းဢွမ်သႂ်ငိၼ်းသဵင်ၸၢႆးပိုၼ်ႉမိူင်းထၢမ်ယူႇ

 လွႆးလွႆးသေတႃႉ ၵွပ်ႈၶေႃးၶူမ် ၵပ်ႉၸႂ်ၼႃႇလႄႈဢမ်ႇမီးႁႅင်းတွပ်ႇလႆႈ ဢဵၼ်ႁႅင်းတႃႇယိပ်းၽူင်းၵေႃႈဢမ်ႇမီးယဝ်ႉလႄႈ ႁူၺ်ႇၽူင်းလုတ်ႇတူၵ်းမိုဝ်းမၼ်းၵႂႃႇယဝ်ႉ ၸၢႆးပိုၼ်ႉမိူင်းၵေႃႈငိၼ်းသဵင်တိုၵ်ႈတၢၵ်ႈၼႆသေၽူင်းတူၵ်းၵႂႃႇလႄႈ ထူၺ်ႈၸႂ်လူင်ၵမ်းၼိုင်ႈယူႇ ၸႂ်ၼိုင်ႈၵေႃႈယိၼ်းဢီးလူယိင်းဢွမ်သႂ် ထႅင်ႈၸႂ်ၼိုင်ႈသမ်ႉ ယိၼ်းသေလၢႆဢူၺ်းၵေႃႉမၼ်းၼႃႇလႄႈ ၼမ်ႉတႃၵေႃႉႁၢၼ်ပေႃးယိုင်ႈႁူၺ်ႇလႆမႃးဝႆႉယူႇ မၼ်းၸၢႆးၸဵတ်ႉၼမ်ႉတႃမၼ်းယဝ်ႉသေ ၶိုၼ်းၵီႈဢဝ်လိၵ်ႈဢၼ်ၵူဝ်ႈဝႆႉလိူတ်ႈဢူၺ်းၵေႃႉမၼ်းၽွင်ႈၼၼ်ႉ ထႆႇယဝ်ႉသူင်ႇပၼ်ယိင်းဢွမ်သႂ်ယဝ်ႉ ၸင်ႇလၢတ်ႈဢွၵ်ႇသူပ်းမႃးလွႆးလွႆးဝႃႈ

 "ၵဝ်ႁဵတ်းပၼ်ဢၼ်မႂ်းယွၼ်းပွၵ်ႈလိုၼ်းသုတ်း

 ယဝ်ႉဢႆႈၵေႃႉ ယႃႇမႆႈၸႂ်သင်တႃႇၵေႃႉၵိုတ်းလင်ယဝ်ႉ ၼွၼ်းလပ်းႁႂ်ႈၵတ်းယဵၼ်ၼႃႈ ႁႂ်ႈမႂ်းထိုင်တီႈလီတီႈၵတ်းယဵၼ်သေ ၸၢတ်ႈလႂ်ပၢၼ်လႂ်‌ေၵႃႈယႃႇႁႂ်ႈမႂ်းလႆႈၵိူတ်ႇထူပ်းၶဵၼ် သၢႆလိူတ်ႈၶိူဝ်းလဵဝ်ၵၼ် ၶိုၼ်းႁႅမ်ၵၼ်တၢႆၸိူင်ႉၼႆထႅင်ႈသေၵမ်း"   ငိၼ်းသဵင် Line ၶဝ်ႈမႃးလႄႈ ယိင်းဢွမ်သႂ် ၶတ်းၸႂ်မိုၼ်းတႃၼႂ်းၵႄႈၼမ်ႉတႃမၼ်းသေ

