ၵဝ်ၶၢၼ်ႉလူ

 

ၼင်ႇႁိုဝ်တေဢမ်ႇၼႅင်မိူဝ်ႈလႆႈသုမ်းၵႂႃႇဝႆႉၵႃႈၶၼ်မိူဝ်ႈတိုၵ်ႉမီးၶၢဝ်းယၢမ်းလႄႈတွၼ်ႈတႃႇ ၵူၼ်းမီးၼမ်ႉၸႂ်ယွၵ်းၵႅၵ်းၶဝ်ၼႆႉလွင်ႈၵၢၼ်သၢင်ႈတၢင်းႁူႉမေႃၼၼ်ႉၵေႃႈ ဢမ်ႇၶဝ်ႈတၢင်းတိုဝ်းသင်။

တွၼ်ႈတႃႇ ၵူၼ်းဢမ်ႇမီးတၢင်းမုင်ႈမွင်းသင်ၶဝ်ၼႆႉ ဝၼ်းမိူဝ်ႈၽုၵ်ႈဢၼ်ဝႃႈၼၼ်ႉၵေႃႈ ဢမ်ႇၶဝ်ႈတၢင်းတိုဝ်းသင်။

တွၼ်ႈတႃႇ ၵူၼ်းဢမ်ႇမေႃဢဝ်တွၼ်ႈသွၼ်ၼႆႉၵၢၼ်ၽိုၵ်းႁဵတ်းတူဝ်ထူပ်းဢၼ်ဝႃႈၼၼ်ႉၵေႃႈ ဢမ်ႇၶဝ်ႈတၢင်းတိုဝ်းသင်။

တွၼ်ႈတႃႇ ၵူၼ်းဢမ်ႇမေႃႁူႉၵုင်ႇမုၼ်ၶဝ်ၼႆႉလွင်ႈၵၢၼ်ၸွႆႈထႅမ်လိူဝ်ၵၼ်ၼၼ်ႉၵေႃႈ ဢမ်ႇၶဝ်ႈတၢင်းတိုဝ်းသင်။

တွၼ်ႇတႃႇ ၵူၼ်းမီးၼမ်ႉၸႂ်ဢတ်တ ႁၼ်ပုၼ်ႈသုၼ်ႇတူဝ်ၵဝ်ႇၼႆႉ လွင်ႈတႃႇပဵၼ်ၽူႈဢွၼ်ႁူဝ်ဢၼ်ဝႃႈၼၼ်ႉၵေႃႈ ဢမ်ႇၶဝ်ႈတၢင်းတိုဝ်းသင်။

တွၼ်ႈတႃႇ ၵူၼ်းၵေႃႉဢမ်ႇမီးလွင်ႈၶုၺ်ႉႁၼ်ၼိူဝ်တၢင်းႁၵ်ႉၼႆႉ လွင်ႈႁူဝ်ၸႂ်ပဵၼ်ၵူႈပႅင်းၸမ်ၸႂ်ၼိူဝ်ၵၼ်ၼၼ်ႉၵေႃႈ ဢမ်ႇၶဝ်ႈတၢင်းတိုဝ်းသင်။

တွၼ်ႈတႃႇ ၵူၼ်းဢမ်ႇမီးတၢင်းၶတ်းၸႂ်ၶဝ်ၼႆႉတိုဝ်ႉတၢင်းလီဢၼ်ဝႃႈၼၼ်ႉၵေႃႈ ဢမ်ႇၶဝ်ႈတၢင်းတိုဝ်းသင်။

တွၼ်ႈတႃႇ ၵူၼ်းဢၼ်မေႃသေလၢႆ ၶီႈထီႇၶီႈၸိုင်းၶဝ်ၼႆႉ လွင်ႈတၢင်းမၢၵ်ႈမီးလီပဵၼ်ၼၼ်ႉၵေႃႈ ဢမ်ႇၶဝ်ႈတၢင်းတိုဝ်းသင်။

တွၼ်ႈတႃႇ ၵူၼ်းဢမ်ႇမီးၼမ်ႉၸႂ်ၽိူၵ်ႇၸိုၼ်ႈၶၢဝ်သႂ်ၶဝ်ၼႆႉ လွင်ႈတူဝ်ၶိင်းႁၢင်ႈလီၸဝ်ႈၵဝ်ႇၼၼ်ႉၵေႃႈ ဢမ်ႇၶဝ်ႈတၢင်းတိုဝ်းသင်။

တွၼ်ႈတႃႇ လုၵ်ႈၼွင်ႉမိူၵ်ႈမႂ်ႈ ဢမ်ႇမီးၸႂ်ထမ်းၼႆႉ ၽူႈဢွၼ်ႁူဝ်လီၼႆၼၼ်ႉၵေႃႈ ဢမ်ႇၶဝ်ႈတၢင်းတိုဝ်းသင်။

တွၼ်ႈတႃႇ ၵူၼ်းဢမ်ႇမီးလွင်ႈယိုၼ်ႈမႅင်ႈပၼ်တီႈပိူၼ်ႈၼႆႉ လွင်ႈတႃႇလိူင်ႇမၢၵ်ႈလီပဵၼ်ၼၼ်ႉ ၵေႃႈ ဢမ်ႇၶဝ်ႈတၢင်းတိုဝ်းသင်။

တွၼ်ႈတႃႇ ၵူၼ်းဢမ်ႇမီးၸႂ်ႁဵတ်းၵၢၼ်လီၵုသူဝ်ႇၶဝ်ၼႆႉ၊ တီႈပဵၼ်ၸူဝ်ႈၸၢတ်ႈပၢၼ်ၵူၼ်းမႃးၼၼ်ႉၵေႃႈ ဢမ်ႇၶဝ်ႈတၢင်းတိုဝ်းသင်။

