သဵင်ႁူဝ်ၸႂ်ဢွၼ်ႇ ၽူႈပိၼ်ႇတႅမ်ႈလိၵ်ႈ

 

                                        

လွင်ႈတၢင်းဢၼ်ၶႂ်ႈလၢတ်ႈတႄႉ တႃႇတေပဵၼ်မႃး ၽိုၼ်လိၵ်ႈၼိုင်ႈၽိုၼ် မွၼ်းၵႂၢမ်းၼိုင်ႈထႅဝ် ဝွၵ်းၼိုင်ႈၶေႃႈၼၼ်ႉ ပိၼ်ႇတႅမ်ႈႁိုဝ် ဝူၼ်ႉတႅမ်ႈႁိုဝ် ၵဵပ်းႁွမ်ဢဝ်မႃးပိုၼ်ၽႄႁိုဝ် ၼႂ်းဢွင်ႈတီႈလႂ်ၵေႃႈယဝ်ႉ မၼ်းဢမ်ႇငၢႆႈꧦ တႃႇၽူႈတႅမ်ႈၽူႈပိၼ်ႇၶဝ် တေတႅမ်ႈပဵၼ်ပပ်ႉမႃးႁႃႉ? (ဢမ်ႇၼၼ်) တႅမ်ႈတၢင်ႇၼိူဝ်/ၼႂ်း Facebook & Pages Manager ၵေႃႈယဝ်ႉ လႆႈၸႂ်ႉတိုဝ်း ၶၢဝ်းယၢမ်းတင်းၼမ်သေ ၸင်ႇၸၢင်ႈတႅမ်ႈၶႃႈယဝ်ႉ။

မိူဝ်ႈဢၼ်တႅမ်ႈၼၼ်ႉၵေႃႈ ၸဝ်ႈပၢႆၵမ်ၸဝ်ႈလႂ် ၵေႃႉလႂ်သေဢမ်ႇဝႃႈ ဢမ်ႇၸႂ်ႈဝႃႈ တႅမ်ႈလႆႈငၢႆႈꧦမိူၼ်ပိူၼ်ႈ ၽိုၼ်ႉတူၺ်းပပ်ႉၼၼ်ႉလေႃႇ ပေႃးပဵၼ်ဢွင်ႈ တီႈဢၼ်သဵင်လင်ဢူၼ်ဢၢၼ်သုၵ်ႉသၵ်ႉ  တီႈဢၼ်ၵူၼ်းၼမ် တီႈဢၼ်မႆႈၼႃႇပူၼ်ႉတီႈဢၼ်ၵတ်းၼႃႇပူၼ်ႉ ၸိူဝ်းၼႆႉဢမ်ႇႁဵတ်းႁႂ်ႈ ၸၢင်ႈၸႂ်ၼိမ်ယဵၼ် ဝူၼ်ႉတႅမ်ႈ ပိၼ်ႇတႅမ်ႈ မႃးလႆႈလႆႈလႃႈ ၵႃႈလႆႈယူႇလိူၵ်ႈဝႃဢွင်ႈဢၼ်တေသၢင်ႇထုၵ်ႈၼၼ်ႉၵွၼ်ႇယဝ်ႉ။

