ပၼ်ႁႃ ၼႂ်းၵႄႈၵၢင်ၸုမ်းသိုၵ်းလွႆ

 

ႁူဝ်ပဝ်ႈလူင် ၶွင်ႇသီႇဢဝ်ၶိုၼ်းၸိုင်ႈတႆး လၢတ်ႈလွင်ႈပၼ်ႁႃ ၼႂ်းၵႄႈၵၢင် RCSS လႄႈ TNLA

ၵဵဝ်ႇလူၺ်ႈလွင်ႈ ပၼ်ႁႃၼႂ်းၵႄႈၵၢင် ၶွင်ႇသီႇဢဝ်ၶိုၼ်းၸိုင်ႈတႆး / တပ်ႉသိုၵ်းၸိုင်ႈတႆး (RCSS/SSA) လႄႈ တပ်ႉသိုၵ်းပူတ်းပွႆႇၸိူဝ်ႉၸၢတ်ႈတဢၢင်း (TNLA) ၼႆႉ သင်ဝႃႈ သွင်ၽၢႆႇဢုပ်ႇဢူဝ်းၵၼ်သေ ၵႄႈလိတ်ႈပေႃးၼႆၸိုင် ပၢင်တိုၵ်းၵေႃႈ တေဢမ်ႇသိုပ်ႇပဵၼ်ထႅင်ႈ လႄႈ ယူႇတီႈၶွင်ႇသီႇဢဝ်ၶိုၼ်း ၸိုင်ႈတႆးၵေႃႈ ဢမ်ႇပႆႇလႆႈမၵ်းမၼ်ႈ သိုၵ်း TNLA ပဵၼ်ၽူႈၶဵၼ် ဝႃႈၼႆ။  

