လူလိၵ်ႈၼမ်ၼမ် လိုမ်းၵႂႃႇၵေႃႈဢမ်ႇပဵၼ်သင်

 

မီးၼင်ႇဝၼ်းၼိုင်ႈ ပူႇလၢၼ်သွင်ၵေႃႉ ၼင်ႈႁိမ်းၽင်ႇၼမ်ႉသေ ဢုပ်ႇၵၼ်ယူႇ။

ၵေႃႉပဵၼ်လၢၼ်တွင်ႈထၢမ် ပူႇမၼ်းၸၢႆးဝႃႈပူႇပူႇႁဝ်း လူလိၵ်ႈယူႇၵူႈဝၼ်း တွင်းလႆႈၵႃႈႁိုဝ်ၶႃႈလႃႇ? 

ပူႇဢႃႇယုယႂ်ႇယဝ်ႉ တွင်းဢိတ်းဢိတ်း လိုမ်းၼမ်ၼမ်ဢိူဝ်ႈ လၢၼ်ၵေႃႈ။

 ပေႃးၼၼ် လူယဝ်ႉၵေႃႈလိုမ်းၸိုင် တႃႉယႃႇလူႁေယဝ်ႉၶႃႈဢေႃႇ ပူႇၵေႃႈ။ ၵေႃႉပဵၼ်လၢၼ် သိုပ်ႇလၢတ်ႈဝႃႈၼၼ်ယဝ်ႉ။

ပူႇထဝ်ႈယုမ်ႉၸုတ်းၵုတ်းတေႃႇလၢၼ်ဢွၼ်ႇမၼ်းသေလၢတ်ႈဝႃႈလၢၼ်ပူႇ ၵႂႃႇဢဝ်သွင်းၵူၺ်သႂ်ႇထၢၼ်ႇ ႁိမ်းၼၼ်ႉမႃးလူး ၼႆယဝ်ႉ။

လၢၼ်ၸၢႆးဢွၼ်ႇမၼ်းၵႂႃႇဢဝ်မႃးယဝ်ႉ သိုပ်ႇၸႂ်ႉႁႂ်ႈမၼ်းၸၢႆး ဢဝ်ၵူၺ်တႃႁၢင်ႇၼၼ်ႉၵႂႃႇတၵ်းၼမ်ႉၼႂ်းႁွင်ႈမႃးယူႇယဝ်ႉ။

လၢၼ်ၸၢႆးဢွၼ်ႇမၼ်းၵေႃႈ ၵင်ပူၵင်ပႃသေ ၵႃႈလႆႈၵႂႃႇတၵ်းၼမ်ႉယဝ်ႉ။

ၸၢႆးဢွၼ်ႇ ဢဝ်ၵူၺ်တၵ်းၼမ်ႉ ယူပ်ႈလူင်းၵႂႃႇ ယုၵ်ႉမႃးၵေႃႈၼမ်ႉဢမ်ႇၵိုတ်းမႃးသေၵမ်။ ပူႇမၼ်းၸႂ်ႉႁဵတ်းသင်ၵေႃႈ မၼ်းတေႃႈဢမ်ႇပွင်ႇၸႂ်ထႅင်ႈၵွၼ်ႇ။

ပူႇမၼ်းလၢတ်ႈ သိုပ်ႇတၵ်းထႅင်ႈလႄႈမၼ်းၸၢႆးၵေႃႈ တၵ်းၵမ်းလႂ်ၵေႃႈဢမ်ႇလႆႈၼမ်ႉလႃးလႃး။

ၵမ်းၼၼ်ႉ ပူႇထဝ်ႈၸင်ႇထၢမ်တီႈလၢၼ်ၸၢႆးဢွၼ်ႇမၼ်းဝႃႈလၢၼ်ၸၢႆးဢိူၺ်း လွမ်တူၺ်းလူး ၵူၺ်တႃႁၢင်ႇၼၼ်ႉ ၸွင်ႇမိူၼ်မိူဝ်ႈၵမ်းဢွၼ်တၢင်းၼၼ်ႉယဝ်ႉႁိုဝ်လႃႇ? ၼႆယဝ်ႉ။

ၸၢႆးဢွၼ်ႇလွမ်တူၺ်းၶိုၼ်းလီလီ ၵူၺ်ဢၼ်ၵမ်းၵမ်းလႆႈၶၢမ်ႇဢဝ်တၵ်းၼမ်ႉ ၸုမ်ႇၶဝ်ႈၼႂ်းႁွင်ႈၼမ်ႉၼၼ်ႉ လႆႈႁၼ်လွင်ႈဝူၺ်ႇႁင်ႈမၼ်းလူၼ်ႇတူၵ်းသေ သႅၼ်ႈသႂ်မႃးလိူဝ်ၵဝ်ႇတႄႉတႄႉယူႇယဝ်ႉ။

ပူႇထဝ်ႈ သိုပ်ႇလၢတ်ႈဝႃႈ လၢၼ်ဢိူၺ်း! လူလိၵ်ႈဢၼ်ဝႃႈၼၼ်ႉ မိူၼ်ဢဝ်ၵူၺ်တႃႁၢင်ႇ တၵ်းၼမ်ႉၼၼ်ႉယဝ်ႉ။ 

ပေႃးလွမ်တူၺ်းတင်းၼွၵ်ႈမၼ်း ၵူၺ်ဢၼ်တၵ်းၼမ်ႉၼၼ်ႉ လႆႈႁၼ်ၼမ်ႉယွတ်ႇတူၵ်းၵႂႃႇ လႅပ်ႈဢမ်ႇလႆႈၼမ်ႉသေယွတ်ႇသေတႃႉၵေႃႈ ၼမ်ႉၸိူဝ်းၼၼ်ႉ ပွတ်ႈသီပၼ်ႁႂ်ႈၵူၺ်ပေႃးသႅၼ်ႈသႂ်မႃးယူႇယဝ်ႉ။ 

လွင်ႈလူလိၵ်ႈၵေႃႈ မိူၼ်ၼင်ႇၵူၺ်တႃႁၢင်ႇၼႆႉယဝ်ႉ ၊ မၼ်းသုၵ်ႈပွတ်ႈသီပၼ် သဵၼ်ႈၸႂ်ဝိၺိၼ်ႇၵူၼ်းႁဝ်းၵမ်းဢိတ်းဢိတ်းၼၼ်ႉယဝ်ႉ။ ၼႆႉပဵၼ်ၽွၼ်းလီ လူလိၵ်ႈယဝ်ႉဢိူဝ်ႈ။

ပေႃးလူလိၵ်ႈယဝ်ႉပပ်ႉၼိုင်ႈၵေႃႈ သၢႆလႅင်းတင်းႁူႉပၼ်ႇၺႃႇၼႂ်းပပ်ႉၼၼ်ႉ ႁဝ်းတၵ်းလႆႈၸူဝ်ႈၸႂ် လႆႈႁပ်ႉဢဝ်ယူႇယဝ်ႉ။ ၼႂ်းတင်းဝူၼ်ႉ ၼႂ်းဢွၵ်းဢေႃႁဝ်းၼၼ်ႉ မၼ်းလွမ်လွမ်လႅၵ်ႈလၢႆႈပၼ် ၸႂ်ႁဝ်းၵမ်းဢိတ်းဢိတ်းယူႇယဝ်ႉ။ 

ၽူႈတႅမ်ႈလိၵ်ႈၸၢဝ်းၶိူဝ်းၶႄႇၵေႃႉၼိုင်ႈလၢတ်ႈဝႃႈပေႃးၵဝ်ၶႃႈလူပပ်ႉလိၵ်ႈၽိုၼ်လၢႆးၶိုၵ်ႉၶႅမ်ႉပပ်ႉၼိုင်ႈ ယၢမ်းလႂ်ၵေႃႈ ၶဝ်မေႃတိုတ်ႉၸၼ်ဢဝ်ၵဝ်ၶႃႈၵႂႃႇၸွမ်းၶဝ်ယဝ်ႉ။

