လွင်ႈၶွင်ႉၶမ်ၸႂ်ဢၼ်ၶႂ်ႈပိုတ်ႇ

 

ၵၢၼ်လုၵ်ႉၽိုၼ်ႉတႆးၼႆႉ တေသိုပ်ႇယၢင်ႈၵႂႃႇၸွမ်းသဵၼ်ႈတၢင်းယိူင်းမၢႆ ႁႂ်ႈထိုင်တီႈၸိူင်ႉၼင်ႇႁိုဝ်?

ဢၼ်ယၢမ်ႈႁဵတ်းသၢင်ႈမႃးၼၼ်ႉၸွင်ႇသမ်ႉမႅၼ်ႈငၢမ်ႇ လွင်ႈဢၼ်တီႈႁဝ်းၶႂ်ႈႁွတ်ႈၼၼ်ႉလႆႈယူႇႁိုဝ်?

ၸူဝ်ႈပၢၼ်မၢင်ၸိူဝ်းပေႃးၼွၼ်းလပ်းလိုမ်းတိုၼ်ႇၵႂႃႇပႅတ်ႈၸိူဝ်းႁဝ်းယဝ်ႉ ၵၢၼ်လုၵ်ႉၽိုၼ်ႉၶၢဝ်းယၢဝ်းၼႆႉ ႁႅင်းၸႂ်ၵေႃႈသဵင်ႈႁၢႆၵႂႃႇၸွမ်းယဝ်ႉႁိုဝ် မၢင်ၸိူဝ်းဢမ်ႇမီးတၢင်းမုင်ႈမွင်းလႄႈ ယွမ်းယဵၼ်းပဵၼ်ပိူၼ်ႈၵႂႃႇၵေႃႈမီးၼမ် ။

ၸဵမ်ၵၢၼ်သင်ၵၢၼ်လႂ်ၵေႃႈႁဝ်းၵတ်ႉၶႅၼ်ႇယူႇ ၵူၺ်းၵႃႈမၼ်းပဵၼ်ၵတ်ႉၽႂ်မၼ်း ၶႅၼ်ႇၽႂ်မၼ်းလႄႈ ဢမ်ႇၶဝ်ႈတၢင်းတိုဝ်းတႃႇၵၢၼ်ႁူမ်ႈသၢင်ႈလွင်ႈၶိုၼ်ႈယႂ်မႃးလႆႈလႄႈ လွင်ႈၸမ်ၸႂ်ၼိူဝ်ၵၢၼ်သၢင်ႈဝၢၼ်ႈမိူင်းမိူၼ်တိူဝ်းႁၢင်ႇၵႆၵႂႃႇလွႆးလွႆးယဝ်ႉ။

ၵူၼ်းမိူင်းၵေႃႈၵုမ်ႇလႆႈႁူဝ်ပၼ်ႇၸွမ်း ၸုမ်းၵၢၼ်မိူင်းဢၼ်ယုင်ႈယၢင်ႈၸႂ်သဵင်ႈလႄႈ ၽႂ်ၵေႃႈၶႂ်ႈဢွၵ်ႇလွတ်ႈၵႂႃႇယူႇတီႈၵတ်းယဵၼ် ၵမ်းလိုၼ်းထိုင်တီႈဢမ်ႇၶႂ်ႈႁူႉငိၼ်း လွင်ႈၵၢၼ်တႆးမႃးလွႆးလွႆးယဝ်ႉ မၢင်ၸိူဝ်းပဵၼ်တႆးသေ ၶဝ်ႈၵႄႈၵၢင်ၸၢဝ်းၶိူဝ်းၵေႃႈ ၼႃႈလဵၵ်ႉတႄႉတႄႉ တႆႈၶိူဝ်းသိူဝ်ယူႇလႂ် တႆးၶိူဝ်းယႂ်ႇႁၢႆလႂ် မၢင်ၸိူဝ်းသူပ်းလၢတ်ႈဝႃႈႁၵ်ႉၸိူဝ်ႉႁၵ်ႉၶိူဝ်း လၢႆးႁဵတ်းသမ်ႉပဵၼ်ႁၢၵ်းၶိူဝ်းယူႇၼၼ်ႉယဝ်ႉ။

