ၸဝ်ႈယွင်ႇဢႃႇၼႃႇၸိူဝ်းၶဝ်ၼႆႉ

 

လွင်ႈလွတ်ႈလႅဝ်းၼႆႉ ပဵၼ်ဢၼ်ၵႃႈၶၼ်ယႂ်ႇလိူဝ်သေပိူၼ်ႈၼႂ်ႈၽဝၸူဝ်ႈပၢၼ်ၵူၼ်းသေ ဢၼ်ၵူၼ်းႁဝ်းၵႆႉလႄႇထွင်ႉထႅင်ႉမင်မိင်ၵၼ်ၸိူဝ်းၼႆႉၵေႃႈ ပိူဝ်ႈၶႂ်ႈလႆႈမုင်ႈမွင်းလွင်ႈလွတ်ႈလႅဝ်းယဝ်ႉ၊

ၵူၺ်းၼႃႇႁဝ်းမီးလွင်ႈလွတ်ႈလႅဝ်းသေ ႁဝ်းဢမ်ႇမေႃယိပ်းၵမ်ၽဝႁဝ်းၶိုၼ်းၼႆ ဢမ်ႇမေႃၸိသင်ႇတူဝ်ၵဝ်ႇၶိုၼ်းၵေႃႈ ၸၢင်ႈလႆႈၶၢမ်ႇတၢင်းပိူၼ်ႈမႃးယိပ်းၵမ် ၸိသင်ႇႁဝ်းၶိုၼ်းယဝ်ႉ ၊

ထွမ်ႇသဵင်ၼူၵ်ႉၵေႃႈ မေႃၸိပ်ႉၸွပ်ႉငိၼ်းလီၶေႃးၶူမ် ထွမ်ႇသဵင်ၾူၼ်းၵေႃႈ တွၵ်ႉတႅၵ်ႉၵဵင်းၵွင်း မႃးပၼ်တၢင်းမွင် တီႈၵေႃႉဢမ်ႇလွတ်ႈလႅဝ်း ႁူဝ်ၸႂ်သႅဝ်းၵေႃႉဢၼ်တိုၼ်ႇၽၢင်ႈ ယၢင်ႈၶဝ်ႈၼႂ်းၶႂၢင်ႇတူင်ႇဝူင်းၵၢၼ်မိူင်းၶဝ်တႄႉ တေဢွၼ်ၵၼ်မုင်ႈယဵမ်ႈမွင်းထိုင် လွင်ႈလွတ်ႈလႅဝ်းမႂ်ႇမႂ်ႇယူႇႁိုဝ်?

မႃးတူၺ်းလွင်ႈၸဝ်ႈဢႃႇၼႃႇသိုၵ်းသိူဝ်ၶဝ်ၸဝ်ႈ ၶႂ်ႈယိပ်းၵမ်ဢႃႇၼႃႇဝၢၼ်ႈမိူင်းတႃႇသေႇၼၼ်ႉ ပဵၼ်ထမ်ႇမတႃႇမၼ်းယဝ်ႉ ၵူၺ်းၼႃႇၸဝ်ႈဢႃႇၼႃႇသိုၵ်းၵူႊမိူင်းမိူင်းၼၼ်ႉ ဢမ်ႇၸႂ်ႈဝႃႈ လုၵ်ႉဢဝ်တီႈပဵၼ် ၸဝ်ႈပိူင်ႇၼမ်ႉလိၼ်လိၼ်ႁိၼ်ၽႃ ဢမ်ႇၸႂ်ႈဝႃႈလုၵ်ႉဢဝ်တီႈပဵၼ်ၽူႈယႂ်ႇၵူၼ်းလူင်ၼႂ်းတပ်ႉသိုၵ်း ဢၼ်ဢဵၼ်ႁႅင်းယႂ်ႇသေ ၸုမ်းၸုမ်းၼၼ်ႉပဵၼ်မႃး၊ 