 ၽုၺ်ႇတူၺ်းယူႇ လႆႈႁၼ်ၶႅပ်းႁၢင်ႈလိၵ်ႈၽိုၼ်ၼိုင်ႈ ၼူၵ်းၵူဝ်ႈလိူတ်ႈဝႆႉၵမ်ႈၽွင်ႈလႄႈ ပဵၼ်တင်းဢိုၵ်ႉၼိုၵ်ႉၸႂ်လူင်မႃးထႅင်ႈသေ ၼမ်ႉတႃလေႃႇပေႃးတၢၼ်ႇသၢႆၽူၼ်ယဝ်ႉၵၼ်ႈႁႆႈထႅင်ႈတၢင်းႁိုင်ယူႇၽိူဝ်ႇလူမ်းၶႂ်ႈႁႆႈပေႇသႃႇမႃးဢိၼ်ႉၼိုင်ႈၼၼ်ႉ ၸင်ႇၼႅတ်ႈလူတူၺ်းလိၵ်ႈၼၼ်ႉယူႇ။

 

ထိုင်/

            ဢွမ်ၵေႃႉၵေႃႉပီႈႁၵ်ႉ

 ၽွင်းယၢမ်းဢွမ်လႆႈလူလိၵ်ႈၼႆႉ ပီႈလႆႈလူၼိူဝ်ႉလိူတ်ႈသၢႆၸႂ်ပၼ်တႃႇဝၢၼ်ႈမိူင်းၸိူဝ်ႉၶိူဝ်းႁဝ်းယဝ်ႉ ဢွမ်ဢူၺ် ၶႂၢင်ႉပၼ်ပီႈယႂ်ႇၼမ်သေၵမ်းဢၼ်ပီႈဢမ်ႇမီးသၢႆၸႂ်တႃႇမႃးယူႇႁိမ်းၸမ်တူၺ်းထိုင်ဢွမ်လႆႈ ဢမ်ႇမီးၶၢဝ်းယၢမ်းႁဵတ်းၸွမ်းၵႂၢမ်းမၼ်ႈၵႅၼ်ႇဢၼ်ပီႈပၼ်ဢွမ်ဝႆႉလႆႈ လွင်ႈပီႈဢမ်ႇမီးသုၼ်ႇလႆႈယူႇတႂ်ႈႁူမ်ႈငဝ်းမဵတ်ႉတႃႇတၢင်းႁၵ်ႉဢွမ်ၼႆႉ တေလႆႈဝႃႈၵၢမ်ႇပီႈပၼ်မႃးဢေႇတႄႉၼေႃ

 လူလိၵ်ႈပႆႇသုတ်းယိင်းဢွမ်သႂ်ၵၼ်ႈႁႆႈထႅင်ႈယူႇယဝ်ႉ ၼႂ်းၵႄႈၶူမ်ၸႂ်ၶူမ်ၶေႃးၼႃႇၼၼ်ႉသေ ၸႂ်ႁၵ်ႉႁႅင်း ယႂ်ႇဢၼ်ၶႂ်ႈလူႁၼ်လိၵ်ႈၶေႃႈၵႂၢမ်းၵမ်းလိုၼ်းဢၼ်ၵေႃႉႁၵ်ႉတႅမ်ႈဝႆႉပၼ်လႄႈ ဢဝ်ပဵၼ်ႁႅင်းမိုၼ်းတႃသိုပ်ႇလူယူႇ

