ဢၢႆႈလဵင်ႉပႄႉ

                                                                                 (႑)

မိူဝ်ႈၵွၼ်ႇပုၼ်ႉ ၵႃႈၼႂ်းမိူင်းလူင် မိူင်း႞ ၸဝ်ႈမုၼ်ယႂ်ႇၶုၼ်ႁေႃၶမ်း ဢိၵ်ႇတင်း ၼၢင်းမိၽရႃး ဢုပ်ႉပိူင်ႇၸၢမ်ႇၸႃးယူႇလႄႈ လုၵ်ႈလၢင်း ဢၼ်တၵ်းပုတ်ႈၶၢမ်ႇၸၢမ်ႇႁေႃၸိုင် ဢမ်ႇမီးသေ ၸဝ်ႈသေပႃးၶႃႈဢေႃႈ။ ပိူဝ်ႈၼႆ ပုင်ႇၼႃးပိင်ႇၺႃႇသိၶဝ်ၸဝ်ႈတင်းလၢႆ ဢမ်ႇၶႂ်ႈႁႂ်ႈ ၸိူဝ်ႉၶိူဝ်းၶဝ်ၸဝ်ႈ လႆႈသုတ်းလႆႈႁၢႆၵႂႃႇၼၼ်ႉ ဢွၼ်ၵၼ်မႃးတၢင်ႇ လဝ်ႊ ပၼ်တၢင်းၵျၢမ်ႇတၢင်းပွင် ႁႂ်ႈၶဝ်ၸဝ်ႈၵႂႃႇ ၵမ်သိၼ်ၼွၼ်းၵျွင်း သုတွင်းယွၼ်းဢဝ်လုၵ်ႈ လၢင်းဢေႃႈ။ ၼင်ႇႁိုဝ် ၶႃႈ မၢၼ်ႈၵူၼ်းမိူင်းတင်းလၢႆ တၵ်းပျေႃႇၼိမ်ၸႂ်ႁင်းၽႂ်ႁင်းမၼ်းၸိုင် ၶဝ်ၸဝ်ႈ ၵေႃႈ ဢမ်ႇထဵင်ပႅတ်ႈ ႁဵတ်းၸွမ်းၵႃႈၼင်ႇဢၼ်ၵူႊၵေႃႉ တိုၵ်းယူင်းၼၼ်ႉဢေႃႈ။ ဢမ်ႇႁိုင်ဢမ်ႇၼၢၼ်း ၼၢင်းမိၽရႃး ႁၼ်ၼႃႈလုၵ်ႈဢွၼ်ႇသေ ယဝ်ႉ ၵိူတ်ႇလဵင်ႉမႃး လုၵ်ႈယိင်းပႃး႞ဢေႃႈ။ မိူဝ်ႈဢၼ် ၸဝ်ႈၼၢင်းဢွၼ်ႇ လႆႈဢသၢၵ်ႈႁႃႈပီႊမႃး ယဝ်ႉၸိုင် ၵူဝ်ပိူၼ်ႈလႆႈမႃးယႃႉမႃးသူၼ်းၸူဝ်း ဢဝ်ၵႂႃႇလႄႈ ၸဝ်ႈႁေႃၶမ်း ၸင်ႇပူင်ဢမိင်ႉၵႃႈတီႈ ၶႃႈၵူၼ်း ႁႂ်ႈဢွၼ်ၵၼ် တႄႇႁဵတ်းႁေႃသဝ်လဵဝ် ပုၼ်ႈ မၼ်းၼၢင်းဢေႃႈ။ ဝၢႆးသေၼၼ်ႉ မၼ်းၸဝ်ႈၸႂ်ႉ ၵူၼ်းထိင်းၼၢင်းတင်းလၢႆ ပႂ်ႉလူပႂ်ႉ တူၺ်းၵူႊၶိင်ႇၶႃႈဢေႃႈ။