ၶၢဝ်းယၢမ်းဢၼ်တႅမ်ႈၼၼ်ႉၵေႃႈ ဢမ်ႇၸႂ်ႈဝႃႈ လႆႈပၼ်ၶၢဝ်းယၢမ်းမွၵ်ႈ လၢႆမဵတ်ႉဢွၼ်ႇၵူၺ်း မၢင်ပွၵ်ႈ လႆႈၸႂ်ႉၶၢဝ်းယၢမ်း ပဵၼ်လၢႆၸူဝ်ႈမူင်းၵွၼ်ႇ ၼင်ႇႁိုဝ်တေ လီလူလီဢၢၼ်ႇ ၵူၺ်းဢမ်ႇၵႃး ႁႂ်ႈပေႃးလႆႈပၼ်ပႃးၸွမ်း ၽွၼ်းလီၼၼ်ႉယဝ်ႉ (ၸဝ်ႈပၢႆၵမ် မၢင်ၵေႃႉ မၢင်ၸဝ်ႈတႄႉတေ တႅမ်ႈလႆႈလီ တႅမ်ႈလႆႈဝႆးယူႇၵေႃႈ ၸၢင်ႈပဵၼ်လႆႈ )    ပေႃးထၢၼ်ႈဝႃႈ ယၢပ်ႇမွၵ်ႈၼၼ်ႉ တေႁဵတ်းႁဵတ်းသင်လႃႇ? ၼႆႁုတေမီးၵူၼ်းၶႂ်ႈႁုယူႇ ယွၼ်ႉဝႃႈၽူႈတႅမ်ႈလိၵ်ႈၵူႈၸဝ်ႈၵူႈၵေႃႉမီးတၢင်းသူင်ဝႃႇသၼႃႇ လွမ်မုင်ႈမွင်း ၶႂ်ႈႁၼ်ၵူၼ်းၸၢဝ်းၶိူဝ်းတႆးၵူၼ်းၶိူဝ်းၸဝ်ႈၵဝ်ႇႁႂ်ႈလႆႈသူင်မိုတ်ႈလိၵ်ႈ လူလိၵ်ႈ တႅမ်ႈလိၵ်ႈ ၼမ်ꧦ ၸိူဝ်းၼၼ်ႉယဝ်ႉ။

တႅမ်ႈလိၵ်ႈယဝ်ႉ ၶႂ်ႈမီးၸိုဝ်ႈသဵင်လီႁႃႉ?    ပေႃးထၢမ်ဝႃႈၼႆ ဢမ်ႇၸႂ်ႈၶႃႈလေႃႇ ၸိုဝ်ႈသဵင်လီဢၼ်ဝႃႈၼၼ်ႉၵူၼ်းႁဝ်းၼိုင်ႈၵေႃႉၼႆႉ ပေႃးဢမ်ႇႁဵတ်းၽိတ်းပၵ်းပိူင် ၽြႃးပဵၼ်ၸဝ်ႈ(ၽိတ်းသိၼ်) ၽိတ်းပၵ်းပိူင်ဝၢၼ်ႈမိူင်းၵေႃႈႁုတိုၼ်းမီးဝႆႉၸိုဝ်ႈသဵင်လီ မိူၼ်ၵၼ်ယူႇယဝ်ႉၵူၺ်းၶႃႈလူး။

တႅမ်ႈလိၵ်ႈယဝ်ႉ ၶႂ်ႈလႆႈၼႃႈႁႃႉ? ပေႃးထၢမ်ဝႃႈၼႆ ဢမ်ႇၸႂ်ႈၶႃႈလေႃႇ ၵူၼ်းႁဝ်းၵူႈၵေႃႉတိုၼ်းမီးၼႃႈၵေႃႉဢၼ်ၵူၺ်း ၵေႃႈပဵင်းပေႃးယဝ်ႉၶႃႈဝႃႈ     (မၢင်ပွၵ်ႈ တေႃႈမီးၼႃႈလဵဝ်ၵူၺ်း ယင်းၶႂ်ႈၶၢၼ်ႉသုၵ်ႈယဝ်ႉ ဢမ်ႇၸႂ်ႈႁိုဝ်?)    တႅမ်ႈလိၵ်ႈယဝ်ႉ မွင်းႁႂ်ႈပိူၼ်ႈယုၵ်ႉယွင်ႈႁႃႉ? ပေႃးထၢမ်ဝႃႈၼႆ ဢမ်ႇၸႂ်ႈၶႃႈလေႃႇ ၼႂ်းလိၵ်ႈၼိုင်ႈၽိုၼ် ဢၼ်ၽူႈဝူၼ်ႉတႅမ်ႈ ၽူႈပိၼ်ႇတႅမ်ႈၶဝ် တႅမ်ႈယူႇၼၼ်ႉ ၶဝ်ဢမ်ႇလႆႈမုင်ႈမွင်းသင် ၼမ်လိူဝ်သေ မွင်းမီးၵူၼ်းလူဢၢၼ်ႇ    ပၼ်ၶႃႈၶႃႈၼႃႈပေႃးတေထၢမ်ဝႃႈ ပေႉၵႆႉတႅမ်ႈလႃႇ?ၵဝ်ၶႃႈတႄႉ ၵႆႉယွၼ်ႉတၢင်းသူင်လႄႈ ဢဝ်လွင်ႈတႅမ်ႈလိၵ်ႈတွပ်ႇၵုင်ႇမုၼ်ၸိူဝ်ႉၶိူဝ်းၵဝ်ၶႃႈ ဢမ်ႇၼမ်ၵေႃႈဢေႇ တွပ်ႇၵုင်ႇမုၼ်ပေႃႈမႄႈ ဢၼ်သူင်ႇၵဝ်ၶႃႈ ၶဝ်ႈႁူင်းႁဵၼ်း တွပ်ႇၵုင်ႇမုၼ်ၶူး/မေႃသွၼ် ဢၼ်ဝႆႉၸႂ်ယႂ်ႇꧦယၢဝ်းꧦ သင်ႇသွၼ်ပၼ်ၶႃႈမႃး လႄႈၼမ်ႉၸႂ်ဢၼ်ၶႂ်ႈၸွႆႈထႅမ် ပေႃးမီးၽႂ်လူယဝ်ႉ ၶႂ်ႈႁႂ်ႈပဵၼ်ႁႅင်းၸႂ်လႆႈ မူၼ်ႈသိူဝ်းၸွမ်းလိၵ်ႈလႆးလႄႈ ၽိူမ်ႉထႅမ်တၢင်းႁူႉတူဝ်ၵဝ်ႇသေ သိုပ်ႇယိုၼ်ႈပၼ်တီႈ ၽူႈသူင်လူလိၵ်ႈၶဝ် ၸိူဝ်းၼႆႉယဝ်ႉ။

