သင်တေၵူပ်ႉၵူႈပဵၼ်ႁိူၼ်း

ၵူၼ်းႁဝ်းပွင်ႇၸႂ်ၵၼ်ဝႃႈ ၵမ်ႉပႃႈၼမ် ဢမ်ႇၵၢင်းယၢၼ်လႆႈတၢင်းႁၵ်ႉၼႆ ၸႂ်ႈယူႇတေႉ။ ဢိင်ၼိူင်လွင်ႈၼႆႉသေ ၵူၼ်းႁဝ်းႁၵ်ႉၵၼ် တွၼ်ႈတႃႇၶၢဝ်းႁိုင်တေႃႇၸူဝ်ႈၼၼ်ႉ တေဢွၼ်ၵၼ်ႁဵတ်းပွႆးပၢင်ၶႅၵ်ႇၵူပ်ႉၵူႊၵၼ်သေ ယူႇႁူမ်ႈႁွမ်းၸွမ်းၵၼ်ၵႂႃႇတေႃႇပေႃးသုတ်းၸူဝ်ႈပၢၼ်ၼၼ်ႉယဝ်ႉ။

ၸူဝ်ႈၵႃႈပႆႇတေႇၼႃႈႁိူၼ်းႁဵတ်းပၢင်ၶႅၵ်ႇၵူပ်ႉၵူႊၵၼ်ၵႂႃႇၼၼ်ႉ ၶႂ်ႈႁႂ်ႈဢူၺ်းၵေႃႉႁၵ်ႉႁဝ်းၶဝ်းၶဝ်ဝူၼ်ႉတူၺ်းလီလီသေယဝ်ႉ ၸွင်ႇၵွႆႈၵူပ်ႉၵူႊပဵၼ်ႁိူၼ်းၸွမ်းၵၼ်ၼၼ်ႉယဝ်ႉ။ ပေႃးႁဝ်းမီးတၢင်းႁၵ်ႉလၢႆလၢႆသေ ဢမ်ႇမီးပႃးတၢင်းႁူႉၼႆၸိုင် တၢင်းႁၵ်ႉႁဝ်းတေဢမ်ႇယိုၼ်းယၢဝ်းၶၢဝ်းၵႆလႆႈ ယွၼ်ႉၼၼ်ႄလႈ ႁဝ်းၶႃႈလူဝ်ႇမီးပႃးတၢင်းႁူႉ တၢင်းႁူႉဢၼ်တေမႃးၵုမ်းထိင်းသၢင်ႈပၼ်လႆႈတၢင်းႁၵ်ႉ ၵႂႃႇၶၢဝ်းယၢဝ်းၵႆလႆႈၼၼ်ႉၵွၼ်ႇ။

တႃႇတေပဵၼ်ၼႃႈႁိူၼ်းမူၼ်းဢုၼ်ႇၸႂ်ၼၼ်ႉတၵ်ႉတေလႆႈမီးလွင်ႈၸိူင်ႉၼႆၵွၼ်ႇ

♥ တၢင်းႁၵ်ႉႁွမ်ၵၼ် - 25%

♥ လွင်ႈပွင်ႇၸႂ်မီးသႅတ်ႉၸႃႇတေႃႇၵၼ် -25%

♥ ၶူဝ်းၶွင်ငိုၼ်းၶမ်းတႃႇ - 50% ၼႆႉပဵၼ်ဢၼ်ႁဝ်းလူဝ်ႇမီးယဝ်ႉ။

ၶူဝ်းၶွင်ငိုၼ်းၶမ်းၼႆႉဢမ်ႇလွင်ႈယႂ်ႇ သွၼ်ႇႁႂ်ႈမေႃႁၵ်ႉၵၼ်တေႉတေႉမီးသႅတ်ႉၸႃႇၼိူဝ်ၵၼ်ၵူၺ်းၵေႃႈပေႃးယဝ်ႉ ဢၼ်ဝႃႈၼၼ်ႉ တေၵိုတ်းဝႆႉမိူဝ်ႈပၢၼ်ပဵၼ်မၢဝ်ႇသၢဝ်ၼၼ်ႉယဝ်ႉ။