ၵမ်းလိုၼ်းၽွၼ်းႁၢႆႉမၼ်းၵေႃႈ ၸိူဝ်းၸႃႉဝၢၼ်ႈလဵဝ်ပွၵ်ႉလဵဝ်ဢွၼ်ႇၵူၺ်းၵေႃႈ လႆႈတႅၵ်ႇယၢႆႈ ပဵၼ်ၽႂ်ပဵၼ်မၼ်းၵႂႃႇထႅင်ႈတၢင်းၼိုင်ႈ သင်ၵၢၼ်ႁႃၵိၼ်လဵင်ႉတွင်ႉဢမ်ႇၵုမ်ႇထူၼ်ႈပေႃးၼႆၸိုင် ၼႂ်းပွၵ်ႉဢိူင်ႇဝၢၼ်ႈႁဝ်းၵေႃႈ တေလႅၵ်ႈလၢႆႈပဵၼ်မႃးလွင်ႈဢၼ်ႁဝ်းဢမ်ႇၶႂ်ႈႁူႉၶႂ်ႈႁၼ်ၶႂ်ႈငိၼ်းၸိူဝ်းၼၼ်ႉယဝ်ႉ။

 ႁဝ်းသမ်ႉလႆႈထူပ်းသင်ယူႇဝၼ်းဝၼ်းၶိုၼ်းၶိုၼ်းၼႆ ဢမ်ႇထုၵ်ႇလီလူင်လိုမ်း ၸူမ်ယူႇၸွမ်း လွင်ႈပိူၼ်ႈသူၼ်း ၶူၼ်းၶဝ်းႁႂ်ႈၼိုၵ်းထိုင်ႉပၼ်ပိူၼ်ႈၸူၵ်းထွင်းၸဝ်ႈၵဝ်ႇယဝ်ႉ ၵမ်ႉလိုၼ်းဢမ်ႇမီးသင်ယဝ်ႉ ပိူၼ်ႈဢဝ်တိၼ်ထၢၵ်ႇပႅတ်ႈၼၼ်ႉပေႁႂ်ႈပဵၼ်သေၵမ်း ႁႂ်ႈမေႃပိုင်ႈပိူၼ်ႈတူၺ်းငဝ်းလၢႆးပိူၼ်ႈ သေပူၵ်းပွင်ၶိုၼ်းၼမ်ႉၵတ်ႉလႄႈ။

ၵၢၼ်သၢင်ႉတၢင်ႉႁႅင်း ၵၢၼ်ႁဵၼ်းႁူႉ ပၢႆးပိင်ႇၺႃႇဝၢၼ်ႈၼွၵ်ႈၸွၵ်ႉထိူၼ်ႈ ႁဝ်းဢမ်ႇပဵင်းပေႃးၼႆၵူႈၵေႃႉၵူႈႁူႉၵၼ်ယူႇ ဢမ်ႇၽွမ်ႉဢွၼ်ၵၼ်ၸွႆႈလႆႈႁႂ်ႈပေႃးပဵၼ်ၵွၼ်ႈ မီးၽူႈၵတ်ႉၶႅၼ်ႇဢွၵ်ႇမႃးလႆႈတေႉတေႉသေ တေႁဵတ်းႁိုဝ်ႁႂ်ႈၶိူဝ်းႁဝ်းၵတ်ႉၶႅၼ်ႇလႆႈလႃႇ။

 ၼႂ်းၼႃႈၵၢၼ်မုင်ႉႁၢင်းႁဝ်းသမ်ႉဝႃႈ လူဝ်ႇၵူၼ်းၵတ်ႉၵူၼ်းၶႅၼ်ႇ ၵူၼ်းလူင်ႉလႅၼ်ႇၼႆႉမၼ်းယၢပ်ႇယူႇ ၸိူဝ်းတီႈဢၼ်မီးဝႆႉမီးယူႇၸိူဝ်းၼၼ်ႉၵေႃႈ ဢမ်ႇမေႃလုမ်းလႃးၸွႆႈႁႂ်ႈၶဝ်တိူဝ်းၶႂၢၵ်ႈၼမ်ႉၵတ်ႉၶဝ်လႄႈ ၵၢၼ်ႁဵၼ်းၵိုတ်းၵေႃႈ ငၢႆးမိူၼ်သၢႆၸႂ်ၶဝ်ၵေႃႈၵိုတ်းၵႂႃႇၼၼ်ႉယဝ်ႉ။