ပေႃးတေထၢမ်ဝႃႈ ပေႉမႃးတၼ်းလႃႇ ဢမ်ႇမီးၵၢၼ်သင်?ဢမ်ႇႁဵတ်းၵၢၼ်သင်ႁႃႉ? ၼႆဢမ်ႇၸႂ်ႈၶႃႈလေႃႇ ၵၢၼ်လႄႈၵူၼ်း မၼ်းတိုၼ်းၵိုၵ်းၵၼ် မႃးယူႇယဝ်ႉၶလူးၸဝ်ႈပၢႆၵမ်ၵူႈၸဝ်ႈၵူႈၵေႃႉၵေႃႈ ၵမ်ႈၽွင်ႈႁဵတ်းၵၢၼ်ႁဵၼ်း ၵမ်ႈၽွင်ႈႁဵတ်းၵၢၼ်ပၢႆးမၢၵ်ႈမီး ၵမ်ႈၽွင်ႈပဵၼ် ႁႅင်းၵၢၼ်ယၢၼ်မိူင်းၵိူတ်ႇၸဝ်ႈၵဝ်ႇ ၸိူဝ်းၼႆႉ လႆႈႁိမ်ဢဝ်ၶၢဝ်းယၢမ်းဢၼ်လိုဝ်ႈႁိူဝ်ႉသေ ၶတ်းၸႂ်ဝူၼ်ႉပိၼ်ႇတႅမ်ႈၼင်ႇၵႃႈပွင်ပဵၼ်လႆႈယဝ်ႉ။

မၢင်ပွၵ်ႈမၢင်လႂ် ၵဝ်ၶႃႈၵႆႉထႆႇႁၢင်ႈ ဢၼ်လူပပ်ႉလိၵ်ႈသေ တၢင်ႇၼႂ်း/ၼိူဝ် Facebook ၼၼ်ႉ ၶႂ်ႈႁႂ်ႈၵူၼ်းတင်းၼမ်ယုၵ်ႉယွင်ႈဝႃႈ ပဵၼ်ၵူၼ်းၵႆႉလူလိၵ်ႈၼႆ ဢမ်ႇၸႂ်ႈၶႃႈလေႃႇ ယုၵ်ႉယွင်ႈဢမ်ႇယုၵ်ႉယွင်ႈၵေႃႈ ပေႃးၶႃႈၶတ်းၸႂ်လူ ၽွၼ်းလီၵေႃႈပဵၼ်ပုၼ်ႈၶႃႈၵူၺ်းလူး တီႈတေႉယဝ်ႉ ၶႃႈၶႂ်ႈႁႂ်ႈၵူၼ်းတူၺ်း မေႃယိူင်ႈဢဝ်တီႈဢၼ်လီယိူင်ႈ ၼင်ႇလူပပ်ႉလိၵ်ႈၸွမ်း မိူၼ်ၵၼ်လႄႈၸင်ႇလႆႈထႆႇႁၢင်ႈသေၼႄၼင်ႇၼၼ်ၵူၺ်း ႁႂ်ႈပွင်ႇၸႂ်။

