ဢပုမ်ႇမႃႉႁူဝ်ၶဵဝ်

 

( ႑ )

မိူဝ်ႈၵွၼ်ႇဢွၼ်ၼႆႉ မီးမူးသိူဝ်းလူင် ၵေႃႉ႞ ယူႇၵႃႈၼႂ်းမိူင်းလူင်မိူင်း႞ဢေႃႈ။ မၼ်းၵႆႉၵႂႃႇလႄႇၵႃႈၼႂ်းႁူၺ်ႈၼႂ်းလွႆလႄႈ ထိုင်မႃးဝၼ်း႞ ၵႂႃႇထူပ်း ႁၼ်မႅၼ်ႈမၢၵ်ႇၶေႃလုၵ်ႈ႞ ဢၼ်လၢၵ်ႇလၢႆး ႁၢင်ႊ လီၼႃႇလူင်လၢင်ဢေႃႈ။ ၵမ်းၼၼ်ႉ မၼ်းပိတ်း ဢဝ် မိူဝ်းၵႂႃႇသၢၵ်ႈ ၸဝ်ႈမုၼ်ယႂ်ႇၶုၼ်ႁေႃၶမ်း ဢၼ်ဢုပ်ႉပိူင်ႇမိူင်းၼၼ်ႉဢေႃႈ။ ၸဝ်ႈမုၼ်ယႂ်ႇ ၶုၼ်ႁေႃၶမ်းၵေႃႈ ၸူမ်းသိူဝ်းၼႃႇလူင်လၢင်လႄႈ ၶျႃႉပၼ် သူးတေႃႇလၢပ်ႈတေႃႇ ၵႃႈတီႈမၼ်းဢေႃႈ။ မၼ်း ၸဝ်ႈၼၼ်ႉၸမ်း ဢမ်ႇမီးလုၵ်ႈယိင်းလုၵ်ႈ ၸၢႆး သေၸဝ်ႈသေပႃး ဢၼ်တၵ်းပုတ်ႈၶၢမ်ႇၸၢမ်ႇ ႁၢင်ႈ ၸၢမ်ႇႁေႃမၼ်းၸဝ်ႈ မိူဝ်းၼႃႈထႃႇလိုၼ်း ၼၼ်ႉဢေႃႈ။ ပေႃးဝႃႈၶဝ်ၸဝ်ႈ လႆႈၵိၼ် မႅၼ်ႈ မၢၵ်ႇၶေႃ ဢၼ်မူးသိူဝ်းမႃးသၢၵ်ႈၼၼ်ႉယဝ်ႉၸိုင် ၼၢင်း မိၽရႃးလူင် ၸပ်းပတိၵ်ႈသၼ်ႇထေႇသေ ယဝ်ႉ ဢမ်ႇႁိုင်ဢမ်ႇၼၢၼ်း ၵိူတ်ႇလဵင်ႉမႃး လုၵ်ႈ ၸၢႆးဢွၼ်ႇ ပႃး႞ဢေႃႈ။ မဵတ်ႉၼႂ်းမၢၵ်ႇၶေႃၵေႃႈ မႃႉ မႄႈတူဝ်႞ ၵဵပ်းၵိၼ်လႄႈ ပႃးပတိၵ်ႉသၼ်ႇထေႇ သေယဝ်ႉ ဢမ်ႇႁိုင်ဢမ်ႇၼၢၼ်း ၵိူတ်ႇလဵင်ႉမႃး မႃႉပေႃႈဢွၼ်ႇ ဢၼ်ၵိုၵ်းၵၼ်တင်း ၸဝ်ႈဢလွင်း ၼၼ်ႉဢေႃႈ။ မႃႉပေႃႈဢွၼ်ႇၼၼ်ႉ ပဵၼ်မႃႉႁူဝ်ၶဵဝ် ဢေႃႈ။ ၸဝ်ႈဢလွင်းၼၼ်ႉၵေႃႈ ယႂ်ႇမႃႈၵႃႊသုင်မႃး ၵူႊမိုဝ်ႉၵူႊဝၼ်းလႄႈ ႁွတ်ႈထိုင်ဢၶိင်ႇဢရွႆႇ မၢဝ်ႇ ႁၢႆးဢေႃႈ။ ထိုင်မႃးမိုဝ်ႉ႞ဝၼ်း႞ မၼ်းၸဝ်ႈၵႂႃႇဢၢပ်ႇ ၼမ်ႉ လႄႈ လႆႈထူပ်းႁၼ် ႁၢင်ႊၼၢင်းယိင်းသၢဝ် ႁၢႆး ဢွၼ်ႇ ဢၼ်ဢဝ်တင်း မွၵ်ႇမူဝ်ႁဵတ်းသေယဝ်ႉ ပွႆႇ လွင်ႈၸွမ်းသၢႆၼမ်ႉမႃးဢေႃႈ။ လွင်ႈတၢင်းၼႆႉ ၸမ်း ၵႃႈတီႈၼႂ်း ထိူၼ်ႇလူင်လုၵ်ႈ႞ပုၼ်ႉ မီးၸဝ်ႈ ရသေး လူင်ပႃး႞လႄႈ မၼ်းၸဝ်ႈႁၵ်းဢဝ်မိူဝ်းၵႂႃႇ မွၵ်ႇမူဝ် လူင်ႇ႞ ၵႃႈၼႂ်းၼွင်မူဝ်ႁႃႈပိူင်သေယဝ်ႉ ဢဝ်မိူဝ်းသႂ်ႇဝႆႉ ၵႃႈၼႂ်းမွၵ်ႇမေႃႈၼမ်ႉဢေႃႈ။ ၵႃႈ ၼႂ်းမွၵ်ႇမူဝ် ၼၼ်ႉ ၼၢင်းမူဝ်ဢွၼ်ႇ ဢွၵ်ႇမႃးလႄႈ ၸဝ်ႈရသေး ၵဵပ်းလဵင်ႉဝႆႉ တေႃႇထိုင်ႁွတ်ႈ ပဵၼ် သၢဝ်ႁၢႆးမႃးဢေႃႈ။ ဝၢႆးသေၼၼ်ႉ မၼ်းၸဝ်ႈဢဝ် မၼ်းၼၢင်း ၵႂႃႇဝႆႉၵႃႈၼႂ်းသူၼ်ဢူးယဵၼ်ႇလူင် ဢၼ် မီးႁေႃၶမ်း ပဵၼ်တီႈဢၼ်တဵတ်ႇယဵၼ်ဢေႃႈ။ ၶိင်ႇမိူဝ်ႈၼၼ်ႉ မၼ်းၼၢင်း တႃႉႁႃတူၼ်ႈၵၢမ်ႇ ပၢၼ်ဢွၼ် ႁႂ်ႈလႆႈပဵၼ် တီႈဢၼ်တိူင်ႇပၢင်ႇလၢတ်ႈ ၸႃၵၼ်လႄႈ ၸင်ႇဝႃႈဢဝ်မွၵ်ႇမူဝ်တု ႁဵတ်းႁၢင်ႊ မၼ်းၼၢင်းသေယဝ်ႉ တိၵ်ႈထၢၼ်ႇပွႆႇလွင်ႈၼမ်ႉၵႂႃႇဢေႃႈ။