 ၵူၺ်းၵႃႈ ဢမ်ႇပဵၼ်သင်ၼႃႈဢွမ် သမ်ႉဝႃႈတူဝ်ပီႈ ၽၢတ်ႇယၢၼ်ဢွမ်ၵႂႃႇယဝ်ႉၵေႃႈ ႁူဝ်ၸႂ်တၢင်းႁၵ်ႉ ပီႈတေမီးယူႇၼႂ်းႁူဝ်ၸႂ်ဢွမ်ၵႂႃႇတေႃႇၸူဝ်ႈယူႇပီႈတေယွၼ်းၼႃႈဢွမ် သမ်ႉဝႃႈဢမ်ႇမီးပီႈယဝ်ႉၵေႃႈဢွမ်ယူႇသဝ်းၵႂႃႇႁႂ်ႈလႆႈၼႃႈ တူၺ်းထိုင်လုမ်းလႃး တူဝ်လီလီ ဝႆႉၸႂ်ၵႅၼ်ႇၶႅင် ပိုင်ႈဢိင်တူဝ်ၸဝ်ႈၵဝ်ႇၵႂႃႇ သင်ဝၼ်းလႂ်ဢွမ်ထူပ်းႁၼ်ၵူၼ်းလီလီၸိုင်တႄႇတင်ႈၸၢတ်ႈပၢၼ်မႂ်ႇၸွမ်းၶဝ်လႆႈၼႃႈ ပီႈပွင်ႇၸႂ်ဝၢင်းၶႂၢင်ႉပၼ်ဢွမ်ယူႇ ဢၼ်ပီႈလၢတ်ႈၸိူင်ႉၼႆဢမ်ႇၸႂ်ႈပီႈဢမ်ႇႁၵ်ႉဢွမ် ၶႂ်ႈဢီးဢွမ်ပၼ်ပိူၼ်ႈယွၼ်ႉပီႈႁၵ်ႉဢွမ်ၼႃႇလႄႈ ပီႈၶႂ်ႈႁၼ်ဢွမ်မီးၵူၼ်းတူၺ်းထိုင်လုမ်းလႃး ၶႂ်ႈႁၼ်ဢွမ်ယုမ်ႉမီးတၢင်းသိူဝ်းၵူႈဝၼ်းဢိူဝ်ႈ ဢွမ်ဢူၺ် ယႃႇယွမ်းၵၢၼ်ႉသင်ငၢႆႈငၢႆႈၼႃႈ ဢၼ်လွင်ႈယႂ်ႇၼႆႉ လွင်ႈပီႈလႆႈလူၼိူဝ်ႉလိူတ်ႈသၢႆၸႂ်ၼႆႉ ယႃႇႁႂ်ႈပဵၼ်တၢင်းၸႂ်ဢူၼ်ႈ တူၵ်းသုမ်းတွၼ်ႈတႃႇဢွမ်သေၵမ်း ပီႈလႆႈလူၼိူဝ်ႉလိူတ်ႈသၢႆၸႂ်ၵႂႃႇၼႆႉ ယွၼ်ႉပဵၼ်တႃႇၵႅတ်ႇၶႄႁႄႉၵင်ႈပၼ်ၸိူဝ်ႉၶိူဝ်းႁဝ်းလႄႈပီႈဢမ်ႇသေလၢႆ ဢသၢၵ်ႈပီႈသေဢိတ်း ဢွမ်ၵေႃႈၼၼ် ၼႂ်းၵႄႈလွင်ႈၶီငဝ်မွင်ၸႂ်ၼၼ်ႉ ႁႂ်ႈဢွမ်လႆႈတၢင်း ႁၢၼ်ႉၸႂ် ဢၼ်မီးၵေႃႉႁၵ်ႉႁဵတ်းၵၢၼ်တႃႇဝၢၼ်ႈမိူင်း လူၼိူဝ်ႉလိူတ်ႈသၢႆၸႂ်ပၼ်ၸိူဝ်ႉၶိူဝ်းၼႆႉသေၵမ်း လိုၼ်းသုတ်းပီႈၶႂ်ႈသင်ႇ သိုပ်ႇပဵၼ်ၵူၼ်းလီ ဝႆႉၸႂ်ၵႅၼ်ႇၶႅင် တေႃႇသူႈၸၢတ်ႈပၢၼ်ၵႂႃႇႁႂ်ႈလႆႈၼႃႈဢွမ်ၵူၼ်းလီပီႈ။

         ႁၵ်ႉဢွမ်မိူၼ်ႁူဝ်ၸႂ် (ႁၢၼ်ၶိူဝ်း)

