ထုၵ်ႇလီၽိုၵ်း ႁႂ်ႈမီးတၢင်းယၢမ်ႈ လူလိၵ်ႈ

                

"ၵူၼ်းလူလိၵ်ႈၵႈၵေႃႉ ဢမ်ႇဢွင်ႇမၢၼ်ၼႆသေတႃႉၵူၼ်းဢွင်ႇမၢၼ်ၵူႈၵေႃႉတႄႉ ပဵၼ်ၵူၼ်းသူင်လူလိၵ်ႈ"    (ဢူးတၢၼ်ႉ ၽူႈၼမ်းၼႂ်း ၵူႈလွင်ႈလွင်ႈ မုၵ်ႉၸုမ်းၸၢတ်ႈၸိုင်ႈလုမ်ႈၾႃႉ ၵေႃႉထူၼ်ႈ 3     ၵူၼ်းဢွင်ႇမၢၼ်ၵူႈၵေႃႉၼၼ်ႉ လူလိၵ်ႈၼႆယဝ်ႉ။

ၵူၼ်းလူလိၵ်ႈၼႆႉ ထိုင်တီႈတေဢမ်ႇဢွင်ႇမၢၼ်ၵေႃႈၶဝ်တေပဵၼ်ၵူၼ်းႁၢင်ႈလီၼႂ်းၵႄႈၵၢင်ၵူၼ်းၼမ်လႄႈ ႁူဝ်ၸႂ်ၶဝ်ေၵႃႈ တေႁၢင်ႈလီဝႆႉ။ 

ပႆၢးဝူၼ်ႉၶဝ်ေတသုင်၊ မေႃထတ်းသၢင်ႈ လွင်ႈၽိတ်းလွင်ႈထုၵ်ႇ၊ မေႃပွင်ႇၸႂ်၊ မေႃယၵ်ႉႁၼ်လၢႆၸဵင်ႇလၢႆၽၢႆႇသေတႅပ်းတတ်းႁဵတ်းသၢင်ႈ။ မေႃလၢတ်ႈၸႃလႄႈ မိူဝ်ႈလၢတ်ႈၸႃၵေႃႈ တေမီးလွၼ်ႉမီးၵႅၼ် တေပဵၼ်လွင်ႈယွမ်းႁပ်ႉလႆႈ။

ၶိူဝ်းၵူၼ်းဢၼ်ဢွင်ႇမၢၼ်ၼၼ်ႉ ပဵၼ်ၶိူဝ်းၵူၼ်း ဢၼ်လူလိၵ်ႈယဝ်ႉ။ ၶိူဝ်းတႆးႁဝ်းၵေႃႈ ထုၵ်ႇလီလူလိၵ်ႈၼမ်ၼမ်၊ ပေႃးမီးၵူၼ်းလူလိၵ်ႈၼမ် ၵူၼ်းမီးတၢင်းႁူႉႁဝ်းတေၼမ်။ ပေႃးၵူၼ်းမီးတၢင်းႁူႉၼမ်ၸူႉတုမ်ၵၼ်ဝႆႉၼႂ်းၸိူဝ်းၶိူဝ်းလႂ် မုၵ်ႉၸုမ်းလႂ်ေၵႃႈ ၶိူဝ်းၼၼ်ႉတေၶိုၼ်ႈယႂ်ႇယဝ်ႉ။

ၶေႃႈထၢမ် ၵွပ်ႈသင် ပပ်ႉလိၵ်ႈတႆးႁဝ်း ဢမ်ႇၼမ်ၼၼ်ႉၵွပ်ႈဝႃႈ ၵူၼ်းလူလိၵ်ႈႁဝ်းဢမ်ႇၼမ်ၼၼ်ႉၵူၺ်း။ ၵူၼ်းတႅမ်ႈလိၵ်ႈၵူႈၵေႃႉၼၼ်ႉ ၵွပ်ႈဝႃႈ မၼ်းလုၵ်ႉမႃးတီႈၵူၼ်းလူလိၵ်ႈ။

ၸဝ်ႈၵဝ်ႇ ထုၵ်ႇလီၽိုၵ်းႁႂ်ႈမီးတၢင်းယၢမ်ႈလူလိၵ်ႈလႄႈထုၵ်ႇလီၽိုၵ်းပၼ် ႁႂ်ႈလုၵ်ႈဢွၼ်ႇႁဝ်း မီးတၢင်းယၢမ်ႈလူလိၵ်ႈပႃး၊ သိုဝ်ႉပပ်ႉ ဢပုမ်ႇသေ လူပၼ်ၶဝ် ႁႂ်ႈၶဝ်ထွမ်ႇ၊ ပေႃးၶဝ်မေႃလိၵ်ႈယဝ်ႉ ႁႂ်ႈၶဝ်လူသေ ၵေႃႉပဵၼ်ပေႃႈမႄႈ လုင်း ပႃႈၼႆၢး ပီႈဢႆၢႈ ပီႈၼၢင်း ဢၼ်ၵွင်ႉၵႆၢႇၸွမ်း ၸွႆႈထွမ်ႇပၼ် ၸိူဝ်းၼႆႉ။ 