ၸွမ်းၼင်ႇဢၼ်လၢတ်ႈမႃးပႃႈၼိူဝ်ၼႆႉသေ ၵူၼ်းသွင်ၵေႃႉယူႇႁူမ်ႈႁွမ်းၸွမ်းၵၼ် ဢဝ်တၢင်းႁၵ်ႉဢၼ်လဵဝ်ပဵၼ်ယႂ်ႇသေ လၢတ်းၶၢမ်ႈၸူဝ်ႈပၢၼ်လူင်ၼႆႉၵႂႃႇၸွမ်းၵၼ်ၼၼ်ႉ မိူဝ်ႈဢွၼ်တၢင်းတေႉၶေးတေမီးယူႇ။ ၵူၺ်းၵႃႈ ၵၢပ်ႈပၢၼ်မႂ်ႇယၢမ်း တေႃႈလဵဝ်ၼႆႉတေႉဢမ်ႇမီးယဝ်ႉ။ ဢမ်ႇၸႂ်ႈၵၢပ်ႈပၢၼ် ၵိၼ်ၶဝ်ႈၵပ်းၵိူဝ်ယဝ်ႉလူး။

ဢမ်ႇလူဝ်ႇၶူဝ်းၶွင်ငိုၼ်းၶမ်း ၵုင်ႇသေရႇၼႃႈတႃ သင်မီးသူၵေႃႈၵူႊလွင်ႈတဵမ်ထူၼ်ႈယဝ်ႉ ဢၼ်ဝႃႈၼႆႉ ပဵၼ်မိူဝ်ႈၽွင်းတိုၵ်ႉမဝ်းႁၵ်ႉ တၢင်းႁၵ်ႉၶဝ်ႈတႃၼႃႇလႄႈ လိုမ်းတၢင်းဝူၼ်ႉပႅတ်ႈၼၼ်ႉၵွၺ်းဢိူဝ်ႈ။

တၢင်းႁၵ်ႉၼႆႉဢမ်ႇမီးတႃဝႃႈၼႆသေတႃႉၵေႃႈ ၵူၺ်းၵႃႈဢွၵ်းဢေႃတေႉလူဝ်ႇမီးတႃ လူဝ်ႇမေႃဝူၼ်ႉသွၼ်ႇၵၼ်ပႃးယူႇသႄႈ။ ဝူၼ်ႉၵႂၢင်ႈၵႂၢင်ႈၶႂၢင်ၶႂၢင် ဝူၼ်ႉႁႂ်ႈသုတ်းသၢႆတႃလႄႈယႃႇဝူၼ်ႉသုတ်းၶွပ်ႇတႃ ဢၼ်မီးႁိမ်းတႃၼႆႉၵူၺ်း။

ပေႃးႁဝ်းသွင်ႁဵတ်းပၢင်ၶႅၵ်ႇယဝ်ႉ ဢွၼ်ၵၼ်ၶတ်းၸႂ်ႁႃႁဵတ်းၵၢၼ်ၼႂ်းႁူင်းၵၢၼ်သေတီႈတီႈ ႁႃၵိၼ်ၸၢင်ႈပိုၼ်ႈသေ ႁွမ်ငိုၼ်းယဝ်ႉၵေႃႈ တႄႇတင်ႈၸၢတ်ႈပၢၼ်ႁဝ်းသွင်ၵႂႃႇ ပေႃးဝူၼ်ႉၸိူင်ႉၼႆၸိုင် တၢင်းဝူၼ်ႉဢၼ်ၼႆႉတိုၼ်းၽိတ်းလူင်လၢင်တေႉတေႉဝႃႈဝႃႈယဝ်ႉ။ဢၼ်လၢတ်ႈၶေႃႈၵႂၢမ်းၸိူင်ႉၼႆ ဢမ်ႇၸႂ်ႈဝႃႈၶႂ်ႈထၢင်ႇလဵၵ်ႉၽႂ် ဢမ်ႇလႆႈမၢႆထိုင်ၽူႈလႂ်ၵေႃႉလႂ်သေလၢတ်ႈ။ ဢမ်ႇၶႂ်ႈမၢႆထိုင်ဝႃႈ  ႁႂ်ႈႁၼ်ထိုင်ငိုၼ်းၶမ်းပိူၼ်ႈ  ၼင်ႇဝႃႈ တႃလမ်ႁၼ်ငိုၼ်းၽိူၵ်ႇတႃလိူၵ်ႇႁၼ်ငိုၼ်းသႃးၼင်ႇၵွၼ်ႇ။

ၼႂ်းလူၵ်ႈၼႆႉ ၵူၼ်းဢၼ်လႆႈၶူဝ်းပူၺ်ႈၶူဝ်းၶွင်ငိုၼ်းၶမ်းဝႆႉတီႈပူႇမွၼ်ၼၢႆးယႃႈပေႃႈမႄႈသေ မၢၵ်ႈမီးလီပဵၼ်ၼႆႉမီးယူႇ(95%)ယဝ်ႉသေ ၵူၼ်းဢၼ်ပိုင်ႈဢိင်ၼမ်ႉၵတ်ႉၸဝ်ႈၵဝ်ႇသေမၢၵ်ႈမီးမႃးၼၼ်ႉၵူၺ်းမီးဢဝ်(5%)ၵူၺ်း။

ယွၼ်ႉၼၼ်ယႃႇပေၶွႆၵူၼ်းဢၼ်မီးၶူဝ်းၶွင်ငိုၼ်းၶမ်းၵုင်ႇသေရႇၼႃႈတႃတဵမ်ထူၼ်ႈဝႆႉယဝ်ႉၸင်ႇတေႇၼႃႈႁိူၼ်း။ ႁဝ်းဢမ်ႇမီးၶၢဝ်းယၢမ်းမႃးၼင်ႈၶွႆပိူၼ်ႈယူႇ။ တွၼ်ႈတႃႇတေၶဝ်ႈပႃးသဵၼ်ႈမၢႆၽူႈမၢၵ်ႈမီး(5%)ၼၼ်ႉ ႁဝ်းလူဝ်ႇလႆႈတိူဝ်းၶတ်းၸႂ်လိူဝ်ပိူၼ်ႈ တေလႆႈတိူဝ်းမီးတၢင်းႁူႉတၢင်းႁၼ်ၼမ်လိူဝ်ပိူၼ်ႈယဝ်ႉ။

တေလႆႈမေႃဝူၼ်ႉသွၼ်ႇၵႂၢင်ႈၵႂၢင်ႈၶႂၢင်ၶႂၢင် တေလႆႈမေႃၶိုင်ပွင်ႁဵတ်းသၢင်ႈၶတ်းၸႂ်ၼမ်ၼမ်ယဝ်ႉ။ တေလႆႈမေႃဝူၼ်ႉသွၼ်ႇၶၢဝ်းယၢမ်းတေႃႈလဵဝ်လႄႈၶၢဝ်းယၢမ်းဝၼ်းမိူဝ်းၼႃႈပႃးထႅင်ႈၵွၼ်ႇ။ပေႃးႁဝ်းၶတ်းၸႂ်ထၢၼ်ႇၼႆႉၵွၼ်ႇ ႁဝ်းၸင်ႇတေပူၵ်ႈပွင်လၢတ်းၽၢၼ်ႇၸူဝ်ႈပၢၼ် ႁဝ်းႁၢင်ႈလီလႆႈ ဢမ်ႇၸႂ်ႈၼႄႇ?။ ယူဝ်တေပဵၼ်ႁဝ်းႁွင်ႉလုၵ်ႈမႄႈပိူၼ်ႈ မႃးထူပ်းတၢင်းယၢပ်ႇၽိုတ်ႇ တူၵ်းၽၢၼ်ယွၼ်ႉႁဝ်းယဝ်ႉႁိုဝ်ၼႆၵေႃႈဝူၼ်ႉပႃးထႅင်ႈၵွၼ်ႇဢိူဝ်ႈ။

 ၶၢဝ်းယၢမ်းလီမီးမင်ႇၵလႃႇ ၵုင်ႇသရေႇၼႃႈတႃဢၼ်ဝႃႈၼၼ်ႉ ၼႂ်းၸူဝ်ႈပၢၼ်ၼႆႉၵေႃႈ မီးၼိူင်ႈပွၵ်ႈၵူၺ်းလူး။ ဢမ်ႇဝႃႈယိင်းႁိုဝ်ၸၢႆး ၶႂ်ႈမီးၼႃႈတႃ ၼႂ်းၵႄႈၵၢင်ပီႈၼွင်ႉၸိူဝ်ႉၶိူဝ်းမၼ်း ၶႂ်ႈႁႂ်ႈပေႃႈမႄႈပီႈၼွင်ႉမၼ်း မီးၼႃႈမီးတႃ ယွၼ်ႉမၼ်း ၶႂ်ႈႁဵတ်းပၢင်ၶႅၵ်ႇဢၼ်ၵိုင်ႇတၢၼ်ႇၵၼ်တၢင်းမၼ်းလႄၶႂ်ႈမီးၼႃႈႁိူၼ်းဢၼ်ဢုၼ်ႇၸႂ် ၼႂ်းၵႄႈၵၢင်ပိူၼ်ယူႇဢိူဝ်ႈ။