ၸဝ်ႈဢလွင်းၵေႃႈ ပိူဝ်ႈဢၼ်ၶဝ်ႈပဵၼ်မိင်ႈၼၢမ်ႇၵၢမ်ႇၵဝ်ႇလႄႈ ပေႃးဝႃႈလႆႈႁၼ် ပုင်ႇႁၢင်ႊ ၼၢင်းမူဝ်ယဝ်ႉၸိုင် မီးတၢင်းဢၼ်ၸႂ်တိတ်းၸႂ်ႁွႆႈ ၸွႆးၸပ်းတေႃႇထိုင် ႁွတ်ႈထၢၼ်ႈပေႃး ၵိၼ်ဢမ်ႇ ဝၢၼ်ၼွၼ်းဢမ်ႇလပ်းဢေႃႈ။ မၼ်းၸဝ်ႈယွၼ်း ဢၶႂၢင်ႉ တီႈၸဝ်ႈ ဢူႈၶမႄးတေႃႇသေယဝ်ႉ ၶီႇ တင်းမႃႉႁူဝ်ၶဵဝ်သေလႄႈ ၵႂႃႇၶႆႈႁႃၼၢင်းမူဝ် တီႈ႞ ယဝ်ႉ တီႈ႞ဢေႃႈ။ မိူဝ်ႈဢၼ်ထူပ်းႁၼ်ယဝ်ႉၼၼ်ႉ မၼ်း ၸဝ်ႈဢဝ်မႃႉမၼ်းၸဝ်ႈ ပွႆႇဝႆႉၵႃႈၼွၵ်ႈသူၼ် ဢူး ယဵၼ်ႇသေယဝ်ႉ ၵႂႃႇၸူးၵႃႈတီႈႁေႃၶမ်းမၼ်းၼၢင်းဢေႃႈ။ ပိူဝ်ႈဢၼ်ၶဝ်ႈပဵၼ်ပၢၼ်ဢွၼ်ၵၼ် လႄႈ သၽေႃးတူႇၵၼ်သေလႄႈ ၵႂႃႇမွၵ်ႇလၢတ်ႈ ပေႃႈရသေး ႁႂ်ႈသွင်ႇမင်ႇၵလႃႇလၢၵ်ႈထၢပ်ႈ ဢဝ် ပၼ်ဢေႃႈ။ ဝၢႆးသေ ပူၼ်ႉၸဵတ်းဝၼ်းယဝ်ႉ မၼ်း ၸဝ်ႈ ၶုၵ်းၸႂ်လႆႈၶႆႈၸႂ်ထူပ်း မႃႉမၼ်းၸဝ်ႈလႄႈ မိူဝ်ႈ ဢၼ်ၵႂႃႇလူတူၺ်းၼၼ်ႉ ဢမ်ႇထူပ်းဢမ်ႇ ႁၼ် ၵွပ်ႈၼႆၸင်ႇမၼ်းၸဝ်ႈ ၵႂႃႇလဝ်ႊလၢတ်ႈတွင်ႈ ထၢမ် တီႈပေႃႈရသေးဢေႃႈ။ ၸဝ်ႈပေႃႈရသေး လူင်ၵေႃႈ တူၺ်းၼၵ်ႈၶၢတ်ႈတႃႇရႃႇ ဢၶႃႇယၢမ်း ဢၼ်တွင်ႈ ထၢမ်ၼၼ်ႉသေယဝ်ႉ ၶိုၼ်းလၢတ်ႈ လႄႈဝႃႈ မႃႉတူဝ်ၼႆႉ တူၵ်းႁွတ်ႈၵႃႈၼႂ်းမိုဝ်းရၢၼ်ႇသူႇယဝ်ႉ ဝႃႈ ၼင်ႇၼႆဢေႃႈ။ ၵမ်းၼၼ်ႉ ၶဝ်ၸဝ်ႈ ၽူဝ်မေး ၸင်ႇလဝ်ႊယွၼ်းဢၶႂၢင်ႉႁႂ်ႈလႆႈၸွမ်း ႁႃ မႃႉၼၼ်ႉလႄႈ ၸဝ်ႈပေႃႈရသေးၵေႃႈ သင်ႇသွၼ် သုင်းမသေယဝ်ႉ ပၼ်ဢၶႂၢင်ႉ ၶဝ်ၸဝ်ႈဢေႃႈ။ လိုၼ်းၼၼ်ႉ ၶဝ်ၸဝ်ႈ ၸွမ်းတၢင်းၵႂႃႇလႄႈ ႁွတ်ႈ ၽႅဝ်ၵႂႃႇ ၵႃႈတီႈၼႂ်းထိူၼ်ႇလူင် တီႈ႞ဢေႃႈ။ မိူဝ်ႈ ဢၼ်ၵိုတ်းသဝ်းလိုဝ်ႈယူႇၼၼ်ႉ မူးသိူဝ်းၵေႃႉ႞ မႃးထူပ်းႁၼ်ၶဝ်ၸဝ်ႈလႄႈ မီးၸႂ်ဢၼ် ၵျိူၵ်ႈႁၵ်ႉ ၶႂ်ႈလႆႈၼၢင်းမူဝ် ၼႃႇလူင်လၢင်ဢေႃႈ။ မိူဝ်ႈၼၼ်ႉ မၼ်းဢဝ်ၵၢင်ႇၵွင်ႉယိုဝ်း သႂ်ႇ ၸဝ်ႈဢလွင်းသေ ယဝ်ႉ လၢၵ်ႈတိုတ်ႉၸၼ်ဢဝ် ၵႂႃႇၼၢင်းမူဝ် ႁႂ်ႈလႆႈ ၸွမ်းဢလူဝ်ႇမၼ်းဢေႃႈ။ ပိၵ်ႉသမ်ႉ မၼ်းတိုၵ်း ယူင်းၸူဝ်းဢဝ်ၶိူဝ်းၶိူဝ်းယႂ်းယႂ်းသေၵေႃႈ ၼၢင်း ၼၼ်ႉ ဢမ်ႇၸွမ်းဢမ်ႇပႃးၵႂႃႇ ၵႃႈၼႂ်းဢလူဝ်ႇ တၢင်းၵျၢမ်ႇတၢင်းပွင်မၼ်း လႃးလႃး။ ၽွင်းမိူဝ်ႈ ဢၼ် မၼ်းတိုၵ်ႉၼွၼ်းလပ်းယူႇၼၼ်ႉ မၼ်း ၼၢင်း ထွတ်ႇဢဝ်မိတ်ႈတႅင်းတၢႆမၼ်းသေယဝ်ႉ ဢွၵ်ႇပၢႆႊၵႂႃႇ သိုဝ်ႈၼႃႈၵႃႊပဵၼ်ဢေႃႈ။ ဝၢႆးသေ ၼၼ်ႉ မၼ်းၼၢင်းႁွတ်ႈထိုင်ၵႂႃႇ ၵႃႈတီႈတိုဝ်ႉ တႃႈ သၢင်းၽေႃးလႄႈ ၶဝ်ႈၵႃႈၼႂ်းႁိူဝ်းသၢင်းၽေႃး လမ်း႞ဢေႃႈ။ မိူဝ်ႈဢၼ် ယင်းတိုၵ်ႉၶီႇႁိူဝ်းသၢင်းၽေႃးၵႂႃႇယူႇၼၼ်ႉ ၵႄႇၵႃႉႁိူဝ်းသၢင်းၽေႃး ဢိၵ်ႇ တင်းၵူၼ်းၵႃႉတင်းလၢႆ ႁၼ်မၼ်းၼၢင်းလႄႈ ၵျၢမ်ႇတိုၵ်း ယူင်းၸူဝ်း ဢဝ်ႁႂ်ႈလႆႈပဵၼ်လုၵ်ႈပဵၼ် မေးဢေႃႈ။ မၼ်းၼၢင်းၵေႃႈ ဢဝ်တင်းပရိယႄႇ သေယဝ်ႉ လၢတ်ႈလႄႈဝႃႈ ၸွမ်းလူၺ်ႈထုင်းၸၢမ်ႇ ၶိင်ႇပဵၼ်ၶႃႈႁဝ်းၶဝ်မီးၼၼ်ႉ ၵေႃႉဢၼ်ၵိၼ်လႆႈ လဝ်ႈ မဝ်းသေပိူၼ်ႈၼၼ်ႉၵွႆး တေထိူၵ်ႈပဵၼ် တူၼ်ႈၵၢမ်ႇ ပၢၼ်ဢွၼ်ၶႃႈၼၢင်းဢေႃႈ ဝႃႈၼင်ႇၼႆ ဢေႃႈ။ ၶဝ်ၸိူဝ်းၼၼ်ႉၵေႃႈ ၵိုဝ်းထၢင်ႇဝႃႈ ပဵၼ် ဢၼ်ၸိုဝ်ႈတေႉၸႂ်ႈတေႉလႄႈ ၶႄႉၵၼ် ၵိၼ်လဝ်ႈ ထၢၼ်ႈပေႃး မဝ်းၵႂႃႇၵူႊၵေႃႉၵူႊၵူၼ်းဢေႃႈ။ မိူဝ်ႈ ဢၼ်ထိုင်ႁွတ်ႈ တႃႈသၢင်းၽေႃးယဝ်ႉၼၼ်ႉ မၼ်းၼၢင်းဢွၵ်ႇပၢႆႊၵႂႃႇတဵတ်ႇတဵတ်ႇယဵၼ်ယဵၼ်သေဢေႃႈ။

( ႒ )

ၸဝ်ႈရသေးလူင် ဢၼ်ၵိုတ်းၵျၢၼ်ႇဝႆႉ ၵႃႈ တီႈၵျွင်းၼၼ်ႉ မွင်းၼၢင်းမူဝ်ၶဝ်ၽူဝ်မေး မိူဝ်ႈလႂ် ၵေႃႈ ဢမ်ႇပေႃႇပွၵ်ႈၽႅဝ်မႃးလႄႈ တူၺ်းၼၵ်ႈၶၢတ်ႈတႃႇရႃႇၵၢင်ႁၢဝ်သေယဝ်ႉ ႁူႉလွင်ႈ ဢၼ်ၶဝ် ၽူဝ်မေးထူပ်းၽေးယဝ်ႉၼၼ်ႉဢေႃႈ။ ၵမ်းၼၼ်ႉ မၼ်း ၸဝ်ႈၸွမ်းၵႂႃႇ ၶၼ်ၶၼ်ၽႂ်းၽႂ်းလႄႈ မိူဝ်ႈ ဢၼ်ၵႂႃႇထူပ်းႁၼ်ၸဝ်ႈဢလွင်း ထုၵ်ႇပိူၼ်ႈယိုဝ်းလူမ်ႉတၢႆယူႇၼၼ်ႉ ဢဝ်ယႃႈယႃသူၺ်းတႃးပၼ် သေယဝ်ႉ ႁႂ်ႈလုၵ်ႉၶိုၼ်းမႃးဢေႃႈ။ ၸဝ်ႈဢလွင်း ၵေႃႈ ႁူႉတူဝ် မႃးတၢၼ်ႇတၢၼ်ႇလႄႈ ၽုတ်ႇလုၵ်ႉ လႅၼ်ႈၵွတ်ႇ ၸဝ်ႈရသေး ထၢင်ႇဝႃႈပဵၼ်မေးမၼ်း ၸဝ်ႈဢေႃႈ။ မိူဝ်ႈၼၼ်ႉ ၸဝ်ႈရသေး ၽုၺ်ႇမွၵ်ႇ လၢတ်ႈၼႄ လွင်ႈတၢင်းၵူႊၸိူဝ်ႉၵူႊပိူင်ယဝ်ႉ ၸင်ႇ ပၼ်ယႃႈယႃ တီႈမၼ်းၸဝ်ႈဢေႃႈ။ မၼ်းၸဝ်ႈႁပ်ႉ ၶၢမ်ႇတုင်း ဢဝ်ယႃႈယႃသေလႄႈ ၶုပ်ႉၶဝ်ႇဝႆႈၸဝ်ႈ ပေႃႈရသေးသေယဝ်ႉ ၽၢတ်ႇယၢၼ်ဢွၵ်ႇၵႂႃႇ ႁႂ်ႈ လႆႈၸွမ်းၶႆႈ ၸွမ်းႁႃမေး မၼ်းၸဝ်ႈဢေႃႈ။ မိူဝ်ႈ ႁွတ်ႈထိုင်ၽင်ႇၼမ်ႉလူင်မႄႈ႞ၼၼ်ႉ မၼ်းၸဝ်ႈ ထူပ်းႁၼ် ၼၢင်းငိူၵ်ႈ တူဝ်႞တၢႆယူႇၵႃႈၼိူဝ်ႁၢတ်ႇသၢႆးဢေႃႈ။ မၼ်းၸဝ်ႈ ဢဝ်ယႃႈယႃ ဢၼ်လႆႈမႃး တီႈၸဝ်ႈပေႃႈ ရသေးလူင်ၼၼ်ႉ လုပ်ႈတႃးပၼ် လႄႈ ၼၢင်းငိူၵ်ႈၶိုၼ်းလိပ်းမႃးၵမ်းလဵဝ်ဢေႃႈ။ ၼၢင်းငိူၵ်ႈၼၼ်ႉ ၸမ်းပဵၼ်လုၵ်ႈယိင်းၶုၼ်ႁေႃ ၶမ်းငိူၵ်ႈဢေႃႈ။ မၼ်းၼၢင်းလႆႈတၢႆၵႂႃႇ ၵွပ်ႈပိူဝ်ႈ တမ်ႇငႃႈမေႃပႃၶဝ်ပေႃႉ ယႅၼ်ႉၼိၵ်ႈၸၢၵ်ႈငႅၼ်း သႄး  လၢတ်ႈဝႃႈ မျူဝ်း ဢမ်ႇလႆႈၼိူဝ်ႉလႆႈ ၼင် ဝႃႈၼင်ႇၼႆဢေႃႈ။ မိူဝ်ႈဢၼ်ၶိုၼ်းလိပ်းမႃး ၼၼ်ႉ မၼ်းၼၢင်းသၢၵ်ႈ ၵုင်ႇၵေးၸူး ၼႂ်းတၢင်း ဢၼ်ဢဝ်ၸဝ်ႈဢလွင်း ၶၢမ်ႈၵႂႃႇ ၽၢႆႇပုၼ်ႉၼမ်ႉ ဢေႃႈ။ ဝၢႆးသေၼၼ်ႉ မၼ်းၼၢင်း ၶၢႆႉပုတ်ႈႁဵတ်း ပဵၼ် ၼၢင်းၵူၼ်းဢၼ်ႁၢင်ႊလီၼႃႇလူင်လၢင်လႄႈ ၸဝ်ႈဢလွင်း ငိၼ်းၵျိူၵ်ႈ ထုၵ်ႇတႃ ႁၵ်ႉ ပႅင်းသေယဝ်ႉ ႁူမ်ႈပွင်းဢဝ်ၵၼ် ပဵၼ်ၽူဝ်ပဵၼ် မေးမႃဢေႃႈ။ ဝၼ်း႞ ၸဝ်ႈဢလွင်း လၢတ်ႈၸပ်း မႅၼ်ႈ လွင်ႈမႃႉမၼ်းၸဝ်ႈ ဢၼ်ႁၢႆၵႂႃႇၼၼ်ႉလႄႈ ၼၢင်းငိူၵ်ႈသမ်ႉ ၽုၺ်ႇမွၵ်ႇလၢတ်ႈၼႄ လွင်ႈဢၼ် ၶုၼ်ႁေႃၶမ်းမိူင်းၽၢႆး ၸၢင်ႊလႄႇလၢၵ်ႈဢဝ် လုၵ်ႈ ယိင်းၼၢင်းသၢဝ်ပိူၼ်ႈလႂ်၊ ဢုၵ်ႈၸႃႇၶူဝ်း လဵင်း လုၵ်ႈဝူဝ်းတူဝ်ၵႂၢႆးပိူၼ်ႈလႂ်၊ ၸၢင်ႉမႃႉ ပိူၼ်ႈ လႂ်ၸိူဝ်း ၼၼ်ႉဢေႃႈ။ ၼွၵ်ႈသေၼၼ်ႉ မၼ်း ၼၢင်းလၢတ်ႈ ၼႄပႃး လွင်ႈလုၵ်ႈယိင်း ၶုၼ်ႁေႃ ၶမ်းမိူင်းၽၢႆး ဢိၵ်ႇတင်း ၸိူင်ႉၼၢင်းၶႃႈၵူၼ်းတင်း လၢႆ ၵႆႉလူင်းမႃးဢၢပ်ႇၼမ်ႉ တီႈတႃႈၼမ်ႉဢၼ် ၸမ်ၵၼ်တင်း တီႈၶဝ်ယူႇၼၼ်ႉဢေႃႈ။ ပေႃးဝႃႈ လႆႈႁူႉလႆႈငိၼ်းလွင်ႈၼၼ်ႉယဝ်ႉၸိုင် မၼ်းၸဝ်ႈ ဢွၵ်ႇၵႂႃႇသေလႄႈ ၵႂႃႇတဵတ်ႇမႅပ်းၵႃႈၼႂ်းႁူးမၢၵ်ႇ ႁိၼ် ႁိမ်းတႃႈၼမ်ႉၼၼ်ႉ ပႂ်ႉၶျွင်းလွမ်တူၺ်း ယူႇဢေႃႈ။