ၵႃႈၼႂ်းမိူင်းၸဝ်ႈၼၼ်ႉၵေႃႈ ပူႇသထေး လူင်ၵေႃႉ႞ မီးလုၵ်ႈၸၢႆးမၢဝ်ႇ ဢၼ်လႄႇၸွပ်ႇ ထၢမ်ႁႃ လုၵ်ႈမေးၵူႊတီႈၵူႊလႅၼ်ႊဢေႃႈ။ ၵူၼ်းထိင်းၼၢင်းၵမ်ႈၽွင်ႈ ႁူႉၸၵ်းမိုတ်ႈၵိုဝ်းၵၼ်တင်း လုၵ်ႈၸၢႆးသထေးလႄႈ ၵိၼ်သူးၵိၼ်လၢပ်ႈသေယဝ်ႉ ႁဵတ်းဢွင်ႇသွႆႇ ၸူဝ်းဢဝ်ၸဝ်ႈၼၢင်းၶဝ် ယိုၼ်ႈလိၵ်ႈပၼ်လိၵ်ႈ ဝႆႉၸူႉဝႆႉၸူဝ်းဢေႃႈ။ မၢင်ၽဝ်ႇမၢင်ပွၵ်ႈ သွင်ၽၢႆႇသွင်ပႃႈ ၶဵၼ်းၵၼ်ၵႂႃႇလႄႇ ၵႂႃႇလဵၼ်ႈ ၵႃႈတီႈသူၼ်ဢူးယဵၼ်ႇၼၼ်ႉဢေႃႈ။ မီးဢၢႆႈယၢၵ်ႈၽၢၼ်ၵေႃႉ ႞ ႁဵတ်းသုမ်ႉႁဵတ်းသွင်း ပႂ်ႉလူပႂ်ႉထိင်းလဵင်ႉပႄႉ ၸဝ်ႈႁေႃၶမ်းယူႇဢေႃႈ။ ၸဝ်ႈၼၢင်းႁေႃသဝ်လဵဝ် ဢိၵ်ႇတင်းလုၵ်ႈၸၢႆး သထေး မႃးလဵၼ်ႈမႃးလႄႇ ၵႃႈၼႂ်းသူၼ်ဢူးယဵၼ်ႇ မိူဝ်ႈလႂ်သေဢမ်ႇဝႃႈ ဢၢႆႈလဵင်ႉပႄႉၼၼ်ႉ တဵတ်ႇတဵတ်ႇၸွမ်းလွမ်ၸွမ်းၶျွင်းသေယဝ်ႉ ထွမ်ႇငိၼ်း ၵႂၢမ်း ၵႃႊဢၼ် ၶဝ်လၢတ်ႈၵၼ်ၸႃၵၼ်ဢေႃႈ။ ဢၢႆႈလဵင်ႉပႄႉ ငိၼ်းၵျိူၵ်ႈႁၵ်ႉပႅင်းၼၢင်းလႄႈ ၸႂ်ၸပ်းၸႂ်ၸွႆး ၶႂ်ႈလႆႈမၼ်းၼႃႇ ထၢၼ်ႈပေႃးလိုမ်းပွႆႇပႄႉမၼ်းဢွၵ်ႇၶွၵ်ႈ ဢတႂၢၵ်ႈပွတ်းၼႂ် ၼႂ်႞ဢေႃႈ။ ပေႃးဝႃႈ ၵၢင်ဝၼ်းတဵင်ႈယဝ်ႉ ၸင်ႇၶုၵ်းၸႂ်လႆႈလႄႈ ၼႅတ်ႈၵႂႃႇပွႆႇဢွၵ်ႇၶွၵ်ႈဢေႃႈ။ ပႄႉတင်းလၢႆ တွင်ႉ မႆႈသႆႈႁွၼ်ႉ တေႃႇထိုင်လႅၼ်ႈဢွၵ်ႇၵႂႃႇၵႃႊပဵၼ်ဢေႃႈ။ ပႄႉတူဝ်႞ လႅၼ်ႈၶဝ်ႈၵႂႃႇၵိၼ် ၵႃႈၼႂ်းသူၼ် ပူႇသထေးလူင်လႄႈ ပူႇသထေးလူင် ၸႂ်လမ်ၼႃႇ သေယဝ်ႉ ပွင်ႉထႃႉဢၢႆႈလဵင်ႉပႄႉ ဢၢင်ႈတၵ်းမၢပ်ႇ တၵ်းမႂ်မၼ်းဢေႃႈ။ မၼ်းၸင်ႇၶိုၼ်းလၢတ်ႈဝႃႈ လီယဝ်ႉလုင်း႟ ၶႂ်ႈမႂ်ၵေႃႈ မႂ်သေၵမ်းၶႃႈ ပုၼ်ႈတႃႇလုင်းႁဝ်းၶႃႈတႄႉ ဢမ်ႇယၢပ်ႇသေဢိတ်းၶႃႈ၊ လုၵ်ႈၸၢႆးလုင်းႁဝ်းၶႃႈ လၵ်ႉလဵၼ်ႈၼၢင်း ႁေႃသဝ်လဵဝ်ၼၼ်ႉ ၵဝ်ၶႃႈတေမိူဝ်းလဝ်ႊၸဝ်ႈႁေႃၶမ်းၵွႆး ဝႃႈၼႆဢေႃႈ။ မိူဝ်ႈ ၼၼ်ႉ ၵမ်းလဵဝ် ပူႇသထေးလူင် ၶိုၼ်းၶျေႃးဝွၼ်း ဢၢႆႈလဵင်ႉပႄႉသေယဝ်ႉ မွၼ်ငိုၼ်းမွၼ်ၶမ်း ဢူတ်းသူပ်းဢူတ်းပၢၵ်ႇမၼ်းဢေႃႈ။

(႒)

ထိုင်မႃးပွၵ်ႈ႞ ၼၢင်းႁေႃသဝ်လဵဝ် ဢိၵ်ႇတင်းလုၵ်ႈၸၢႆးသထေး ႁူပ်ႉထူပ်းၵၼ် ထႅင်ႈလႄႈ ၶဵၼ်းၵၼ်ပၼ်ဢၶိင်ႇၼႃႇရီႇ ဢၢင်ႈတၵ်းလၵ်ႉၵၼ် ဢွၵ်ႇပၢႆႊဢေႃႈ။ ၶူဝ်းၼုင်ႈတၢင်းမႆႊ ဢၼ်ထုၵ်ႇ ၼုင်ႈထုၵ်ႇပႃးမျူဝ်းၸိူင်ႉၼင်ႇႁိုဝ်ၵေႃႈ လၢတ်ႈ ၼႄၵၼ်ဝႆႉဢေႃႈ။ ဢၢႆႈလဵင်ႉပႄႉၵေႃႈ လၵ်ႉလွမ် ထွမ်ႇမၢတ်ႈတွင်းဝႆႉ ၵႂၢမ်းၶဝ်ၵူႊၶေႃႈသေယဝ်ႉ ဢွၵ်ႇၵႂႃႇၸူးႁိူၼ်းပူႇသထေးလူင် ႁႂ်ႈလႆႈယွၼ်း ႁိမ်ၶူဝ်းလဵင်း ဢၼ်လုၵ်ႈၸၢႆးမၼ်း ဢၢင်ႈတၵ်းပႃးဢဝ်ၵႂႃႇၸိူဝ်းၼၼ်ႉဢေႃႈ။ ပိၵ်ႉသမ်ႉ ပူႇသထေး ဢမ်ႇၶႂ်ႈပၼ်ႁိမ်ပၼ်ၼုင်ႈသၵေေႃႈ ပိူဝ်ႈ ဢၼ်လႆႈၵူဝ်မၼ်း တၵ်းမိူဝ်းသေႃႇမိူဝ်းလဝ်ႊ ၸဝ်ႈႁေႃၶမ်း လွင်ႈလုၵ်ႈၸၢႆးမၼ်းလႄႈ ၸိူင်ႉ ၼင်ႇဢၼ်ဢလူဝ်ႇမၼ်းမီးၼၼ်ႉ ပၼ်ၵႂႃႇ သိူဝ်ႈ လမ် ၵူၼ်ၶွၼ်ႇ ၶဵၼ်းႁူဝ်ၶွင်ႇ သၢႆဢႅဝ်ၶဵဝ် ဢိၵ်ႇ တင်းမႃႉၵမ်ႇ လုၵ်ႈၸၢႆးမၼ်း ၶီႇယူႇသေႇသေႇ ၼၼ်ႉဢေႃႈ။ ပေႃးဝႃႈ ထိုင်ၶိင်ႇတဵင်ႈၶိုၼ်းၸၢႆႉမႃး လိူၼ်ဢွၵ်ႇၵေႃႈ လႅင်းမူဝ်းၵႄႇဝႆႉၼၼ်ႉ ဢၢႆႈလဵင်ႉ ပႄႉ ၽၢမ်းပုင်ႇႁဵတ်းႁၢင်ႊလုၵ်ႈၸၢႆးသထေးသေယဝ်ႉ မႃးပွႆႇသဵင် ႁွင်ႉပၼ်ဢၶျၢၵ်ႈၼၢင်း ႁႂ်ႈလူင်း မႃးၶၼ်ၶၼ်ၽႂ်းၽႂ်းဢေႃႈ။ ၸဝ်ႈၼၢင်းၵေႃႈ ၵိူဝ်း ထၢင်ႇဝႃႈ ပဵၼ်ၸူႉရၢင်းမၼ်းၸဝ်ႈလႄႈ ၶီႇမႃႉ ၸွမ်းၵႂႃႇဢၢႆႈလဵင်ႉပႄႉၼၼ်ႉ တေႃႇထိုင်ႁွတ်ႈၽႅဝ်ထိုင်ၵႃႈထိူၼ်ႇ ဢၼ်ႁၢမ်ႉၵႆၵၼ် တင်းမၢၼ်ႈၵူၼ်းတၢၼ်ႇတၢၼ်ႇၼၼ်ႉဢေႃႈ။

ပေႃးဝႃႈၼၢင်းႁၢႆၵႂႃႇယဝ်ႉၸိုင် ၸဝ်ႈႁေႃၶမ်း ပူင်ဢမိင်ႉၵႃႈတီႈပူဝ်ႇပႃႇလုၵ်ႈသိုၵ်းၼမ်ၼႃႇ ယဵပ်ႇထိူၼ်ႇယဵပ်ႇၶိူဝ်း ၸွမ်းႁႃၵူႊတီႈဢေႃႈ။ လုၵ်ႈၸၢႆးသထေးၵေႃႈ ပႃးၸွမ်းၶဝ်ၵႂႃႇဢေႃႈ။ ၵူၺ်းၵႃႈ ဢမ်ႇထူပ်းဢမ်ႇႁၼ် သေတီႈသေတၢင်းလႄႈ ၶိုၼ်းမႃးတၢင်ႇလဝ်ႊ ၸဝ်ႈႁေႃၶမ်း လဝ်ႊလၢတ်ႈ ဝႃႈ ၼၢင်းပၢႆႊၸွမ်းဢၢႆႈလဵင်ႉပႄႉယဝ်ႉ ဝႃႈၼႆ ဢေႃႈ။ ၸဝ်ႈႁေႃၶမ်း ဢမ်ႇၸၢင်ႊလၢတ်ႈဝႃႈၸိူင်ႉ ၼင်ႇႁိုဝ်လႄႈ ၸိၵ်ႈၵူးၶမ်ၸႂ်ယူႇၸိူင်ႉၼၼ်ၵွႆးဢေႃႈ။ ၽွင်းမိူဝ်ႈဢၼ် ၸွမ်းတၢင်း လတ်းၶဝ်ႈႁူၺ်ႈယႂ်ႇလွႆလူင်ၵႂႃႇယူႇၸိုင် ဢၢႆႈလဵင်ႉပႄႉ ထၢမ် ၼၢင်းလႄႈဝႃႈ ၼႂ်းမိူင်းသူၼႆႉ သူႁၵ်ႉၽႂ် သူၸင်း ၽႂ်ၼႃႇသေပိူၼ်ႈၼၼ်ႉ လၢတ်ႈၼႄႁဝ်းသေ ဢိတ်း႞လူး ဝႃႈၼႆဢေႃႈ။ ၼၢင်းၵေႃႈၶိုၼ်းမွၵ်ႇ လၢတ်ႈဝႃႈ ႁဝ်းႁၵ်ႉသူၼႃႇ ထၢၼ်ႈပေႃးလၵ်ႉပၢႆႊ ၸွမ်းသူမႃးယဝ်ႉ ဢၼ်ႁဝ်းၸင်းၼႃႇၼၼ်ႉ ပဵၼ် ဢၢႆႈလဵင်ႉပႄႉႁႃႈပၢၵ်ႇ ၸဝ်ႈဢူႈၶမႄးတေႃႇႁဝ်းၵွႆး ဝႃႈၼႆဢေႃႈ။ မိူဝ်ႈဢၼ်ၾႃႉပၢင်ႇမိူင်းလႅင်းမႃးၸိုင် ၸဝ်ႈၼၢင်းၵေႃႈ ဝၢႆႇတူၺ်းတၢင်းလင်သေယဝ်ႉ လႆႈႁၼ်ဢၢႆႈလဵင်ႉပႄႉ ၽၢမ်းပုင်ႇႁဵတ်းလုၵ်ႈၸၢႆးသထေးၸွမ်းမႃးဢေႃႈ။ မၼ်းၼၢင်းၵေႃႈ ၸႂ်လမ် တေႃးသႃႉ ဢွၵ်ႇၼႃႇသေယဝ်ႉ ထႃႉလႃႇဢၢႆႈလဵင်ႉ ပႄႉၼၼ်ႉလႄႈဝႃႈ ဢၢႆႈမိူၵ်ႈ မႂ်းလႅၼ်ႁွင်ႉၵဝ်မႃး ႁဵတ်းသင် ၵဝ်ဢမ်ႇၵျိူၵ်ႈဢမ်ႇႁၵ်ႉမႂ်း ၵဝ်ၶၢၼ်ႉ ႁၼ်ၶၢၼ်ႉလၢတ်ႈတေႃႇမႂ်းၼႃႇ မႂ်းမိူဝ်း သူင်ႇၵဝ် ၶိုၼ်းတီႈႁၢင်ႈတီႈႁေႃလႃႈ ဝႃႈၼင်ႇၼႆဢေႃႈ။ ဢၢႆႈလဵင်ႉပႄႉၵေႃႈ မွၵ်ႇလၢတ်ႈဝႃႈ တၢင်းႁိူၼ်းၵေႃႈပဵၼ်ဢၼ်ၵႆၼႃႇယဝ်ႉ မိူဝ်းၶိုၼ်းၵေႃႈ သူလွတ်ႈ တၢင်းဢၼ်ပိူၼ်ႈ သေႉသွမ်းသမ်ႇမုၵ်ႈ ဢမ်ႇၸႂ်ႈ၊ ဢမ်ႇၸၢင်ႊႁဵတ်းၸိူင်ႉၼင်ႇႁိုဝ်ယဝ်ႉလႄႈ ဝႆႉၸႂ် ႁၵ်ႉၵၼ် ဢဝ်ၵၼ်ဝႃႈ ပႃးၵၼ်ပဵၼ် ႁဵတ်းၽူဝ် ႁဵတ်းမေးၵၼ်လႃႈႁဝ်း ဝႃႈၼင်ႇၼႆဢေႃႈ။ ဝၢႆး သေၼၼ်ႉ ၶဝ်ႁွတ်ႈၵႂႃႇၵႃႈတီႈ မႆႉႁုင်းလူင်တူၼ်ႈ႞ လႄႈ လူင်းလိုဝ်ႈႁူမ်ႈၶျႃးပၢင်ယူႇဢေႃႈ။