ပေႃးၵဝ်ၶႃႈပွၵ်ႈမႃးၶိုၼ်းၵေႃႈ ၸိူဝ်းၶဝ်မႃးယူႇၸွမ်းၵဝ်ၶႃႈတႃႇသေႇယဝ်ႉ ၼႆယဝ်ႉ။

ပေႃးလူလိၵ်ႈယဝ်ႉၼိုင်ႈပပ်ႉယၢမ်းလႂ်ေသဢမ်ႇဝႃႈ မၼ်းမေႃသုၵ်ႈသီပၼ်ၸႂ်ဝိၺိၼ်ႇႁဝ်းယဝ်ႉ။ ႁဝ်းၸၢင်ႈထၢင်ႇဝႃႈ ႁဝ်းလူယဝ်ႉၵေႃႈလိုမ်းယဝ်ႉၼႆယူႇ။ တီႈတႄႉ  မၼ်းမႃးယူႇသဝ်းၼႂ်းတင်းဝူၼ်ႉၺၢၼ်ႇသႂ်ႁဝ်းသေ လႅၵ်ႈလၢႆႈပၼ်ၸၢတ်ႈပၢၼ်ႁဝ်း ၵမ်းဢိတ်းဢိတ်းယူႇယဝ်ႉ။ 

ၵွပ်ႈၼၼ်လၢၼ်ၸၢႆးဢိူၺ်း!

= လူလိၵ်ႈလႄႈ

= ထတ်းသၢင်ၸွမ်းလႄႈ

= ႁႂ်ႈပေႃးၵိုတ်းတႃႇၸဝ်ႈၵဝ်ႇၼၼ်ႉ မိပ်ႇဢဝ်တင်းဝူၼ်ႉ တင်းႁၼ်ၸဝ်ႈၵဝ်ႇဢွၵ်ႇမႃးၸွမ်းပပ်ႉလိၵ်ႈလႄႈ။

=  ဢၼ်ဢမ်ႇၶဝ်ႈပွင်ႇၶဝ်ႈပေၵေႃႈ လိုမ်းပႅတ်ႈလႄႈ။

= ဢွၵ်းဢေႃႁဝ်းၼႆႉ ဢမ်ႇၸႂ်ၵူၺ်ယုၵ်းယၢၵ်း ယႃႇပေသႂ်ႇယုၵ်းယၢၵ်းဝႆႉ။

ၸွင်ႇလၢၼ် ပႃႈပွင်ႇၸႂ်ယဝ်ႉႁိုဝ်? 

လၢၼ်ပွင်ႇၸႂ်ယဝ်ႉၶႃႈပူႇ။ လၢၼ်တေၶတ်းၸႂ်လူလိၵ်ႈၵူႈဝၼ်းၶႃႈပူႇ။ 

လီတႄႉတႄႉယဝ်ႉ လၢၼ်ပူႇဢိူၺ်း!

လူႇယဝ်ႉၵႂႃႇလွင်ႈပူႇသွၼ်လၢၼ်ယဝ်ႉသေ လႆႈတွၼ်ႈသွၼ်သင်ၽွင်ႈ ?

သင်လႆႈၸႂ်ယူႇၸိုင် Like , Share ပၼ်ဢူၺ်းၵေႃႉၵႂႃႇလႄႈ

#ShanBooks #Read #Book#လူ #ပပ်ႉ #လိၵ်ႈ#တၢင်းႁူႉ 

ပိၼ်ႇတႅမ်ႈ>>ဝတ်ႉမႁႃႇၵမ်ႇပေႃၹတႆးလႅင်း ဝဵင်းတႃႈလိူဝ်ႇ