ၵဵဝ်ႇလူၺ်ႈလွင်ႈၼႆႉသေ ႁူဝ်ပဝ်ႈလူင် ၶွင်ႇသီႇဢဝ်ၶိုၼ်းၸိုင်ႈတႆး ၸွမ်သိုၵ်းလူင်ယွတ်ႈသိုၵ်း လၢတ်ႈဝႃႈ ၼႃႈလိၼ်ဢုပ်ႉပိူင်ႇၽွင်းငမ်းႁင်းၶေႃ တဢၢင်းၼႆၼၼ်ႉ လူင်ပွင်ၸိုင်ႈၵေႃႈ တႅပ်းတတ်းမၵ်းမၼ်ႈဝႆႉယဝ်ႈ လွင်ႈလူင်ပွင်ၸိုင်ႈ တႅပ်းတတ်းမၵ်းမၼ်ႈပၼ် ၼႃႈလိၼ်ဢုပ်ႉပိူင်ႇ ၽွင်းငမ်းႁင်းၶေႃႈ တဢၢင်းၼၼ်ႉ ယူႇတီႈၶွင်ႇသီႇဢဝ်ၶိုၼ်းၸိုင်ႈတႆးၵေႃႈ ႁၼ်လီၸွမ်းယူႇ၊ ပေႃးသိုၵ်း TNLA ယူႇၼႂ်းၸႄႈဝဵင်းၼမ်ႉသၼ်ႇ လႄႈ ၸႄႈဝဵင်းမၢၼ်ႈတူင်ႈ ၼႂ်းၼႃႈတီႈၵုမ်းၵမ် တဢၢင်းၼၼ်ႉ ႁဝ်းၶႃႈၵေႃႈဢမ်ႇလႆႈဝႃႈသင် ၵႂႃႇတၢင်းလႂ်ၵေႃႈ သွင်ၽၢႆႇ ပွင်ႇလႅင်းၵၼ်ပေႃးၼႆ တေဢမ်ႇမီးပၼ်ႁႃသင်။ ၵူၺ်းၵႃႈ တပ်ႉသိုၵ်းၸိုင်ႈတႆး RCSS/SSA ဢၼ်တူင်ႉၼိုင်ဝႆႉယူႇ မိူင်းတႆးပွတ်းႁွင်ႇၼၼ်ႉ ယူႇတီႈ သိုၵ်း TNLA ဢဝ်ႁႅင်းသိုၵ်းၼပ်ႉႁူဝ်ပၢၵ်ႇ ဝႅတ်ႉလွမ်ႉတိုၵ်းယိုဝ်း သေဢမ်ႇၵႃး မီးလွင်ႈတဵၵ်းတဵင် ၶႃႈႁႅမ်တၢႆပႃးၵူၼ်းမိူင်း ၵူၼ်းမိူင်းၵမ်ႈၽွင်ႈထုၵ်ႇ သိုၵ်း TNLA တီႉၺွပ်း၊ တေႃႇထိုင်ဝၼ်းမိူဝ်ႈၼႆႉ တၢႆႁိုဝ်လိပ်းႁိုဝ် ယင်းဢမ်ႇပႆႇလႆႈႁူႉၸွမ်း၊ ယူႇယူႇသမ်ႉ ဢဝ်ႁႅင်းသိုၵ်းတင်းၼမ် တိုၵ်းယိုဝ်း RCSS/SSA တိၵ်းတိၵ်းလႄႈ ယူႇတီႈ RCSS/SSA ၵေႃႈ ၵႃႈတေလႆႈၵႅတ်ႇၶႄတူဝ်ၵဝ်ႇၶိုၼ်း ဝႃႈၼႆ။ ပၼ်ႁႃၼႂ်းၵႄႈၵၢင်သွင်ၽၢႆႇ ဢၼ်ပဵၼ်ယူႇၼႆႉၵေႃႈ ဢမ်ႇၸႂ်ႈဝႃႈ RCSS/SSA ၶႂ်ႈၵႂႃႇတိုၵ်းယိုဝ်း၊ ယွၼ်ႉပိူဝ်ႈ သိုၵ်း TNLA ၶႃႈႁႅမ်တၢႆၵူၼ်းမိူင်း၊ တဵၵ်းတဵင်ယွၼ်းငိုၼ်းၵူၼ်းမိူင်း၊ ၸႂ်ႉၵူၼ်းမိူင်း ဢမ်ႇႁူႉတီႈႁူႉတၢင်းမၼ်း၊ ႁၢင်ႈၵၢင် မၢၵ်ႇယဵပ်ႇ မၢၵ်ႇၽႃႇလႄႈ ႁဵတ်းႁႂ်ႈၵူၼ်းမိူင်းယဵပ်ႇၺႃးမၢၵ်ႇ ပဵၼ်ၶႃပုတ်း၊ တူဝ်သတ်းဝူဝ်းၵႂၢႆး ၵူၼ်းမိူင်း ဢၼ်လဵင်ႉလူဝႆႉၸိူဝ်းၼႆႉၵေႃႈ ယဵပ်ႇၺႃးမၢၵ်ႇ လူႉတၢႆတင်းၼမ် ပေႃႈမႄႈၵူၼ်းမိူင်း လႆႈတၢင်း တုၵ်ႉၶ ႁူမ်ႈပႃးတင်း ၸၢဝ်းတဢၢင်းယဝ်ႈ လွင်ႈႁဵတ်းသၢင်ႈဢၼ်ၼႆႉ ဢမ်ႇထုၵ်ႇလီႁဵတ်း သေဢိတ်း ဝႃႈၼႆ။ 

ၶၢဝ်းယၢမ်းဝၼ်းမိူဝ်ႈၼႆႉ ပၢင်တိုၵ်းၵေႃႈဢမ်ႇထုၵ်ႇလီပဵၼ်ယဝ်ႉ ၵွပ်ႈပိူဝ်ႈၸိူင်ႉၼႆလႄႈ ဢၼ်လီ သေပိူၼ်ႈသုတ်းၼႆႉ ၸၢဝ်းၶိူဝ်းဢၼ်ယူႇသဝ်း ၼႂ်းမိူင်းတႆး ၵူႈၽၢႆႇၽၢႆႇ လူဝ်ႇလႆႈဢုပ်ႇဢူဝ်းၵၼ် သေ ၵႄႈလိတ်ႈပၼ်ႁႃ၊ ပေႃးဢမ်ႇဢုပ်ႇဢူဝ်းၵၼ် ၵႄႈလိတ်ႈပၼ်ႁႃပေႃးၼႆႉ ပၢင်တိုၵ်းၵေႃႈ တေသိုပ်ႇပဵၼ်ထႅင်ႈတိၵ်းတိၵ်း၊ ၵၢပ်ႈပၢၼ်ဝၼ်းမိူဝ်ႈၼႆႉ မၼ်းပဵၼ်ၵၢပ်ႈပၢၼ်ဢုပ်ႇဢူဝ်းၵၼ်သေ ၵႄႈလိတ်ႈပၼ်ႁႃလႄႈ သင်ဝႃႈဢဝ်ၵွင်ႈၵၢင်ႇသေ ၵႄႈလိတ်ႈပၼ်ႁႃၼႆ မၼ်းတေဢမ်ႇသုတ်း သဵင်ႈလႆႈ တေႁဵတ်းႁႂ်ႈၵူၼ်းမိူင်းတုၵ်ႉၶၵူၺ်း ၼႆယဝ်ႉ။