ဝၢႆးသေလူလိၵ်ႈသုတ်းယဝ်ႉ ယိင်းဢွမ်သႂ် ပဵၼ်ဢၼ်ၶီမွင်ၸႂ် တိူဝ်ႉၸႂ် ႁိူဝ်ႉၸႂ် ၸႂ်ဢူၼ်ႈ ႁၢၼ်ႉၸႂ် ပေႉၸႂ် လေႃးၵၼ်ဝႆႉသေ ဢမ်ႇႁူႉဝႃႈတေႁပ်ႉဝႆႉဢၼ်လႂ်လီယဝ်ႉ တီႈၼႂ်းႁူဝ်ၸႂ်မၼ်းသုၵ်ႉယုင်ႈၵႂႃႇမူတ်းယဝ်ႉ ဢမ်ႇမီးၸႂ်ၶႂ်ႈႁဵတ်းသင် ဢမ်ႇမီးၸႂ်ၶႂ်ႈၵိၼ်သင် ၼွၼ်းၸေႈၼမ်ႉတႃမၼ်းတေႃႇၶမ်ႈလပ်းသိင်ႇသေလပ်းၵႂႃႇၼႂ်းၵႄႈ ၼမ်ႉတႃမၼ်းယဝ်ႉ

 ထိုင်ၵၢင်ၼႂ်ၼႃႈမိူင်းၸမ်လႅင်း ယိင်းဢွမ်သႂ်လုၵ်ႉႁုင်ၶဝ်ႈၽၵ်းတၢင်ႇသွမ်းၽြႃးယဝ်ႉ ၶိုၼ်းႁႅၼ်းၶဝ်ႈၽၵ်းသႂ်ႇၵႅင်ႉလႄႈၵႂႃႇပိတ်းမွၵ်ႇၼႂ်းသူၼ်ၽၢႆႇလင်ႁိူၼ်းၶဝ်မႃးသေဢဝ်ၶဝ်ႈတႅၵ်ႇၵႅင်ႉၶဝ်ႈလႄႈမွၵ်ႇသႂ်ႇသႃႉသေ ၾႃႉၵေႃႈပၢင်ႇလီမိူင်းလႅင်းယဝ်ႉလႄႈယိင်းဢွမ်သႂ်ၶီႇလူတ်ႉဢွၵ်ႇႁိူၼ်းၵႂႃႇယူႇ။

 ယိင်းဢွမ်သႂ်လွင်းၶဝ်ႈသွမ်းယဝ်ႉယဝ်ႉ လူင်းၵျွင်းမႃးသေ ပႆဢွၵ်ႇၵႂႃႇၼွၵ်ႈဝၢင်းၵျွင်းထိုင်ၵႂႃႇတီႈတူၼ်ႈမႆႉတူၼ်ႈၼိုင်ႈယဝ်ႉ ၸင်ႇဢဝ်တဝ်ႈၼမ်ႉဢၼ်မၼ်းယိပ်းမႃးၼၼ်ႉယၢတ်ႇတူၵ်းလိၼ်ၵႂႃႇသေဝူၼ်ႉလၢတ်ႈၼႂ်းၸႂ်မၼ်းယူႇ

 (ပီႈဢူၺ် မိူဝ်ႈလဵဝ်ၼႆႉယိင်းမႃးႁဵတ်းၵၢၼ်လီၵုသူဝ်ႇပၼ်ပီႈဢေႃႈ သမ်ႉဝႃႈပီႈၵႂႃႇမီးယူႇတီႈလႂ်ၸၢတ်ႈလႂ်ၵေႃႈ ႁႂ်ႈတၢင်းလီၵုသူဝ်ႇၼႆႉ ႁွတ်ႈထိုင်တူဝ်ပီႈသေၵမ်း ၵၢၼ်လီၵုသူဝ်ႇတၢင်းသဵင်ႈဢၼ်ယိင်းယၢမ်ႈႁဵတ်းမႃးသမ်ႉဝႃႈၸၢတ်ႈၼႆႉႁိုဝ်ၸၢတ်ႈလႂ် ယွၼ်းႁႂ်ႈတၢင်းလီၸိူဝ်းၼၼ်ႉထိုင်တူဝ်ပီႈ ႁႂ်ႈပီႈႁွတ်ႈထိုင်တီႈၵတ်းယဵၼ်သေၵမ်းၶႃႈ)