မၢင်ပွၵ်ႈမၢင်လႂ် လႆႈႁၼ်ၸဝ်ႈပၢႆၵမ်ၶဝ်ၵမ်ႈၽွင်ႈၵေႃႈ ဢဝ်ႁႅင်းၸႂ်တူၵ်းၵႂႃႇ ယွၼ်ႉဢမ်ႇမီးၵူၼ်းလူဢၢၼ်ႇ ဢမ်ႇမီးၵူၼ်းပၼ်ႁႅင်းသေ လႆႈၵိုတ်းလိုဝ်ႈပၢႆၵမ်ၵႂႃႇၼၼ်ႉ လီငိၼ်းသေလၢႆတေႉꧦယဝ်ႉၶႃႈၵူၺ်းၵႃႈၵေႃႉဢၼ် ဝူၼ်ႉထိုင်တၢင်းသူင် ၸဝ်ႈၵဝ်ႇသေ ထိုင်တီႈတေဢမ်ႇမီးၽႂ်လူ ပၼ်ႁႅင်းၸႂ်ၵေႃႈ ယင်းတိုၵ်ႉတေသိုပ်ႇၶတ်းၸႂ်တႅမ်ႈ ပိုၼ်ၽႄႈတၢင်းႁူႉႁၼ်ယူႇ ဢၼ်ဝႃႈၼၼ်ႉၵေႃႈ မီးထႅင်ႈတင်းၼမ်ယူႇၵွၼ်ႇ။

ၶေႃႈၵႂၢမ်းဢၼ် ၸွႆႈဝူၼ်ႉမႄး ထတ်းသၢင်ပၼ်ၼၼ်ႉ ၸဝ်ႈပၢႆၵမ်ၶဝ်ၵူႈၸဝ်ႈၵူႈၵေႃႉ မုင်ႈမွင်းႁၢပ်ႉၼမ်လိူဝ်သေ ၶေႃႈယုၵ်ႉယွင်ႈၶႃႈယဝ်ႉ ၵူၺ်းၵႃႈ ဢမ်ႇၵျိူၵ်ႈ လွင်ႈယုၵ်ႉယွင်ႈၼႆတႄႉ ဢမ်ႇဝႃႈၼင်ႇၵွၼ်ႇ ပၼ်မႃးၸိူင်ႉႁိုဝ်ၵေႃႈ ၸဝ်ႈပၢႆၵမ်ၵူႈၸဝ်ႈၵူႈၵေႃႉတိုၼ်းမီးလွင်ႈငိၼ်းၸူမ်း ယႂ်ႇꧦၼမ်ꧦ ဢၼ်ဝႃႈၼၼ်ႉတႄႉတိုၼ်းယုမ်ႇယမ် ႁူဝ်ပၢၵ်ႇ(100%) တဵမ်ဝႆႉယူႇ။

