ႁႅင်းဢီးတႃႇယိူင်းမၢႆလီ

                                     

 မိူဝ်ႈၼၼ်ႉၼၼ်ႉ မီးယူႇဝဵင်းၼိုင်ႈ မီးၵူၼ်းႁၢႆႉလူင် ၵေႃႉၼိုင်ႈ တမ်ႇၼူတ်ႇၶဝ်ၺွပ်းလႆႈမၼ်းလႄႈ ႁူဝ်ၼႃႈတမ်ႇၼူတ်ႇၵေႃႈတူၺ်းပပ်ႉမၢႆတွင်းတူဝ် မၼ်းသေၸင်ႇထၢမ်ဝႃႈ -

" ယွၼ်ႉသင်လႄႈသူလႆႈမႃးပဵၼ်ၵူၼ်း ၸူၼ်ႁၢႆႉလူင်ၸိူင်ႉၼႆလႃႇၼႆ ၼင်ႇႁိုဝ်ၵူၼ်း ၼုမ်ႇၶဝ်တေလႆႈဢဝ်တွၼ်ႈသွၼ်ၼၼ်ႉ မွၵ်ႇ လၢတ်ႈၼႄၽွင်ႈ " ။

 တွပ်ႇ - " လွင်ႈဢၼ်ၵဝ်ၶႃႈလႆႈမႃးပဵၼ်ၸူၼ်လူင် ၼႆႉယွၼ်ႉပိူဝ်ႈပေႃႈသိုပ်ႇၵဝ်ၶႃႈဢေႃႈ၊ ပေႃႈသိုပ်ႇ ၵဝ်ၶႃႈၼၼ်ႉဝႃႈ ယွၼ်ႉမၼ်းလႆႈႁဵတ်းလဵင်ႉႁဝ်း ၼႆသေ ပေႉၵိၼ်ႁဝ်းၶႃႈလႄႈ ၵဝ်ၶႃႈၵေႃႈၶႂ်ႈႁဵတ်း ၶိတ်ႉပေႃႈသိုပ်ႇလႄႈၸင်ႇလႆႈၵိၼ်လဝ်ႈ တေႃႇလွင်း ယဝ်ႉၵေႃႈမၢင်ၶမ်ႈၼႆဢမ်ႇပွၵ်ႈႁိူၼ်းသေၼွၼ်း ၸွမ်းတၢင်းယူႇ၊ ႁဵၼ်းၼၼ်ယဝ်ႉ လႆႈလဵၼ်ႈၵေႃႉ မႅၼ်ႈၵူၼ်းၽိတ်းသေ ၸင်ႇမေႃသူႇယႃႈလႄႈ မေႃလၵ်ႉ မေႃၸူၼ်မႃးယဝ်ႉ " ။

 ထၢမ် - " သူမီးပီႈၸၢႆးၵေႃႉၼိုင်ႈၼႆ မၼ်းၵေႃႈ ပဵၼ်ၵူၼ်းၸူၼ်ႁၢႆႉလူင်ၵူၺ်းႁႃႉ? " ။ 

တွပ်ႇ - " ဢမ်ႇၸႂ်ႈၶႃႈ၊ မၼ်းတႄႉမီးတၢင်ႇဝဵင်း သေ ပဵၼ်မေႃသွၼ်လူင်ၸၼ်ႉၸွမ်ဢေႃႈ " ။ 

ႁူဝ်ၼႃႈတမ်ႇၼူတ်ႇၼၼ်ႉၵေႃႈ ၸင်ႇတိူဝ်းၶဝ်ႈၸႂ် ၸင်ႇလႆႈၵႂႃႇတီႈၸၼ်ႉၸွမ်ဢၼ်မေႃသွၼ်လူင် ယူႇၼၼ်ႉသေ ထၢမ်မေႃသွၼ်လူင်ဝႃႈ ။ 

ထၢမ် - " မေႃသွၼ်လူင်ႁဝ်းၶႃႈ! တွၼ်ႈတႃႇတေ ပဵၼ်မေႃသွၼ်လူင်မႃးၼႆႉ လႆႈၶတ်းၸႂ်မႃးၸိူင်ႉႁိုဝ် လႆႈၶၢမ်ႇယၢပ်ႇမႃးၸိူင်ႉႁိုဝ်ၼႆ ၼင်ႇႁိုဝ်ၵူၼ်းၼုမ်ႇ ၶဝ်တေလႆႈဢဝ်တွၼ်ႈသွၼ်ၼၼ်ႉ ၸွႆႈမွၵ်ႇလၢတ်ႈ ၼႄၽွင်ႈၶႃႈ " ။ 

တွပ်ႇ - " ဢၼ်ၵဝ်ၶႃႈလႆႈမႃးပဵၼ်မေႃသွၼ်လူင် ၼႆၵေႃႈ ပဵၼ်ယွၼ်ႉပိူဝ်ႈ ပေႃႈသိုပ်ႇဢေႃႈ " ။