မိူဝ်ႈဢၼ် ၼၢင်းၽၢႆးတင်းလၢႆ  မႃးဢၢပ်ႇ ၼမ်ႉၵၼ်လႄႈ တေႃႇမေႈမူၼ်ႊပၢႆႊ တဵတ်ႇၵၼ် ၼၼ်ႉ လုၵ်ႈယိင်းၶုၼ်ႁေႃၶမ်းၽၢႆး ဢၼ်ပဵၼ် ၼၢင်းလိုၼ်း ၵျၢမ်ႇဢၢင်ႈပၢႆႊ ၶဝ်ႈတဵတ်ႇ ၵႃႈၼႂ်းႁူး မၢၵ်ႇႁိၼ် တီႈဢၼ်ၸဝ်ႈဢလွင်းမီးၼၼ်ႉလႄႈ ၸင်ႇတၵ်းထူပ်းႁူပ်ႉ ၺႃးၵၼ်ဢေႃႈ။ မိူဝ်ႈဢၼ် လႆႈ ထူပ်းလႆႈႁၼ်ၵၼ်ၼၼ်ႉ ငိၼ်းပဵၼ်တၢင်း ဢၼ် ႁၵ်ႉႁႅင်းပႅင်းယႂ်ႇၵၼ် တင်းသွင်ၽၢႆႇသွင်ပႃႈ သေယဝ်ႉ လၢတ်ႈမၼ်ႈၵိၼ်ႇၵႅၼ်ႇၵၼ်သေလႄႈ ႁႂ်ႈ ၸဝ်ႈဢလွင်း လၵ်ႉၸွမ်းမိူဝ်း ၵႂႃႇတီႈႁၢင်ႈႁေႃ ပုၼ်ႉတဵတ်ႇတဵတ်ႇယဵၼ်ယဵၼ်ဢေႃႈ။ ၸိူင်ႉၼင်ႇ ဢၼ် မၼ်းၼၢင်း ၼႄဝႆႉတီႈ မၢတ်ႈတီႈတွင်း ၵႃႈၼႂ်း သဵၼ်ႈသၢႆတၢင်းၼၼ်ႉ မၼ်းၸဝ်ႈၸွမ်း မိူဝ်းၵႂႃႇတေႃႇထိုင်ႁွတ်ႈၽႅဝ် ၵႃႈၼႂ်းလုၵ်းတီႈ ၼွၼ်းမၼ်းၼၢင်းဢေႃႈ။ ၸဝ်ႈဢလွင်းၵေႃႈ ၶျေႃး ထၢမ်မၼ်းၼၢင်း လွင်ႈမႃႉ မၼ်းၸဝ်ႈဢၼ်ႁၢႆၵႂႃႇ ၼၼ်ႉ ဢေႃႈ။ ပိူဝ်ႈဢၼ်ပဵၼ်ၵေႃႉႁၵ်ႉၵေႃႉပႅင်းလႄႈ မၼ်းၼၢင်း ၶႆႊၼႄ လၢတ်ႈၼႄ ၵူႊၸိူဝ်ႉ ၵူႊပိူင်သေယဝ်ႉ ၸႂ်ႉမၼ်းၸဝ်ႈ ၵႂႃႇလူလွမ်ၸၢမ်း တူၺ်း ဢေႃႈ။ မႃႉၼၼ်ႉၵေႃႈ ပေႃးဝႃႈထူပ်းႁၼ် ၸဝ်ႈမၼ်းယဝ်ႉၸိုင် မီးတၢင်းဢၼ်ၸူမ်းသိူဝ်း ၼႃႇ လႄႈ ဝႅၼ်ၽၢင်ႈထိပ်ႇယၼ်ပိတ်ႉၶွၵ်ႈလဵၵ်းသေယဝ်ႉ ၵျွၵ်းဢွၵ်ႇမႃးၵမ်းလဵဝ်ဢေႃႈ။ ၸဝ်ႈ ဢလွင်း ၸင်ႇၶိုၼ်ႈၶီႇမႃႉၼၼ်ႉသေလႄႈဢွၵ်ႇ ပၢႆႊၵႂႃႇ တၢင်ႇတီႈတၢင်ႇလႅၼ်သေဢေႃႈ။ လုၵ်ႈ ယိင်းၶုၼ် ႁေႃၶမ်းမိူင်းၽၢႆးၵေႃႈ ပိူဝ်ႈဢၼ်လႆႈ ၽၢတ်ႇယၢၼ်တင်း ၵေႃႉႁၵ်ႉၵေႃႉပႅင်းလႄႈ မီးၸႂ်ဢၼ်ႁဵဝ်ႇၸွပ်ႈ တမ်ႇၼွႆႉ မွင်ၸႂ်ၼႃႇ လူင် လၢင်သေယဝ်ႉ ၶႆႈၸွမ်း တၢင်းၵႂႃႇတၢင်းပႆမၼ်း ၸဝ်ႈဢေႃႈ။ ထိုင်မႃးဝၼ်း႞ မၼ်းၼၢင်း ၵႂႃႇထူပ်း ႁူပ်ႉ ၼၢင်းမူဝ်ၶမ်း ဢၼ်ပႃး ပတိၵ်ႈသၼ်ႇထေႇ ၵႄႇယဝ်ႉထူၼ်ႈယဝ်ႉလႄႈ ၸမ်တၵ်းႁၼ်ၼႃႈ လုၵ်ႈဢွၼ်ႇၼၼ်ႉဢေႃႈ။ မိူဝ်ႈၼၼ်ႉ ၶဝ်ၸဝ်ႈသွင် ၼၢင်း ၸင်ႇတၵ်းတိူင်ႇပၢင်ႇ လၢတ်ႈၸႃၵၼ်လႄႈ ႁူႉလွင်ႈဢၼ်ၶဝ်ၸဝ်ႈ လႆႈပဵၼ် မေးၽူဝ်ၵေႃႉလဵဝ် ၵၼ်ၵွႆးၼၼ်ႉဢေႃႈ။ မိူဝ်ႈဢၼ်ၼၢင်းမူဝ်ၶမ်း ၸမ်တၵ်းႁၼ်ၼႃႈလုၵ်ႈဢွၼ်ႇၼၼ်ႉ ၼၢင်းၽၢႆး ၵႂႃႇႁႃ ၶႄႈႁႃၽိုၼ်း ၵႃႈၼႂ်းထိူၼ်ႇပုၼ်ႉဢေႃႈ။ ပေႃးဝႃႈ ၶိုၼ်းႁွတ်ႈၽႅဝ်မႃး ယဝ်ႉၸိုင် လႆႈႁၼ် မၼ်းၼၢင်း ၵိူတ်ႇဝႆႉ လုၵ်ႈၸၢႆး ဢွၼ်ႇၵေႃႉ႞သေ ယဝ်ႉ တၢႆယူႇၼၼ်ႉဢေႃႈ။ လွင်ႈတၢင်းဢၼ် လႆႈ ပဵၼ်မႃးၸိူင်ႉၼင်ႇၼႆၼၼ်ႉၸမ်း မူးသိူဝ်းဢၼ် မၼ်းၼၢင်း လႆႈဢဝ်တၢႆမႅၼ်ႈမိူဝ်ႈဢွၼ်တၢင်း ၼၼ်ႉ ၵိူတ်ႇပဵၼ်ငူးလူင်သေ ၸွမ်းလၢၼ်ႇၸွမ်းၽျၢၵ်ႈမၼ်းၼၢင်းဢေႃႈ။ ၼၢင်းၽၢႆးၵေႃႈ ၵဵပ်း ဢဝ်လုၵ်ႈၸၢႆးဢွၼ်ႇၼၼ်ႉသေယဝ်ႉ ၵႂႃႇဝႆႉတီႈ ႁေႃၶမ်းလူင် ဢၼ်ၶုၼ်ၽီသိၵ်ႈၵျႃး ၽၢၼ်ႇသၢင်း ႁဵတ်းပဵၼ်ၼႂ်းၶိင်ႇမိူဝ်ႈၼၼ်ႉဢေႃႈ။