ၽွင်းၸဝ်ႈဢႃႇၼႃႇၶဝ်တိုၵ်ႉၶိုၼ်ႈတႄႉ ၸိသင်ၵေႃႈ ပဵၼ်ၼမ်ႉပဵၼ်ၾႆးယဝ်ႉ၊ ဢႃႇၼႃႇၼႆႉ ပဵၼ်ဢၼ်ယႃႉၵဝ်းၸၢတ်ႈပၢၼ်ၵူၼ်းယဝ်ႉ၊ ဢႃႇၼႃႇတီႈဢၼ်ဢမ်ႇမီးတီႈသုတ်းတိူၵ်ႈၼၼ်ႉ ပဵၼ်ၽေးလေႃးၵဢၼ်ယႂ်ႇသုတ်းယဝ်ႉ ၊ ၸဝ်ႈဢႃႇၼႃႇလူင်ၶဝ်ၼႆႉ မဝ်းၵႂင်ၸွမ်းဢႃႇၼႃႇသေ ဢွၼ်ၵၼ်ဢုပ်ႉငမ်းႁိမ်ဢဝ် ၶူဝ်းတိုၼ်းသၽႃႇဝ ဢၼ်မီးၼႂ်းၼမ်ႉတႂ်ႈလိၼ် ဢၼ်ၵူၼ်းမိူင်းဢုပ်ႉထိူၵ်ႈၼၼ်ႉယူႇ။

တီႈတႄႉမၼ်း ၼႂ်းလူၵ်ႈလုမ်ႈၾႃႉၼႆႉ ဢၼ်မီးတၢင်းႁၢင်ႈလီတဵမ်ထူၼ်ႈဝႆႉၼႆႉ သင်ၵူၼ်းႁဝ်းဢဝ်မၢၵ်ႇႁူဝ်ၸႂ်တၢင်းႁၵ်ႉ တၢင်းဢီးလူတၢင်းပွင်ႇၸႂ်တေႃႇၵၼ် တၢင်းၸွႆႈထႅမ်ၵၼ်ၼမ်းၼႃႈသေ ဢမ်ႇမီးတၢင်းမိူၵ်ႈမႂ်ႈၶႂ်ႈယႃႉၶႂ်ႈလႆႈ ၶူဝ်းတိုၼ်းသၽႃႇဝဝၢၼ်ႈမိူင်းၸိုင် တၵ်းမီးတၢင်းၵတ်းယဵၼ် ဢမ်ႇႁၢင်ႉ ၵူၺ်းၼႃႇ ၵူၼ်းတိုဝ်ၵူၼ်းတၼ် ၸဝ်ႈဢႃႇၼႃႇလူင်ၶဝ်ၼႆႉသမ်ႉ ဢဝ်ၸႂ်လေႃးၽၼမ်းၼႃႈသေ ဢုပ်ႉငမ်းၵူၼ်းဝၢၼ်ႈၵူၼ်းမိူင်းလႄႈ တၢင်းႁၢင်ႈလီဝၢၼ်ႈမိူင်းလေႃးၵၵေႃႈလႆႈလူႉလႅဝ်ၵႂႃႇပႅတ်ႈ၊ ပွႆးတိုၵ်း ပွႆးသိုၵ်းသိူဝ် ဢၼ်ႁဵတ်းႁႂ်ႈလိူတ်ႈၵမ်ႇလႅင်ယွႆႉတူၵ်း ၼုၵ်းၵူဝ်ႈ ယွမ်ႉသီလိၼ်မိူင်းလၢႆးလေႃးၵႂႃႇၼၼ်ႉၵေႃႈ ပဵၼ်ၸဝ်ႈဢႃႇၼႃႇလူင်ၶဝ်ၵေႃႉႁဵတ်းပဵၼ်ယဝ်ႉ၊ 

ဢၼ်ၶဝ်ၸဝ်ႈႁဵတ်းၸိူင်ႉၼႆတေႃႇဝၢၼ်ႈမိူင်းၵူၼ်းမိူင်း ဢၼ်ဢမ်ႇမီးတၢင်းၽိတ်းသင်ၼႆႉ ပဵၼ်လူၺ်ႈ...