(႓)

ပိူဝ်ႈဢၼ်ၸဝ်ႈၼၢင်းဢမ်ႇယၢမ်ႈၵႂႃႇတႃႈၵႂႃႇတၢင်းလႄႈ ပဵၼ်ဢၼ်ႁိူဝ်ႉၼူၼ်းဢူၼ်ႈၸႂ်ၼႃႇ ၵွႆးဢမ်ႇၵႃး ငိၼ်းတွင်ႉမႆႈၶဝ်ႈၼႃႇဢေႃႈ။ မၼ်းၼၢင်းၵေႃႈ ပွႆႇၸႂ်ႉဢၢႆႈလဵင်ႉပႄႉ ၵႂႃႇႁႃသိုဝ်ႉၶဝ်ႈ ၽၵ်းဢေႃႈ။ မိူဝ်ႈၼၼ်ႉၵမ်းလဵဝ် ဢၢႆႈလဵင်ႉပႄႉ ပတ်ႉၶႅပ်းလႅၼ်းၶႃ ဢွၵ်ႇၵႂႃႇႁႃသိုဝ်ႉႁႃသၢႆႇ ၶဝ်ႈၼမ်ႉတၢင်းၵိၼ်မႃးဢေႃႈ။ ပေႃးဝႃႈ မၼ်းႁွတ်ႈၽႅဝ် ၶိုၼ်းမႃးယဝ်ႉၸိုင် ၼၢင်းၵေႃႈ လၢတ်ႈလႄႈဝႃႈ ပေႃးမႂ်းမီးၺၢၼ်ႇမေႃႁဵတ်းႁႂ်ႈၵဝ်လၢတ်ႈတေႃႇမႂ်း ၵႂၢမ်းသၢမ်ၶေႃႈၵွႆးၸိုင် ၵဝ်တၵ်းၶၢမ်ႇႁဵတ်းမေးမႂ်းယဝ်ႉ ဝႃႈၼႆဢေႃႈ။ ဢၢႆႈလဵင်ႉပႄႉၵေႃႈ ဢမ်ႇၶိုၼ်း လၢတ်ႈၵႂၢမ်းသေၶေႃႈသေၵမ်း ၸၵ်ႉဢဝ်ၵဵင်းဢၼ် မီးၶႃသွင်ၽၢႆႇ တမ်းၼိူဝ်လိၼ်သေယဝ်ႉ ဢဝ်မေႃႈ ၶဝ်ႈတၢင်ႇသႂ်ႇ ၵႃႈၼိူဝ်မၼ်းဢေႃႈ။ မေႃႈပိၼ်ႈတူၵ်း ၵဵင်းလႄႈ ၾႆးမွတ်ႇၵႂႃႇဢေႃႈ။ ၾႆးမွတ်ႇယဝ်ႉ သမ်ႉ ၶိုၼ်း သႂ်ႇထႅင်ႈ ႁဵတ်းၸိူင်ႉၼင်ႇၼၼ်ယူႇတိၵ်း တိၵ်းလႄႈ ၼၢင်းတွင်ႉမႆႈၶဝ်ႈၸႂ်လမ်သေယဝ်ႉ လၢတ်ႈဝႃႈ ဢၢႆႈငိူဝ်ႈငႃႉ မႂ်းတေႁဵတ်းႁိုဝ်တင်ႈမေႃႈ ၶဝ်ႈ ၼိူဝ်ၵဵင်းသွင်ၶႃ ဝႃႈၼႆဢေႃႈ။ မၼ်းၵေႃႈ ဢမ်ႇတွပ်ႇဢမ်ႇလၢတ်ႈဝႃႈၵႃႈသင်၊ မႄးဢဝ်မၢၵ်ႇ ႁိၼ် ၶုသႂ်ႇၵဵင်းမၼ်းသေလႄႈ တင်ႈမေႃႈ ၶဝ်ႈယူႇ ၵွႆးဢေႃႈ။ မိူဝ်ႈဢၼ်မေႃႈၶဝ်ႈလိူတ်ႇမႃး