ထွမ်ႇလႄႈ တေလၢၼ်ႈၼေ

  

ၵူၼ်းၼုမ်ႇလူၵေႃႈယဝ်ႉ ၵူၼ်းလူင်လူၵေႃႈယႃႇ

ၽတ်ႉလူမ်း လၢတ်ႈၼေဝႃႈ "မိူဝ်ႈထူပ်းလွင်ႈယၢပ်ႇၽိုတ်ႇမႃးၼၼ်ႉဝႆႉၸႂ်ၵတ်းၵတ်းယဵၼ်ယဵၼ်လႄႈ" ဝႃႈၼႆ

ယၢမ်းမူင်း လၢတ်ႈၼေဝႃႈ "ယႃႇပေၸႂ်ႉၶၢဝ်းယၢမ်းပႅတ်ႈလၢႆလၢႆ ၸႂ်ႉႁႂ်ႈၵိုင်ႇၵႃႈၶၼ်လႄႈ" ဝႃႇၼႆ

ၶႅပ်းတိၼ် လၢတ်ႈၼေဝႃႈ "ယႃႇပေတိုဝ်းတွၼ်ႈတႃႇႁၢင်ႈလီ တိုဝ်းႁႂ်ႈပဵၼ်တႃႇႁေႉၵင်ႈၼၢမ်ဢၼ်တေၸၢင်ႈၸူၵ်ႉတိၼ်ၵူၺ်းလႄႈ" ဝႃႈၼႆ

ၸွင်ႈ လၢတ်ႈၼေဝႃႈ "ၵႂႃႇလႂ်သေဢမ်ႇဝႃႈ ႁွင်ႉၶႃႈလႄႈ ၼင်ႇႁိုဝ်တေႁေႉၵင်ႈပၼ်လႆႈလႅတ်ႇမႆႈ လႄႈၾူၼ်တူၵ်းၼၼ်ႉ" ဝႃႈၼႆ

ငိုၼ်း လၢတ်ႈၼေဝႃႈ "လိူဝ်သေလွင်ႈၶႂ်ႈလႆႈယဝ်ႉ ဝႆႉၵႃႈၶၼ်ၼိူဝ်လွင်ႈလူဝ်ႇလႆႈလူဝ်ႇမီးသေၸႂ်ႉၸၢႆႇၵႂႃႇလႄႈ သင်မေႃၸႅၵ်ႇတီႈဝႃႈ ၸႂ်ႉငိုၼ်း လႄႈ မူၺ်ႇငိုၼ်းၼႆၸိုင် ၼႂ်းၸူဝ်ႈပၢၼ်မႂ်း ၽွင်းဢမ်ႇမီးၵဝ်ယဝ်ႉမႂ်းတေၸၢင်ႈလႆႈၼႃႈလဵၵ်ႉၼႂ်းၵႄႈပိူၼ်ႈဢိူဝ်ႈ" ဝႃႈၼႆ

ၶုၼ်လိူၼ် လၢတ်ႈၼေဝႃႈ "ပဵၵ်ႉသမ်ႉဝႃႈလပ်းသိင်ႇမွၵ်ႈႁိုဝ်ၵေႃႈယဝ်ႉၶတ်းၸႂ်ႁႂ်ႈပဵၼ်ၵူၼ်းၵေႃႉဢၼ် ပၼ်သၢႆႁိူဝ်ႈလႅင်းတီႈပိူၼ်ႈၼၼ်ႉလႄႈ" ဝႃႈၼႆ

ၶုၼ်ဝၼ်း လၢၼ်ႈၼေဝႃႈ "ၼႂ်းၸူဝ်ႈပၢၼ်မႂ်းၼၼ်ႉ ႁႂ်ႈသိုပ်ႇၶၢဝ်းတၢင်းၵႂႃႇလူၺ်ႈလွင်ႈယုမ်ႇယမ်တူဝ်ၸဝ်ႈၵဝ်ႇလႄႈ ၵူၼ်းၼႆႉ ၶဝ်ၵူၺ်းမုင်ႈမွင်း ၵေႃႉဢၼ်တေပၼ်သၢႆႁိူဝ်ႈလႅင်းၶဝ်ၼၼ်ႉယူႇဢိူဝ်ႈ" ဝႃႈၼႆ