 ဝၢႆးသေလူႇတၢၼ်းယၢတ်ႇၼမ်ႉယဝ်ႉယဝ်ႉ ယိင်းဢွမ်သႂ် ဝၢႆႇႁူဝ်လူတ်ႉမၼ်းမႃးၸူးၼွင်လုၵ်ႈၼိုင်ႈယဝ်ႉ မႃးၼင်ႈတီႈၽင်ၼွင်ဢၼ်မၼ်းၼၢင်းလႄႈၵေႃႉႁၵ်ႉမၼ်းယၢမ်ႈၼင်ႈဢုပ်ႇၵႂၢမ်းႁၵ်ႉပႅင်းတေႃႇၵၼ်ၼၼ်ႉသေ သဵင်မေႃးယူႇလွႆးလွႆးၼႂ်းႁူဝ်ၸႂ်မၼ်းၼၢင်း ၵႅမ်ႈၶွင်ႇဢွၼ်ႇမၼ်းၼၢင်းၵေႃႈ ယမ်းၼမ်ႉတႃသႂ်ဝႆႉယူႇ

 * ပီႈဢူၺ် ၼင်ႇဢၼ်ပီႈယွၼ်းၼၼ်ႉ ယိင်းတေၶတ်းၸႂ်ႁဵတ်းပၼ်ဢေႃႈပီႈ ယိင်းတေသိုပ်ႇယူႇၵႂႃႇပဵၼ်ၵူၼ်းလီၸႂ်ၵႅၼ်ႇၶႅင်ႁႂ်ႈလႆႈ လွင်ႈဝႃႈတေထူပ်းၵူၼ်းလီလီထႅင်ႈၼႆၼၼ်တႄႉ ယိင်းဢမ်ႇလူဝ်ႇၶႃႈ ၸၢတ်ႈပၢၼ်ယိင်းႁူဝ်ၸႂ်ယိင်း ၼိူဝ်ႉလိူတ်ႈသၢႆၸႂ်ယိင်း မွပ်ႇဢၢပ်ႈပၼ်ဝႆႉပီႈမူတ်းယဝ်ႉပီႈပဵၼ်လႆႈၵေႃႉလဵဝ်ၸဝ်ႈၶွင်ယိင်း ပီႈပဵၼ်ၵေႃႉႁၵ်ႉလိုၼ်းသုတ်းယိင်း ပဵၼ်ၵေႃႉလဵဝ်ဢၼ်ယိင်းတေႁၵ်ႉၵႂႃႇၵူႈၶၢဝ်းယၢမ်းတေႃႇၸူဝ်ႈဢေႃႈ သမ်ႉဝႃႈ ၽဝဢွၼ်ႇၸၢတ်ႈပၢၼ်ၼႆႉႁႃးပီႈၼွင်ႉဢမ်ႇထိူၵ်ႈၵွင်ႉမိုဝ်းၵၼ်ႁူမ်ႈႁိူၼ်းႁၵ်ႉၵေႃႈ ၶႅၼ်းတေႃႈၽဝၸၢတ်ႈၼႃႈမႃး ႁႂ်ႈႁႃးပီႈၼွင်ႉလႆႈယူႇႁူမ်ႈႁိူၼ်းႁၵ်ႉၵၼ် ၵႂႃႇၶၢဝ်းႁိုင်ၼႆ ယိင်းယွၼ်းသူးဝႆႉယူႇဢေႃႈ တႄႇဢဝ်ၼႆႉၵႂႃႇ ပီႈယႃႇမႆႈၸႂ်သင် ၸွမ်းယိင်းယဝ်ႉၶႃႈ ၵၢၼ်မေႃသွၼ်ယိင်းၵေႃႈ ယိင်းတေဢမ်ႇၽႃႈ တေသွၼ်ပၼ်လုၵ်ႈလၢၼ်