ၼႆႉတေႉပဵၼ်လွင်ႈၼွၼ်းၾၼ် ၽူႈမီးတၢင်းႁၵ်ႉၶဝ်ၵူႊၵေႃႉယဝ်ႉ။ႁဝ်းတေထဵင်ၶိုၼ်းဢမ်ႇလႆႈ။ ပေႃးဢမ်ႇမီးလၵ်းထၢၼ် ၵၢၼ်ငၢၼ်းသင်သေ ၼႂ်းၸၢတ်ႈပၢၼ်ၼႆ့ တေႁဵတ်းၵိၼ်ၵၢၼ်သင်လႄႈ တေသိုပ်ႇၶၢဝ်းၼႃႈလႆႈၸိူင်ႉႁိုဝ်။ တီႈဢေႇသုတ်းတေႉလီလႆႈမီးၼႃႈၵၢၼ်သုၼ်ႇတူဝ်ၸဝ်ႈၵဝ်ႇလႄႈမီးၼမ်ႉၵတ်ႉမေႃႁႃငိုၼ်းသွင်ဢၼ်ၼႆႉယူႇ ဢမ်ႇၸႂ်ႈၼႄႇ။

လွင်ႈတႄႇၼႃႈႁိူၼ်းၼႆႉဢမ်ႇၸႂ်ႈၼႂ်ႈၸိူင်း ဢမ်ႇၸႂ်ႈတၢင်းလဵၼ်ႈလုၵ်ႈဢွၼ်ႇ ဝူၼ်ႉငၢႆႈငၢႆႈသေတႅပ်းတတ်းၵႂႃႇငၢႆႈငၢႆႈပေႃးၼႆၸိုင် ပေႃးၶၢဝ်းယၢမ်းမိူဝ်းၼႃႈမႃး ၸၢင်ႈတေမီးပၼ်ႁႃၼႂ်းၼႃႈႁိူၼ်းလႄႈတေဢမ်ႇပဵၼ်ၼႃႈႁိူၼ်းဢုၼ်ႇၸႂ်လႆး။

လိုၼ်းသုတ်းယဝ်ႉ သင်ဝႃႈၽူႈလူလိၵ်ႈႁဝ်းၶဝ်တေႁဵတ်းပၢင်ၶႅၵ်ႇၵူပ်ႉၵူႊၵၼ်တၢင်းၵေႃႉႁၵ်ႉႁဝ်းယဝ်ႉၼႆၸိုင်ၶႂ်ႈႁႂ်ႈတၢင်းသွင်ပႃႈသွင်ၽၢႆႇဝူၼ်ႉတူၺ်းလီလီယဝ်ႉၸင်ႇၵွႆႈႁဵတ်းပၢင်ၶႅၵ်ႇတေႇၼႃႈႁိူၼ်းၸွမ်းၵၼ်ႄလႈ ႁႂ်ႈထူပ်းၺႃးၵူၼ်းၵေႃႉဢၼ်မီးတၢင်းႁၵ်ႉၸႅတ်ႇ၊မီးလွင်ႈပွင်ႇၸႂ်၊မီးသႅတ်ႉၸႃႇ၊မီးၼမ်ႉၵတ်ႉမေႃႁႃႁွမ်ငိုၼ်းလႄႈမီးၼႃႈၵၢၼ်သုၼ်ႇတူဝ်ဢၼ်တေပၼ်တၢင်းသိူဝ်းႁႂ်ႈၼႃႈႁိူၼ်းမူၼ်းဢုၼ်ႇၸႂ်ၼၼ်ႉသေၵမ်း။

ပိၼ်ႇတႅမ်ႈ - မူဝ်ႁိူင်း (သီႇပေႃႉ)

ၶႅပ်းႁၢင်ႈ - D Phone photography