ထၢမ် - " ပေႃႈသိုပ်ႇသမ်ႉၸွႆႈထႅမ်ၸိူင်ႉႁိုဝ်ၶႃႈ " ။ 

တွပ်ႇ - " ပေႃႈသိုပ်ႇၸွႆႈထႅမ်တႄႉဢမ်ႇၸႂ်ႈၶႃႈ၊ ယွၼ်ႉပေႃႈသိုပ်ႇပေႉၵိၼ်ႁဝ်းလႄႈ၊ ၵဝ်ၶႃႈၵေႃႈ ပေႃးပေႃႈသိုပ်ႇပေႉၵိၼ်မိူဝ်ႈလႂ်ၵေႃႈ လႆႈၵႂႃႇ တီႈႁူင်းတူၺ်းလိၵ်ႈသေလူလိၵ်ႈဢေႃႈ၊ မၢင်ပွၵ်ႈၵေႃႈ ဢမ်ႇပဵၼ်မိူဝ်းႁိူၼ်း လၢတ်ႈတီႈ ၽူႈပႂ်ႉႁူင်းတူၺ်းလိၵ်ႈသေ ၼွၼ်းတီႈႁူင်းတူၺ်းလိၵ်ႈဢေႃႈ၊ ၽူႈပႂ်ႉႁူင်းတူၺ်းလိၵ်ႈၵေႃႈ လိူၵ်ႈႁႃပပ်ႉလိၵ်ႈ ဢၼ်လီလူသေပၼ်ၵဝ်ၶႃႈလူလႄႈ ယွၼ်ႉပိူဝ်ႈ လူလိၵ်ႈသေ ၵဝ်ၶႃႈၸင်ႇ လႆႈႁူႉလွင်ႈပိူင်ပဵၼ်ၶူင်းၵၢင်သေ ၵဝ်ၶႃႈႁူႉလွင်ႈတႃႇတေၸုၵ်းမၼ်ႈၼႂ်ႈၸၢတ်ႈပၢၼ် လႄႈၵဝ်ၶႃႈၸင်ႇၶတ်းၸႂ်ေသ ၸူးပဵၼ်မႃးမေႃသွၼ် လူင်ၸိူင်ႉၼႆဢေႃႈ " ။

 တွၼ်ႈသွၼ် - လွင်ႈလႆႈထူပ်းပေႃႈသိုပ်ႇလႄႈ လွင်ႈလႆႈထုၵ်ႇပေႃႈသိုပ်ႇႁဵတ်းႁၢႆႉပေႉၵိၼ်ၼၼ်ႉ မိူၼ်ၵၼ်ယူႇသေတႃႉ၊ ၵေႃႉဢၼ်ၵိၼ်လဝ်ႈသေ ပၼ်ၶၢဝ်းယၢမ်းသုမ်းလၢႆလႄႈၵေႃႉဢၼ်ဢဝ် ၶၢဝ်းယၢမ်းသေလူလိၵ်ႈၼႆႉ မၼ်းပိူင်ႈၵၼ်ၸိူင်ႉႁိုဝ်ၼႆ ႁၼ်ၸႅင်ႈလႅင်းလီၼႃႇ၊ ယဝ်ႉၵေႃႈ ၽွၼ်းလီလွင်ႈ လူလိၵ်ႈၼႆႉ မၼ်းလႅၵ်ႈလၢႆႈပၼ်ၸၢတ်ႈပၢၼ်ၵူၼ်း ႁဝ်းၵႃႈႁိုဝ်ၼႆၵေႃႈ ႁၼ်ၸႅင်ႈလႅင်းလီၼႃႇ။

 လွၵ်းလၢႆးတၢင်းလူလိၵ်ႈ သၢမ်ပိူင် - 

1. ဢဝ်တႃသေလႄႈလူလိၵ်ႈ - ပပ်ႉလိၵ်ႈလႄႈ ႁၢင်ႈၽၢင်ၶူင်းၵၢင်ဢၼ်တႃလႆႈတူၺ်းႁၼ်  ။

 2. ဢဝ်ႁူသေလႄႈလူလိၵ်ႈ - လွင်ႈထွမ်ႇတြႃးလႄႈ လွင်ႈထွမ်ႇပၢင်တၢၼ်ႈၶႆႈထႅမ်တၢင်းႁူႉ ။ 

3. ဢဝ်တိၼ်သေလႄႈလူလိၵ်ႈ - လွင်ႈဢွၵ်ႇၶၢဝ်း တၢင်းလႄႈလဵပ်ႈႁဵၼ်းဢဝ်တၢင်းႁူႉ ။

ၸိူဝ်းၼႆႉယဝ်ႉ မီးလွင်ႈသုၵ်ႉသင်မႃးၵေႃႈ ႁႂ်ႈမေႃသွၵ်ႈႁႃ တၢင်းႁူႉ ႁႅင်းဢီးတႃႇယၢင်ႈၸူးယိူင်းမၢႆလီသေၵမ်း။ ၼပ်ႉယမ်ၽူႈလူလိၵ်ႈႁဝ်းၶဝ်တင်းသဵင်ႈသေ ..... 

ပိၼ်ႇ - ၶမ်းသႅၼ်