တီႈႁဝ်းဢုပ်ႉပိူင်ႇလႆႈ ၵူႈလွင်ႈၸိူဝ်းၼၼ်ႉယႃႇပေဝူၼ်ႉဝႃႈ မၼ်းတေမီးတၢင်းသိူဝ်း။

ယွၼ်ႉပိူဝ်ႈ ၸႂ်လမ်ႇမၢၵ်ႈလေႃးၽ လႄႈ မီးၸႂ်ဢတ်တၼိူဝ်တူဝ်ၵဝ်ႇသေ တိုၼ်းတေလႆႈလွင်ႈလိူတ်ႇမႆႈဢိူဝ်ႈ။

တီႈလႆႈတူၵ်းသုမ်းၵႂႃႇၵူႈဢၼ်ၸိူဝ်းၼၼ်ႉယႃႇပေထၢင်ႇဝႃႈ တေပဵၼ်လွင်ႈၸႂ်လဵၵ်ႉၶေႃးၶူမ်မႆႈၸႂ်ၸွမ်းယူႇ သင်မေႃဝႆႉၼမ်ႉၸႂ်လီယူႇၸိုင် တိုၼ်းၵတ်းယဵၼ်ယူႇဢိူဝ်ႈ။

တီႈယွမ်းၵၢၼ်ႉသုမ်းပၼ်ၼၼ်ႉ ယႃႇပေထၢင်ႇဝႃႈ လႆႈလွင်ႈတၢင်းဢွင်ႇပေႉယဝ်ႉၼႆယူႇ သင်ဢမ်ႇမေႃႁူႉႁၼ် လွင်ႈၼႂ်းၸႂ်ပိူၼ်ႈလိုၵ်ႉလိုၵ်ႉၼၼ်ႉပဵၼ်ႁိုဝ်ပေႃးၼႆၸိုင် သူၵေႃႈပဵၼ်ၽူႈၵၢၼ်ႉသုမ်းၵႂႃႇၼင်ႇၵဝ်ႇယဝ်ႉ။ 

သင်သူဢမ်ႇမေႃဝႆႉၵႃႈၶၼ် တီႈသူလႆႈဢုပ်ႉပိူင်ႇမႃးၼႆႉပေႃးၼႆၸိုင် ၊ ထိုင်မိူဝ်ႈလႆႈသုမ်းၵႂႃႇယဝ်ႉ ၸင်ႇတေပွင်ႇၸႂ်ႁူႉဝႃႈ မၼ်းမီးၵႃႈၶၼ်ၼႆ လွင်ႈလႆႈသုမ်းၼၼ်ႉ တိုၼ်းပဵၼ်လွင်ႈတၢင်းၼႅင်ႈၸႂ်လူင်တွၼ်ႈတႃႇသူဢမ်ႇႁၢင်ႉယဝ်ႉ။

လွင်ႈလႆႈယွမ်းၵၢၼ်ႉသုမ်းၵႂႃႇၵူႈဢၼ်ၵေႃႈဢမ်ႇၸႂ်ႈဝႃႈ ပဵၼ်လွင်ႈလႆႈတူၵ်းသုမ်းယဝ်ႉၼင်ႇၵဝ်ႇ။ တိူၵ်ႈတီႈဝႃႈ ဢုပ်ႉပိူင်ႇလႆႈယဝ်ႉၵေႃႈဢမ်ႇၸႂ်ႈဝႃႈတေႁူမ်ႇငမ်းၵုမ်းၵမ်လႆႈတင်းပိုၵ်းၼင်ႇၵၢင်ၸႂ်လႆႈၼင်ႇၵဝ်ႇ။

သင်ၸိူဝ်ႉဝႃႈဢမ်ႇမီးလွင်ႈပွင်ႇၸႂ်ပၼ်ၵၼ်ၸိုင် ယူႇၸမ်ၵၼ်ယူႇၵေႃႈ တေႃႈဢမ်ႇၶဝ်ႈတၢင်းတိုဝ်းသင်။ ၵေႃႉၼိုင်ႈလႄႈတင်းၵေႃႉၼိုင်ႈ  သင်ၸိူဝ်ႉဝႃႈၸႂ်ႁၢင်ႇၵႆၵၼ်ၵႂႃႇယဝ်ႉပေႃးၸိုင် လွင်ႈတၢင်းမူၼ်ႈသိူဝ်းႁူမ်ႈၵၼ်ဢၼ်ဝႃႈၼၼ်ႉၵေႃႈ တေႃႈတိုၼ်းတေဢမ်ႇမီးလႆႈ။

ပဵၵ်ႉသမ်ႉ ၵႃႈပေႉၵႆၵၼ်လၢႆႁဵင်လၵ်းၵေႃႈယဝ်ႉ သင်ၸိူဝ်ႉဝႃႈၸႂ်ႁဝ်းၸမ်ၵၼ်ဝႆႉယူႇပေႃးၼႆၸိုင် လွင်ႈယုမ်ႇယမ်ပွင်ႇၸႂ်ၼိူဝ်ၵၼ်ၼၼ်ႉ ၵွပ်ႈမီးၸႂ်ယူႇလႄႈ လွင်ႈမူၼ်ႈသိူဝ်းၸိူဝ်းၵူႈလွင်ႈၼၼ်ႉၵေႃႈ တၵ်းတေယူႇၸွမ်းႁဝ်းဝႆႉယူႇတႃႇသေႇဢိူဝ်ႈ။

Credit: Original Writer & Photo