ႁပ်ႉတွၼ်ႈပီႊမႂ်ႇ သႂ်ႇၸႂ်ဝူၼ်ႉတူၺ်း လိၵ်ႈႁူဝ်ၼႆႉ

 

သင်ႁဝ်းၸႂ်ႉပီႊလိူၼ်ဝၼ်းတႆးၸိူင်ႉၼႆ ၸွမ်းၼင်ႇဝႃႈထုင်းၵဝ်ႇယႃႇႁႂ်ႈႁၢႆလၢႆးမႂ်ႇႁႂ်ႈၶိုတ်းၵၢပ်ႈၼႆၼၼ်ႉသေသိုပ်ႇတၢမ်းလၢမ်းပႆမႃးထိုင်ယၢမ်းလဵဝ် ပီႊမႂ်ႇ ႒႑႑႕ ၼီႈၵေႃႈၸမ်ႁွတ်ႈထိုင်မႃးယဝ်ႉလႄႈၼႆၶႂ်ႈႁႂ်ႈဢွၼ်ၵၼ်ၶူၼ်ႉဝူၼ်ႉႁၼ်လၢႆးၼပ်ႉဝၼ်းလိူၼ်ပီႊတႆးႁဝ်းယၢမ်ႈၸႂ်ႉၼင်ႇႁိုဝ်မႃး လႄႈသိုပ်ႇၵႂႃႇၼႆႉ ႁဝ်းထုၵ်ႇလီႁဵတ်းၼင်ႇႁိုဝ်ၼႆၸိူဝ်းၼႆႉယူႇ

လၢႆးၼပ်ႉဢၢၼ်ႇပီႊတႆး မိူဝ်ႈၼၼ်ႉထိုင်ယၢမ်းလဵဝ်  ၼပ်ႉဝၼ်းတႆး

• ႁႃႈဝၼ်း ပဵၼ်ၼိူင်ႈၵၢတ်ႇ
• သွင်ၵၢတ်ႇ ပဵၼ်ၼိူင်ႈဝူင်ႈ
• သၢမ်ဝူင်ႈ ပဵၼ်ၼိူင်ႈလိူၼ်
• သိပ်းသွင်လိူၼ် ပဵၼ်ၼိူင်ႈပီႊ

ၼႂ်းပိူင်ၼပ်ႉဢၢၼ်ႇလၵ်းၼီႈပီႊတႆးႁဝ်းၼၼ်ႉ  မီးဝႆႉ မႄႈပီႊ လႄႈ လုၵ်ႈပီႊၼႆ သွင်မဵဝ်း။ 

မႄႈပီႊမီး 10 တူဝ်။ လုၵ်ႈပီႊမီး 12တူဝ်။(မႄႈပီႊ 10 တူဝ်ၼႆႉ သိပ်းလုၵ်ႈဝၼ်း ၼႆၵေႃႈဝႃႈယဝ်ႉ)။မႄႈပီႊလႄႈ လုၵ်ႈပီႊၼႆႉ လႆႈႁွမ်းၵၼ် ၼပ်ႉသွၼ်ႇၵႂႃႇယဝ်ႉ။

တူဝ်ယၢင်ႇ တႃႇပွင်ႇၸႂ်ငၢႆႈၼၼ်ႉ
ဝႆႉဝႃႈ  မႄႈ ပီႈသိပ်းတူဝ် ပဵၼ်
1   2   3   4  5  6  7  8  9  10   သေ

လုၵ်ႈပီႊ တူဝ် ပဵၼ်
ၵ ၶ င ၸ သ ၺ တ ထ ၼ ပ ၽ ၾ  - ၼႆတႃႉ

လၢႆးၼပ်ႉဢၢၼ်ႇမၼ်းၸမ်း
1ၵ   ၊  2ၶ   ၊ 3င   ၊   4ၸ ၊ 5သ  ၊  6ၺ
7တ  ၊ 8ထ  ၊ 9ၼ  ၊ 10ပ  ၊ 1ၽ  ၊  2ၾ 
3ၵ   ၊  4ၶ   ၊ 5င  ၊  6ၸ   ၊ 7သ  ၊  8ၺ
9တ  ၊ 10ထ ၊ 11ၼ  

ႁဵတ်းၼၼ်သေ မႄႈပီႊလႄႈ လုၵ်ႈပီႊ ႁွမ်းၵၼ် ၼပ်ႉၵႂႃႇ ။ ပေႃးလႆႈႁူၵ်းသိပ်းဝၼ်းၼႆ  တေတဵမ်ႁွပ်ႈၶိုၼ်းသေ မႄႈပီႊ မၢႆၼိူင်ႈလႄႈ လုၵ်ႈပီႊ မၢႆၼိူင်ႈၵေႃႈ တေၺႃးၵၼ်ၶိုၼ်းယဝ်ႉ။ ပိုင်ႈၼိူဝ်လွၵ်း ႁူၵ်းသိပ်းဝၼ်းပၼ်ႇႁွပ်ႈၼႆႉသေယဝ်ႉ တႆးႁဝ်းၸင်ႇ မီးမႃး ၽိင်ႈႁွင်ႉ ဝၼ်းဝူင်ႈလိူၼ်ပီႊ ၼင်ႇၼႆ ။

• ႁႃႈဝၼ်းပဵၼ်ၼိူင်ႈၵၢတ်ႇ
• သွင်ၵၢတ်ႇပဵၼ်ၼိူင်ႈဝူင်ႈ
• သၢမ်ဝူင်ႈပဵၼ်ၼိူင်ႈလိူၼ်
• သွင်လိူၼ် ယေႈပၼ်ႇႁွပ်ႈ
• ႁူၵ်းပၼ်ႇႁွပ်ႈ ၼိူင်ႈပီႊ    ၼႆယဝ်ႉ ။

ၸိူဝ်းပႃႈၼိူဝ်ၼႆႉ လႆႈႁၼ်တီႈဢၼ်
#ၸၢႆးၵွၼ်း (ပၢင်ႇဢူး) ၵဵပ်းႁွမ်တွမ်ႊတႅမ်ႈဝႆႉ

ၸွမ်းၼင်ႇလွၵ်းလၢႆၼပ်ႉၵဝ်ႇၵဝ်ႇယၢမ်ႈမီးမႃးယဝ်ႉသေၼင်ႇႁိုဝ်ပေႃးတေတိူဝ်းမီးလွင်ႈလႅၵ်ႈလၢႆႈတီႈလီ ၶဝ်ႈတၢင်းတိုဝ်းၼၼ်ႉ ယူႇတီႈတၢင်းႁၼ်ထိုင်သေၶႂ်ႈၽိူမ်ႉပၼ်ဝႃႈၼင်ႇႁိုဝ်ပီႊလႄႈလိူၼ်ဝၼ်းတႆးႁဝ်းပေႃးတေၸႂ်ႉတိုဝ်းလႆႈငၢႆႈလိူဝ်ၼၼ်ႉၼႆသေ

တိူဝ်းဝူၼ်ႉလႆႈဝႃႈသင်ႁဝ်းၸႂ်ႉၸွမ်းမိူၼ်ၼင်ႇ
ပီႊလိူၼ်ဝၼ်း ၼင်ႇတၢင်ႇၸၢဝ်းၶိူဝ်းၼၼ်ႉၼႆ
တေတိူဝ်းလီယူႇႁိုဝ် ပိူင်တႅၵ်ႈ မိူၼ်ၼင်ႇဝႃႈ

( လိူၼ်ၸဵင်မႂ်ႇ/႑/႒႑႑႕ )တႆး
လိူၼ်ၸဵင်လွင်ႈ/႑ၶမ်ႈ/႒႑႑႕ ပီႊ 

မိူၼ်ၼင်ႇ December/15/2020

ၼင်ႇၼႆၸိုင် တေဢွၵ်ႇၽၢင်ႁၢင်ႈမႃးလူၺ်ႈဝႃႈ ၵၢၼ်ၸႂ်ႇတိုဝ်းတူဝ်ၼပ်ႉတႆးလႄႈ ၼပ်ႉဝၼ်းလိူၼ်ပီႊတႆးၵႂႃႇၸွမ်းၼင်ႇပပ်ႉမၢႆဝၼ်းၼၼ်ႉလႆႈလီၼႆ

ယုမ်ႇယမ်ဝႃႈတေၸၢင်ႈပဵၼ်လွၵ်းလၢႆးလီတႃႇပီႊမႂ်ႇႁဝ်းၵႂႃႇယူႇၼႆသေ ယွၼ်းတၢင်းႁၼ်ထိုင်ၵၼ်ယိုၼ်ႈပၼ်ၵၼ်ၵႂႃႇသေၵမ်း။

တႆးႁဝ်းၵေႃႈယွၼ်ႉမီးဝူတ်ႉသင်လူင်လၢင်ဢၼ်ၸွမ်းတွပ်ႇတႅၼ်းတႆးဢမ်ႇယဝ်ႉဢမ်ႇဝၢႆးၼၼ်ႉ ပီႊမႂ်ႇမိူဝ်ႈလႂ်ၵေႃႈႁဝ်းလႆႈထဵင်ၵၼ်မိူဝ်ႈၼၼ်ႉၼႆႉမီးယူႇ တီႈတူဝ်လိၵ်ႈ ပီ ပီႊ ၼႆႉဢမ်ႇယဝ်ႉဢမ်ႇဝၢႆး မီးၸုမ်းသိုၵ်းၵေႃႈသွင်ဢၼ် မီးၸုမ်းၵၢၼ်မိူင်းၵေႃႈသွင်ဢၼ် မီးၽွၼ်ႉလိၵ်ႈတႃႇၸႂ်ႉၼႂ်းပၢၼ်ၼႆႉၵေႃႈ မီးသွင်ဢၼ်

ၼၢမ်ႇသွင်ဢၼ်ၸိူင်ႉၼႆမီးၼမ် ပဵၼ်လွၵ်းလၢႆးႁဝ်းသေႇယႃႉတိုတ်ႉၵၼ် ၼမ်ႁႅင်းလႄႈ တႃႇတေၶိုၼ်ႈယႂ်ႇမႃးၼၼ်ႉၵေႃႈ လူမ်ႉလုၵ်ႈ ၶီႇၶေႃးၵၼ် သေႉၵၼ် ၼေးၵၼ် မင်ၵၼ်မႃးယူႇ ၽႂ်ၵေႃႈဢမ်ႇႁွၼ်ႇဝူၼ်ႉယွမ်းၼွမ်းမႃႇၼတႆးၶႄႉၶဵင်ႇတႆးမႃး တႃႇၵႂႃႇၼႃႈၾႃႉလီပီမႂ်ႇၼႆႉ ၶႂ်ႈႁႂ်ႈၵူႈၵေႃႉဝူၼ်ႉသွၼ်ႇပႃးယူႇ လွင်ႈၶႂ်ႈႁႂ်ႈတႆးႁဝ်းတေသိုပ်ႇပဵၼ်ၵႂႃႇၸိူင်ႉၼင်ႇႁိုဝ်ၼႆၼၼ်ႉ။

ပဵၵ်ႉသမ်ႉဝႃႈတူဝ်မႂ်ႇၸႂ်မႂ်ႇယူႇၵူႊပီႊသေတႃႉငိုၼ်းၵႃႈၸႂ်ႉၸၢႆႇၵႃႈၶူဝ်း ၵႃႈလဵင်ႉလူႁဝ်း လွၵ်းလၢႆးႁဵတ်းဝူၼ်ႉႁူမ်ႈသၢင်ႈႁဝ်းဢမ်ႇမႂ်ႇသေပွၵ်ႈဢမ်ႇၵႃး တိူဝ်းႁူၼ်လင်မႃးလွႆးလွႆးယဝ်ႉထုၵ်ႇလီပိၼ်ႇလႅၵ်ႈၸိူင်ႉႁိုဝ်ၵၼ်ၼႆ ၼၼ်ႉၵေႃႈၽၢၵ်ႇၶေႃႈၵႂၢမ်းဝႆႉၵႂႃႇလႄႈ ဢူၺ်းၵေႃႉၽူႈသူင်လူလိၵ်ႈႁဝ်းၶဝ်။

ႁႂ်ႈတူဝ်ၸႂ်သွင်ပိူင်ၵတ်းၸိုၼ်ႈယဵၼ်ၸႂ်လူၺ်ႈပီႊမႂ်ႇတႆးႁဝ်းၵႂႃႇသေၵမ်း။