တႆးႁဝ်းႁႂ်ႈပဵၼ်ၵူၼ်းလီၵူၼ်းၵတ်ႉၶႅၼ်ႇႁၵ်ႉၸိူဝ်ႉၶိူဝ်းႁၵ်ႉဝၢၼ်ႈမိူင်းႁဝ်းမိူၼ်ပီႈဢေႃႈ ပီႈၵေႃႈယူႇဝႆႉၼႂ်းႁူဝ်ၸႂ်ယိင်းသေ ပဵၼ် ႁႅင်းၸႂ်ပၼ်ယိင်းၼႃႈပီႈ ၼွင်ႉႁၵ်ႉပီႈတႄႉဢေႃႈ

 သၢႆလူမ်းဢွၼ်ႇထွင်းမႃးလိဝ်လိဝ် ၸွမ်းၽိဝ်ၼမ်ႉၼွင်ၼၼ်ႉ မိူၼ်မွင်ၸႂ်ၸွမ်းယိင်းဢွမ်သႂ်ဝႆႉယူႇၽူႈတႅမ်ႈလိၵ်ႈၵေႃႈၼၼ် ယိၼ်းမွင်ၸႂ်ၸွမ်း ၵေႃႉႁၵ်ႉၵေႃႉႁၢၼ်ၵူႈၵေႃႉ လႄႈ ပေႃႈမႄႈပီႈၼွင်ႉၵေႃႉႁၢၼ်ၶဝ်ၵူႈၵေႃႉယူႇဢေႃႈ။

သိုပ်ႇၵႂႃႇၼႆႉ ၽူႈလႂ်ၽႂ်တေမႃးၸဵပ်းမၢတ်ႇတၢႆယွၼ်ႉႁဝ်းၽိတ်းမေႃးၵၼ်သေလူႉသဵင်ႈသၢႆၸႂ်ၵႂႃႇၸွမ်းထႅင်ႈ ပေႃႈမႄႈပီႈၼွင်ႉၼိူဝ်ႉလိူတ်ႈၸိူဝ်ႉၶိူဝ်းႁဝ်းတေလူတ်းယွမ်းလူင်းၵႂႃႇထႅင်ႈတၢၼ်ႇလႂ် ႁဵတ်းပုၼ်ႈတႃႇပေႃႈမႄႈ ၵူၼ်းမိူင်းၼႆ ယွၼ်ႉသင်လႄႈၸိူဝ်းၶဝ်လႆႈပၢႆႈလႆႈႁႆႈ တူၵ်းၼမ်ႉတႃ ဢမ်ႇလႆႈႁဵတ်းၵိၼ်ၵၢၼ် ၽၢၼ်ႁိူၼ်းယေး ၵပ်ႉဢူၵ်းၵိၼ်ၸႂ်ထႅင်ႈယွၼ်ႉပီႈၼွငိႉၸိူဝ်ႉၶိူဝ်းၸဝ်ႈၵဝ်ႇဢဝ်ပၢၵ်ႇၵွင်ႈၸူၵၼ်ၼင်ႇၼႆယူႇၼႆႉ တေႁိုင်ထႅင်ႈၵႃႈႁိုဝ် ၸင်ႇတေႁၢၼ်ႉၸႂ်သူၶဝ်လႃႇ ယိူင်းဢၢၼ်လုၵ်ႉၽိုၼ်ႉၽႂ်တေႉတေႉ မိူဝ်ႈလႂ်တေၵိုတ်းၽူႈၸိုၵ်းပိုၼ်းၶဝ်ဢူၺ်း

ၸိူင်းတၢင်းႁၵ်ႉဢွၼ်ႇ ဢၼ်ပဵၼ်ၵႂႃႇၸူဝ်ႈပႆႇႁိုင်သင် ၽွင်းတႆးဝိၼ်ႇပၢၵ်ႇၵွင်ႈယိုဝ်းၵၼ်ၶိုၼ်းယူႇၼႆႉ

 #တႅမ်ႈ လိူၼ်မွၼ်းလၢဝ်(ထုင်ႉၼၢင်းသိပ်းသွင်)