- ၶဝ်ဢမ်ႇမီးတၢင်းၼမ်ႉၸႂ်ဢီးလူႁႃႉ?

-ႁႅင်းၵွင်ႉႁႅၼ်ႇၸႂ်လမ်ႇမၢၵ်ႈလေႃးၽၶိုၼ်ႈႁိုဝ်?

-ၵူဝ်သေၵေႃႉၵေႃႉ ႁိမ်ဢႃႇၼႃႇတီႈၼင်ႈၸဝ်ႈၵဝ်ႇႁႃႉ?

-ဢမ်ႇထိင်းပေႉလႆႈ ၸႂ်တေႃးသၸဝ်ႈၵဝ်ႇႁႃႉ?

ၸိူဝ်းၼႆႉၵေႃႈတေၶဝ်ႈပႃးဝႆႉသေ ဢၼ်ထၢင်ႇၸႅင်ႈမၼ်းတႄႉ ၵွပ်ႈပိူဝ်ႈမီးၸႂ်ႁၵ်ႉ ငိူၼ်ႈၶိူဝ်းၸဝ်ႈၵဝ်ႇႁႅင်းလူၼ်ႉလိူဝ်ၼၼ်ႉယဝ်ႉ။

ၸႂ်ယႂ်ႇၶူဝ်းၶွင်လၢႆပိူၼ်ႈဢဝ်မႃးပဵၼ်သုၼ်ႇၸိူဝ်ႉၶိူဝ်းၼိူဝ်ႉလိူတ်ႈပီႈၼွင်ႉလုၵ်ႈလၢင်းၼၢင်းမေးၸဝ်ႈၵဝ်ႇသေ သင်ဝႃႈၵူၼ်းမိူင်းဢမ်ႇထွမ်ႇၶေႃႈၸိသင်ႇပူင်ၸိုင် ၶဝ်ၸိူဝ်းၼႆႉ ၵႆႉဢဝ်ၵွင်ႈၸီႉၸမ်ႈငႃလွၵ်ႇငိူတ်ႈ ထွၼ်ဢဝ်သၢႆၸႂ်ၵူၼ်းမိူင်းပႃးၵွၼ်ႇယဝ်ႉ  တႃႇသိုပ်ႇလူပိုၼ်းလွင်ႈမိူၼ်းၸိူဝ်းၶဝ်ႁဵတ်းႁိုဝ်တေႃႇသူႈမႃးၼႆၼၼ်ႉ ပပ်ႉဢၼ်မီးၸိုဝ်ႈဝႆႉဝႃႈ  မိူင်းဢၼ်ၶတ်းၸႂ် လုၵ်ႉဢဝ်တီႈပိူင် ၸဝ်ႈဢႃႇၼႃႇ ပႃႇတီႇလဵဝ်သေ ပဵၼ်မႃးပိူင် တီႇမူဝ်ႇၶရေႇၸီႇလႄႈ ပႃႇတီႇတင်းၼမ် ၼႆႉၵႂႃႇလႄႈ မိူင်းတီႈၶဝ်ႈပႃးၼႂ်းပပ်ႉပိုၼ်းၸဝ်ႈဢႃႇၼႃႇၼၼ်ႉတႄႉ ပဵၼ် မိူင်းၽီးလိပ်ႉပိၼ်း၊ မိူင်းၶူဝ်းရီးယႃးၸၢၼ်း၊ မိူင်းဢိၼ်ႇတူဝ်ႇၼီးသျႃး ၶဝ်သၢမ်မိူင်ႈ ပဵၼ်ပပ်လိၵ်ႈ ဢၼ် #သိူဝ်ယုမ်ႉ ပိၼ်ႇတႅမ်ႈဝႆႉ

#ShanBooks #Philippines #Mr_Marcos  #kimDaeJung #Korea #Indonesia  #Army #Coups #Government #Myanmar  #AungSanSuKyi #SaveMyanmar #RejectTheMilitary #HelpUsAndSupportOurLeader  #Non_Violence_Campaign_Against_Military_Coup #AntiViolence #AntiDictatorship #AntiDiscrimination