ၼင်ႇႁိုဝ်ပေႃးတေမီး ၽူႈတႅမ်ႈလိၵ်ႈ ပိုၼ်ၽႄႈတၢင်းႁူႉၼမ်ꧦၼၼ်ႉ ၶႂ်ႈတုၵ်းယွၼ်းႁႂ်ႈမီးၵူၼ်း ပၼ်ၶၢဝ်းယၢမ်း လူလိၵ်ႈၼမ်ꧦ ၵူၺ်းယဝ်ႉၼင်ႇႁိုဝ်ပေႃးတေလႆႈႁုဝႃႈ မီးၵူၼ်းလူႁႃႉ? ဢမ်ႇလူ? ၼႆၼၼ်ႉယွၼ်းႁႂ်ႈပေႃး ၽူႈလူဢၢၼ်ႇၶဝ် ဢၢၼ်ႇယဝ်ႉၼႆၸွႆႈတဵၵ်း like ပၼ်လႄႈ ဢမ်ႇၸိုဝ်ႈဝႃႈ ၶႂ်ႈလႆႈ like လႄႈတႅမ်ႈ ပေႃးဝႃႈ like ပၼ်ၼႆ ႁဵတ်းႁႂ်ႈၽူႈတႅမ်ႈပိုၼ်ၽႄႈႁုဝႃႈ ယင်းတိုၵ်ႉမီးၵူၼ်း လူပၼ်ပႂ်ႉပၼ်ႁႅင်းယူႇၼႆတိူဝ်းမီးႁႅင်းၸႂ် တႃႇတေသိုပ်ႇတႅမ်ႈထႅင်ႈတၢင်းႁူႉမႂ်ႇမႂ်ဢွၼ်ႇ ၼၼ်ႉၵေႃႈမိူၼ်ႁၢင်ႈတေဢမ်ႇၼၵ်းၸႂ်သင်ယဝ်ႉ။

ၶေႃႈလိုၼ်းသုတ်း တႃႇတေပဵၼ်မႃး ၽူႈတႅမ်ႈလိၵ်ႈၵေႃႉၼိုင်ႈၼႆႉလႆႈၶတ်းၸႂ်ဝူၼ်ႉ သႂ်ႇႁႅင်းၸႂ်ၸွမ်း တင်းၼမ်ယဝ်ႉ ၵူၺ်းၵႃႈ တႃႇတေၵိုတ်းပႅတ်ႈတႄႉ ဢမ်ႇသႂ်ႇႁႅင်းၸွႆႈၵေႃႈ ၵိုတ်းလႆႈၵႂႃႇငၢႆႈꧦ ၵႂႃႇၸိူင်ႉၼၼ်တႄႉ ပဵၼ်ဢၼ်လီသေလၢႆ လူင်လၢင်ၼႃႇ ယွၼ်ႉၼၼ် ၽူႈသူင်တႅမ်ႈလိၵ်ႈႁဝ်းၶဝ်ၵေႃႈ ယႃႇပေပွႆႇၽႃႈပႅတ်ႈ လွင်ႈတၢင်းသူင်မိုတ်ႈၵၢၼ်ပိၼ်ႇ၊ဝူၼ်ႉ၊တႅမ်ႈၸဝ်ႈၵဝ်ႇၵႂႃႇငၢႆႈꧦ ၽူႈလူလိၵ်ႈၵေႃႈ ယႃႇပေပႅတ်ႈၵၢၼ်လူလိၵ်ႈ ၵၢၼ်လဵပ်ႈႁဵၼ်းတၢင်းႁူႉမႂ်ႇ ၵူဝ်ပဵၼ်ဝႃႈဝၼ်း႞ မီးၵူၼ်းတႅမ်ႈ " ဢမ်ႇမီးၵူၼ်းလူၵေႃႈ မိူၼ်ၼမ်ႉလႆၼိူဝ်သဵၼ်ႈတၢင်း ဢၼ်ဢမ်ႇမီးႁွင်ႈၵူၺ်းမီးၵူၼ်းလူ ဢမ်ႇမီးၵူၼ်းတႅမ်ႈၵေႃႈ မိူၼ်မီးႁွင်ႈသေ ၼမ်ႉႁႅင်ႈၵႂႃႇၵူၺ်း "ၵွပ်ႈၼႆလႄႈ ၼင်ႇႁိုဝ်ႁွင်ႈတေမီးၼမ်ႉ ၼမ်ႉတေလႆႈလႆၼႂ်းႁွင်ႈၼၼ်ႉ ၽူႈတႅမ်ႈလႄႈၽူႈလူလိၵ်ႈႁဝ်းၶဝ် ႁဝ်းဢွၼ်ၵၼ် ၸုင်ၸၼ်ပၼ်ႁႅင်း ၶတ်းၸႂ်ၵႂႃႇၸွမ်းၵၼ်ၼေႃႈ ။

     တႅမ်ႈ #ယိင်းမွၵ်ႇၸၢမ်ႁွမ် (လႃႈသဵဝ်ႈ)