တႃႇသိုပ်ႇယၢင်ႈၵႂႃႇထႅင်ႈတင်းၼႃႈ ၼၼ်ႉၶူၼ်ႉဝူၼ်ႉတူၺ်းဝႃႈ ႁဝ်းပဵၼ်သင်ယူႇဝၼ်းမိူဝ်ႈၼႆႉ ပိူၼ်ႈႁူမ်ႇငမ်းၼိူဝ်ႁဝ်းၵႂႃႇသင်လၢႆလၢႆၼႆပေလိုမ်းၶူၼ်ႉဝူၼ်ႉၶိုၼ်းသေၵမ်း။

မိူဝ်ႈလဵဝ်ၼႆႉ ၼႂ်းပွၵ်ႉၼႂ်ႈဝၢၼ်ႈ ဢမ်ႇႁူမ်ႈၵၼ် ဢမ်ႇမေႃၶဝ်ႈဢွၵ်ႇၵၼ် ဢမ်ႇမေႃလၢတ်ႈတေႃႇၵၼ် ဢမ်ႇမေႃၸွႆႈထႅမ်ၵၼ် ယူႇၽႂ်ယူႇမၼ်း မႃးလွႆးလွႆးယဝ်ႉ တီႈဝတ်ႉၵေႃႈ မၢင်ဝတ်ႉၼႆႉ ဢမ်ႇပဵၼ်တီႈၵမ်ႉထႅမ်သင်ၶိုၼ်းၼႂ်းဝၢၼ်ႈ မိုင်ႉၵၢၼ်လူႇၵၢၼ်တၢၼ်းႁႅင်းၽႅဝ်လႄႈ ၵၢၼ်သၢင်ႈဝတ်ႉသၢင်ႈၵျွင်းၶႄႉၵၼ် လူတ်ႉၵႃးလဝ်းၶိုၵ်ႉၶဵင်ႇၵၼ်

လိုမ်းဝူၼ်ႉႁၼ်ဝၼ်းမိူဝ်းၼႃႈတႃႇၵၢၼ်တၢင်းႁူႉပၢႆးပိင်ႇၺႃႇၼေႃႇတႅၼ်းၶိူဝ်း ၸိူဝ်းႁၢမ်းၶိုၼ်ႈႁူင်းႁဵၼ်း ပဵၼ်သၢင်ႇယူႇၼၼ်ႉ ၼႆႉဢမ်ႇၸိုဝ်ႈၸူဝ်ႈတၢင်းပဵၼ်ၼႆႉၵူၺ်း။

ၵူၼ်းမိူင်းႁဝ်းၶဝ်လူဝ်ႇႁႅင်းထၢတ်ႈၸႂ်ဢၼ်ၵႅၼ်ႇၶႅင် ဢၼ်ၶႂ်ႈႁဵတ်းသၢင်ႈဝႆႉယူႇဢိူဝ်ႈ ၽိူဝ်ႇတေတဵၵ်းတဵင် ၶၢၼ်းၵိၼ်ၶၢၼ်းလူႇ ယူႇၼၼ်ႉ ပၢႆးႁူၺ်းဢဝ် ႁႂ်ႈလႆႈပႃးတူဝ်ပႃးၸႂ်ၸိူဝ်းၶဝ်ၼင်ႇၵႃႈလႆႈၼၼ်ႉၵႂႃႇလႄႈ ၸိူဝ်းၸၢင်ႈၶိုင်ပွင်လႆႈၶဝ်ၼႆ ႁၼ်ထိုင်ၼင်ႇၼႆ။ 

#ပၼ်တၢင်းႁၼ်ထိုင်လႆႈယူႇ>>>

#သိုပ်ႇလူ >>>  ၵၢၼ်လုၵ်ႉၽိုၼ်ႉတႆး

#ShanBooks #Book #Read #Freedom #Peace #Shan

#RCSS #SSPP #SSA #SNLD #SNDP #CSSU #revolution