ၵူၼ်းႁဝ်းၼႆႉ ဢမ်ႇမီးၽႂ် ဢမ်ႇၶႂ်ႈမၢၵ်ႈမီး ၶိုၼ်ႈယႂ်ႇၵူၺ်းၵႃႈ ၵူၼ်းဢၼ်ၸႂ်ႉတိုဝ်းၶၢဝ်းယၢမ်း ႁဵၼ်းႁူႉလွင်ႈမႂ်ႇမႂ်ႇသမ်ႉ ဢမ်ႇပေႃးမီး။    ဢမ်ႇမီးၶၢဝ်းယၢမ်း ဢၼ်ဝႃႈၼၼ်ႉ ပဵၼ်ၵွပ်ႈဢမ်ႇပၼ် ၶၢဝ်းယၢမ်းလႆႈၵူၺ်း။ ဢမ်ႇမီးၽႂ် ၵၢၼ်သုၵ်ႉယူႇတၢင်း 24 ၸူဝ်ႈမူင်း။    ၼိုင်ႈဝၼ်းၼိုင်ႈဝၼ်းၼၼ်ႉ ထုၵ်ႇလီပၼ်ၶၢဝ်းယၢမ်း လဵပ်ႈႁဵၼ်းႁူႉလွင်ႈမႂ်ႇမႂ်ႇ တီႈဢေႇသုတ်း ၼိုင်ႈၸူဝ်ႈမူင်း။

မိူဝ်ႈတေႇတႄႉ တေလီၶၢၼ်ႉယူႇ၊ မၼ်းတေလႆႈၽိုၵ်းဢဝ်၊ ၽိုၵ်းႁႂ်ႈမီးတၢင်းယၢမ်ႈ၊ တၢင်းယၢမ်ႈၼိုင်ႈဢၼ် ၼႆႉ ၸႂ်ႉၶၢဝ်းယၢမ်း 21 ဝၼ်း (သၢမ်ဝူင်ႈ) သေ သၢင်ႈမၼ်းလႆႈ ၼႆယဝ်ႉ။

21 ဝၼ်းၼႆႉ ၸၢမ်းပၼ်ၶၢဝ်းယၢမ်းၼိုင်ႈၸူဝ်ႈမူင်းသေ လူလိၵ်ႈတူၺ်း၊ ေပႃးႁဵတ်းလႆႈ 21 ဝၼ်းယဝ်ႉ သိုပ်ႇႁဵတ်းၵႂႃႇထႅင်ႈ 90 ဝၼ်း (သၢမ်လိူၼ်)၊ပေႃးတဵမ်သၢမ်လိူၼ်ယဝ်ႉ မၼ်းတေပဵၼ်ပိူင်ယူႇသဝ်းၸူဝ်ႈပၢၼ်တူဝ်ၵဝ်ႇၵႂႃႇ၊ ၽႆၢႇၽူႈၶူၼ်ႉၶႂႃႉၶဝ် လဵပ်ႈႁဵၼ်း တႅမ်ႈတၢင်ႇၽိုၼ်ဝႆႉ ၸိူင်ႉၼႆ။ 

ပေႃးၶႂ်ႈလႅၵ်ႈလႆၢႈၸူဝ်ႈပၢၼ်ၼႆ လူဝ်ႇလႅၵ်ႈလႆၢႈပႆၢးဝူၼ်ႉတႃႇလႅၵ်ႈလႆၢႈပႆၢးဝူၼ်ႉၼၼ်ႉ တေလႆႈလူလိၵ်ႈ၊ တေလႆႈထွမ်ႇ ၽူႈမီးတၢင်းႁူႉၶဝ်လၢတ်ႈ၊ တေလႆႈလဵပ်ႈႁဵၼ်းတီႈတူင်ႇဝူင်းႁိမ်းႁွမ်းႁဝ်းၸိူဝ်းၼႆႉ ၼႆယဝ်ႉ။ ႁႂ်ႈၵူႈၵေႃႉ ၽိုၵ်းတၢင်းယၢမ်ႈလူလိၵ်ႈလႆႈသေၵမ်း။

>>>>>   #မွၼ်းၶိူဝ်း