ၵၢင်ႁၢဝ် လၢတ်ႈၼေဝႃႈ "ပဵၵ်ႉသမ်ႉဝႃႈ ဢမ်ႇမီးမွၵ်ႇၵုမ်ႈသင်ၵေႃႈ ၵဝ်ယင်းတိုၵ်ႉတၢင်းႁၢင်ႈလီယူႇဢိူဝ်ႈ" ၼႆဝႃႈ။

တူၼ်ႈမႆႉ လၢတ်ႈၼေဝႃႈ"ၽႂ်ၶႂ်ႈမႃးလိုဝ်ႈသဝ်းႁူမ်ႈၵေႃႈလႆႈ ႁႂ်ႈပဵၼ်ၽူႈၵေႃႉဢၼ် ပၼ်လႆႈတၢင်းၵတ်းၸိုၼ်ႈယဵၼ်ၸႂ်ပိူၼ်ႈၼၼ်ႉသေၵမ်း" ဝႃႈၼႆ

ပပ်ႉလိၵ်ႈ လၢတ်ႈၼေဝႃႈ  "လၢတ်ႈတေႃႇၵဝ်ၶႃႈၼမ်ၼမ်လႄႈႁဵတ်းၵေႃႉၶႃႈၼမ်ၼမ်တႃႉ မႂ်းတေမီးႁႅင်းၶၢမ်ႇၶႄႉၶဵင်ႇတေႃႇသူႈလႆႈ ၼႂ်းလူမ်ႈၾႃႉဢိူဝ်ႈ" ဝႃႈၼႆ

ပၢင်ႇလၢႆႇလူင် လၢတ်ႈၼေဝႃႈ "ယႃႇပေယူႇမိူၼ်ၼင်ႇၵဝ်ၼႃႈ ၵဝ်ၶႃႈၼႆႉၼမ်ယႂ်ႇလူင်ယူႇသေတႃႉၵေႃႈ ဢမ်ႇမီးၵူၼ်းၵိၼ်ၵူၺ်း" ဝႃႈၼႆ

ၾႆး လၢတ်ႈၼေဝႃႈ "ယႃႇပေယူႇႁႂ်ႈပဵၼ်ၸိူင်ႉၵဝ် ၵဝ်မေႃမႆႈဢိူဝ်ႈ ၵွပ်ႈၼၼ် ႁိမ်းႁွမ်းၵဝ်ၼၼ်ႉ ဢမ်ႇမီးၽႂ်ၶႂ်ႈဢိူမ်ႈၸမ်ယဝ်ႉ" ဝႃႈၼႆ

ၵွပ်ႈၼႆ ပဵၵ်ႉသမ်ႉဝႃႈၽႂ်ၶႂ်ႈႁၢႆႉႁၢႆႉလိူင်းလိူင်း ယူႇႁႂ်ႈလီထိသုတ်ႉၵႂႃႇလႄႈ။

တွၼ်ႈတႃႇၸူဝ်ႈပၢၼ်ၸဝ်ႈၵဝ်ႇ တေလႆႈၶတ်းၸႂ်ဢိူဝ်ႈ ထုၵ်ႇလီမေႃတူၺ်းႁၼ် လွင်ႈဢၼ်ၸဝ်ႈၵဝ်ႇႁၢင်ႈလီၼၼ်ႉဢိူဝ်ႈ၊

ၸူဝ်ႈပၢၼ်ဢၼ်သူလႆႈမႃးယူႇယၢမ်းလဵဝ်ၼႆႉ ႁႂ်ႈယူႇႁႂ်ႈမီးလွင်ႈမူၼ်ႉသိူဝ်းတဵမ်ၸႂ်ႁႂ်ႈလီထိသုတ်းၼႆၼၼ်ႉ ယႃႇပေလိုမ်းသေၵမ်း။

ပိၼ်ႇတႅမ်ႈ ဝၼ်းႁိူင်း သီႇပေႃႉ