( ႓ )

ထိုင်မႃးထႅင်ႈဝၼ်း႞ ၸဝ်ႈရသေးလူင် တူၺ်းၼၵ်ႈၶၢတ်ႈတင်းလၢႆလႄႈ လႆႈႁူႉ လွင်ႈ ဢၼ် လုၵ်ႈယိင်းမၼ်းၸဝ်ႈ ၼၢင်းမူဝ်ၶမ်း သဵင်ႈ ၵၢမ်ႇသုတ်းမုၼ် ၶၢႆႉၸၢတ်ႈၶၢႆႉပၢၼ် တၢႆၵႂႃႇယဝ်ႉ ၼၼ်ႉဢေႃႈ။ မိူဝ်ႈၼၼ်ႉ မၼ်းၸဝ်ႈႁိပ်ႈၼႅတ်ႈ ၸွမ်းၵႂႃႇ လႄႈ ၵႂႃႇထူပ်းႁၼ်တူဝ် တၢႆမၼ်းၼၢင်း ဢေႃႈ။ ၸဝ်ႈပေႃႈဢဝ်ယႃႈယႃ တႃးပၼ်သေယဝ်ႉ မၼ်း ၼၢင်းလုၵ်ႉၵႃႈတၢင်း တၢႆလိပ်းၶိုၼ်းဢေႃႈ။ ဝၢႆးသေၼၼ်ႉ မၼ်းၼၢင်းတုၵ်းတေႃးယွၼ်း ဢၶႂၢင်ႉ ႁႂ်ႈလႆႈၸွမ်းၵႂႃႇ ႁႃၽူဝ်မၼ်းၼၢင်းဢေႃႈ။ ပိူဝ်ႈဢၼ် ႁေႉၶႅၼ်ဢမ်ႇလႆႈလႄႈ ၸဝ်ႈပေႃႈရသေး ၸင်ႇပၼ် တင်းယႃႈယႃသေယဝ်ႉ ပွႆႇဝၢင်းၶႂၢင်း ပၼ် ႁႂ်ႈမၼ်းၼၢင်းၸွမ်းၵႂႃႇဢေႃႈ။ ၵမ်းၼၼ်ႉ မၼ်းၼၢင်း ၽျၢၵ်ႈႁၢင်ႊ ႁဵတ်းၼင်ႇသြႃႇမေႃယႃ လူင်သေယဝ်ႉ ၶဝ်ႈမိူင်း႞ဢွၵ်ႇမိူင်း႞ ၵႂႃႇၵႃႊၼင်ႇ ဢထၢင်ႇၸႂ်မီး ဢေႃႈ။ မိူဝ်ႈဢၼ်မၼ်းၼၢင်းႁွတ်ႈ ၽႅဝ်ၵႂႃႇ ၵႃႈတီႈ ဝဵင်းဝဵင်း႞ၼၼ်ႉ မၼ်းၼၢင်းလႆႈ ႁၼ် ၵူၼ်းၼမ်ၼႃႇယုင်ႈယၢင်ႈဢူၼ်မေႃးၵၼ်ယူႇဢေႃႈ။ ၵေႃႉႁႆႈ ၵေႃႈႁႆႈ ၵေႃႉၶူဝ်ၵေႃႈၶူဝ် ၵူၼ်းမီး ၸေးၼႃႇဢေႃႈ။ မၼ်းၼၢင်းၸၢမ်းထၢမ်တူၺ်း လွင်ႈမၼ်းတၢင်းမၼ်းလႄႈ လႆႈႁူႉလွင်ႈဢၼ် ၵူၼ်းတင်းလၢႆ ၵၢၼ်သုၵ်ႉလူၺ်ႈ မႃႇသႃႇလုၵ်ႈ ယိင်း ၸဝ်ႈမုၼ်ယႂ်ႇၶုၼ်ႁေႃၶမ်းဢေႃႈ။ ၵမ်း ၼၼ်ႉ မၼ်းလၢတ်ႈလႄႈဝႃႈ ၵဝ်ၶႃႈၼႆႉ ပဵၼ်သြႃႇ မေႃယႃလူင် ဢၼ်လႄႇယႃၵိၼ် ၵူၼ်းၶႃႈဢေႃႈ။ တေႃႈတၢႆၵႂႃႇယဝ်ႉသေၵေႃႈ ယင်းႁဵတ်းႁႂ်ႈ လုၵ်ႉ ၶိုၼ်းလႆႈယူႇၶႃႈဢေႃႈ။ ၸဝ်ႈၼၢင်း ဢွၼ်ႇၼႆႉၵေႃႈ ပေႃးၶႂ်ႈႁႂ်ႈလုၵ်ႉၵႃႈတၢင်းတၢႆလိပ်း ၶိုၼ်းၸိုင် ၵဝ် ၶႃႈတၢတ်ႈၼိူင်ႇလႆႈယူႇၶႃႈဢေႃႈ ဝႃႈၼင်ႇၼႆ ဢေႃႈ။ မိူဝ်ႈဢၼ်ငိၼ်းၵႂၢမ်းမၼ်းၼၢင်းၼၼ်ႉ ပိူၼ်ႈဢွၼ်ၵၼ်ၵႂႃႇလဝ်ႊလၢတ်ႈ ၸဝ်ႈမုၼ်ယႂ်ႇ ၶုၼ်ႁေႃၶမ်းဢေႃႈ။ ၸဝ်ႈမုၼ်ယႂ်ႇ ၶုၼ်ႁေႃၶမ်း ၵေႃႈ မီးဢမိင်ႉလႄႈဝႃႈ ပေႃးဝႃႈယႃလႄႈ လုၵ်ႈ ယိင်း လုၵ်ႉၶိုၼ်းလိပ်းၸႂ်ႈတေႉၸိုင် ၵႃႈၼင်ႇ ဢလူဝ်ႇသၼ်ႇတမီးၼၼ်ႉ ယွၼ်းသေၵမ်း ဝႃႈ ၼင်ႇၼႆဢေႃႈ။ ပေႃးဝႃႈ ငိၼ်းၵႂၢမ်းမၼ်းၸဝ်ႈ ယဝ်ႉၸိုင် သြႃႇမေႃယႃဢၼ် ပဵၼ်ၼၢင်းမူဝ်ၶမ်း မူၼ်ႉၶဝ်ႈၵႂႃႇ ၵႃႈၼႂ်းၽႃႈၵင်ႈ ၸဵတ်းထၢပ်ႈဢၼ်ႁေႉၵႃႇဝႆႉၼၼ်ႉသေယဝ်ႉ ဢဝ်ယႃႈယႃလုပ်ႈတႃး ပၼ် ၸဝ်ႈၼၢင်းဢွၼ်ႇ လုၵ်ႉၵႃႈတၢင်းတၢႆ ၶိုၼ်း လိပ်းမႃးဢေႃႈ။ မိူဝ်ႈၼၼ်ႉ ၸႃႉၸဵမ်ၸဝ်ႈမုၼ်ယႂ်ႇ ၶုၼ်ႁေႃၶမ်း ဢိၵ်ႇတင်းၶႃႈမၢၼ်ႈၵူၼ်းမိူင်းတင်းလၢႆ ၸူမ်းသိူဝ်းၼႃႇလူင်လၢင်လႄႈ ဢွၼ်ၵၼ် ယုၵ်ႉယွင်ႈ သြႃႇမေႃယႃၼၼ်ႉဢေႃႈ။

ဝၢႆးသေၸဝ်ႈၼၢင်းဢွၼ်ႇ လုၵ်ႉၵႃႈတၢင်းတၢႆၶိုၼ်းလိပ်းယဝ်ႉၼၼ်ႉ သြႃႇမေႃယႃ ဢၼ်ပဵၼ် ၼၢင်းမူဝ်ၶမ်း လဝ်ႊယွၼ်းတွင်းပၢၼ်ႇ ၸဝ်ႈမုၼ် ယႂ်ႇ ၶုၼ်ႁေႃၶမ်း ႁႂ်ႈလႆႈၶၢမ်ႇ ဢွင်ႇပွႆး ၸဵတ်းဝၼ်း လႄႈ ၸဵတ်းၶိုၼ်းဢေႃႈ။ ၸိူင်ႉၼင်ႇဢၼ်ၵတိ ၸဝ်ႈ လႆႈမီးယဝ်ႉဢၼ်ဝႃႈ ဢလူဝ်ႇသၼ်ႇတ မီး ၸိူင်ႉၼင်ႇႁိုဝ်သေၵေႃႈ ယွၼ်းသေၵမ်းဝႃႈၼင်ႇ ၼႆၼၼ်ႉ လႄႈ ၼႂ်းၶိင်ႇမိူဝ်ႈၼၼ်ႉ မၼ်းၸဝ်ႈ ထွမ်ႇဢဝ်ၵႂၢမ်းမၼ်းၼၢင်းသေယဝ်ႉ ပၼ်လိၵ်ႈ ၽိတ်ႈပၢင်းၵႂႃႇ ၵူႊမၢၼ်ႈၵူႊမိူင်း ႁႂ်ႈဢွၼ်ၵၼ်မႃး ၶဝ်ႈပွႆး ယႂ်ႇယႂ်ႇၼမ်ၼမ်ၵၼ် ဢယုၵ်ႈဢလၢတ်ႈ ဢမျၢတ်ႈ ဢမ်ႇလိူၵ်ႈဢမ်ႇယူၺ်း ၸဵမ်လဵၵ်ႉၸဵမ် ယႂ်ႇ ၸဵမ်ၼုမ်ႇၸဵမ်ထဝ်ႈဢေႃႈ။ ၼင်ႇႁိုဝ် ၵူၼ်း ဢမျႃးတၵ်းလႆႈ မႃးၶူဝ်ႇမႃးလိုဝ်ႈၼၼ်ႉ မၼ်း ၼၢင်းၸီႇမၢၼ်ႇ တႄႇႁဵတ်းၶဵင်ႇမေႃႈ ၼမ်ႉလူင် လင်႞ဝႆႉသေယဝ်ႉ ၸႂ်ႉပၶျီႇတႅမ်ႈၵႃးပုင်ႇဢၼ် ၸၢပ်ႈသႅင်ႇၸၢတ်ႈတေႃႇ လွင်ႈၶဝ် ၸဝ်ႈၽူဝ်မေး ႁေႃႇၶဝ်ႈဝၼ်းလင် ပႃးမႃးၸိူင်ႉၼင်ႇ ႁူပ်ႉၺႃးၵၼ် ဢိၵ်ႇတင်းၽေးၵျၢမ်ႇမႃႇ ဢၼ်ဢမ်ႇလီဢမ်ႇငၢမ်း ၸွမ်းယႃႉၽျၢၵ်ႈႁဝ်းလႄႈ လၢႆးၸိူင်ႉၼင်ႇႁိုဝ်လႄႈ လႆႈၽၢတ်ႇယၢၼ်ၵၼ်ၵႂႃႇၸိူဝ်းၼၼ်ႉဢေႃႈ။ ၼွၵ်ႈ သေၼၼ်ႉ မၼ်းၼၢင်းသင်ႇလၢတ်ႈဝႆႉ တီႈဢွၼ်ႇ ၸၢႆးၶဝ်လႄႈဝႃႈ ပေႃးထူပ်းႁၼ်သေၵေႃႉသေၵူၼ်း ဢၼ်မႃးယႅၵ်ႉလွမ် တူၺ်းပုင်ႇႁၢင်ႊ ၸၢတ်ႈဢၼ် တႅမ်ႈဝႆႉ တီႈၶဵင်ႇၼမ်ႉၼႆႉ မီးတၢင်းၸႂ်လဵၵ်ႉၸႂ်ၼွႆႉ သေယဝ်ႉ ၼမ်ႉတႃယွတ်ႇ ယွႆႉလႆလူင်းၸိုင် ဢဝ် မႃးသူင်ႇၵမ်းလဵဝ် ဝႃႈၼင်ႇၼႆဢေႃႈ။  မိူဝ်ႈဢၼ် ထိုင် ဝၼ်းပွႆးၼၼ်ႉ ၵူၼ်းၵေႃႉလႂ်သေဢမ်ႇဝႃႈ မႃးယႅၵ်ႉလွမ်တူၺ်းၵႃးပုင်ႇသေယဝ်ႉ ဢွၼ်ၵၼ် ယုၵ်ႉယွင်ႈဢၢမ်းႁွႆးမိုဝ်းသြႃႇပၶျီႇၶဝ်ၼႃႇဢေႃႈ။ လိုၼ်းၼၼ်ႉၸင်ႇ ၶဝ်လႆႈႁၼ် ၵူၼ်းၵေႃႉ႞ ဢၼ် ပႃး တင်းမႃႉႁူဝ်ၶဵဝ်တူဝ်႞သေယဝ်ႉ မႃးၵိၼ်ၼမ်ႉ ၵႃႈတီႈၼၼ်ႉလႄႈ လွမ်တူၺ်းပုင်ႇႁၢင်ႊဢၼ် တႅမ်ႈဝႆႉၼၼ်ႉဢေႃႈ။ မၼ်းၼၼ်ႉၸမ်း မီးတၢင်းဢၼ်တမ်ႇၼွႆႉမွင်ၸႂ်ၼႃႇလူင်လၢင် လႄႈ တူပ်း ဢူၵ်းသေယဝ်ႉ ႁႆႈၵမ်းလဵဝ်ဢေႃႈ။ မိူဝ်ႈၼၼ်ႉ ဢွၼ်ႇၸၢႆးၶဝ်ၵေႃႈ ဢွၼ်ၵၼ် တိုတ်ႉၸၼ်ဢဝ် မၼ်းၵႂႃႇတီႈ ၽၢႆႇၼႃႈသေႉတေႃႇ ၸဝ်ႈမုၼ်ယႂ်ႇ ၶုၼ်ႁေႃၶမ်း ဢိၵ်ႇတင်း သြႃႇမေႃယႃ ဢၼ်လႆႈ ဢရႃႇ ဢိင်ႇသေႉၵႅမ်မိူင်းၼၼ်ႉဢေႃႈ။ သြႃႇမေႃယႃ ၼၼ်ႉ ပေႃးဝႃႈ လႆႈႁၼ်ၸဝ်ႈဢလွင်းမႃႉႁူဝ်ၶဵဝ် ၸိုင် လႅၼ်ႈၵွတ်ႇဢဝ်သေယဝ်ႉ ႁႆႈတေႃႇၵၼ် ဢေႃႈ။ ၵမ်းၼၼ်ႉ ၼၢင်းငိူၵ်ႈ ၼၢင်းၽၢႆး ဢိၵ်ႇ တင်း လုၵ်ႈလၢင်းၶဝ် သုတ်ႉၸမ်သုတ်ႉၸူးသေ ယဝ်ႉ ႁႆႈၼင်ႇၵဝ်ႇဢေႃႈ။ ၵူၼ်းၼမ်ၼႃႇ မီးတၢင်း ဢၼ် ၵႂင်ၸႂ်ယုင်ႈၸႂ်လႄႈ လူလွမ်တူၺ်းၶဝ်ၸဝ်ႈ ယူႇ ၸိူင်ႉၼၼ်ၵွႆးဢေႃႈ။ မိူဝ်ႈၼၼ်ႉသြႃႇမေႃယႃ ဢၼ် ပဵၼ် ၼၢင်းမူဝ်ၶမ်း လုၵ်ႉသေလႄႈ ၼႄမိုဝ်း ႁႂ်ႈ ၵူၼ်းတင်းသဵင်ႈတင်းလူင် တဵတ်ႇယဵၼ်သေ ယဝ်ႉ ၸင်ႇလၢတ်ႈၼႄၶိုၼ်း လွင်ႈတၢင်း ဢၼ် ပဵၼ်မႃး တင်းသဵင်ႈတင်းလူင် ၸိူဝ်းၼၼ်ႉဢေႃႈ။ ၵူၼ်းၵူႊၵေႃႉၵေႃႈ လႆႈမီးတၢင်းဢၼ် သၢၵ်ႈသႃႇ ၼိမ်ၸႂ် သေယဝ်ႉ ၸူမ်းသိူဝ်းမူၼ်ႊပျေႃႇၵၼ်လႄႈယူႇႁူမ်ႈလူၺ်ႈၵၼ်ၵႂႃႇ တေႃႇထိုင် ႁွတ်ႈဝၼ်းသုတ်းဝၼ်းၵွႆၶဝ်ပုၼ်ႉဢေႃႈ။ ၸဝ်ႈဢလွင်းမႃႉႁူဝ် ၶဵဝ်ၵေႃႈ လႆႈပုတ်ႈၶၢမ်ႇၸၢမ်ႇႁၢင်ႈၸၢမ်ႇႁေႃ ၼႂ်း မိူင်းၼၼ်ႉသေယဝ်ႉ ဢုပ်ႉပိူင်ႇၸၢမ်ႇၸႃး ႁူမ်ႈ လူၺ်ႈၵၼ် တင်း ၸဝ်ႈၼၢင်းမူဝ်ၶမ်း၊ ၸဝ်ႈၼၢင်း ငိူၵ်ႈ၊ ၸဝ်ႈ ၼၢင်းၽၢႆး ဢိၵ်ႇတင်း ၸဝ်ႈၼၢင်း ဢွၼ်ႇ ပဵၼ်ဢၼ်ပျေႃႇမူၼ်ႊႁုၼ်ႉဢူၼ် တေႃႇထိုင်တီႈသုတ်း ဢသၢၵ်ႈၶဝ်ၸဝ်ႈပုၼ်ႉဢေႃႈ။

                                            By    

မွင်ႇၸေႃးၽေႇ (လၢႆးၶႃႈ)    https://hsenpai.media (သႅၼ်ပၢႆး)