ပုၼ်းသႂ်ႇ ၾႆးယူႇၸိုင် မၼ်းလႄႇမဝ်းႁႃၵၢၵ်ႇ မၼ်းဢေႃႈ။ ၾႆးမွတ်ႇၵႂႃႇထႅင်ႈလႄႈ ၼၢင်းတွင်ႉမႆႈၶဝ်ႈ ၸႂ် လမ်သႆႈၵမ်ႇသေယဝ်ႉ ႁိုတ်းႁၢတ်း မၼ်းဝႃႈ ဢၢႆႈ ၸိုင်မႂ်းပေႉငိူဝ်ႈ ဢဝ်ၵၢၵ်ႇၼဵပ်းဢႅင်ႈၼဵပ်းဢႅဝ်ယူႇသေယဝ်ႉ မဝ်းႁႃၸိူင်ႉၼႆ ၵဝ်ဢမ်ႇတွၼ်ႉႁၼ် လႃးလႃး ဝႃႈၼႆဢေႃႈ။ မၼ်းၵေႃႈ ဢွမ်ႇမေႃႈၶဝ်ႈ သေယဝ်ႉ ဢၢင်ႈတၵ်းၶူဝ်ႈၶႆႇၵႆႇလႄႈ ဢဝ်ၶဵမ်ၵွင်ႉ သွႆႁႃၶႆႇၵႆႇ ႁႃၵႂႃႇႁႃၶိုၼ်း ဢမ်ႇႁၼ်လႄႈ ပွင်ႉပွင်ႉ ထႃႉထႃႉယူႇၸိူင်ႉၼၼ်ဢေႃႈ။ ၼၢင်းၵေႃႈ တွင်ႉ မႆႈၶဝ်ႈၼႃႇ ႁွင်ႉလၢတ်ႈဝႃႈ ဢၢႆႈ႟ ၸူဝ်ႈပၢၼ်ပူႇ မႂ်းပေႃႈမႂ်းၵေႃႈ ၶႆႇၵႆႇဢမ်ႇတွၼ်ႉမီးငိူၼ်ႈသေပွၵ်ႈၵွႆး ဝႃႈၼႆဢေႃႈ။ ၵမ်းၼၼ်ႉ ဢၢႆႈလဵင်ႉပႄႉ ၸင်ႇ လႅၼ်ႈၵႂႃႇၸူး ၼၢင်းလႄႈ လၢတ်ႈဝႃႈ ၵႂၢမ်းသၢမ် ၶေႃႈၵေႃႈၸေးယဝ်ႉ ၼွင်ႉၶမ်းလဝ်းမေးႁဝ်း႟ မႃး လႄႈ ႁဝ်းၵႂႃႇၵိၼ်ၶဝ်ႈ ဝႃႈၼႆဢေႃႈ။

မိူဝ်ႈၼၼ်ႉ ၼၢင်းႁေႃသဝ်လဵဝ် ၸင်ႇမႃး ၸိၵ်ႈၵူးဝူၼ်ႉၸႂ်ဝႃႈ ဢၢႆႈလဵင်ႉပႄႉၼႆႉ ၵူၼ်းၸလိူဝ်ႈၸလႃႈ ဢမ်ႇၸႂ်ႈ ၸႂ်သၽေႃးၵေႃႈလီ ၺၢၼ်ႇၵေႃႈမီး မၼ်းထိူၵ်ႈပဵၼ် တူၼ်ႈၵၢမ်ႇၵဝ်ယူႇ ဝႃႈၼႆသေယဝ်ႉ ယွၼ်းတွင်းပၢၼ်ႇ ဢၢႆႈလဵင်ႉပႄႉ ဢေႃႈ။ ဢၢႆႈလဵင်ႉပႄႉၵေႃႈ လၢတ်ႈဝႃႈ လီယဝ်ႉ ၼၢင်း႟ ႁဝ်းဢမ်ႇပၼ်ဢပႅတ်ႈၵႃႈသင်တီႈသူ ဝႃႈၼႆဢေႃႈ။ ဝၢႆးသေၼၼ်ႉ ၶဝ်ပႃး ၵၼ်ဢွၵ်ႇ ၵႂႃႇႁွတ်ႈၽႅဝ် တီႈမၢၼ်ႈပိူၼ်ႈမိူင်းပိူၼ်ႈဢေႃႈ။ ၶိင်ႇ မိူဝ်ႈဢၼ်ၶဝ် ၼွၼ်းလိုဝ်ႈလပ်းယူႇ ၵႃႈတီႈပၢင် လိုဝ်ႈတီႈ႞ၸိုင် မူးမၢတ်ႈၽွင်းမိူင်း မိူင်းၼၼ်ႉ ဢွၼ်ၵၼ်ပွႆႇမႃႉရထႃး သႂၢင်းၽုၵ်ႉလႄႇႁႃ ၸဝ်ႈလီ ၶုၼ်မၢၼ်ႇ ပုၼ်ႈတႃႇသိုပ်ႇၶၢမ်ႇၸၢမ်ႇႁေႃၶမ်းမိူင်းၶဝ်ဢေႃႈ။ ၶုၼ်ႁေႃၶမ်းမိူင်းၶဝ် ၼွၼ်းၽႄးယဝ်ႉ လႄႈ ဢမ်ႇမီးလုၵ်ႈလၢင်း ဢၼ်တၵ်းပုတ်ႈၶၢမ်ႇ ၸၢမ်ႇႁၢင်ႈၸၢမ်ႇႁေႃၶဝ်ဢေႃႈ။ ရထႃးသႂၢင်း ၽုၵ်ႉၵေႃႈ ၶဝ်ႈတီႈ႞ဢွၵ်ႇတီႈ႞သေယဝ်ႉ ၵမ်း လိုၼ်းလင်သုတ်း မႃးသိူၵ်ႈယူႇၵႃႈတီႈ ဢၼ်ဢၢႆႈ လဵင်ႉပႄႉ ဢိၵ်ႇတင်းမေးမၼ်း ၸဝ်ႈၼၢင်းႁေႃ သဝ်လဵဝ် ၼွၼ်းလိုဝ်ႈလပ်းၵၼ်ယူႇ ၼၼ်ႉဢေႃႈ။ မူးမၢတ်ႈၶဝ်ၵေႃႈ ႁႆႇပုင်ႇတွင်ႇၵွင်မွင်း လႄႈ ၽွမ်ႉ ၵၼ်ႁွင်ႉပၼ် ဢေႃးပႃႇထေႃးပၼႃႇ ယွင်ႈယေႃး ၸဝ်ႈမႂ်ႇၶုၼ်မႂ်ႇၶဝ်ဢေႃႈ။ ဝၢႆးသေၼၼ်ႉ ၶဝ်ဢွၼ် ၵၼ်ၽိတ်ႈပၢင်းႁွင်ႉဢဝ်ၶဝ်ၸဝ်ႈၽူဝ်မေး မိူဝ်း ၸၢမ်ႇႁေႃၶမ်း ႁဵတ်းၸဝ်ႈၶဝ်ၶုၼ်ၶဝ်သေဢေႃႈ။ သတၢင်းသဵင်ၶၢဝ်ႇၶဝ်ၸဝ်ႈၽူဝ်မေးၵေႃႈ လႆႈႁွတ်ႈ ၽႅဝ်ထိုင်မိူဝ်းၵႂႃႇ ၵႃႈတီႈမၢၼ်ႈမိူင်း ၸဝ်ႈဢူႈၶမႄး တေႃႇဢေႃႈ။ ဢၢႆႈလဵင်ႉပႄႉၼၼ်ႉၸမ်း မီးၵၢမ်ႇ မီးမုၼ်လႄႈ လႆႈပဵၼ်ၽူဝ် ၼၢင်းႁေႃသဝ်လဵဝ်ၵွႆး ဢမ်ႇၵႃး လႆႈဢုပ်ႉပိူင်ႇမၢၼ်ႈမိူင်း ပဵၼ်ၸဝ်ႈထွတ်ႈ ၸဝ်ႈမျၢတ်ႈဢေႃႈ။