ႁူဝ်ပဝ်ႈလူင် ၶွင်ႇသီႇဢဝ်ၶိုၼ်းၸိုင်ႈတႆး ၸွမ်သိုၵ်းလူင်ယွတ်ႈသိုၵ်း ယင်းၾၢၵ်ႇၶေႃႈၵႂၢမ်းထိုင် သိုၵ်း TNLA ဝႃႈ သိုပ်ႇၵႂႃႇမိူဝ်ႈၼႃးၼႆႉ သွင်ၽၢႆႇလူဝ်ႇလႆႈဢုပ်ႇဢူဝ်းၵၼ် ယူႇတီႈၶွင်ႇသီႇဢဝ်ၶိုၼ်း ၸိုင်ႈတႆးၵေႃႈ ၽွမ်ႉဢုပ်ႇဢူဝ်းၵၼ်ယူႇတႃႇသေ မူႇလႂ်ၸုမ်းလႂ်ၵေႃႈယဝ်ႉ တိုၼ်းလူဝ်ႇလႆႈဢုပ်ႇ ဢူဝ်းၵၼ်၊ ၵူၺ်းၵႃႈ ၸုမ်းလႂ်ၵေႃႈယဝ်ႉ ပေႃးၶတ်းၶႂၢင်ယႃႉၵဝ်း ၶွင်ႇသီႇဢဝ်ၶိုၼ်းၸိုင်ႈတႆးပေႃးၼႆ ယူႇတီႈၶွင်ႇသီႇဢဝ်ၶိုၼ်းၸိုင်ႈတႆးၵေႃႈ ၵႃႈတေလႆႈၵႅတ်ႇၶႄတူဝ်ၶိုၼ်းယူႇ ၼႆယဝ်ႉ။

သင်ဝႃႈပေႃႈမႄႈၵူၼ်းမိူင်းတုၵ်းယွၼ်း ႁႂ်ႈဢဝ်လွင်ႈႁူမ်ႇလူမ်ႈပၼ်ၼႆၵေႃႈ ယူႇတီႈတပ်ႉသိုၵ်း ၸိုင်ႈတႆး RCSS/SSA ၵႃႈတေလႆႈဢဝ်ႁူမ်ႇလူမ်ႈပၼ် ပေႃႈမႄႈၵူၼ်းမိူင်းယူႇ ယွၼ်ႉဝႃႈ RCSS/SSA ႁဵတ်းပုၼ်ႈပၢင်ႈၽွၼ်းလီတႃႇ ပေႃႈမႄႈၵူၼ်းမိူင်းယူႇယဝ်ႉ။

ၵွပ်ႈပိူဝ်ႈၸိူင်ႉၼႆလႄႈ ဢၼ်လီသေပိူၼ်ႈသုတ်းတႄႉ ၸၢဝ်းၶိူဝ်း ၵူၼ်းမိူင်းတႆးႁဝ်းၶႃႈ ၵူႈၽၢႆႇၽၢႆႇ လူဝ်ႇလႆႈဢုပ်ႇဢူဝ်းၵၼ်သေ ၵႄႈလိတ်ႈပၼ်ႁႃ ဢုပ်ႇဢူဝ်းၵၼ်လူၺ်ႈသၽႃႇဝ သုၼ်ႇဢၼ်လူဝ်ႇ လႆႈ လႄႈ ဢၼ်ထုၵ်ႇလႆႈ ၼႆယဝ်ႉ။

တႆးလွတ်ႈလႅဝ်း   https://www.tai.taifreedom.com/?p=14403